త్వరలో విద్యా, వైజ్ఞానిక ప్రదర్శనలు

త్వరలో విద్యా, వైజ్ఞానిక ప్రదర్శనలు

అమలాపురం రూరల్‌: విద్యార్థుల్లో దాగి ఉన్న సృజనాత్మకత, పరిశోధనాసక్తిని వెలికి తీసేందుకు త్వరలో విద్యా, వైజ్ఞానిక ప్రదర్శనలు నిర్వహించనున్నట్టు జిల్లా విద్యాశాఖ అధికారి షేక్‌ సలీం బాషా తెలిపారు. ఈ మేరకు బుధవారం ప్రకటన విడుదల చేశారు. సమాజంలో జరుగుతున్న మార్పులకు అనుగుణంగా విద్యార్థులు తమ ఆలోచనలకు పదును పెట్టాలన్నారు. జిల్లాలోని ప్రభుత్వ, ప్రైవేట్‌ పాఠశాలల్లో 6 నుంచి 10వ తరగతి చదువుతున్న విద్యార్థులందరూ ప్రాజెక్టులను తయారు చేయాలన్నారు. సాంకేతికత, ఆహారం, ఆరోగ్యం, పరిశుభ్రత, రవాణా, సమాచారం, సేంద్రియ వ్యవసాయం, విపత్తుల నిర్వహణ, నమూనాలు, వ్యర్థాలు, వనరుల నిర్వహణ వంటి వాటిపై ప్రాజెక్టులను రూపొందించాలని సూచించారు. మండల స్థాయి ప్రదర్శన తేదీలను ఈ నెల 29వ తేదీకి ముందుగానే ఎంఈవోలు తెలియజేయాలన్నారు. ఏవైనా సందేహాలు ఉంటే జిల్లా సైన్స్‌ అధికారి సుబ్రహ్మణ్యాన్ని 96401 88525 నంబర్‌లో సంప్రదించాలన్నారు.