జీవితం అనూహ్యమైనది, ప్రతిదీ సెకన్లలో మారిపోతుంది. సంతోషం లేదా దుఃఖం ఏదీ శాశ్వతం కాదు, జీవితంలోని ప్రతి దశ మంచిదైనా, చెడ్డదైనా గడిచిపోతుంది. ఒకప్పుడు నిత్యం సినిమా షూటింగ్‌లతో బిజీగా ఉంటూ కొంతమేరకు ఆర్థికంగా ఆయన నిలబడ్డాడు.. చేతినిండా సంపాదనతో భార్యాపిల్లలతో సంతోషంగా ఉన్నాములే అనుకున్న సమయంలో ఆ వ్యక్తి జీవింతంలోకి ఉపద్రవంలా ఊహించని కష్టాలు వస్తే.. అనారోగ్యం కారణంగా కూడబెట్టిన డబ్బంతా ఖర్చు పెట్టినా ఫలితం లేక చివరకు కనీసం మందులు కూడా కొనలేని స్థితిలో మరణిస్తే..  ఇదంతా సనిమా కథ కాదు.. ఒక హిట్‌ నటుడి జీవితం. స్లమ్‌డాగ్ మిలియనీర్ (2008), పీప్లీ లైవ్ (2010), ది లెజెండ్ ఆఫ్ భగత్ సింగ్ (2002), జాలీ ఎల్‌ఎల్‌బి 2, పాన్ సింగ్ తోమర్ వంటి చిత్రాలలో నటించిన బాలీవుడ్‌ ప్రముఖ నటుడు సీతారాం పంచల్ గురించే ఇదంతా.. తన నటనతో ఎంతో మంది హృదయాలను గెలుచుకున్న ఈ నటుడు 10 ఆగస్టు 2017న పేదరికంలో మరణించాడని తెలిస్తే మీరు షాక్ అవుతారు. స్లమ్‌డాగ్ మిలియనీర్ చిత్రానికి ఆస్కార్‌ అవార్డు దక్కడంలో ఆయన పాత్ర కూడా చాలా కీలకంగా ఉంది. వెండితెరపై  ఎన్నో హిట్‌ సినిమాల్లో నటించిన సీతారాం నిజ జీవితంలో మాత్రం పేదరికంతో తన ప్రయణాన్ని ముగించాడు.  కిడ్నీ, ఊపిరితిత్తుల క్యాన్సర్‌తో బాధపడుతున్న ఆయన కదల్లేని పరిస్థితికి చేరుకున్నాడు. దీంతో సినిమా అవకాశాలు లేక కొన్ని రోజులుగా ఇంట్లోనే ఉండిపోయారు. ఈలోపు సినిమాల ద్వారా ఆయన కూడబెట్టిన డబ్బంతా కరిగిపోయింది. అయినా ఆరోగ్యం కుదుటపడలేదు. దీంతో సాయం కోసం చెయి చాపాడు. 2017లో హర్యానా ప్రభుత్వం రూ. 5 లక్షలు ఇచ్చింది. ఆ డబ్బు కూడా చాల్లేదు. అతని పరిస్థితిని గమనించిన సినీ ఆర్టీస్ట్‌ అసోసియేషన్‌ అతనికి ఆర్థిక సాయం చేయాలని నెటిజన్లను కోరింది. ఆయనకు సాయం చేయాలంటూ విరాళాల ఇవ్వాలని వేడుకుంది. కానీ ఆ సమయంలో కేవలం రూ. 1,06,575 మాత్రమే వచ్చింది. సరైన చికిత్స అందించేందుకు చేతిలో డబ్బు లేదు.. తాను కలిసి నటించిన స్టార్‌ హీరోలు ఎవరూ సాయం చేసేందుకు ముందుకు రాలేదు. రోజులు గడిచాయి అతని ఆరోగ్య పరిస్థితి మరింత క్షీణించింది. బరువు పూర్తిగా తగ్గిపోయాడు. ఎవరూ గుర్తించలేని స్థితికి చేరుకున్నాడు. అలా 2017 ఆగష్టు 10న ఆయన మరణించాడు. ఒక ఇంటర్వ్యూలో సీతారాం పంచల్ భార్య  మాట్లాడుతూ.. 'నా భర్త డబ్బు లేక మాత్రమే చనిపోయాడు. ఆ సమయంలో సరైన చికిత్స అందించి ఉంటే బతికేవాడని డాక్టర్స్‌ చెప్పారు. కానీ, నా వద్ద అందుకు సరిపడా డబ్బు లేదు. డబ్బు మాత్రమే ఉండి ఉంటే ఆయన బతికే వాడనే విషయాన్ని నేను జీర్ణించుకోలేకపోయాను. ఆయన చాలామంది స్టార్స్‌తో కలిసి నటించాడు. కానీ వారెవరూ సాయం చేయలేదు. కనీసం చూసేందుకు కూడా రాలేదు. చివరి రోజుల్లో ఆస్పత్రిలో బిల్లు కూడా చెల్లించలేకపోయాను. ఆస్పత్రి సిబ్బంది వారిని బతిమలాడి ఆయన పార్థివదేహాన్ని ఇంటికి తెచ్చాను. ఎవరైనా సాయం చేసి ఉంటే ఆయన బతికే వారు.' అని వాపోయింది. అక్షయ్ కుమార్,జాకీర్ హుస్సేన్,అజయ్ దేవగన్, ఇర్ఫాన్‌ ఖాన్‌ వంటి స్టార్స్‌తో పాటు అమీర్ ఖాన్ ప్రొడక్షన్స్‌లో కూడా సీతారాం పంచల్ పనిచేశాడు.


 ముంబై: బాలీవుడ్‌ సీనియర్‌ నటుడు సీతారాం పంచల్‌   మృతి చెందారు. గత మూడు ఏళ్లుగా కెన్సర్‌తో బాధపడుతున్న ఆయన గురువారం ఉదయం తుది శ్వాస విడిచారు. 1994లో వచ్చిన బాండిట్‌ క్వీన్‌ చిత్రం ద్వారా వెండి తెరకు పరిచయమైన సీతారాం ‘పీప్లి లైవ్‌’, ‘స్లమ్‌డాగ్‌ మిలియనీర్‌’, ‘పాన్‌సింగ్‌తోమర్‌’, ‘జాలీ ఎల్‌ఎల్‌బీ-2’ తదితర చిత్రాల్లో నటించారు. అనారోగ్యం కారణంగా సినిమా అవకాశాలు లేక కొన్ని రోజులుగా ఇంట్లోనే ఉంటున్నారు. ఆర్థిక పరిస్థితి సరిగ్గాలేక ఆయన గత నెలలో సోషల్‌ మీడియా వేదికగా తన చికిత్స కోసం అవసరమైన డబ్బు సాయం చేయాల్సిందిగా కోరారు.
 
 ఆయన ధీన స్థితిని గుర్తించిన హరియాణ ప్రభుత్వం చికిత్సకు రూ.5లక్షలు సాయం అందించింది. సినీ ఆర్టీస్ట్‌ అసోసియేషన్‌ కూడా సీతారాం వైద్యం కోసం విరాళలు సేకరించింది. సీతారామ్‌కు 2014లో కెన్సర్‌ వచ్చిందని, అప్పటి నుంచి ఆయుర్వేదిక్‌ చికిత్స తీసుకుంటున్నట్లు ఆయన భార్య ఉమ మీడియాకు తెలిపారు. బుధవారం 26వ పెళ్లి రోజు జరుపుకున్న సీతారాం మరుసటి రోజే మరణించడంతో ఆ కుటుంబంలో తీవ్ర విషాదం నెలకొంది.