పది రోజుల్లో కూతురి వివాహం జరగాల్సి ఉంది. ఆహ్వాన పత్రాలు పంచి.. బంధువులను కూడా ఆహ్వానించారు. అంతలోనే షాకింగ్‌ ఘటన చోటుచేసుకుంది. ఆమె తల్లి తన కాబోయే భర్తతో పారిపోవడంతో ఆమెతో పాటు కుటుంబ సభ్యులందరినీ తీవ్ర దిగ్భ్రాంతికి గురిచేసింది. ఈ ఘటన ఉత్తర ప్రదేశ్‌లోని అలీఘర్‌లో జరిగింది. ఈ ఘటన సోషల్‌ మీడియాలో వైరల్‌గా మారింది.నాలుగు నెలల క్రితం ఓ మహిళ తన కూతురు వివాహం చేసేందుకు ఓ సంబంధం చూసింది. ఓ యువకుడితో తన కుమార్తెకు పెళ్లి చేయడానికి నిశ్చయించింది. ఈ నెల 16న పెళ్లి జరగాల్సి ఉండగా.. ఆమె తల్లి తనకు కాబోయే అల్లుడితో పారిపోవడం అందరినీ ఆశ్చర్యానికి గురి చేసింది. పారిపోయేటప్పుడు తన కుమార్తె వివాహం కోసం దాచిన రూ. 5 లక్షలు విలువ చేసే బంగారంతో పాటు 5.5 లక్షలకు పైగా నగదు కూడా తనతో తీసుకెళ్లింది.అయితే పెళ్లి కుదిరిన కొద్ది రోజుల తర్వాత అల్లుడు తన అత్తకు మొబైల్ ఫోన్‌ బహుమతిగా అందించాడు. తరుచూ ఆమెతో ఫోన్‌లో మాట్లాడే వాడు. పలుమార్లు అత్త ఇంటికి రావడంతో పాటు, గంటల తరబడి ఒకే గదిలో అత్తతో మాట్లాడేవాడు. ఈ క్రమంలో అల్లుడితో ప్రేమలో పడిన అత్త, పెళ్లికి మరో పది రోజులు ఉందనగా ఇంట్లోని డబ్బు, నగలు తీసుకొని, అతడితో పారిపోయింది. దీంతో బంధువులు పోలీసులకు ఫిర్యాదు చేశారు. ఘటనపై పోలీస్ అధికారి మహేష్ కుమార్ మాట్లాడుతూ.. మహిళ ఇంట్లో ఎవరికి చెప్పకుండా వెళ్లిపోయిందని తెలిసింది. దీంతో మిస్సింగ్ కేసు నమోదు చేసుకొని దర్యాప్తు చేపడుతున్నామని వెల్లడించారు.

యశవంతపుర: తండ్రి బైక్‌ ప్రమాదంలో చనిపోగా, పెళ్లిపీటలపై ఉన్న కూతురికి ఆ వార్త చెప్పకుండా పెళ్లిని పూర్తి చేశారు. ఈ ఘటన చిక్కమగళూరు జిల్లా తరీకెరెలో సోమవారం జరిగింది. ఏ తండ్రి అయినా తన కూతురు పెళ్లి ఆటంకాలు లేకుండా ఘనంగా జరగాలని కోరుకుంటాడు. అలాగే తండ్రి చేతుల మీదుగా వివాహం జరగాలని కూతురు ఆకాంక్షిస్తుంది. కానీ విధి నాటకంలో అంతా తారుమారైంది.పెళ్లి పత్రికలు పంచి వస్తుండగాతరీకెరెకి చెందిన చంద్రు కూతురు దీక్షిత అనే యువతికి పెళ్లి నిశ్చయమైంది. ఆదివారం సాయంత్రం చంద్రు మరో ఇద్దరితో కలిసి పెళ్లిపత్రికలను పంచడానికి బైక్‌లో వెళ్లాడు. తిరిగి వస్తుండగా గుర్తు తెలియని వాహనం బైకును ఢీకొనటంతో చంద్రు, జతలో వెళ్లిన ఇద్దరు అక్కడికక్కడే మరణించాడు. ఈ విషయం తెలిసి బంధువులు విషాదంలో మునిగిపోయినా తల్లీ, కూతురికి చెప్పలేదు. ఆ వార్త తెలిసినా, మృతదేహాన్ని ఇంటికి తీసుకువచ్చినా పెళ్లి నిలిచిపోయి మరింత విషాదం ఏర్పడుతుందని భావించారు. అందుకే చివరి నిమిషం వరకు చంద్రు పెళ్లి పనుల్లో ఉన్నాడని చెబుతూ సోమవారం మూడుముళ్ల వేడుకను పూర్తి చేయించారు. తండ్రి స్థానంలో మరో వ్యక్తిని ఉంచి కన్యాదానం చేశారు. అక్షింతలు, అతిథుల భోజనాల తరువాత చంద్రు భార్య, కూతురికి ఈ చేదు వార్త చెప్పగానే వారు బోరుమంటూ రోదించారు. అప్పటివరకు ఉన్న పెళ్లి కళ దూరమైంది. పెళ్లికి వచ్చిన బంధుమిత్రులే అంత్యక్రియల పనులు పూర్తిచేశారు.

కర్నూలు, సాక్షి: వైఎస్సార్‌సీపీ అధ్యక్షుడు, మాజీ ముఖ్యమంత్రి శ్రీ వైయస్‌ జగన్‌ బుధవారం కర్నూలులో పర్యటించారు. జీఆర్‌సీ కన్వెన్షన్‌ సెంటర్‌లో వైఎస్సార్‌సీపీ రాష్ట్ర కార్యదర్శి తెర్నెకల్‌ సురేంద్ర రెడ్డి కుమార్తె వివాహా రిసెప్షన్‌కు హాజరయ్యారు. నూతన వధూవరులు డాక్టర్‌ కె. చతుర, డాక్టర్‌ కె. నిఖిల్‌లకు వివాహా శుభాకాంక్షలు తెలిపి, ఆశీర్వదించారు. జగన్‌ రాకతో కర్నూలు కోలాహలంగా మారింది. ఆయన్ని ఫొటో తీసేందుకు, సెల్ఫీలు దిగేందుకు అభిమానులు ఎగబడ్డారు. వారందరికీ అభివాదం చేసి ముందుకు కదిలారాయన.

సాక్షి, కాకినాడ: జగ్గంపేట నియోజకవర్గంలో బుధవారం ముఖ్యమంత్రి వైఎస్‌ జగన్‌మోహన్‌రెడ్డి పర్యటించారు. వైఎస్సార్‌సీపీ ఎమ్మెల్యే జ్యోతుల చంటిబాబు కుమార్తె వివాహ వేడుకలో పాల్గొన్నారు.  ఇర్రిపాకలోని ఎమ్మెల్యే జ్యోతుల చంటిబాబు నివాసానికి వెళ్లిన సీఎం జగన్‌..  నూతన వధూవరులు అన్నపూర్ణ, సాయి ఆదర్శ్ లను ఆశీర్వదించారు. అంతకు ముందు ఇర్రిపాకలో ఏర్పాటు చేసిన హెలిప్యాడ్‌ వద్ద మంత్రులు,ఎమ్మెల్యేలు సీఎం జగన్‌కు సాదర స్వాగతం పలికారు.

సాక్షి, విజయవాడ: ప్రిన్సిపల్‌ చీఫ్‌ కన్జర్వేటర్‌ ఆఫ్‌ ఫారెస్ట్స్‌ (పీసీసీఎఫ్‌) వై.మధుసూదన్‌రెడ్డి కుమార్తె వివాహ రిసెప్షన్‌కు ముఖ్యమంత్రి వైఎస్‌ జగన్‌మోహన్‌రెడ్డి బుధవారం హాజరయ్యారు. నూతన దంపతులు తేజశ్రీ, అర్జున్‌లను సీఎం ఆశీర్వదించారు. ఈ కార్యక్రమంలో ఎంపీ నందిగం సురేష్, మాజీ మంత్రి వెల్లంపల్లి శ్రీనివాస్‌, ఎమ్మెల్యేలు శిల్పా చక్రపాణి రెడ్డి, మల్లాది విష్ణు, మేయర్ భాగ్యలక్ష్మి, ఎమ్మెల్సీలు తలశిల రఘురాం, రుహుల్లా తదితరులు పాల్గొన్నారు. కాగా, తూర్పుగోదావరి జిల్లా నిడదవోలులో సీఎం జగన్‌ బుధవారం పర్యటించారు. ఎమ్మెల్యే జి. శ్రీనివాస్ నాయుడు కుమార్తె రిసెప్షన్ వేడుకల్లో పాల్గొన్నారు. నూతన వధూవరులను సీఎం ఆశీర్వదించారు. చదవండి: నిడదవోలు: నూతన దంపతులను ఆశీర్వదించిన సీఎం జగన్‌

సాక్షి, గుంటూరు: మాజీ మంత్రి వెల్లంపల్లి శ్రీనివాస్‌ కుమార్తె వివాహానికి ముఖ్యమంత్రి వైఎస్‌ జగన్‌మోహన్‌రెడ్డి హాజరయ్యారు. బుధవారం మంగళగిరి సీకే కన్వెన్షన్‌లో జరిగిన ఈ వివాహ వేడకకు సీఎం ముఖ్య అతిథిగా విచ్చేశారు. నూతన వధూవరులు సాయి అశ్విత, మంచుకొండ చక్రవర్తిలను సీఎం జగన్‌ ఆశీర్వదించారు. ఈ సందర్భంగా సీఎం జగన్‌ వెంట మంత్రులు బొత్స సత్యనారాయణ, తానేటి వనిత, టీటీడీ చైర్మన్ వైవీ సుబ్బారెడ్డి, ఎమ్మెల్యేలు చెవిరెడ్డి భాస్కర్ రెడ్డి, ఎమ్మెల్సీలు లేళ్ల అప్పిరెడ్డి, తలశిల రఘురాం, రాహుల్లా, డొక్కా మాణిక్య వరప్రసాద్, ఎమ్మెల్యే అన్నా రాంబాబు ఉన్నారు. చదవండి: (నూతన వధూవరులను ఆశీర్వదించిన సీఎం జగన్‌)

సాక్షి, హైదరాబాద్‌: సాక్షిప్రతినిధి, కరీంనగర్‌:  రాష్ట్ర ముఖ్యమంత్రి కల్వకుంట్ల చంద్రశేఖర్‌రావు గురువారం కరీంనగర్‌ జిల్లాలో పర్యటించారు. నగర మాజీ మేయర్‌ సర్దార్‌ రవీందర్‌సింగ్‌ కుమార్తె పూజా కౌర్‌ వివాహానికి హాజరయ్యారు. ఎర్రవెల్లి ఫాంహౌస్‌ నుంచి హెలికాప్టర్‌లో మానేరు డ్యాం వద్ద ఉన్న స్పోర్ట్స్‌ స్కూల్‌ మైదానానికి మధ్యాహ్నం 12.50 సమయంలో చేరుకున్నారు. రాష్ట్ర మంత్రులు గంగుల కమలాకర్, కొప్పుల ఈశ్వర్, ప్రణాళికా సంఘం ఉపాధ్యక్షుడు బోయినపల్లి వినోద్‌కుమార్, ఎమ్మెల్సీ కౌశిక్‌రెడ్డి, కలెక్టర్‌ ఆర్‌వీ కర్ణన్‌ తదితరులు ఆయనకు స్వాగతం పలికారు. హెలిప్యాడ్‌ నుంచి ప్రత్యేక బస్సులో బయలుదేరి బైపాస్‌ రోడ్డులోని వి–కన్వెన్షన్‌ ఫంక్షన్‌ హాల్‌లో జరిగిన వివాహ వేడుకల్లో పాల్గొన్నారు. గంటన్నరపాటు అక్కడే గడిపిన సీఎం.. భోజనానంతరం క్రిస్టియన్‌ కాలనీలోని మంత్రి గంగుల నివాసానికి చేరుకున్నారు. తేనీటి విందు తర్వాత సీఎంకు గంగుల వెంకటేశ్వర స్వామి ప్రతిమను బహూకరించారు. కలెక్టర్‌ హుజూరాబాద్‌లో అమలవుతున్న దళిత బంధు ప్రాజెక్టు తీరు తెన్నులపై రూపొందించిన బుక్‌లెట్‌ను సీఎంకు అందజేశారు. ప్రత్యేక బస్సులో హెలిప్యాడ్‌కు చేరుకున్న సీఎం 3.45 నిమిషాలకు హైదరాబాద్‌కు తిరుగు పయనమయ్యారు. వివాహ వేడుకకు వెళ్లిన కేసీఆర్‌..రవీందర్‌సింగ్‌కు ఓ గిఫ్ట్‌ ఇచ్చారు. అతడిని రాష్ట్ర పౌరసరఫరాలశాఖ కార్పొరేషన్‌ ఛైర్మన్‌గా నియమించారు. ఈమేరకు ఉత్తర్వులు జారీ చేశారు. రాష్ట్ర పౌర సరఫరాల శాఖ కార్పొరేషన్ చైర్మన్ గా సర్దార్ రవీందర్ సింగ్ గారిని నియమిస్తూ ఉత్తర్వులు జారీ చేసిన తెలంగాణ ప్రభుత్వం. pic.twitter.com/HoxC0UWxXS — TRS Party (@trspartyonline) December 8, 2022 చదవండి: (బీఆర్‌ఎస్‌గా మారిన టీఆర్‌ఎస్‌.. కేసీఆర్‌కు లేఖ పంపిన ఈసీ)

సాక్షి, నెల్లూరు: సూళ్లూరుపేట ఎమ్మెల్యే కిలివేటి సంజీవయ్య కుమార్తె వివాహానికి ముఖ్యమంత్రి వైఎస్‌ జగన్‌మోహన్‌రెడ్డి హాజరయ్యారు. నెల్లూరు నగరంలోని వీపీఆర్‌ కన్వెన్షన్‌ సెంటర్‌కు చేరుకుని నవదంపతులు శ్రావణ్, సౌజన్యలను సీఎం జగన్‌ ఆశీర్వదించారు. వివాహ వేడుకకు మంత్రులు పెద్దిరెడ్డి రామచంద్రా రెడ్డి, కాకాణి గోవర్ధన్ రెడ్డి, అంబటి రాంబాబు, ఎంపీ వేమిరెడ్డి ప్రభాకర్‌రెడ్డి దంపతులు హాజరయ్యారు. అంతకుముందు కనుపర్తిపాడులో హెలిప్యాడ్‌కు చేరుకున్న సీఎం జగన్‌కు మంత్రి కాకాణి గోవర్ధన్‌రెడ్డి, ఎంపీ వేమిరెడ్డి ప్రభాకర్‌ రెడ్డి, ఎమ్మెల్యేలు, ఎమ్మెల్సీలు, అధికారులు ఘనస్వాగతం పలికారు. చదవండి: (వైఎస్సార్‌సీపీ నేత హత్యపై సీఎం జగన్‌ ఆరా.. ధర్మానకు కీలక ఆదేశాలు) 

సాక్షి, అమరావతి, గుంటూరు వెస్ట్‌: సీఎం వైఎస్‌ జగన్‌మోహన్‌రెడ్డి.. ప్రభుత్వ ఎలక్ట్రానిక్‌ మీడియా సలహాదారు, సినీ నటుడు అలీ కుమార్తె వివాహ రిసెప్షన్‌కు హాజరయ్యారు. మంగళవారం సాయంత్రం గుంటూరు ఇన్నర్‌ రింగ్‌రోడ్‌లోని శ్రీకన్వెన్షన్‌లో జరిగిన రిసెప్షన్‌కు సీఎం జగన్‌ హాజరై నూతన వధూవరులను ఆశీర్వదించారు. (ఫొటో గ్యాలరీ కోసం ఇక్కడ క్లిక్ చేయండి)

సాక్షి, అమరావతి/గుంటూరు వెస్ట్‌: సీఎం వైఎస్‌ జగన్‌  మంగళవారం గుంటూరు పర్యటనకు వెళ్లనున్నారు. ప్రభుత్వ ఎలక్ట్రానిక్‌ మీడియా సలహాదారు, సినీ నటుడు అలీ కుమార్తె వివాహ రిసెప్షన్‌కు హాజరవుతారు. సాయంత్రం తాడేపల్లి నివాసం నుంచి బయలుదేరి 4.55 గంటలకు గుంటూరు ఇన్నర్‌ రింగ్‌ రోడ్‌లోని శ్రీ కన్వెన్షన్‌కు చేరుకుంటారు. నూతన వధూవరులను ఆశీర్వదిస్తారు. అనంతరం తాడేపల్లికి చేరుకుంటారు. చదవండి: (సీఎం జగన్‌ ప్రతిపాదనలపై కేంద్ర ప్రభుత్వం సానుకూలం)

సాక్షి, హైదరాబాద్‌: ఆంధ్రప్రదేశ్‌ ఎలక్ట్రానిక్ మీడియా సలహాదారు, టాలీవుడ్‌ ప్రముఖ నటుడు అలీ తెలంగాణ గవర్నర్‌ తమిళిసై సౌందరరాజన్‌ని కలిశారు. అలీ దంపతుల పెద్ద కుమార్తె ఫాతిమా త్వరలో పెళ్లిపీటలెక్కనున్న విషయం తెలిసిందే. ఈ నేపథ్యంలో తమ కుమార్తె వివాహానికి హాజరు కావాల్సిందిగా బుధవారం గవర్నర్‌ తమిళిసైని కలిసి మర్యాదపూర్వకంగా ఆహ్వానించారు. పెళ్లి పత్రికను స్వీకరించిన తమిళిసై తప్పకుండా వివాహానికి హాజరు అవుతానని అలీకి మాటిచ్చారు.  చదవండి: (కమెడియన్‌ అలీకి కాబోయే అల్లుడు ఎవరో తెలుసా?)

సాక్షి, ఖమ్మం: మాజీ ఎంపీ పొంగులేటి శ్రీనివాసరెడ్డి కుమార్తె స్వప్ని రెడ్డి వివాహ రిసెప్షన్‌ విందు ఖమ్మంలో అంగరంగ వైభవంగా జరిగింది. పొంగులేటి కుమార్తె స్వప్నిరెడ్డి, మాజీ ఎంపీ సురేందర్‌ రెడ్డి మనవడు అర్జున్‌రెడ్డిల వివాహం ఈ నెల 12న ఇండోనేషియాలోని బాలీ ద్వీపంలో జరిగింది. అనంతరం ఖమ్మంలో రాజస్థాన్‌ ప్యాలెస్‌ను తలపించే భారీ సెట్టింగ్‌లో రిసెప్షన్‌ను ఏర్పాటు చేశారు. ఈ రిసెప్షన్‌కు వైఎస్సార్‌ తెలంగాణ పార్టీ అధ్యక్షురాలు వైఎస్‌ షర్మిల హాజరై వధూవరులను ఆశీర్వదించారు. అలాగే తెలుగు రాష్ట్రాల్లోని అనేక మంది రాజకీయ నేతలు, వ్యాపారవేత్తలు, ఇతర ప్రముఖలు హాజరై నూతన వధూవరులను ఆశీర్వదించారు.  చదవండి: (Nandamuri Balakrishna: చంద్రబాబుకు ఝలక్‌ ఇచ్చిన బాలయ్య)

సాక్షి, ముంబై: కరోనా మహమ్మారి భయాల నేపథ్యంలో రాష్ట్ర గృహనిర్మాణ శాఖ మంత్రి జితేంద్ర అవ్హాడ్‌ తన కూతురి వివాహాన్ని సాదాసీదాగా జరిపించి ఆదర్శంగా నిలిచారు. మంగళవారం ఆయన తన కూతురు నతాషా అవ్హాడ్‌కు రిజిస్టర్‌ వివాహం జరిపించారు. ఎలాంటి హంగు, ఆర్భాటం లేకుండా జరిగిన ఈ పెళ్లికి కేవలం ఆయన కుటుంబ సభ్యులు, కొందరు ప్రముఖులు మాత్రమే హాజరయ్యారు. మంత్రి హోదాలో ఉండి కూడా తన ఏకైక కూతురి వివాహాన్ని నిరాడంబరంగా జరిపించిన మంత్రి జితేంద్ర అవ్హాడ్‌ను ఈ సందర్భంగా పలువురు అభినందించారు.  చదవండి: (కనీస మద్దతు ధరపై జేపీసీ ఏర్పాటు చేయాలి: ఎంపీ విజయసాయిరెడ్డి)

వాషింగ్టన్‌: ప్రస్తుత కాలంలో సామాన్యుల ఇళ్లల్లో జరిగే పెళ్లి వేడుకలే అంగరంగ వైభవంగా జరుగుతున్నాయి. మరి అలాంటిది ప్రపంచ కుబేరుడు బిల్‌గేట్స్‌ ఇంట పెళ్లి అంటే.. మాటలు కాదు. అతిరథ మహరథులు అతిథులుగా హాజరయ్యే ఈ వేడుకకు ఖర్చు మాములుగా ఉండదు. మన ఆసియా కుబేరుడు ముకేష్‌ అంబానీ ఆయన కుమార్తె ఇషా అంబానీ వివాహ వేడుకకు సుమారు 200 కోట్ల రూపాయలు ఖర్చు పెట్టినట్లు సమాచారం. మరి ప్రపంచ కుబేరుడు బిల్‌ గేట్స్‌ కుమార్తె వివాహం అంటే ఖర్చు గురించి ప్రత్యేకంగా చెప్పక్కర్లేదు అనుకుంటున్నారా.. అయితే అక్కడే మీరు పప్పులో కాలేసినట్లు. బిల్‌గేట్స్‌ కుమార్తె వివాహ వేడుకకు కేవలం 2 మిలియన్‌ డాలర్లు అనగా 14 కోట్ల రూపాయలు మాత్రమే ఖర్చయ్యాయట. ఇంత తక్కువ ఎందుకంటే.. కరోనా.  (చదవండి: ప్రియుడితో బిల్‌గేట్స్‌ తనయ జెన్నీఫర్‌ పెళ్లి!) కొన్ని  రోజుల క్రితం బిల్‌ గేట్స్‌ కుమార్తె జెన్నీఫర్‌ కేథరిన్‌ గేట్స్‌ వివాహం జరిగినట్లు ప్రకటించిన సంగతి తెలిసిందే. తన స్నేహితుడు, ప్రియుడు, హార్స్‌ రైడర్‌ అయిన నాయెల్‌ నాజర్‌తో జెన్నిఫర్‌ పెళ్లి జరిగినట్లు అమెరికాకు చెందిన ‘పీపుల్‌’ మ్యాగజైన్‌ ధృవీకరించింది. పెళ్లి అనంతరం జెన్నీఫర్‌ గేట్స్‌  తన వివాహ వేడుక గురించి వోగ్‌ మ్యాగ్‌జైన్‌కి ఇంటర్వ్యూ ఇచ్చింది. ఆ వివరాలు ఆమె మాటల్లోనే.. ‘‘2021 నాకు చాలా సవాళ్లు విసిరిన సంవత్సరం. ఓ వైపు కరోనా మహమ్మారి ప్రపంచాన్ని పట్టి పీడిస్తోంది. బయటకు వెళ్లడానికి అవకాశం లేకుండా అయిపోయింది. దానికి మించిన సంఘటన మా ఇంట్లోనే చోటు చేసుకుంది. దురదృష్టం కొద్ది ఈ ఏడాదే మా తల్లిదండ్రులు విడాకులు తీసుకున్నారు. ఇలాంటి పరిస్థితులు మధ్య పెళ్లి వేడుకను ప్లాన్‌ చేయడం చాలా సవాలుతో కూడుకున్న పని అయ్యింది’’ అని తెలిపింది జెన్నీఫర్‌.  (చదవండి: ఈ పెళ్లి చరిత్రలో నిలిచిపోతుంది.. ఎందుకంటే!) ‘‘ఇక పెళ్లికి ఇరు కుటుంబాల సన్నిహితులను మాత్రమే పిలవాలని భావించాం. అలా చూసుకున్న 300 మంది లిస్ట్‌ తయారయ్యింది. ఇక వారందరిని టీకా సర్టిఫికేట్‌ తప్పనిసరి చేశాం. నెగిటివ్‌ రిపోర్ట్‌ తీసుకురావాల్సిందిగా సూచించాం. పెళ్లి సందర్భంగా వారాంతంలో రెండు వివాహ వేడుకలు నిర్వహించాం. ఒకటి సివిల్‌ మరొకటి మతపరమైనది’’ అని తెలిపింది. ‘‘శనివారం మధ్యాహ్నం న్యూయార్క్‌లోని ఉత్తర సేలంలోని కుటుంబానికి చెందిన 142 ఎకరాల ఎస్టేట్‌లో బహిరంగ వివాహ వేడుక జరిగింది. ప్రఖ్యాత న్యూయార్క్ సిటీ రెస్టారెంట్లు క్యాటరింగ్‌ చేశాయి. కస్టమ్ వెరా వాంగ్ డిజైన్‌ చేసిన వెడ్డింగ్‌ గౌను ధరించాను. ఈవెంట్ ప్లానర్ మార్సీ బ్లమ్ వారాంతంలో ఈ వేడుక జరిపించారు’’ అన్నది.  జెన్నీఫర్‌ భర్త నాయల్‌ నాజర్‌ ఈక్వెస్ట్రియన్‌(గుర్రపు స్వారీ)లో పాల్గొన్నాడు. ఈజిప్టు సంతతికి చెందిన నాజర్‌ది సంపన్న కుటుంబమే. వీరిద్దరూ చాలా కాలం క్రితం నుంచే డేటింగ్‌లో ఉన్నారట. స్టాన్‌ఫర్డ్‌ యూనివర్సిటీలో వీరిద్దరి కలిసి చదువుకుంటున్నపటి నుంచే ప్రేమలో ఉన్నారు. వీరి ప్రేమకు బిల్‌గేట్స్‌ గ్రీన్‌ సిగ్నల్‌ ఇచ్చారట. గేట్స్‌ దంపతులు విడిపోవడంతో.. కుమార్తె వివాహానికి సంబంధించి అన్ని ఏర్పాట్లను తల్లి మిలిందా దగ్గరుండి చూసుకున్నారు. బిల్‌గేట్స్‌.. కుమార్తె జెన్నీఫర్‌ వివాహ వేడుకకు ఒకరోజు ముందుగా హాజరయ్యారు.  చదవండి: గోల చేయని భార్య! ప్చ్‌.. నాలుగు రోజులకే విడాకులు

సాక్షి, ఎల్‌.ఎన్‌.పేట: పాతపట్నం ఎమ్మెల్యే రెడ్డి శాంతి కుమార్తె, ఐఏఎస్‌ అధికారి రెడ్డి వేదిత వివాహ రిసెప్షన్‌ నవంబర్‌ 9న పాతపట్నంలో జరగనుంది. ఈ వేడుకకు రావాలని కోరుతూ.. ఎమ్మెల్యే రెడ్డి శాంతి మంగళవారం ముఖ్యమంత్రి వైఎస్‌ జగన్‌మోహన్‌రెడ్డిని కలసి ఆహ్వానపత్రికను అందజేశారు. సీఎంను కలిసిన వారిలో ఎమ్మెల్యేతో పాటు ఆమె కుమారుడు రెడ్డి శ్రావణ్‌కుమార్‌ ఉన్నారు.   చదవండి: (రాష్ట్రాభివృద్ధిలో అందరికీ భాగస్వామ్యం) చదవండి: (Andhra Pradesh: చిట్టి చెల్లెమ్మకు 'స్వేచ్ఛ')

సాక్షి, హైదరాబాద్‌: తెలంగాణ కాంగ్రెస్‌ సీనియర్‌ నేత, భువనగిరి ఎంపీ కోమటిరెడ్డి వెంకటరెడ్డి కుమార్తె శ్రీనిధి- ప్రణవ్‌ల వివాహం బుధవారం ఘనంగా జరిగింది. కోవిడ్‌ కారణంగా ఈ వేడుకలో ఇరుకుటుంబాల దగ్గరి బంధువులు మాత్రమే పాల్గొన్నారు. కర్నూలుకు చెందిన శిల్పా మోహన్‌రెడ్డి సోదరుడు శిల్పా ప్రతాప్‌ రెడ్డి కుమారుడైన ప్రణవ్‌ రెడ్డి వరుడు. రాజస్థాన్‌లో ఉదయ్‌పూర్‌లోని లీలాప్యాలెస్‌ వేదికగా కల్యాణం జరుగుతోంది. (ఫొటో గ్యాలరీ కోసం ఇక్కడ క్లిక్ చేయండి)

హీరో వెంకటేశ్‌ ఇంట్లో పెళ్లి సందడి మొదలైంది. ఆయన పెద్ద కుమార్తె అశ్రిత వివాహం  హైదరాబాద్‌ రేస్‌ క్లబ్‌ చైర్మన్‌ సురేంద్ర రెడ్డి మనవడు వినాయక్‌ రెడ్డితో నేడు జరగనుంది. కుటుంబ సభ్యులు, అతి కొద్ది మంది సన్నిహితుల సమక్షంలో రాజస్తాన్‌లో జరగనున్న ఈ డెస్టినేషన్‌ వెడ్డింగ్‌లో భాగంగా జరిగిన వేడుకలో రానా, నాగచైతన్య, సమంత, బాలీవుడ్‌ నటుడు సల్మాన్‌ ఖాన్‌ మరికొందరు పాల్గొన్నారు. శనివారం జరిగిన సంగీత్‌ కార్యక్రమంలో రానా, నాగచైతన్య డ్యాన్స్‌ పర్ఫార్మెన్స్‌లు హైలైట్‌గా నిలిచాయని సమాచారం. నాగచైతన్య, సమంత వివాహ వేడుకల్లో అతిథులతో వెంకటేశ్‌

న్యూఢిల్లీ: సీబీఐ తాత్కాలిక చీఫ్‌గా ఎం.నాగే శ్వరరావు నియామకాన్ని సవాల్‌ చేస్తూ దాఖలైన పిటిషన్‌ విచారణ నుంచి మరో న్యాయమూర్తి తప్పుకున్నారు. సీబీఐ తాత్కాలిక చీఫ్‌ నాగేశ్వరరావు తమ రాష్ట్రం వాడేననీ, ఆయన కుమార్తె వివాహానికి కూడా వెళ్లానని అందుకే ఈ ధర్మాసనం నుంచి వైదొలుగుతున్నట్లు జస్టిస్‌ ఎన్‌వీ రమణ వివరించారు. ప్రధాన న్యాయమూర్తి(సీజేఐ) జస్టిస్‌ రంజన్‌ గొగోయ్, సీనియర్‌ న్యాయమూర్తి జస్టిస్‌ ఏకే సిక్రీ తర్వాత ఈ పిటిషన్‌ విచారణ నుంచి తప్పుకున్న మూడో జడ్జి జస్టిస్‌ ఎన్‌వీ రమణ. ఆయన వైదొలగడంతో సీనియర్‌ జడ్జి జస్టిస్‌ అరుణ్‌ మిశ్రా నేతృత్వంలోని మరో ధర్మాసనం ఈ కేసును శుక్రవారం నుంచి విచారిస్తుందని సీజేఐ ప్రకటించారు. జనవరి 10న ప్రధాని నేతృత్వంలో అత్యున్నత స్థాయి కమిటీ ఐపీఎస్‌ అధికారి ఆలోక్‌వర్మను సీబీఐ చీఫ్‌ హోదా నుంచి తొలగించిన అనంతరం ఎం.నాగేశ్వరరావును తాత్కాలిక చీఫ్‌గా నియమించిన విషయం తెలిసిందే. అయితే, ఈ నియామకం సరిగా జరగలేదంటూ కామన్‌కాజ్‌ అనే స్వచ్ఛంద సంస్ధ సుప్రీం కోర్టులో పిటిషన్‌ వేసింది. గురువారం జస్టిస్‌ ఎన్‌వీ రమణ, జస్టిస్‌ శంతన గౌడర్, జస్టిస్‌ ఇందిరా బెనర్జీల ధర్మాసనం ఈ పిటిషన్‌ను విచారించింది. ఈ సందర్భంగా జస్టిస్‌ ఎన్‌వీ రమణ.. ‘సీబీఐ తాత్కాలిక చీఫ్‌ ఎం.నాగేశ్వర రావు, నేనూ ఒకే రాష్ట్రం వాళ్లం. ఆయనతో నాకు పరిచయం ఉంది. న్యాయవాదిగా పనిచేస్తున్న ఆయన అల్లుడు కూడా నాకు తెలుసు. అందుకే ఈ కేసు విచారణ నుంచి తప్పుకుంటున్నా’ అని ప్రకటించారు. కాగా, సీబీఐ చీఫ్‌ ఎంపిక విషయమై చర్చించేందుకు శుక్రవారం మరోసారి సమావేశం కానున్నట్లు ప్రధాని నేతృత్వంలోని అత్యున్నత ఎంపిక కమిటీ సభ్యుడు, లోక్‌సభలో ప్రతిపక్ష నేత మల్లికార్జున ఖర్గే తెలిపారు.

ప్రముఖ వ్యాపారవేత్త ముఖేష్‌ అంబానీ కూతురి పెళ్లి సంబరాలు ఇటీవల జరిగిన విషయాన్ని వినే ఉంటారు. ఇండియన్‌ సెలబ్రిటీలను మాత్రమే కాకుండా ఇంటర్నేషనల్‌ సెలబ్రిటీలను కూడా ఆహ్వానించారు అంబానీ. కేవలం వెడ్డింగ్‌ పార్టీల కోసమే సుమారు వంద మిలియన్‌ డాలర్లను కార్లో పెట్రోల్‌లా ఖర్చు పెట్టారట ఆయన. ఈ ఫంక్షన్‌లో హాలీవుడ్‌ సింగర్‌ బియాన్స్‌ కనిపించడం విశేషం. ఎందుకంటే బియాన్స్‌ ఒక్క ప్రైవేట్‌ పార్టీకి సుమారు 3–4 మిలియన్‌ డాలర్స్‌ (దాదాపు 20 కోట్ల రూపాయలు) అందుకుంటారట. 2017లో మ్యూజిక్‌ ఇండస్ట్రీలో అత్యధికంగా సంపాదించిన సింగర్‌గా బియాన్స్‌ రికార్డ్‌ సొంతం చేసుకున్నారు. ఇంతకీ ఆమె అంబానీ పార్టీ కోసం ఎంత తీసుకున్నారంటే.. సుమారు 28 కోట్లు పుచ్చుకున్నారని టాక్‌.


  గాలి కూతురి పెళ్లి కోసం 20% కమీషన్‌పై డబ్బు మార్పు
 ► కర్ణాటక అధికారి భీమానాయక్ డ్రైవర్ సూసైడ్ నోట్‌లో వెల్లడి
 ► లేఖలో ప్రభుత్వాధికారి భీమా నాయక్ అక్రమాస్తుల వివరాలు
  
  బెంగళూరు: పారిశ్రామికవేత్త గాలి జనార్దన రెడ్డి.. కూతురి పెళ్లి కోసం రూ.100 కోట్ల నల్లధనాన్ని చెలామణిలోకి తెచ్చారని.. మంగళవారం ఆత్మహత్య చేసుకున్న ఓ ప్రభుత్వాధికారి డ్రైవర్ సూసైడ్ నోట్‌లో పేర్కొన్నారు. బెంగళూరలో ప్రత్యేక భూ సేకరణ అధికారిగా పనిచేస్తున్న భీమా నాయక్.. డ్రైవర్ కేసీ రమేశ్ గౌడ.. మాండ్యలోని ఓ లాడ్జీలో ఆత్మహత్య చేసుకున్న విషయం తెలిసిందే. అయితే ఈ గదినుంచి పోలీసులు స్వాధీనం చేసుకున్న ఆత్మహత్య లేఖలో గాలి కూతురి పెళ్లికి నల్లధనం ఎలా చెలామణిలోకి వచ్చిందీ, భీమానాయక్ అక్రమాలు, అక్రమాస్తుల వివరాలున్నాయి. ఈ వివరాలన్నీ తనకు తెలియటంతోనే చంపేందుకు ప్రయత్నిస్తున్నారని రమేశ్ తన సూసైడ్ నోట్‌లో పేర్కొన్నారు.
  
  కాగా, ఈ లేఖను స్వాధీనం చేసుకున్న పోలీసులు దర్యాప్తు చేస్తున్నారు. ‘అక్టోబర్ 28న భీమానాయక్, మరో వ్యక్తితో కలిసి.. ఓ గెస్ట్ హౌజ్‌లో బీజేపీ ఎంపీ శ్రీరాములు, గాలి జనార్దన రెడ్డిలను కలిశారు. 2018 అసెంబ్లీ ఎన్నికల్లో హగరిబొమ్మనహల్లి నియోజకవర్గం నుంచి పోటీ చేయాలనుకుంటున్నట్లు పేర్కొన్న ఆ వ్యక్తి.. అందుకోసం రూ.25 కోట్లు ఇచ్చేందుకు ఒప్పందం కుదుర్చుకున్నారు’ అని లేఖలో రమేశ్ పేర్కొన్నారు. గాలి కూతురి పెళ్లికి రూ.25 కోట్ల వైట్ మనీని ఎలా తెచ్చిందీ నవంబర్ 15న ఓ హోటల్లో తనముందే చెప్పారన్నారు. అవి కాకుండా.. రూ.100 కోట్లను 20 శాతం కమీషన్‌కు మార్చుకున్న తీరును రమేశ్ తన లేఖలో వివరించారు. అలాగే, శ్రీరాములు ఇంటికీ నాయక్ వెళ్లిన సందర్భాలు.. ఆయా సమయాల్లో వాడిన వాహనాల రిజిస్ట్రేషన్ నంబర్లనూ రమేశ్ లేఖలో పేర్కొన్నారు.ఇవన్నీ తనకు తెలియటంతో చంపించేస్తామని బెదిరించారన్నారు.
  
   భీమ్ నాయక్ అక్రమ సంపాదన, అక్రమాస్తుల వివరాలనూ రమేశ్ తన సూసైడ్ లేఖలో పేర్కొన్నారు. నాయక్, ఆయన వ్యక్తిగత డ్రైవర్ మొహమ్మద్‌లే తన ఆత్మహత్యకు కారణమన్నారు. తనకు జీతం రాకుండా మూడు నెలలు అడ్డుకున్నారన్నారు. నోట్లరద్దు నేపథ్యంలో అంగరంగ వైభవంగా తన కూతురు వివాహాన్ని చేసిన గాలిపై ఐటీ విచారణ జరుగుతున్న విషయం తెలిసిందే. కాగా, ఈ ఆరోపణలు అవాస్తవమని.. తమ పరువు తీసేందుకు ఆడుతున్న కుట్రలో భాగమని ఎంపీ శ్రీరాములు ఢిల్లీలో తెలిపారు. కాగా.. ఈ కేసులో నిష్పాక్షిక విచారణ జరపాలని కాంగ్రెస్ నాయకుడు గులాం నబీ ఆజాద్ డిమాండ్ చేశారు.
  


 మల్కాజిగిరి: ఆయన భాద్యతలు స్వీకరించినపుడు ఎందరికో డబ్బులు వారి ఖాతాల నుంచి సకాలంలో అందజేసి ఉంటారు. కానీ కేంద్ర ప్రభుత్వం నోట్ల మార్పిడి, రద్దు నిర్ణయంతో ఈ రోజు ఆయనే తాను పనిచేసిన శాఖలో.. తన ఖాతాలోని డబ్బులు తీసుకోలేని పరిస్థితి. మరి కొన్ని గంటల్లో కూతురి పెళ్లి ఉన్నా.. చేతిలో డబ్బు లేక దిక్కుతోచని స్థితిలో ఉన్నారాయన. మల్కాజిగిరి సాయిపురికాలనీకి చెందిన సి.విజయ్‌కుమార్ సబ్ పోస్ట్‌మాస్టర్‌గా విధులు నిర్వహించి 2010లో పదవీవిరమణ పొందారు.
  
   అప్పుడు వచ్చిన డబ్బులు సుమారు నాలుగున్నర లక్షలను మల్కాజిగిరి పోస్టాఫీస్‌లో ఎంఐఎస్ స్కీమ్‌లో తన కూతురి పేరిట జమచేశారు. 2016 సెప్టెంబర్‌లో స్కీమ్ గడువు ముగియడంతో ఎస్‌బీ ఖాతా ప్రారంభించి డబ్బులు అందులో జమచేశారు. ఆదివారం కూతురు వివాహం ఉండడంతో మూడు రోజుల క్రితం తనకు రూ.2.50 లక్షలు ఇవ్వాలని అధికారులను కోరారు. కేవైసీ ప్రతాలతో పాటు పెళ్లి కార్డు జతచేసి ఇవ్వాలని అధికారులు అడిగారు. అయితే, నగదు తక్కువగా ఉందని చెప్పడంతో కనీసం లక్ష రూపాయలైనా సర్దాలని ఆయన కోరారు. 
  
  శనివారం వస్తే నగదు ఇస్తామని చెప్పిన అధికారులు.. ఉదయం నుంచి సాయంత్రం వరకు ఉన్నా నగదు ఇవ్వలేదని విజయ్‌కుమార్ ఆవేదన వ్యక్తం చేశారు. కేవైసీ పత్రాలు కూడా అందజేశానని, డబ్బులు ఎవరెవరికి ఇవ్వాలో వారి పేర్లు కూడా ఇవ్వడానికి అంగీకరించానన్నారు. పైగా తాను డబ్బులు ఇవ్వాల్సిన వారికి బ్యాంక్ ఖాతాలేదని లిఖిత పూర్వకంగా రాసి ఇవ్వాలని చెప్పడం దారుణమన్నారు. డబ్బులు ఉన్నా కూతురి పెళ్లికి నలుగురి వద్ద అప్పు చేయాల్సిన పరిస్థితి వచ్చిందని ఆయన అధికారుల తీరుపై ఆగ్రహం వ్యక్తం చేశారు.
  


 న్యూఢిల్లీ: ఢిల్లీ ముఖ్యమంత్రి అరవింద్‌ కేజ్రీవాల్ మరోసారి నవ్వుల పాలయ్యారు. తెలిసి తెలియని సమాచారంతో మాట్లాడి అబాసుపాలయ్యారు. గతంలో మాదిరిగానే మరోసారి ఆయన తప్పులో కాలేశారు. బీజేపీ ఎంపీ మహేశ్‌ శర్మ కూతురు వివాహం రెండున్నర లక్షల్లోనే చేస్తున్నారా అంటూ కేజ్రీవాల్‌ ట్విట్టర్ ద్వారా ప్రశ్నించిన విషయం తెలిసిందే. అయితే, ఈ మాటలకు వెంటనే స్పందించిన ఎంపీ మహేశ్‌ శర్మ ముందు కేజ్రీవాల్‌ తన మాటలను సరి చేసుకోవాలని అన్నారు.
 
 తన ఇంట్లో వివాహం జరుగుతున్న మాట వాస్తవం అని అయితే, కేజ్రీవాల్ చెప్పినట్లు కూతురు పెళ్లి కాదని కుమారుడు పెళ్లి అని కేజ్రీవాల్‌ పూర్తి స్థాయిలో సమాచారం తెలుసుకుని మాట్లాడితే బాగుంటుందని ఆయన చెప్పారు. తాను పెళ్లికి కావాల్సిన ఏర్పాట్లన్నీ కూడా బ్యాంకు ద్వారానే చెల్లింపులు చేసినట్లు తెలిపారు. గతంలో కూడా ఓ దొంగ ఆత్మహత్యకు పాల్పడిన సందర్భంలో అతడు బ్యాంకు క్యూలో నిల్చున్న డబ్బు దొరకక ఆత్మహత్య చేసుకున్నాడని ఒకసారి.. సిరియా పిల్లల ఫొటోలు చూపిస్తూ ఉత్తరప్రదేశ్ రైలు ప్రమాద బాధితులు అని పేర్కొంటూ కేజ్రీవాల్‌ ట్విట్టర్‌లో పెట్టి నవ్వులపాలయిన విషయం తెలిసిందే. తాజాగా మరోసారి ఆయన ఎంపీ కుమారుడి వివాహాన్ని కూతురు వివాహంగా చెప్పి అబాసు పాలయ్యారు. 
 పెద్ద నోట్లను రద్దు చేస్తూ కేంద్ర ప్రభుత్వం తీసుకున్న నిర్ణయాన్ని వ్యతిరేకిస్తూ ఆమ్ ఆద్మీ పార్టీ నేతలు, మద్దతుదారులు ఆందోళనలు చేస్తున్న విషయం తెలిసిందే. 


 న్యూఢిల్లీ: పెద్ద నోట్ల రద్దు నేపథ్యంలో ఢిల్లీ ముఖ్యమంత్రి, ఆమ్ ఆద్మీ పార్టీ అధినేత అరవింద్‌ కేజ్రీవాల్‌ సోమవారం కేంద్ర ప్రభుత్వంపై మళ్లీ విరుచుకుపడ్డారు. పెళ్లిల్లకు మాత్రమే ప్రత్యేక అనుమతి ద్వారా రెండున్నర లక్షలు తీసుకునే వెసులుబాటు ఇవ్వడాన్ని మరోసారి ప్రశ్నించారు. త్వరలో జరగబోతున్న బీజేపీ ఎంపీ మహేశ్‌ శర్మ కూతురు వివాహానికి ఏర్పాట్లు ఆయన రెండున్నర లక్షల్లోనే పూర్తి చేశారా అని ప్రశ్నించారు.
 
 కొనుగోళ్లకు ప్రతి చోట చెక్కుల ద్వారానే చెల్లించారా అని నిలదీశారు. ఆయన అసలు నోట్ల మార్పిడిని ఎలా చేసుకున్నారని అన్నారు. మొత్తం వివాహ ఏర్పాట్లు 2.5లక్షల్లోనే పూర్తి చేశారా అని మండిపడ్డారు. నిజంగా అలాగే చేస్తుంటే అలా ఎలా చేయగలిగారో కూడా చెప్పాలని ఆయన డిమాండ్ చేశారు. పెద్ద నోట్లను రద్దు చేస్తూ కేంద్ర ప్రభుత్వం తీసుకున్న నిర్ణయాన్ని వ్యతిరేకిస్తూ ఆమ్ ఆద్మీ పార్టీ నేతలు, మద్దతుదారులు ఆందోళనలు చేస్తున్న విషయం తెలిసిందే. 


 20న హైదరాబాద్‌లో రిసెప్షన్
 
  సాక్షి, బెంగళూరు: కర్ణాటక మాజీ మంత్రి గాలి జనార్దనరెడ్డి, లక్ష్మి అరుణ దంపతుల కుమార్తె బ్రహ్మణి వివాహం హైదరాబాద్‌కు చెందిన ప్రముఖ పారిశ్రామికవేత్త విక్రమ్‌దేవ్‌రెడ్డి, రమాదేవిల కుమారుడు రాజీవ్‌రెడ్డితో బుధవారం అంగరంగ వైభవంగా జరిగింది. బెంగళూరులోని ప్యాలెస్ మైదానంలో జరిగిన ఈ వేడుకలో దక్షిణాది రాష్ట్రాలకు చెందిన రాజకీయ, పారిశ్రామిక, చలనచిత్ర రంగాలకు చెందిన పలువురు ప్రముఖులతో పాటు 50 వేల మందికి పైగా ప్రజలు పాల్గొన్నారు. మైదానంలోని దాదాపు 4 ఎకరాల విస్తీర్ణంలో తిరుమల శ్రీవారి ఆలయ సెట్‌ను రూపొందించి.. అందులో శ్రీవారి నిలువెత్తు విగ్రహం ముందు బృహత్ వేదికను ఏర్పాటు చేశారు.
 
 ఈ వేదికపై రాజీవ్‌రెడ్డి...బ్రహ్మణి మెడలో మాంగల్యధారణ గావించారు. కర్ణాటక గవర్నర్ వజుభాయ్ రుడాభాయ్ వాలా, కర్ణాటక మాజీ ముఖ్యమంత్రి, భారతీయ జనతాపార్టీ రాష్ట్ర అధ్యక్షుడు యడ్యూరప్ప, వివిధ పార్టీలకు చెందిన పలువురు నేతలు వివాహానికి హాజరై వధూవరులను ఆశీర్వదించారు. బ్రహ్మానందం, శరత్ రాంబాబు, పునీత్ రాజ్‌కుమార్, విశాల్ తదితర తెలుగు, కన్నడ, తమిళ చిత్రరంగాలకు చెందిన నటీనటులు పాల్గొన్నారు. వైఎస్సార్ కాంగ్రెస్ పార్టీ మాజీ ఎమ్మెల్యేలు కాపురామచంద్రారెడ్డి, భూమన కరణాకర్‌రెడ్డి తదితరులు నూతన వధువరులకు శుభాకాంక్షలు తెలిపారు. బ్రహ్మణి, రాజీవ్‌రెడ్డిల వివాహ విందు ఈ నెల 20న హైదరాబాద్‌లో జరగనుంది.
  
 
  
 
  
 
  
 (మరిన్ని చిత్రాల కోసం ఇక్కడ క్లిక్ చేయండి)


 బెంగళూరు: కర్ణాటక మాజీ మంత్రి గాలి జనార్దన్ రెడ్డి తన కూతురు బ్రాహ్మణి వివాహ వేడుకకు భారీ ఏర్పాట్లు చేస్తున్నారు. బెంగళూరులో జరగనున్న పెళ్లికి అతిథులను ఆహ్వానించేందుకుగానూ రూపొందించిన వైరైటీ శుభలేఖపై జాతీయ మీడియా సంస్థలు సైతం వార్తలు ప్రచురించాయి. దేశంలోనే బిగ్ వెడ్డింగ్ ఈవెంట్లలో ఇదీ ఒకటని పేర్కొన్నాయి. 
  
 జనార్దన్ రెడ్డి, లక్షీ దంపతుల తనయ బ్రాహ్మణి వివాహం నవంబర్ 16న రాజీవ్ రెడ్డితో జరగబోతున్నదంటూ ప్రచురించిన శుభలేఖను ఒక బాక్స్ లో ఉంచారు. ఆ బాక్స్ తెరవగానే పై భాగంలో ఏర్పాటుచేసిన ఎల్సీడీ స్క్రీన్ పై గాలి వారి పెళ్లిపాట మొదలవుతుంది. నిమిషం నిడివిగల ఆ వీడియోలో 'అతిథిదేవోభవా..' అంటూ జనార్దన్ రెడ్డి, ఆయన సతీమణి, కుమారుడితోపాటు వధూవరులిద్దరూ కనిపిస్తారు. ఆ వెరైటీ ఇన్విటేషన్ కు సంబంధించిన వీడియో ఇదే..
  


 సేలం: తన కూతురు పెళ్లి కోసం ఓ ప్రభుత్వ పాఠశాల ప్రధానోపాధ్యాయురాలు ఏకంగా పాఠశాలకు రెండు రోజులు తాళం వేయించింది. దీంతో ఆ పాఠశాలలో చదువుతున్న మూడొందల మంది విద్యార్థులతో పాటు తొమ్మిది మంది ఉపాద్యాయులు ఇంటికే పరిమితమయ్యారు. ఈ విషయం కాస్తా ఉన్నతాధికారుల దృష్టికి పోవడంతో దీనిపై సమగ్ర విచారణకు ఆదేశించారు.
 
 వివరాల్లోకి వెళ్తే.. తమిళనాడులోని పుక్కుంపట్టిలో తమిళ్సెల్వి ప్రధానోపాధ్యాయురాలుగా విధులు నిర్వహిస్తోంది. ఫిబ్రవరి 17, 18 తేదీలలో చెన్నైలో తన కూతురు వివాహం జరిపించిన ఆమె.. ఆ రెండు రోజులు పాఠశాలకు సెలవు ప్రకటించింది. అదికూడా అక్కడ స్థానికంగా లేనటువంటి ఓ పండుగను గ్రామస్తులు జరుపుకుంటున్నారనే అసత్య కారణాన్ని చూపిస్తూ ఈ చర్యకు పాల్పడింది. దీనిపై ఆరాతీసిన విద్యార్థుల తల్లిదండ్రులు అసలు స్థానికంగా తాము ఆ పండుగనే జరుపుకోమని చెబుతూ.. విషయాన్ని ఉన్నతాధికారుల దృష్టికి తీసుకెళ్లారు. హెచ్ఎం అధికార దుర్వినియోగానికి పాల్పడిందని గుర్తించిన విద్యాశాఖ అధికారులు దీనిపై పూర్తి నివేదిక అందించాలని కోరారు.
  


  తుని/తుని రూరల్ :జాతీయ రహదారిపై తుని మండలం ఎర్రకోనేరు సమీపంలో జరిగిన రోడ్డు ప్రమాదంలో బావాబావమరుదులు మరణించారు. కుమార్తె పెళ్లి కార్డులను బంధువులకు పంచడానికి కారులో వెళుతుండగా పశ్చిమ గోదావరి జిల్లాకు చెందిన వీరిద్దర్ని మృత్యువు కబళించింది. సంఘటన స్థలంలో ఉన్న పోలీసు సిబ్బంది, విలేకరులపైకి పది నిమిషాల వ్యవధిలో రెండు వాహనాలు దూసుకురావడంతో ఐదుగురు గాయపడ్డారు. ఎస్సైకు తృటిలో ప్రమాదం తప్పింది. తుని రూరల్ ఎస్సై శివప్రసాద్, స్థానికులు తెలిపిన వివరాలిలా ఉన్నాయి.
  
  పశ్చిమగోదావరి జిల్లా భీమవరం, పాలకొల్లుకు చెందిన బావ, బావమరుదులైన దాట్ల గంగరాజు (51), మంతెన  బలరామరాజు (51) కలిసి శనివారం ఉదయం పెళ్లి శుభలేఖలు పంచడానికి కారులో విశాఖపట్నం బయలుదేరారు. తుని మండలం ఎర్రకోనేరు వద్ద ఉదయం 9.30 సమయంలో వీరు ప్రయాణిస్తున్న కారు జాతీయ రహదారిపై వెళుతున్న లారీని వెనుక నుంచి ఢీకొంది. లారీ వెనుక భాగంలోకి కారు చొచ్చుకుపోవడంతో ఇద్దరూ సంఘటన స్థలంలోనే చనిపోయారు. నుజ్జయిన కారులోనే మృతదేహాలు చిక్కుకుపోయాయి. కారులో  చిక్కుకుపోయిన గంగరాజు, బలరామరాజు మృతదేహాలను బయటకు తీయడానికి రెండు గంటలు పట్టింది. పలుగులతో కారు డోర్లను పగులగొట్టి బయటకుతీశారు. స్థానికులు పోలీసులకు సహకరించారు. తుని ఏరియా ఆస్పత్రిలో పోస్టుమార్టం అనంతరం గంగరాజు, బలరామరాజు మృతదేహాలను బంధువులకు అప్పగించారు.
  
  దూసుకొచ్చిన వాహనాలు
  ఈ ప్రమాద వార్త తెలిసిన వెంటనే పోలీసులు, పాత్రికేయులు సంఘటన స్థలానికి చేరుకున్నారు. ఆ సమయంలో వర్షం కురవడం వల్ల సహాయక చర్యలకు ఇబ్బంది ఏర్పడింది. కారును తాళ్లతో కట్టి లారీ నుంచి వేరు చేస్తుండగా, రాజమండ్రి నుంచి విశాఖపట్నం వెళుతున్న సుమో అటుగా దూసుకొచ్చి, డివైడర్ పైకి ఎక్కింది. పోలీసులు, విలేకరులు పక్కకు తప్పుకున్నారు. మరో పది నిమిషాల వ్యవధిలో విలేకరులు, పోలీసుల పైకి ఓ కారు వేగంగా వచ్చి అక్కడున్న పోలీసు జీప్‌ను ఢీకొంది. ఆ జీప్ లారీ కింద ఇరుక్కున్న కారును ఢీకొట్టింది. ఈ ప్రమాదంలో ముగ్గురు పాత్రికేయులు, కానిస్టేబుల్‌కు గాయాలయ్యాయి. అక్కడున్న ఎస్సై శివప్రసాద్ త్రుటిలో అపాయం నుంచి తప్పించుకున్నారు.
  
  పాత్రికేయులు ఎం.సూర్యనారాయణ, రామృకృష్ణ, వాసు, తుని మండలం రాజుపేటకు చెందిన కిల్లాడ దుర్గకు గాయాలు కావడంతో, 108లో తుని ప్రభుత్వ ఏరియా ఆస్పత్రికి  తరలించారు. వాహనాలను నిర్లక్ష్యంగా నడిపిన ఇద్దరు డ్రైవర్లపై పోలీసులు కేసు నమోదు చేశారు. ఆస్పత్రిలో చికిత్స పొందుతున్న పాత్రికేయులను తుని ఎమ్మెల్యే దాడిశెట్టి రాజా పరామర్శించారు. ‘సాక్షి’ తుని రూరల్ విలేకరి సూర్యనారాయణకు తీవ్ర గాయం కావడంతో వైద్యులు చికిత్స అందించారు.
  
  శుభలేఖలు పంచడానికి వెళ్తూ..
  బలరామరాజు పెద్ద కుమార్తెకు ఆగస్టు 13న వివాహం జరగనుంది. బంధువులు, స్నేహితులకు శుభలేఖలు పంచడానికి బావమరిది గంగరాజుతో కలసి శనివారం పాలకొల్లు నుంచి కారులో బయలుదేరారు. శుభలేఖలు పంచడానికి వెళ్లిన వీరు క్షేమంగా తిరిగొస్తారని ఎదురుచూస్తున్న కుటుంబ సభ్యులకు తీరని విషాదం మిగిలింది. బావ, బావమరుదులైనా స్నేహితుల్లా కలిసిమెలిసి ఉండేవారని గంగరాజు సోదరుడు వెంకట్రాజు కన్నీరు పెట్టుకున్నారు. భీమవరానికి చెందిన గంగరాజు ఆక్వా వ్యాపారం చేస్తున్నారు. ఆయనకు భార్య సుబ్బలక్ష్మి, ఇద్దరు కుమారులు ఉన్నారు. పాలకొల్లుకు చెందిన బలరామరాజుకు భార్య రాధారాణి, ఇద్దరు కుమార్తెలు ఉన్నారు.