రుగ్వేద మహా సభలు ప్రారంభం

రుగ్వేద మహా సభలు ప్రారంభం

పి.గన్నవరం: ముంగండ గ్రామంలోని చింతామణి గణపతి మందిరంలో బుధవారం రుగ్వేద సంహిత పారాయణ, వేద విద్వత్‌ మహా సభలు ఘనంగా ప్రారంభమయ్యాయి. ఉమ్మడి తెలుగు రాష్ట్రాలతో పాటు కర్ణాటక నుంచి సుమారు 70 మంది రుగ్వేద పండితులు హాజరయ్యారు. ఐదు రోజుల పాటు ఈ సభలు జరుగుతాయి. రుగ్వేదాన్ని పరిరక్షించేందుకు ఈ మహాసభలు నిర్వహిస్తున్నట్టు ముంగండ ఆశ్వలాయన మహిర్షి రుగ్వేద పరిషత్‌ సభ్యులు తెలిపారు. ఇందులో భాగంగా బుధవారం గ్రామంలోని ఉమా రామలింగేశ్వర స్వామి ఆలయం నుంచి సభాస్థలి వరకూ గ్రామ ప్రదక్షిణ జరిగింది. ఈ సందర్భంగా గణపతి పూజ, స్వస్తి వాచనం, పుణ్యాహవాచనం, పంచగవ్యప్రాశన, అఖండ స్థాపన, వేద పురుష కలశస్థాపన నిర్వహించారు. అనంతరం పండితులు వేద పఠనం చేశారు. కార్యక్రమాలకు ఆశ్వలాయన మహర్షి రుగ్వేద పరిషత్‌ సభ్యులు ఆధ్వర్యం వహించారు.