కరాచీ:ఇటీవల కాలంలో పాకిస్తాన్ క్రికెట్ లో మ్యాచ్ ఫిక్సింగ్ ఉదంతాలు తరచు వెలుగుచూస్తున్న సంగతి తెలిసిందే. అంతర్జాతీయ మ్యాచ్ ల దగ్గర్నుంచీ, దేశీయ లీగ్ ల వరకూ పాక్ లో ఏదొక చోటు బుకీలు క్రికెటర్లకు గాలం వేయడం పరిపాటిగా మారిపోయింది.  తాజాగా పాక్ క్రికెట్ కెప్టెన్ సర్ఫరాజ్ అహ్మద్ ను ఒక బుకీ సంప్రదించిన విషయం ఆలస్యంగా వెలుగులోకి వచ్చింది. యూఏఈలో శ్రీలంకతో వన్డే సిరీస్ లో భాగంగా దుబాయ్ లోని ఒక హోటల్ ల్లో సర్పరాజ్ ను బుకీ కలిసిన విషయాన్ని పీసీబీ వర్గాలు ధృవీకరించాయి. అయితే సదరు బుకీ చేసిన ఆఫర్ ను సర్ఫరాజ్ తిరస్కరించడమే కాకుండా అక్కడ ఉన్న అవినీతి నిరోధక అధికారులు వెంటనే సమాచారం అందించినట్లు పీసీబీ సీనియర్ అధికారి తెలిపారు.  'సర్ఫరాజ్ ను బుకీ సంప్రదించాడు. ఈ విషయాన్ని వెంటనే తెలియజేయడంతో అవినీతి నిరోధక అధికారులు అప్రమత్తమయ్యారు. గేమ్ ను ఫిక్సింగ్ బారిన పడకుండా చేయాలంటే సర్ఫరాజ్ ను ఉదాహరణగా తీసుకుని పాక్ క్రికెటర్లు ముందుకు సాగాలి. ఒక ఆటగాడిగా, కెప్టెన్ గా సర్ఫరాజ్ గౌరవప్రదంగా వ్యవహరించాడు' అని పీసీబీ అధికారి పేర్కొన్నారు. కొన్ని రోజుల క్రితం ఫిక్సింగ్ ఆరోపణలు కారణంగా షర్జిల్ ఖాన్, ఖలిద్ లలిఫ్ లను పై పీసీబీ నిషేధం విధించింది. పాకిస్తాన్ సూపర్ లీగ్ లో వారు ఫిక్సింగ్ కు పాల్పడి క్రికెట్ కు దూరమయ్యారు.


 న్యూఢిల్లీ: క్రికెట్‌లో ఫిక్సింగ్‌ను అరికట్టడానికి కఠినమైన చట్టాలు అవసరమని పాకిస్థాన్ మాజీ కెప్టెన్ జావేద్ మియాందాద్ అన్నాడు. స్పాట్ ఫిక్సింగ్‌కు పాల్పడిన క్రికెటర్లకు మరణశిక్ష విధించాలని సూచించాడు. పాకిస్థాన్‌లో ఇటీవల మరోసారి స్పాట్ ఫిక్సింగ్ భాగోతం వెలుగుచూసిన నేపథ్యంలో మియాందాద్ సంచలన వ్యాఖ్యలు చేశాడు.
 
 క్రికెట్‌లో అవినీతిని అరికట్టడానికి క్రీడా సంఘాలు తగిన చర్యలు తీసుకోవాలని మియాందాద్ సూచించాడు. క్రికెట్‌లో ఫిక్సింగ్ సంఘటలను క్షమించరాదని అన్నాడు. నిందితులను కఠినంగా శిక్షించడం వల్ల మిగిలిన క్రికెటర్లు అవినీతికి పాల్పడేందుకు భయపడుతారని చెప్పాడు.
 
 పాకిస్థాన్ సూపర్ లీగ్‌లో స్పాట్ ఫిక్సింగ్‌కు పాల్పడినట్టు ఆరోపణలు ఎదుర్కొన్న పేసర్ మహ్మద్ ఇర్ఫాన్‌పై పీసీబీ సస్పెన్షన్ వేటు వేసిన సంగతి తెలిసిందే. అంతేగాక ఈ టోర్నీలోనే స్పాట్ ఫిక్సింగ్‌కు పాల్పడినట్టు ఆరోపణలు వచ్చిన మరో ఇద్దరు క్రికెటర్లు షర్జీల్ ఖాన్, ఖలీద్ లతీఫ్‌ సస్పెండ్ అయ్యారు. ఇదే కేసులో మరో పాక్ క్రికెటర్ నసీర్ జంషెడ్‌ అరెస్టయ్యాడు. గతంలో పాక్ అంతర్జాతీయ క్రికెటర్లు మహ్మద్ ఆమీర్, సల్మాన్ బట్, మహ్మద్ ఆసిఫ్‌లు ఫిక్సింగ్ కేసులో సస్పెండ్ కావడంతో పాటు జైలు శిక్ష అనుభవించారు.