బైక్‌ను ఢీకొట్టిన కారు.. ఒకరికి గాయాలు

రామన్నపేట: బైక్‌ను కారు ఢీకొనడంతో ఓ వ్యక్తికి తీవ్ర గాయాలయ్యాయి. రామన్నపేట మండలం శోభనాద్రిపురం గ్రామానికి చెందిన కొండకింది శేఖర్‌రెడ్డి సోమవారం బైక్‌పై రామన్నపేట నుంచి స్వగ్రామానికి వెళ్తుండగా.. రామన్నపేట మండల కేంద్రంలోని బీసీ కాలనీ సమీపంలో ఎదురుగా వస్తున్న కారు ఢీకొట్టింది. ఈ ప్రమాదంలో శేఖర్‌రెడ్డి కాలు విరిగింది. ఈ మేరకు కేసు నమోదు చేసి దర్యాప్తు చేస్తున్నట్లు ఎస్‌ఐ పి. మల్లయ్య తెలిపారు.

లారీ ఢీకొని..

వేములపల్లి (మాడ్గులపల్లి): మాడ్గులపల్లి మండలం కుక్కడం గ్రామ శివారులో బైక్‌పై వెళ్తున్న వ్యక్తి లారీ ఢీకొట్టడంతో తీవ్రంగా గాయపడ్డాడు. మాడ్గులపల్లి మండలం అభంగాపురం గ్రామానికి చెందిన మౌలానా మాడ్గులపల్లి మండల కేంద్రంలో కారు మెకానిక్‌గా పనిచేస్తున్నాడు. సోమవారం సాయంత్రం పని ముగించుకుని బైక్‌పై ఇంటికి వెళ్తుండగా.. కుక్కడం గ్రామ శివారులో పెద్దదేవులపల్లి నుంచి కుక్కడం వైపు వస్తున్న లారీ బైక్‌ను ఢీకొట్టింది. ఈ ప్రమాదంలో మౌలానా తీవ్రంగా గాయపడ్డాడు. స్థానికులు వెంటనే అతడి కుటుంబ సభ్యులకు సమాచారం అందించి చికిత్స నిమిత్తం మిర్యాలగూడ ఏరియా ఆస్పత్రికి తరలిచారు. పరిస్థితి విషమంగా ఉండడంతో కుటుంబ సభ్యులు అతడిని హైదరాబాద్‌కు తరలించారు.