గ్రామస్తుల శ్రమదానం

గ్రామస్తుల శ్రమదానం

● తూటంగిలో తాగునీటి ట్యాంకును శుభ్రం చేసిన గ్రామ మహిళలు

డుంబ్రిగుడ: మండలంలోని తూటంగి పంచాయతీ కేంద్రంలోని తాగునీటి ట్యాంకులో చెత్తచెదారం నిండిపోయి ఉండడంతో పాటు ఇటీవల కురిసిన వర్షాలకు కొండపైన ఉన్న మట్టి కొట్టుకొచ్చి ట్యాంకులో నిండిపోయింది. గ్రామస్తులకు ట్యాంకులోని బురద నీరే దిక్కుకావడంతో పలువురు స్థానికులు అనారోగ్యానికి గురయ్యారు. దీంతో స్థానికులంతా కలిసి ట్యాంకును శుభ్రపరిచేందుకు బుధవారం శ్రమదానం చేపట్టారు. ఈ మేరకు కొందరు మహిళలు ట్యాంకు లోపలకు దిగి బురదనీటిని, మట్టిని తొలగించారు. ట్యాంకు లోపల, బయట బ్లీచింగ్‌ పౌడర్‌ చల్లించారు. ట్యాంకు శుభ్రం చేయడంపై స్థానికులను పలువురు అభినందించారు. వార్డు సభ్యులు బాలన్న, చక్రి, ఎన్‌ఆర్‌ఈజీఎస్‌ ఫీల్డ్‌ అసిస్టెంట్‌ లక్ష్మణ్‌ తదితరులున్నారు.