ఆదిలాబాద్‌టౌన్‌: హెల్మెట్‌ ప్రాణానికి రక్షణ. హెల్మెట్‌ ధ రించి ప్రమాదాలకు గురైన వారిలో చాలా మందివరకు బతికి బయటపడ్డారు. ఎన్నో సందర్భాల్లో హెల్మెట్‌ ధరిస్తే బతికుండేవాడేమోనని సంఘటన స్థలాల్లో ప్రజలు చర్చించుకోవడం కనిపిస్తోంది. ప్రమాదాల నివారణకు పోలీసు, రవాణా శాఖల ఆధ్వర్యంలో హెల్మెట్‌ వాడేలా చర్యలు చేపడుతున్నారు. గతంలో సైతం జిల్లాలో నో హెల్మెట్‌.. నోపెట్రోల్‌  అమలు చేసినా కొన్ని రోజులకే పరిమితమైంది. 2021 జనవరి 1 నుంచి మరోమారు ఈ శాఖల ఆధ్వర్యంలో నో హెల్మెట్‌.. నో పెట్రోల్‌ కార్యక్రమానికి శ్రీకారం చుడుతున్నారు. 2016 జూన్‌2 నుంచి జిల్లాలో నో హెల్మెట్‌.. నో పెట్రోల్‌ కార్యక్రమాన్ని ప్రారంభించారు. నాలుగు నెలల పాటు ఈ కార్యక్రమం కొనసాగింది. వాహనదారులు హెల్మెట్లు ధరిస్తేనే పెట్రోల్‌ బంకుల్లో పెట్రోల్‌ పోసేవారు. ఆ తర్వాత కలెక్టర్, రవాణా, పోలీసు శాఖలో ఉన్నతాధికారులు బదిలీలు కావడంతో మళ్లీ మొదటికొచ్చింది. వాహనదారులు హెల్మెట్‌ లేకుండా వచ్చినా బంక్‌ యజమానులు పెట్రోల్‌ పోశారు. ఆ తర్వాత వచ్చిన అధికారులు పట్టించుకోకపోవడంతో కార్యక్రమం నిలిచిపోయింది.  తాజాగా రవాణా శాఖ డీటీసీ, ఎస్పీ 2021 జనవరి 1 నుంచి నో హెల్మెట్‌.. నో పెట్రోల్‌ కార్యక్రమానికి మరోసారి ప్రారంభించనున్నారు. ఇప్పటికే జిల్లాలోని అన్ని పెట్రోల్‌ బంక్‌ల యజమానులతో సమావేశాలు నిర్వహించి చర్చిస్తున్నారు. హెల్మెట్‌ లేనిదే ఏ ఒక్క వాహనదారుడికి పెట్రోల్‌ పోయవద్దని సూచిస్తున్నారు. ప్రమాదాల నివారణ కోసమే ఈ కార్యక్రమాన్ని చేపడుతున్నట్లు ఆయా శాఖల అధికారులు చెబుతున్నారు. దీనికి ప్రతిఒక్కరూ సహకరించాలని కోరుతున్నారు. ఆదిలాబాద్‌ పట్టణంలోని ఆయా ముఖ్య కూడళ్లలో ట్రాఫిక్‌ పోలీసులు ద్విచక్ర వాహనదారులు, ప్రజలకు అవగాహన కల్పిస్తున్నారు. హెల్మెట్‌ ధరించి ప్రయాణం చేస్తే గమ్యస్థానానికి సురక్షితంగా చేరుకోవచ్చని సూచిస్తున్నారు.ఈ ఏడాది జిల్లాలో 78 ద్విచక్రవాహన ప్రమాదాలు చోటుచేసుకున్నాయి. 43 మంది మృత్యువాత పడ్డారు. ఒకరు తీవ్రంగా గాయపడ్డారు. ఇవేకాకుండా చిన్నచిన్న ప్రమాదాలు వందల్లో జరిగినట్లు తెలుస్తోంది. మరణించిన వారిలో ముఖ్యంగా హెల్మెట్‌ లేకపోవడమే కారణంగా తెలుస్తోంది. జనవరి 1 నుంచి అమలు చేస్తాం నో హెల్మెట్‌.. నో పెట్రోల్‌ కార్యక్రమాన్ని 2021 జనవరి 1 నుంచి అమలు చేస్తున్నాం. ఇప్పటికే ప్రజలు, వాహనదారులకు వీటిపై అవగాహన కల్పిస్తున్నాం. జిల్లాలోని పెట్రోల్‌బంక్‌ యజమానులతో సైతం చర్చించాం. రోడ్డు ప్రమాదాల నివారణ కోసం పోలీసు, రవాణా శాఖ సంయుక్తంగా కార్యక్రమాన్ని చేపడుతున్నాం. 2016లో ఈ కార్యక్రమాన్ని ప్రారంభించాం. అప్పట్లో వివిధ కారణాలతో ఈ కార్యక్రమం మధ్యలోనే నిలిచిపోయింది. ఈసారి మాత్రం పకడ్బందీగా అమలు చేస్తాం. దీనికి ప్రజలంతా సహకరించాలి. – పుప్పాల శ్రీనివాస్, డీటీసీ  

సాక్షి, న్యూఢిల్లీ:  ద్విచక్రవాహనదారులకు షాకిచ్చేలా కొత్త నిబంధనలు గ్రేటర్ నోయిడా పరిధిలో అమల్లోకి  వచ్చాయి.  హెల్మెట్‌ లేకుండా  ప్రయాణించే ద్విచక్ర వాహనదారులకు ఇకపై పెట్రోల్‌ లభించదు. నోయిడా, గ్రేటర్ నోయిడాలో పరిధిలోని బైక్‌ రైడర్స్‌ హెల్మెట్‌ లేకుండా పెట్రోల్‌ స్టేషన్‌కు వెళితే అక్కడి సిబ్బంది పెట్రోల్‌ పోయరు. ఈ నిబంధన జూన్‌ 1 నుంచి అమల్లోకి వచ్చింది.  ఈ మేరకు కఠిన ఆదేశాలు జారీ అయ్యాయి. రోడ్డు భద్రతను ప్రోత్సహించేందుకు జిల్లా మేజిస్ట్రేట్ బ్రిజేష్ నారాయణ్ సింగ్ ఈ నిర్ణయం తీసుకున్నారు. ఇటీవల ఉన్నతాధికారులు పెట్రోల్‌ పంపుల యజమానులతో సమావేశం నిర్వహించారు.  ప్రస్తుతానికి ఈ అదేశాలను రెండు నగరాల్లో అమలు చేయాలని, అనంతరం  ఇతర ప్రాంతాల్లో  కూడా అమలు చేయాలని యజమానులను ఆదేశించారు. హెల్మెట్‌ లేకుండా ప్రయాణిస్తే, డ్రైవింగ్‌ లైసెన్సును  రద్దు చేయడంతోపాటు,  చట్టపరమైన చర్యలు కూడా జిల్లా యంత్రాంగం తీసుకుంటుందని కలెక్టర్‌ సింగ్‌ తెలిపారు. అలాగే  పెట్రోల్‌ బంకుల్లోని సిబ్బందితో ఎవరైనా దురుసుగా ప్రవర్తిస్తే రైడర్లను అరెస్ట్‌ చేస్తామని హెచ్చరించారు. అంతేకాదు ఐపీసీ క్రిమినల్‌  ప్రొసీజర్ కోడ్ 151 సెక్షన్‌ ప్రకారం కేసు నమోదు చేస్తామని  ఆయన చెప్పారు.  కాగా మోటారు వాహనాల చట్టం 129 సెక్షన్ ప్రకారం, హెల్మెట్‌ లేని ప్రయాణం నేరం. దీని  ఉల్లఘించినవారికి 6 నెలలు  జైలు శిక్ష విధించవచ్చు.

సాక్షి, హైదరాబాద్‌ : లారీల సమ్మె ప్రభావం పెట్రో ట్యాంకర్లపైనా పడింది. ఐదో రోజున మంగళవారం రాష్ట్రవ్యాప్తంగా 4,500 ఆయిల్‌ ట్యాంకర్లు నిలిచిపోయాయి. దీంతో అనేక చోట్ల పెట్రోల్‌ బంకుల్లో నో స్టాక్‌ బోర్డులు దర్శనమిచ్చాయి. మంగళవారం నుంచి ఆయిల్‌ ట్యాంకర్లను నిలిపేస్తామని లారీ ఆపరేటర్లు హెచ్చరించడంతో వాహనదారులు సోమవారం బంకుల వద్ద క్యూ కట్టారు. సమ్మె కొనసాగితే గురువారం నాటికి పెట్రోల్‌ బంకులు పూర్తిగా మూత పడే అవకాశం లేకపోలేదు.  పెరిగిన సమ్మె ప్రభావం..  మొదటి నాలుగు రోజులూ తెలంగాణలో లారీల సమ్మె పాక్షికంగా జరిగినా మంగళవారం నుంచి దాని ప్రభావం పెరిగింది. సమ్మె కారణంగా నిత్యావసర సరుకులకు కొంత కొరత ఏర్పడింది. పండ్లు, కూరగాయల ధరలు పెరిగాయి. సమ్మెను బూచీగా చూపించి వ్యాపారులు నిత్యావసర వస్తువుల ధరలు పెంచి దండుకుంటున్నారు. కీలకమైన వ్యవసాయ సీజన్లో రైతులకు అవసరమైన విత్తనాలు, ఎరువులను సరఫరా చేయడానికి సమ్మె అడ్డంకిగా మారింది. రాష్ట్రవ్యాప్తంగా ఎరువులు, విత్తనాల సరఫరా నిలిచిపోవడంతో రైతులు ఇబ్బందులు పడుతున్నారు. పలుచోట్ల యూరియా సరఫరాకూ అడ్డంకులు ఏర్పడ్డాయి. వ్యవసాయ శాఖ ప్రత్యామ్నాయ చర్యలు తీసుకోకపోవడంపై విమర్శలు వస్తున్నాయి. అయితే, విమానాల కోసం ఉపయోగించే ఇంధన సరఫరాకు ఇబ్బందులు లేకుండా చూస్తామని ఆపరేటర్లు హామీ ఇచ్చినట్లు తెలిసింది.  సమ్మెలో 90 లక్షల లారీలు: శ్రీనివాస్‌గౌడ్‌  లారీల సమ్మెకు సంఘీభావంగా హైదరాబాద్‌ చర్లపల్లిలోని ఇండియన్‌ ఆయిల్, భారత్, హెచ్‌పీ పెట్రోలియం కార్పొరేషన్ల వద్ద లారీ ఓనర్స్, ట్యాంక్‌ ట్రక్‌ ఓనర్స్‌ అసోసియేషన్స్‌ నిర్వహించిన నిరసన కార్యక్రమానికి మహబూబ్‌నగర్‌ ఎమ్మెల్యే, తెలంగాణ లారీ ఓనర్స్‌ అసోసియేషన్‌ గౌరవాధ్యక్షుడు వి.శ్రీనివాస్‌గౌడ్‌ ముఖ్యఅతిథిగా హాజరయ్యారు. ఈ సందర్భంగా ఆయన మాట్లాడుతూ లారీల యజమానుల న్యాయమైన డిమాండ్లు నెరవేరేదాకా సమ్మె కొనసాగుతుందన్నారు. దేశవ్యాప్తంగా సమ్మెలో 90 లక్షల లారీలు పాల్గొంటున్నాయన్నారు. సమ్మె కారణంగా లారీలపై ఆధారపడి ప్రత్యక్షంగా, పరోక్షంగా ఉపాధి పొందుతున్న 10 కోట్ల కుటుంబాలకు ఇబ్బందిగా మారిందని, దీనిని దృష్టిలో ఉంచుకుని వెంటనే సమ్మె విరమణకు కేంద్రం చర్యలు చేపట్టాలని డిమాండ్‌ చేశారు. తెలంగాణ, ఏపీ మధ్య లారీల రాకపోకలకు ఉద్దేశించిన సింగిల్‌ పర్మిట్‌ను వెంటనే అమలు చేయాలని డిమాండ్‌ చేశారు. నిత్యావసర సరుకుల పంపిణీకి బంద్‌ నుండి మినహాయింపు ఇచ్చామన్నారు. త్వరలో పెట్రోల్‌ బంక్‌ల యజమానులు కూడా బంద్‌కు మద్దతు తెలిపి పాల్గొంటారన్నారు. తెలంగాణ పెట్రోలియం ట్యాంకర్స్‌ అసోసియేషన్‌ అధ్యక్షుడు రాజశేఖర్‌రెడ్డి మాట్లాడుతూ సీఎస్‌ సూచనల మేరకు అత్యవసర సర్వీసులను దృష్టిలో ఉంచుకుని ఒక్కరోజే సమ్మె చేస్తున్నామన్నారు. కార్యక్రమంలో తెలంగాణ లారీ ఓనర్స్‌ అసోసియేషన్‌ ప్రధాన కార్యదర్శి దుర్గాప్రసాద్, జనార్దన్, సయ్యద్‌ అరిఫ్‌ ఉల్‌ హుస్సేన్, తదితరులు పాల్గొన్నారు. కాగా, చర్లపల్లి, ఘట్‌కేసర్, రామగుండం, వరంగల్, సూర్యాపేట ఐఓసీ డిపోల్లో ఆయిల్‌ ట్యాంకర్‌ అసోసియేషన్లుసమ్మెలో పాల్గొన్నాయి.  రూ.150 కోట్లు నష్టం  లారీల సమ్మె కారణంగా నిత్యం దాదాపు రూ.25–30 కోట్ల మేర నష్టం వాటిల్లిందని తెలంగాణ లారీ యజమానుల సంఘం అధ్యక్షుడు భాస్కర్‌రెడ్డి తెలిపారు. 5 రోజుల సమ్మె కారణంగా లారీ యజమానులకు రూ.150 కోట్లు నష్టం వచ్చిందన్నారు. రాష్ట్రవ్యాప్తంగా ఎక్కడికక్కడ లారీలు నిలిచిపోయినా ఇప్పటివరకూ కేంద్ర, రాష్ట్ర ప్రభుత్వాల నుంచి తమకు ఆహ్వానం రాలేదన్నారు. ప్రభుత్వాలు స్పందించకపోతే తమకు మద్దతుగా ఆయిల్, పాలు, తాగునీటి ట్యాంకర్లు కూడా సమ్మెలో పాల్గొంటాయని ఆయన స్పష్టంచేశారు. 

కలెక్టర్‌ వినయ్‌చంద్‌ ఆదేశం ఒంగోలు టౌన్‌: రోడ్డు ప్రమాదాల నివారణలో భాగంగా నో హెల్మెట్‌.. నో పెట్రోల్‌ విధానాన్ని అన్ని పెట్రోల్‌ బంకుల్లో అమలు చేయాలని కలెక్టర్‌ వి.వినయ్‌చంద్‌ ఆదేశించారు. మంగళవారం స్థానిక క్యాంపు కార్యాలయంలో జిల్లా స్థాయి రోడ్డు భద్రతా కమిటీ సమావేశంలో ఆయన మాట్లాడారు. జిల్లాలో రహదారి భద్రత నియమాలు పాటించి రోడ్డు ప్రమాదాల నివారణకు చర్యలు తీసుకోవాలన్నారు. రోడ్డు ప్రమాదాలు జరిగిన వెంటనే స్పందించేందుకు రెస్క్యూ ఆపరేషన్‌ ఎక్విప్‌మెంట్‌ అందుబాటులో ఉండాలని నేషనల్‌ హైవే అధికారులను ఆదేశించారు.  జాతీయ రహదారులపై ఆర్‌అండ్‌బీ ఎస్‌ఈ, డీఎస్‌పీలు, ఎంవీఐలు సంయుక్తంగా తనిఖీలు నిర్వహించి ప్రమాదకర ప్రాంతాలను గుర్తించి నివేదిక అందించాలని చెప్పారు. జిల్లాలోని జాతీయ రహదారులపై ప్రమాదం జరిగే ప్రాంతాలను బ్లాక్‌ స్పాట్స్‌గా గుర్తించి సైన్‌ బోర్డులు ఏర్పాటు చేయాలన్నారు. జాతీయ రహదారిపై ఉన్న బొల్లాపల్లి, టంగుటూరు టోల్‌ ప్లాజా వద్ద రెస్టు రూమ్‌లు, లైటింగ్, తాగు నీరు వంటి సౌకర్యాలు కల్పించేందుకు చర్యలు తీసుకోవాలని పేర్కొన్నారు. మద్యం తాగి వాహనాలు నడిపే వారిపై కఠిన చర్యలు తీసుకోవాలని జిల్లా న్యాయమూర్తికి రాతపూర్వకంగా తెలియజేయాలన్నారు.  షార్ట్‌ ఫిల్మ్‌ తయారు చేయాలి జిల్లాలో జరిగే రోడ్డు ప్రమాదాలపై షార్ట్‌ ఫిల్మ్‌ తయారు చేసి థియేటర్లలో ప్రదర్శించి ప్రజలకు అవగాహన కలిగించాలని వినయ్‌చంద్‌ సూచించారు. డ్రంక్‌ అండ్‌ డ్రైవ్‌లో వాహనదారులను పరీక్షించేందుకు ప్రతి మునిసిపాలిటీలో రెండు బ్రీత్‌ ఎనలైజర్స్‌ కొనుగోలు చేయాలని ఆదేశించారు. అద్దంకి–నార్కట్‌పల్లి జాతీయ రహదారి వద్ద మేదరమెట్ల కొండ ప్రాంతాన్ని ఆర్‌అండ్‌బీ ఎస్‌ఈ, పోలీసు అధికారులు పరిశీలించి తొలగించేందుకు చర్యలు తీసుకోవాలన్నారు. జాతీయ రహదారులపై బ్లాక్‌ స్పాట్లు, స్పీడ్‌ బ్రేకర్లు నిర్మించేందుకు బడ్జెట్‌ ప్రతిపాదనలు తయారు చేసి ప్రభుత్వానికి పంపించాలని కలెక్టర్‌ ఆదేశించారు. సమావేశంలో ఎస్పీ సత్యఏసుబాబు, రవాణశాఖ డిప్యూటీ కమిషనర్‌ సుబ్బారావు, ఆర్‌టీసీ ఆర్‌ఎం ఆదాం సాహెబ్, ఆర్‌అండ్‌బీ ఎస్‌ఈ నాగమల్లు, పంచాయతీరాజ్‌ ఎస్‌ఈ నాయుడు, ఒంగోలు డీఎస్‌పీ శ్రీనివాసరావు, ట్రాఫిక్‌ డీఎస్‌పీ రాంబాబు, స్పెషల్‌ బ్రాంచ్‌ డీఎస్‌పీ నాగరాజు, డీసీఆర్‌బీ డీఎస్‌పీ మరియదాసు పాల్గొన్నారు. 

పట్నంబజారు(గుంటూరుతూర్పు): ద్విచక్ర వాహన ప్రమాదాలు పెరుగుతూనే ఉన్నాయి. కానీ హెల్మెట్‌ (శిరస్త్రాణం) పెట్టుకోవాలన్న నిబంధన మాత్రం ఎవరికీ పట్టడం లేదు. పోలీసులు వాహనాల తనిఖీల సందర్భంగా జరిమానాలు విధిస్తున్నారే తప్ప అందరికీ సరైన రీతిలో అవగాహన కల్పించలేకపోతున్నారని విమర్శలున్నాయి. గతంలో నో హెల్మెట్‌.. నో పెట్రోల్‌ అంటూ పెట్రోల్‌ పంపుల వద్ద నిబంధనలు అమలు చేసినా వాటిని కఠినంగా అమలు చేయకపోవడంతో లక్ష్యం నీరుగారిపోతోందని విమర్శలు వినిపిస్తున్నాయి. రోజుల వ్యవధిలో అటకెక్కిన వైనం..   కొద్ది కాలం క్రితం జిల్లా పోలీసు ఉన్నతాధికారులు హెల్మెట్‌ ధారణపై ప్రత్యేక దృష్టి సారించారు. పోలీస్‌ సిబ్బంది సైతం హెల్మెట్‌ పెట్టేలా చర్యలు చేపట్టారు. దీంతో కలెక్టర్‌ కార్యాలయంలోకి సైతం హెల్మెట్‌ లేకపోతే విధులకు రావివ్వొదంటూ.. ఆదేశాలు జారీ చేశారు. అయితే నిబంధనలు పాటించాలన్న విషయం మాత్రం మూణ్ణాళ్ల ముచ్చటలా మారింది. ఎన్నో అవగాహన సదస్సులు నిర్వహించటంతో పాటు, భారీ ర్యాలీలు నిర్వహించి హెల్మెట్‌ ధారణపై కొత్త అధ్యాయాన్నే సృష్టించారు. తొలి రోజుల్లో ప్రతి ఒక్కరూ హెల్మెట్‌ పట్టుకునేలా చర్యలు చేపట్టిన అధికారులు దొరికిన పట్టుని వదిలేసినట్లు కనబడుతోంది. జిల్లా పోలీసు కార్యాలయంలోకి వచ్చే సిబ్బందిని సైతం అడ్డుకుని హెల్మెట్‌ లేని వారికి జరిమానాలు విధించేలా చర్యలు చేపట్టారు. అయితే రోజుల వ్యవధిలోనే ఈ ప్రక్రియ  అటకెక్కిందనే విమర్శలు లేకపోలేదు. పూర్తిస్థాయిలో పోలీసు సిబ్బంది, అధికారులే నిబంధనలను పాటించని పరిస్థితులు కనపడుతున్నాయి. కేసులు ఫుల్‌.. అవగాహన నిల్‌..   పోలీసు అ«ధికారులు హెల్మెట్‌ వాడకంపై అవగాహన మరింత కలిగించాలనే అభిప్రాయాలు వ్యక్తమవుతున్నాయి. హెల్మెట్‌ పెట్టుకోని వారికి జరిమానాలు విధిస్తున్నారే తప్ప.. అవగాహన కల్పించడంలో విఫలమయ్యారనే చెప్పాలి. దీనితో పాటు అపరాధ రుసుం పత్రాన్ని ఇంటికి పంపించే ప్రక్రియలో జాప్యం కూడా జరుగుతోందనే అభిప్రాయం వ్యక్తమవుతోంది. గతంలో మాన్యువల్‌ పద్ధతిలో కేసులు నమోదు చేయటం, రుసుం చెల్లించని వాహనాలను స్టేషన్‌కు తరలించటం జరిగేది. అయితే ఈ–చలానా పద్ధతి వచ్చిన తరువాత 15 రోజుల వ్యవధిలో కేవలం రూ.145 చలానా చెల్లించాల్సి ఉండటంతో ప్రతి ఒక్కరూ కూడా పట్టీపట్టనట్లు వ్యవహరిస్తున్నారు. హెల్మెట్‌ లేకుండా పెట్రోల్‌ బంకులకు వచ్చే వారికి పెట్రోలు పోయరాదని అధికారులు జారీ చేసిన ఆదేశాలను యాజమాన్యాలు బేఖాతరు చేస్తున్నాయి. అందరూ ఒక చోటే.. ట్రాఫిక్‌ పోలీసు ఉన్నతాధికారులు సైతం ఉదయం, సాయంత్రం వేళల్లో స్పెషల్‌ డ్రైవ్‌లకే పెద్దపీట వేస్తున్నారు. త్రిపుల్‌ రైడింగ్, స్నేక్‌ డ్రైవింగ్, ర్యాష్‌ డ్రైవింగ్‌పై డ్రైవ్‌లు నిర్వహిస్తున్నప్పటీకీ వాటిని నియంత్రించటంలో విఫలమవుతున్నారనే విమర్శలు లేకపోలేదు. ట్రాఫిక్‌ స్టేషన్‌ పరిధిలోని ఎస్‌ఐలకు కేసుల నిర్వహణను అందజేస్తున్నారు. ముఖ్యంగా ఒక్కొక్కరికి టార్గెట్‌లు నిర్వహిస్తుండటంతో ఎస్‌ఐలు కూడా కేవలం కేసులకే పరిమితం అవ్వాల్సిన పరిస్థితులు ఏర్పడుతున్నాయి. దీంతో ఉదయం, సాయంత్రం వేళల్లో కలిసికట్టుగా కేసులు నమోదు చేస్తున్నారనే విమర్శలు ఉన్నాయి. హెల్మెట్‌ ధారణపై మరింత అవగాహన కలిగించాలనే పలువురు చెబుతున్నారు. ఏదిఏమైనా పోలీసులు ఉన్నతాధికారులు పూర్తిస్థాయిలో దృష్టి సారించడం ద్వారానే హెల్మెట్‌ ధారణ సాధ్యపడుతుందనే అభిప్రాయాలు వ్యక్తమవుతున్నాయి. చిన్న ప్రమాదం.. జీవితాన్ని    ఛిన్నాభిన్నం చేస్తుంది.. బంగారు కుటుంబాన్ని రోడ్డున పడేస్తుంది.. ఇటువంటి ప్రమాదాలకు చెక్‌ పెట్టేందుకు పోలీసు ఉన్నతాధికారులు చర్యలు చేపట్టారు. అధికంగా జరుగుతున్న ప్రమాదాల్లో హెల్మెట్‌ (శిరస్త్రాణం) లేకపోవటం కారణంగానే మృత్యువాత పడుతున్నారని గణాంకాల ఆధారంగా పరిశీలించి హెల్మెట్‌ యజ్ఞానికి నాంది పలికారు. ఎంతో ప్రతిష్టాత్మకంగా ఈ కార్యక్రమం  నీరుగారిపోతోంది. ఎక్కడ మొదలు పెట్టారో.. తిరిగి అక్కడికే చేరుకుంటోంది.

సాక్షి, విశాఖపట్నం : రోడ్డు ప్రమాదాల్లో మరణాల రేటును తగ్గించేందుకు త్వరలో నో హెల్మెట్‌– నో పెట్రోల్‌ విధానాన్ని అమలు చేయాలని కలెక్టర్‌ ప్రవీణ్‌కుమార్‌ అధికారులను ఆదేశించారు. హెల్మెట్‌ లేని వాహన చోదకులకు పెట్రోల్‌ పోయకుండా పెట్రోల్‌ బంకుల యజమానులను ఆదేశించాలన్నారు. కలెక్టరేట్‌ సమావేశ మందిరంలో కలెక్టర్‌ అధ్యక్షతన మంగళవారం నిర్వహించిన రహదారి భద్రత కమిటీ సమావేశంలో పోలీస్‌ కమిషనర్‌ యోగానంద్, ఎస్పీ రాహుల్‌దేవ్‌ శర్మ, వుడా వీసీ బసంత్‌కుమార్‌తో కలిసి పరిస్థితిని సమీక్షించారు. గతేడాది జరిగిన ప్రమాదాల గురించి డీటీసీ ఎస్‌.వెంకటేశ్వరరావు పవర్‌పాయింట్‌ ప్రెజెంటేషన్‌ ద్వారా వివరించారు. 2016లో జరిగిన 2,609 రోడ్డు ప్రమాదాల్లో    551 మంది మరణించారని, 2,058 మంది గాయాలపాలయ్యారని తెలిపారు. దీనిపై కలెక్టర్‌ మాట్లాడుతూ ద్విచక్రవాహనచోదకులు తప్పనిసరిగా హెల్మెట్‌ ధరించేలా చూస్తే చాలావరకు మరణాల రేటును తగ్గించవచ్చన్నారు. హెల్మెట్‌ వాడకంపై ద్విచక్రవాహనచోదకుల్లో అవగాహన పెరిగేలా ప్రత్యేక కార్యక్రమాలు నిర్వహించాలని సూచించారు. పోలీస్, రవాణా శాఖలు ప్రత్యేక చొరవతో ద్విచక్రవాహనచోదకులకు హెల్మెట్‌ తప్పనిసరి చేయాలన్నారు.   సమన్వయంతో సత్ఫలితాలు అనకాపల్లి–ఆనందపురం జాతీయ రహదారి పనులు నిర్వహించే ముందు సమన్వయ కమిటీతో చర్చించి వారి సూచనలకు అనుగుణంగా పనులు నిర్వహిస్తే మంచి ఫలితాలుంటాయని సీపీ యోగానంద్‌ అన్నారు. నక్కపల్లి–యలమంచిలి రోడ్డుపై లైటింగ్, సైన్‌ బోర్డులు, స్పీడ్‌ బ్రేకర్లు ఏర్పాటు చేయాల్సిన అవసరం ఉందని ఎస్పీ రాహుల్‌దేవ్‌ శర్మ సూచించారు. సమావేశంలో అదనపు డీసీపీ మహేంద్ర పాత్రుడు, ఏసీపీ కె.ప్రభాకరరావు, ఆర్టీవోలు ఎ.హెచ్‌. ఖాన్, ఐ.శివప్రసాద్, కేజీహెచ్‌ అదనపు సూపరింటెండెంట్‌ డాక్టర్‌ వరప్రసాద్‌ తదితరులు పాల్గొన్నారు. ప్రమాద నివారణ మార్గాలివీ.. ► ప్రమాదాల నివారణకు చేపట్టాల్సిన చర్యలను కలెక్టర్‌ అధికారులకు సూచించారు. ► ‘నో హెల్మెట్‌.. నో పెట్రోల్‌’ విధానం అమలుకు కార్యాచరణ రూపొందించాలి. ► జాతీయ రహదారికి అనుసంధానమయ్యే కూడళ్లలో ప్రమాదాలు ఎక్కువగా జరుగుతున్నందున ఆ జంక్షన్లలో సైన్‌ బోర్డులు, స్పీడ్‌ బ్రేకర్లు ఏర్పాటు చేయాలి. ► కప్పరాడ, మధురవాడ, ఆనందపురం తదితర ప్రాంతాల్లో డివైడర్లు లేకపోవడంతో ప్రమాదాలు జరుగుతున్నందున వాటిని ఏర్పాటు చేయాలి. ► రద్దీగా ఉండే గాజువాక, ఎన్‌ఏడీ, మద్దిలపాలెం, సత్యం తదితర జంక్షన్లలోనూ సెంట్రల్‌ మీడియన్‌ గ్రిల్స్‌ పాడైపోవడం, కొన్ని చోట్ల లేనందువల్ల ప్రమాదాలు జరుగుతున్నందున వాటిని నిర్మించాలి. ► జాతీయ రహదారి శివారు ప్రాంతాల్లో వీధి దీపాలు లేకపోవడం ప్రమాదాలకు దారి తీస్తున్నందున చర్యలు చేపట్టాలి. ► ప్రధాన రహదారుల్లో ఎక్కడ పడితే అక్కడ వాహనాలు నిలపకుండా పార్కింగ్‌ స్థలాలను నిర్దేశించి, అన్నిచోట్ల సైన బోర్డులు ఏర్పాటు చేయాలి. ► ప్రమాదాలకు గురైన వారిని వెంటనే ఆస్పత్రులకు తరలించేందుకు వీలుగా ప్రధాన కూడళ్లలో అంబులెన్సులు సిద్ధంగా ఉంచాలి. అంబులెన్స్‌ వివరాలు తెలియజేస్తూ వాహన యజమానులు, డ్రైవర్లకు ఎస్‌ఎంఎస్‌ చేయాలి.


 న్యూఢిల్లీ: ఇక నుంచి ఢిల్లీ రోడ్లపై పెట్రోల్, డీజిల్ క్యాబ్లను అనుమతించబోమంటూ సుప్రీంకోర్టు ఆదేశాలు జారీ చేసింది. డెడ్ లైన్ ఇక పొడిగించడం కుదరదని స్పష్టం చేసింది. మే 1నుంచి సీఎన్జీతో ఉన్న క్యాబులను మాత్రమే అనుమతిస్తామంటూ శనివారం తీర్పులో తెలిపింది. అయితే, ఆల్ ఇండియా పర్మిట్ ఉన్న వాహనాలకు మాత్రం మినహాయింపునిచ్చింది. ఢిల్లీలో విపరీతంగా కాలుష్యం పెరిగిన నేపథ్యంలో క్యాబ్లను ఏప్రిల్ 30లోగా పెట్రోల్, డీజిలేతర సీఎన్జీ వాహనాలుగా మార్చుకోవాలని ఆదేశించింది.
 
 అయితే, ఆ గడువును మరోసారి పొడిగించాలని క్యాబ్స్ తరుపువారు వేసిన పిటిషన్ ను సుప్రీంకోర్టు కొట్టివేస్తూ మే 1 నుంచి ఎట్టి పరిస్థితుల్లో అలాంటి వాహనాలు అనుమతించబోమని స్పష్టం చేసింది. మన దేశంలో డీజిల్, పెట్రోల్ వాహనాలను సీఎన్ జీ వాహనాలుగా మార్చుకునే సాంకేతిక పరిజ్ఞానం తమకు అందుబాటులో లేదని, అందుకే తమకు కొంత గడువు ఇవ్వాలని క్యాబ్స్ యజమానులు సుప్రీంను అభ్యర్థించగా ఇప్పటికే చాలినంత సమయం ఇచ్చామని, దేశంలో ఉన్నత న్యాయ స్థానం ఇచ్చే ఆదేశాలు, మార్గదేశాలు పాటించి తీరాలని సుప్రీం గట్టిగా మందలించింది.


 - ప్రజల్లో వ్యతిరేకతతో తగ్గిన ప్రభుత్వం
  
 సాక్షి, హైదరాబాద్: హెల్మెట్ ధరించనివారికి పెట్రోలు బంకుల్లోకి అనుమతించొద్దనే ఆలోచనపై కసరత్తు చేసిన ప్రభుత్వం ప్రస్తుతానికి దాన్ని పక్కనపెట్టింది. వాహనదారులకు అవగాహన కల్పించకుండా ఇలాంటి కఠిన నిబంధనలు విధించటం వల్ల ప్రజల నుంచి తీవ్ర వ్యతిరేకత వస్తుందని భావిస్తున్న ప్రభుత్వం అలాంటి వివాదాస్పద అంశాల జోలికి ఇప్పట్లో వెళ్లొద్దని నిర్ణయించింది.
 
 ఇటీవల ఉన్నతాధికారులు, జిల్లా కలెక్టర్లతో వీడియోకాన్ఫరెన్స్ సందర్భంగా మంత్రి మహేందర్‌రెడ్డి ఈ అంశాన్ని తెరపైకి తెచ్చారు.  దీనిపై ప్రజల్లో వ్యతిరేకత వెల్లువెత్తింది. కొన్ని స్వచ్ఛంద సంస్థలు విమర్శలు గుప్పించాయి. వాహనదారుల్లో ముందుగా అవగాహన తెచ్చిన తర్వాత ఇలాంటి చర్యలకు దిగితే బాగుంటుందని, ముందే బెదరగొట్టేలా చేయటం ఎంతవరకు సబబని ప్రశ్నించాయి. దీంతో ప్రభుత్వం వెనక్కు తగ్గింది. స్వచ్ఛంద సంస్థలను భాగస్వాముల్ని చేసి ప్రజల్లో హెల్మెట్ ధారణపై అవగాహన తేవాలని నిర్ణయించింది.


 - ప్రభుత్వ పరిశీలనలో ప్రతిపాదన
 - కలెక్టర్లు, ఎస్పీల అభిప్రాయం కోరిన
 - రవాణా శాఖ మంత్రి మహేందర్‌రెడ్డి
  
 సాక్షి, హైదరాబాద్: హెల్మెట్ వాడకం విషయంలో క్రమంగా దూకుడు పెంచే దిశగా ప్రభుత్వం అడుగులేస్తోంది. కేవలం అవగాహన కార్యక్రమాలతో వాహనచోదకుల్లో మార్పురావడం లేదని భావిస్తున్న ప్రభుత్వం పెనాల్టీలు విధించే అంశాన్ని పరిశీలిస్తోంది. ముందుగా ఓ గడువు ప్రకటించి వాహనదారులను హెచ్చరించే యోచనలో ఉంది. దీంతోపాటు కీలక ప్రాంతాల్లో హెల్మెట్ లేని వాహనచోదకుల ప్రవేశాన్ని నిరోధిస్తే ఎలా ఉంటుందనే విషయాన్నీ పరిశీలిస్తోంది.
 
 పెట్రోలు బంకులు, చెక్‌పోస్టులు, టోల్‌గేట్లు లాంటి ప్రాంతాలకు వచ్చేవారు విధిగా హెల్మెట్లు ధరించాలని, లేనివారికి ప్రవేశం నిషేధించాలనే దిశగా ఆలోచిస్తోంది. దీనిపై అభిప్రాయాలు తెలపాలని జిల్లా కలెక్టర్లు, ఎస్పీలను ఆదేశించింది. లారీ యజమానుల సంఘం సమస్యలపై చర్చించేందుకు సోమవారం రవాణాశాఖ మంత్రి మహేందర్‌రెడ్డి జిల్లా కలెక్టర్లు, ఎస్పీలు, ఇతర విభాగాల ఉన్నతాధికారులతో వీడియో కాన్ఫరెన్సు నిర్వహించారు. ఈ సందర్భంగా హెల్మెట్ల వినియోగం అంశాన్నీ సమీక్షించారు. మీరిచ్చే అభిప్రాయాల ఆధారంగా ఆదేశాలు జారీ చేయనున్నట్టు చెప్పారు. రాష్ట్రంలో ఏటా ఏడు వేల మంది రోడ్డు ప్రమాదాల్లో చనిపోతుండగా, ఇందులో 20 శాతం మంది ద్విచక్రవాహనదారులేనన్నారు. హెల్మెట్ ధరిస్తే ఈ సంఖ్యను తగ్గించొచ్చన్నారు.
  
 వారి సమస్యలపై తరచూ సమావేశాలు
 తమ సమస్యల పరిష్కారంపై లారీ యజమానులు ప్రభుత్వంపై ఒత్తిడి తెస్తున్న నేపథ్యంలో జిల్లా స్థాయిలో కలెక్టర్లు, ఎస్పీ లు తరచూ సమావేశాలు నిర్వహిస్తూ వాటి పరిష్కారానికి చర్యలుతీసుకోవాలని మంత్రి మహేందర్ రెడ్డి ఆదేశించారు. ఓవర్ లోడ్, మామూళ్ల కోసం పోలీసు వేధింపులు, పార్కింగ్ పేర అక్రమ వసూళ్లు, ఇసుక అక్రమ రవాణా విషయాల్లో వారు ప్రత్యేక దృష్టి సారించాలన్నారు. నగరంలోని మూసాపేట, పెద్ద అంబర్‌పేట, కంచన్‌బాగ్‌లలో లారీల కోసం పార్కింగ్ స్థలాలు కేటాయించినా వాటిని వినియోగించటం లేదనే  ఫిర్యాదులొస్తున్నాయని, దీనిపై చర్యలు తీసుకోవాలని రంగారెడ్డి కలెక్టర్ ను ఆదేశించారు. ఆయా కేసుల్లో పట్టుకున్న వాహనాలు ఎక్కువ కాలం స్టేషన్‌లోనే ఉంచే పద్ధతిని నిరోధించాలని, చట్టానికి లోబడి అవసరమైన స్టేషన్ బెయిల్ ఇచ్చేలా చూడాలని సూచించారు.