సాక్షి, కాంచీపురం: ఆగివున్న లారీని కారు ఢీకొనడంతో నలుగురు టెక్కీలు దుర్మరణం పాలయ్యారు. ఈ సంఘటన కాంచీపురం జిల్లా మధురాంతకం సమీపంలోని చెన్నై– తిరుచ్చి జాతీయ రహదారిపై శనివారం చోటుచేసుకుంది. వివరాలు...చెన్నై ఐటీ పార్కులో ఉద్యోగం చేస్తున్న కొందరు టెక్కీలతో ప్రయాణిస్తున్న కారు విల్లుపురం నుంచి చెన్నై వైపుగా వెళ్తూ పట్టాలం సమీపంలోని పలపాక్కం వద్ద మరమ్మతులకు గురై నిలబడి ఉన్న సరుకు లారీని వెనుక వైపు నుంచి వేగంగా ఢీకొట్టింది. దీంతో కారులో ప్రయాణిస్తున్న ఐశ్వర్య(23), ప్రశాంత్‌(25), దీపన్‌(22) అక్కడికక్కడే మృతి చెందారు.  చికిత్స పొందుతూ ఏపీలోని ఒంగోలుకు చెందిన గుర్రం మెహర్ సుకుమార్‌ (25) మృతి చెందాడు. గాయపడిన అఖిల(25), శరత్‌(25)ను చెంగల్పట్టు ప్రభుత్వాసుపత్రికి తరలించారు. ప్రమాదంలో కారు ముందుభాగం నుజ్జునుజ్జు అయింది. ప్రమాదం జరిగిన సమయంలో వర్షం కురుస్తుంది. తీవ్ర గాయాలతో కారులో ఇరుక్కున వారిని స్థానికులు, వాహనచోదకులు గమనించి బయటకు తీసి పోలీసులకు సమాచారం అందించారు. విషయం తెలిసిన వెంటనే పట్టాలం పోలీసులు, ట్రాఫిక్‌ పోలీసులు హుటాహుటిన అక్కడకు చేరుకుని రక్షణ చర్యలు చేపట్టారు. ప్రమాదం గురించి పోలీసులు కేసు నమోదు చేసి విచారణ జరుపుతున్నారు. మృతదేహాలకు శవ పంచనామా నిర్వహించారు. లారీ కింద చిక్కుకున్న కారును అతి కష్టం మీద బయటకు తీశారు. జాతీయ రహదారిపై రెండు గంటల పాటు ట్రాఫిక్‌ స్తంభించింది.  మృతులు కేరళ, ఏపీకి చెందినవారు.. మృతిచెందిన నలుగురిలో ముగ్గురిది కేరళ, ఒకరిది ఏపీ. ఐశ్వర్య స్వస్థలం కేరళలోని తిరుచ్చూరు, ప్రశాంత్,దీపన్‌ల స్వస్థలం నామక్కల్‌ జిల్లా తిరుచెంగోడు తాలుకా కైలాసనాథ పాళయం, మేఘర్‌ స్వస్థలం ఏపీ. ప్రమాద విషయాన్ని కుటుంబ సభ్యులకు పోలీసలు సమాచారం అందించారు.    


 పూణే: పూణే-అహ్మద్‌నగర్‌ హైవేపై జరిగిన ఘోర రోడ్డు ప్రమాదంలో ఏడుగురు సాఫ్ట్‌వేర్‌ ఇంజినీర్లు దుర్మరణం చెందారు. ఆదివారం జరిగిన ఈ ఘటన వివరాలివీ.. వేర్వేరు ఐటీ సంస్థల్లో పనిచేస్తున్న దాదాపు 13 మంది ఇంజనీర్లు మినీ బస్సులో అహ్మద్‌నగర్‌లో జరిగిన స్నేహితుని వివాహ వేడుకలో పాల్గొని మినీ బస్సులో తిరిగి వస్తున్నారు. వారి వాహనం ఫూణేకు నలబై కిలోమీటర్ల దూరంలో ఉన్న లోనికండ్‌ గ్రామం సమీపంలో ఉండగా ఎదురుగా వేగంగా వచ్చిన ట్యాంకర్‌ ఢీకొట్టింది.
  
 అనంతరం ఆ వెనుకే ఉన్న మరో బస్సును కూడా ఢీకొట్టింది. ఈ ఘటనలో మినీ బస్సుల్లో ఉన్న ఆరుగురు అక్కడికక్కడే చనిపోగా మరో ఏడుగురు తీవ్రంగా గాయపడ్డారు. మృతుల్లో ఇద్దరు మహిళా ఇంజినీర్లు కూడా ఉన్నారు. ఆస్పత్రిలో చికిత్స పొందుతున్న మరో టెకీ సోమవారం మృతిచెందారు.
  
 అంతేకాదు, బస్సులో ఉన్న ఓ వ్యక్తి స్వల్పంగా గాయపడ్డారు. ట్యాంకర్‌ డ్రైవర్‌ కృష్ణ కితర్వాడ్‌(22) నిర్లక్ష్యంగా వాహనాన్ని నడిపి ప్రమాదానికి కారణమయ్యాడని పోలీసులు తెలిపారు. ఈ మేరకు అతడిని సోమవారం అదుపులోకి తీసుకున్నారు. అతనిపై వివిధ సెక‌్షన్ల కింద కేసులు నమోదు చేసి విచారణ చేపట్టారు.