రోడ్డు ప్రమాదంలో ఒకరు మృతి: మరొకరికి తీవ్ర గాయాలు

రోడ్డు ప్రమాదంలో ఒకరు మృతి: మరొకరికి తీవ్ర గాయాలు

గంగవరం : మండల కేంద్రంలంలోని మధ్య వీధిలో బుధవారం జరిగిన రోడ్డు ప్రమాదంలో ఒక వ్యక్తి మృతి చెందగా, మరోకరు తీవ్రగాయాలతో బయటపడ్డాడు. ఈ కేసుకు సంబంధించిన వివరాలను ఎస్‌ఐ డి.భూషణం విలేకరులకు తెలిపారు. బుధవారం సాయంత్రం రంపచోడవరం మండలం చిన్నగెద్దాడ గ్రామానికి చెందిన కలుముల జోగిరెడ్డి (33) తన బంధువు ఎండపల్లి రాయుడు (31)తో కలిసి బైక్‌పై పాతగంగవరం వైపు వెళ్తుండగా కొత్తపల్లి వైపు నుంచి బైక్‌పై వస్తున్న శెట్టిపల్లి గ్రామానికి చెందిన కురుసం పాపారావు ఎదురుగా వచ్చి ఢీకొన్నాడు. ప్రమాదంలో జోగిరెడ్డి, రాయుడులకు తీవ్ర గాయాలైయ్యాయి. స్థానికులు సమాచారం మేరకు సంఘటన స్థలానికి చేరుకున్న పోలీసు సిబ్బంది క్షతగాత్రులను స్థానిక ప్రాథమిక ఆరోగ్య కేంద్రానికి తరలించారు. కలముల జోగారెడ్డి తలకు బలమైన గాయం కావడంతో వైద్య సేవలు అందించే సమయంలో మృతి చెందాడు. ఎండపల్లి రాయుడు కాళ్లకు, చేతులకు తీవ్ర గాయాలైనట్టు ఎస్‌ఐ భూషణం తెలిపారు. తీవ్ర గాయాలైన ఎండపల్లి రాయుడును మెరుగైన వైద్యం కోసం రంపచోడవరం ఏరియా ఆసుపత్రికి తరలించామని, జోగిరెడ్డి మృతదేహాన్ని పోస్టుమార్టం నిమిత్తం అడ్డతీగల ప్రభుత్వాసుపత్రికి తరలించినట్టు ఎస్‌ఐ తెలిపారు. కేసు నమోదు చేసి దర్యాపు చేస్తున్నట్టు తెలిపారు.