సాక్షి, న్యూఢిల్లీ : వరుసగా మూడోరోజు పార్లమెంటు దద్దరిల్లింది. ఒకవైపు ప్రత్యేక హోదా కోసం వైఎస్‌ఆర్‌సీపీ ఎంపీల ఆందోళన, మరోవైపు విగ్రహాల ధ్వంసంపై రగడతో పార్లమెంటు ఉభయసభలు బుధవారం ఉదయం దద్దరిల్లాయి. ఎంపీల ఆందోళన, గందరగోళం నడుమ లోక్‌సభ ప్రారంభమైన వెంటనే వాయిదా పడింది. అటు రాజ్యసభలోనూ ప్రత్యేక హోదా ఆందోళనలు మూడురోజు కొనసాగాయి. తెలుగు ఎంపీలు బుధవారం కూడా రాజ్యసభలో ప్రత్యేక హోదా కోసం నిరసన తెలిపారు. విగ్రహాలపై దాడి అంశాన్ని ఇతర ప్రతిపక్ష పార్టీలు లేవనెత్తాయి. కావేరి నదీ జలాల అంశం కూడా దీనికి తోడయింది. దీంతో సభ్యుల ఆందోళన నడుమ కాసేపు కొనసాగిన రాజ్యసభ.. అనంతరం మధ్యాహ్నం 2 గంటల వరకు వాయిదాపడింది. అనంతరం లోక్‌సభ మధ్యాహ్నం 12 గంటలకు తిరిగి సమావేశమైనప్పటికీ.. మళ్లీ సభ్యులు తమ ఆందోళనను యథాతథంగా కొనసాగించారు. సభ్యుల ఆందోళన, గందరగోళం నడుమ ఎంతోసేపు సభ నడిపించలేకపోయిన స్పీకర్‌ సుమిత్రా మహాజన్‌ చివరకు గురువారానికి సభను వాయిదా వేశారు. గత సోమవారం పునఃప్రారంభమైన పార్లమెంటు బడ్జెట్‌ సమావేశాల్లో గత మూడురోజులుగా వాయిదాల పర్వం కొనసాగుతున్న సంగతి తెలిసిందే. ఒకవైపు ప్రత్యేక హోదా కోసం వైఎస్‌ఆర్‌సీపీ, ఇతర తెలుగు ఎంపీల ఆందోళన, మరోవైపు కేంద్ర ప్రభుత్వ తీరుపై ఇతర ప్రతిపక్షాల నిరసన నేపథ్యంలో గత మూడు రోజులుగా పార్లమెంటు సమావేశాల్లో ప్రతిష్టంభన నెలకొంది. ఈ నేపథ్యంలో సభను సజావుగా నడిపించేందుకు లోక్‌సభ స్పీకర్‌ సుమిత్రా మహాజన్‌ బుధవారం మధ్యాహ్నం ఒంటిగంటకు అఖిలపక్ష సమావేశం నిర్వహించబోతున్నారు.


 న్యూఢిల్లీ :  నిర్భయ  డాక్యుమెంటరీ  ఉదంతంపై బుధవారం  రాజ్యసభ దద్దరిల్లింది.   ప్రశ్నోత్తరాల సమయంలో దీనిపై  చర్చ చేపట్టిన సభ.. నిర్భయ కేసులో  దోషి ముఖేష్ కుమార్ను ఇంటర్వ్యూ చేయటాన్ని తీవ్రంగా ఖండించింది.     దోషిగా ఉన్న అతడితో ఇంటర్వ్యూ కు అనుమతిచ్చిన జైలు అధికారులపై చర్యలు  తీసుకోవాలని  ప్రతిపక్షాలు పట్టుబట్టాయి. ఈ ఘటనపై  ఏం చర్యలు తీసుకున్నారో  తెలపాలని ఛైర్మన్ హమీద్ అన్సారీ సూచించారు.
 
 మరోవైపు డిప్యూటీ ఛైర్మన్ కురియన్ కూడా ఈ ఇంటర్వ్యునూ ఖండించారు.  బాధ్యులపై చర్యలు తీసుకుంటామని కేంద్రమంత్రి ముఖ్తార్ అబ్బాస్ నఖ్వీ సభకు తెలిపారు.  ఈ సంఘటనపై కేంద్ర హోంమంత్రి రాజ్నాథ్ సింగ్ వివరణ ఇస్తూ ... ఇది చాలా  తీవ్రమైన విషయమని, వ్యక్తిగతంగా కూడా తనను  ఈ సంఘటన తనను ఎంతో బాధించిందన్నారు.   డాక్యుమెంటరీ తీసిన వ్యక్తికి నోటీసులు జారీ చేశామని తెలిపారు.
 
 కాగా ఇదే విషయంపై రాజ్యసభలోని మహిళా సభ్యులంతా ధ్వజమెత్తారు. ఎంపీ, బాలీవుడ్ నటిజయాబచ్చన్  మాట్లాడుతూ, అసలు దోషికి మరణ శిక్ష ఎందుకు విధించలేదో చెప్పాలన్నారు. మొసలి కన్నీళ్లు తమకు అవసరం లేదంటూ ఆగ్రహం వ్యక్తం చూస్తూ  సభను వాకౌట్ చేశారు.   నిర్మలా సీతారామన్,  మాయావతి, అంబికాసోనీ తదితరులు దీనిపై ఆందోళన వ్యక్తం చేశారు. సత్వరమే విచారణ చేపట్టాలని డిమాండ్ చేశారు. సభ్యుల ఆందోళనతో సభ కాసేపు వాయిదా పడింది.   మరోవైపు ముకేష్ ఇంటర్వ్యూ పై దేశవ్యాప్తంగా నిరసనలు వెల్లువెత్తడంతో ఆ ఇంటర్వ్యూ దృశ్యాల ప్రసారంపై నిషేధం  విధిస్తూ  కేంద్ర ప్రసార మంత్రిత్వ శాఖ  నోటీసులు  జారి చేసింది.