మద్యం దుకాణాల వద్ద ఘర్షణ

మద్యం దుకాణాల వద్ద ఘర్షణ

గుర్రంకొండ : మండల కేంద్రమైన గుర్రంకొండలోని మద్యం దుకాణాల వద్ద పెద్ద ఎత్తున ఘర్షణ జరిగింది. ఈ ఘర్షణలో మద్యం దుకాణంలో పనిచేసే ఓ వ్యక్తికి తీవ్ర రక్త గాయాలయ్యాయి. కాగా ఈ పంచాయితీ పోలీస్‌ స్టేష్‌కు చేరింది. వివరాలు ఇలా ఉన్నాయి. గ్రామంలోని తూముకుంట రోడ్‌లో రెండు మద్యం దుకాణాలు నిర్వహిస్తున్నారు. వీటి పక్కనే పెద్ద ఎత్తున చిల్లర దుకాణాలు ఉన్నాయి. ఈ దుకాణాల్లో మద్యం ప్రియులు రాత్రింబవళ్లు మద్యం సేవిస్తుంటారు. ఈ నేపథ్యంలో ఆదివారం సాయంత్రం ఓ మద్యం దుకాణంలో పనిచేసే వ్యక్తికి మద్యం దుకాణం పక్కనే చిల్లర దుకాణం నిర్వహించే వారికి మధ్య వివాదం చెలరేగింది. ఈ వివాదం పెద్దదిగా మారి చిల్లర దుకాణం నిర్వహించే వారు మద్యం దుకాణంలో పనిచేసే వ్యక్తిని చితకబాదారు. దీంతో అతనికి తీవ్ర రక్తగాయాలయ్యాయి. విషయం తెలుసుకొన్న పోలీసులు హుటాహుటిన మద్యం దుకాణాల వద్దకు చేరుకొని అందరిని పోలీస్‌ స్టేషన్‌కు తరలించారు.