రోడ్డు ప్రమాదంలో జార్ఖండ్‌ వాసి మృతి

రోడ్డు ప్రమాదంలో జార్ఖండ్‌ వాసి మృతి

అడ్డగూడూరు: జార్ఖండ్‌ రాష్ట్రానికి చెందిన యువకుడు బైక్‌పై వెళ్తూ అదుపుతప్పి కిందపడి మృతిచెందాడు. ఈ ఘటన ఆదివారం రాత్రి అడ్డగూడూరు మండల కేంద్రం శివారులో జరిగింది. పోలీసులు, స్థానికులు తెలిపిన వివరాల ప్రకారం.. అడ్డగూడూరు మండలంలోని గురజాల నుంచి చౌల్ల రామారం మధ్యన చేపట్టిన రోడ్డు నిర్మాణ పనుల్లో జార్ఖండ్‌లోని కోడర్‌మా జిల్లాకు చెందిన పింటూసావ్‌(30) హిటాచీ డ్రైవర్‌గా పనిచేస్తున్నాడు. పింటూసావ్‌ ఆదివారం రాత్రి 9గంటల ప్రాంతంలో అడ్డగూడూరు మండల కేంద్రలో భోజనం చేసి తిరిగి హిటాచీ వద్దకు బైక్‌పై వెళ్తుండగా.. అడ్డగూడూరు మండల కేంద్రం శివారులో బైక్‌ అదుపుతప్పడంతో రోడ్డు పక్కనే ఉన్న గుంతలో పడి అక్కడికక్కడే మృతిచెందాడు. సోమవారం తెల్లవారుజామున వ్యవసాయ పనుల కోసం వెళ్తున్న రైతులు చూసి పోలీసులకు సమాచారం ఇచ్చారు. పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం రామన్నపేట ప్రభుత్వ ఆస్పత్రికి తరలించారు. ఈ మేరకు కేసు నమోదు చేసి దర్యాప్తు చేస్తున్నట్లు ఎస్‌ఐ నాగరాజు తెలిపారు.