బైక్‌ పైనుంచి కిందపడి..

మిర్యాలగూడ టౌన్‌: బైక్‌ పైనుంచి కిందపడి మహిళ మృతి చెందింది. ఈ ఘటన గురువారం మిర్యాలగూడ మండలంలో జరిగింది. మిర్యాలగూడ రూరల్‌ ఎస్‌ఐ పిల్లి లోకేష్‌ తెలిపిన వివరాల ప్రకారం.. మిర్యాలగూడ మండలం శ్రీనివాస్‌నగర్‌ గ్రామానికి చెందిన నెక్కండి రమేష్‌, అతడి భార్య దివ్య(28) బైక్‌పై మిర్యాలగూడకు వస్తున్నారు. మార్గమధ్యలో వెంకటాద్రిపాలెం గ్రామ శివారులో రైల్వే బ్రిడ్జి సమీపంలో కోదాడ–జడ్చర్ల జాతీయ రహదారిపై బైక్‌ అదుపుతప్పడంతో దివ్య బైక్‌ పైనుంచి కిందపడింది. ఆమెకు తీవ్ర గాయాలయ్యాయి. అక్కడే ఉన్న పండ్ల వ్యాపారులు వెంటనే ఆమెను 108 వాహనంలో మిర్యాలగూడ ఏరియా ఆస్పత్రికి తరలించారు. పరిస్థితి విషమంగా ఉండడంతో మెరుగైన వైద్యం కోసం నల్లగొండలోని ఓ ప్రైవేట్‌ ఆస్పత్రికి తరలించగా చికిత్సపొందుతూ మృతి చెందింది. మృతదేహాన్ని మిర్యాలగూడ ఏరియా ఆస్పత్రి మార్చురీలో భద్రపరిచారు. మృతురాలి భర్త రమేష్‌కు కూడా స్వల్ప గాయాలయ్యాయి. మృతురాలి మేనమామ అటూరు ఉదయ్‌కుమార్‌ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్‌ఐ తెలిపారు. మృతురాలికి ఒక కుమారుడు ఉన్నాడు.