కుందుర్పి: అప్పిలేపల్లికి చెందిన చాకలి రమేష్‌ (40) డెంగీ లక్షణాలతో మంగళవారం మృతి చెందాడు. వివరాలిలా ఉన్నాయి. దినసరి కూలీ అయిన రమేష్‌ రెండు వారాల కిందట కర్ణాటకలోని చిత్రదుర్గం వెళ్లి డెంగీ బారిన పడ్డాడు. పది రోజులపాటు చికిత్సలు చేయించుకున్నా కోలుకోలేకపోయాడు. పరిస్థితి విషమించి మంగళవారం మృతి చెందినట్లు రమేష్‌ తమ్ముడు మరిస్వామి తెలిపాడు. మృతుడికి భార్య, ఇద్దరు పిల్లలు ఉన్నారు.


 హిందూపురం అర్బన్‌ : లేపాక్షి మండలం పులమతికి చెందిన రమేష్‌ మృతిపై ఇన్‌చార్జ్‌ ఆర్డీఓ విశ్వనాథ్‌ మంగళవారం విచారణ చేశారు. పేకాట ఆడుతున్న తొమ్మిది మందిని ఎస్‌ఐ శ్రీధర్‌, సిబ్బంది పట్టుకొచ్చి లాఠీలతో చితకబాదడంతో దెబ్బలకు తాళలేక రమేష్‌ సోమవారం రాత్రి మృతి చెందాడు. పోలీసులే కొట్టి చంపారంటూ బంధువులు ఆరోపించారు. ఆ రోజు రాత్రి నుంచి మంగళవారం ఉదయం వరకు హిందూపురం ఆస్పత్రి ప్రాంగణం ఉద్రిక్తంగా మారింది. మృతదేహంతో ఆందోళన చేపట్టాలని బంధువులు, గ్రామస్తులు ప్రయత్నించారు. అయితే అక్కడ భారీగా మోహరించిన పోలీసులు.. వారిని పోస్టుమార్టం గది వైపు పోకుండా నియంత్రించారు. భారీ బందోబస్తు మధ్య శవ పరీక్షలు నిర్వహించారు.
 
 తమకు న్యాయం జరగకుంటే శవాన్ని తీసుకెళ్లేది లేదంటూ బాధితులు భీష్మించారు. ఇంతలో ఇన్‌చార్జ్‌ ఆర్డీఓ విశ్వనాథ్‌ అక్కడికి చేరుకుని వారికి సర్ది చెప్పారు. బాధితులందరినీ తహసీల్దార్‌ కార్యాలయం వద్దకు పిలిపించి మృతుడి భార్య పుష్ప, ఆమె తండ్రిని విచారణ చేసి, వాంగ్మూలం నమోదు చేశారు. పేకాట ఆడుతూ పట్టుబడిన ఇతర వ్యక్తులను కూడా ఆర్డీఓ విచారణ చేశారు. చివరకు చంద్రన్న బీమా పథకం ద్వారా రూ.4 లక్షల పరిహారం అందించేలా కృషిచేయడంతో పాటు నష్టపరిహారం కింద రూ.లక్ష ఇచ్చేలా హామీ చెప్పినట్లు తెలిసింది. అనంతరం భారీ బందోబస్తు మధ్య శవాన్ని పులమతి గ్రామానికి తరలించి అంత్యక్రియలు పూర్తి చేశారు.


 పేకాట ఆడుతున్నారని చావబాదిన లేపాక్షి ఎస్‌ఐ
 అస్వస్థతతో మృతి చెందిన రమేష్‌
 ఆగ్రహించిన మృతుని బంధువులు
 లాకప్‌డెత్‌ చేశారంటూ ఆరోపణ
 
 హిందూపురం అర్బన్‌ / హిందూపురం రూరల్‌/ లేపాక్షి :  పేకాటరాయుళ్లపై పోలీసులు లాఠీలు ఝుళిపించారు. వారి దెబ్బలకు తాళలేక ఓ యువకుడు ప్రాణాలు కోల్పోయాడు. దీంతో పేకాట ఆడితే ప్రాణాలు తీసేస్తారా అంటూ మృతుడి బంధువులు ఆందోళనకు దిగారు. పోలీసుల తీరుపై మండిపడ్డారు. బాధితుల కథనం మేరకు.. లేపాక్షి మండలం పులమతి గ్రామంలోని ఆంజనేయస్వామి ఆలయం వెనుక సోమవారం సాయంత్రం పేకాట ఆడుతున్నట్లు సమాచారం అందుకున్న ఎస్‌ఐ శ్రీధర్‌ తన సిబ్బందితో వెళ్లి పాలిష్‌బండలు అమర్చే కార్మికుడైన రమేష్‌(25)తో సహా తొమ్మిదిమందిని లాఠీలతో చితకబాది పోలీస్‌స్టేషన్‌కు తీసుకెళ్లారు.
 
 అక్కడ మరోమారు లాఠీలకు పని చెప్పారు. లాఠీ దెబ్బలతో తీవ్ర అస్వస్థతకు గురైన రమేష్‌ (25)ను ఇద్దరు కానిస్టేబుళ్లు హిందూపురం ప్రభుత్వాస్పత్రికి తీసుకెళ్లారు. అతన్ని పరీక్షించిన వైద్యులు అప్పటితే మృతి చెందినట్లు నిర్ధారించారు. దీంతో రమేష్‌ను తీసుకొచ్చిన ఇద్దరు కానిస్టేబుళ్లు అక్కడి నుంచి జారుకున్నారు. ఎస్‌ఐ శ్రీధర్‌ కూడా తన సెల్‌ఫోన్‌ స్విచాఫ్‌ చేసుకుని వెళ్లిపోయారు. సీఐలు రాజగోపాల్‌నాయుడు, ఈదుర్‌బాషా, మధుభూçషణ్‌ ఆస్పత్రికి చేరుకుని విషయం బయకు పొక్కకుండా మృతదేహాన్ని మార్చురీకి తరలించారు.
 
 ఏమైనా రాసుకోండి
 జరిగిన సంఘటనపై రూరల్‌ సీఐ రాజగోపాల్‌నాయుడును వివరణ కోరగా... ఆయన స్పందించడానికి నిరాకరించారు. ‘మీ ఇష్టం ఏమైనా రాసుకోండి’ అంటూ వెళ్లిపోయారు.
 
 ‘ముమ్మాటికీ లాకప్‌డెత్తే’
 పేకాట ఆడుతున్నారని పట్టుకెళ్లి లాకప్‌లో వేసి లాఠీలతో విచక్షణారహితంగా కొట్టడం వల్లే రమేష్‌ చనిపోయాడని బంధువులు, పులమతి గ్రామస్తులు ఆరోపించారు. సోమవారం రాత్రి హిందూపురం ఆస్పత్రి వద్ద ధర్నా చేశారు. అనంతరం అక్కడి నుంచి వెళ్లి ఇందిరమ్మ సర్కిల్‌ వద్ద రాస్తారోకో చేపట్టారు. వాహనాల రాకపోకలకు ఇబ్బంది కలగడంతో పోలీసులు వచ్చి ఆందోళనకారులను సర్దిచెప్పేందుకు ప్రయత్నించారు. కొట్టి చంపింది కాక మళ్లీ సర్దిచెప్పేందుకు వస్తారా అంటూ బాధితులు ఆగ్రహం వ్యక్తం చేశారు.
 
 మా మామను పొట్టనపెట్టుకున్నారు : మృతుడి భార్య పుష్ప
 పేకాట ఆడితే ఏదో చేయరాని నేరం చేసినట్లు చితకబది కొట్టి చంపేస్తారా ? మా మామను పోలీసులు పొట్టన పెట్టుకున్నారంటూ రమేష్‌ భార్య పుష్ప కన్నీరు మున్నీరైంది. ఆమెను సముదాయించడం ఎవరి తరమూ కాలేదు. విచారణ జరిపి న్యాయం చేస్తామని పోలీసులు ఆందోళనకారులను సముదాయించారు.


 ఎస్కేయూ : శ్రీకృష్ణదేవరాయ విశ్వవిద్యాలయం, క్యాంపస్‌ కళాశాలలకు సోమవారం సెలవు ప్రకటించినట్లు ఎస్కేయూ రిజిస్ట్రార్‌ ఆచార్య కె.సుధాకర్‌బాబు తెలిపారు. అకడమిక్‌ విభాగంలో విధులు నిర్వర్తిస్తున్న రమేష్‌ అనే ఉద్యోగి సొంత గ్రామమైన బాకరాపేటలో అనారోగ్యంతో మరణించారన్నారు. ఆయనకు సంతాపంగా వర్సిటీకి సెలవు ప్రకటించామన్నారు.