బీజింగ్: ప్రేమను వ్యక్తం చేయడంలో చైనావాళ్ల స్టైయిలే వేరు. డిఫరెంట్ గా ప్రపోజ్ చేయడంతో చైనీయులు ముందుంటారు. విభిన్నంగా ప్రేమను వ్యక్తపరుస్తూ ప్రపంచం దృష్టిని ఆకర్షిస్తుంటారు. ఉత్తర చైనాలోని షన్ యాంగ్ నగరానికి చెందిన 27 ఏళ్ల టొంగ్ అయెనన్ కూడా ఈ కోవకు చెందినవాడే. తన డ్రీమ్ గాళ్ కు వెరైటీగా ప్రపోజ్ చేసి అందరి దృష్టిని ఆకర్షించాడు. అయితే ప్రియురాలి ప్రేమను మాత్రం గెలుచులేకపోయాడు
 
 తన పొరుగింటిలో ఉన్న యువతిని టొంగ్ ఇష్టపడ్డాడు. ఆమెకు తన ప్రేమను విభిన్నంగా వ్యక్తం చేయాలనుకున్నాడు. అనుకున్నదే తడవుగా 840 రూబిక్ క్యూబ్‌ లతో 20 గంటల పాటు శ్రమించి తనింట్లోనే ప్రేయసి చిత్రానికి ప్రాణం పోశాడు. వెరైటీగా ప్రపోజ్ చేసినా అతడిని ఆమె తిరస్కరించింది. 'రూబిక్ క్యూబ్‌ లతో తయారు చేసిన ఫొటోను నా డ్రీమ్ గాళ్ కు చూపించి సర్ ప్రైజ్ చేశాను. నువ్వంటే నాకు ఇష్టమని చెప్పాను. కానీ ఆమె నా ప్రేమను తిరస్కరించింది' అని మెకానిక్ గా పనిచేస్తున్న టొంగ్ తెలిపాడు.
 
 ప్రేయసి తిరస్కరించడం పట్ల ఎలా ఫీలవుతున్నావని అడగ్గా... దాని గురించి ఎక్కువగా ఆలోచించడం లేదని సమాధానమిచ్చాడు. తన డ్రీమ్ గాళ్ ఫొటో తయారు చేసేందుకు 2 నెలల ముందు నుంచి ప్లాన్ వేసుకున్నానని వెల్లడించాడు. 2.1 మీటర్ల ఎత్తు, 1.4 మీటర్ల వెడల్పుతో దీన్ని రూపొందించానని చెప్పాడు. ముందుగా ఫొటోషాప్ లో డిజైన్ చేసుకుని దాని ప్రకారం 840 రూబిక్ క్యూబ్‌ లతో ఈ చిత్రాన్ని తయారుచేశానన్నాడు. డిజైన్ కు అనుగుణంగా రూబిక్ క్యూబ్‌ ను సరిచేసుకుంటూ, ప్రత్యేకంగా తయారు చేసిన చెక్క ఫ్రేమ్ లో వీటిని ఒకదానిపై ఒకటి అమర్చానని వెల్లడించాడు. మూడు రాత్రుల్లో 20 గంటల పాటు శ్రమించి దీన్ని రూపొందించానని, ఇందుకోసం 460 డాలర్లు వెచ్చించానని తెలిపాడు. దీనికి సంబంధించిన ఫొటోలు చైనా సోషల్ మీడియాలో విస్తృతంగా షేర్ అయ్యాయి.
 
 ఆమె ఎందుకు టొంగ్ ప్రేమను తిరస్కరించిందని నెటిజన్లు ప్రశ్నలు సంధిస్తున్నారు. తన డ్రీమ్ గాళ్ పై వ్యక్తిగత వ్యాఖ్యలు చేయొద్దని ఆన్ లైన్ జనానికి టొంగ్ విజ్ఞప్తి చేశాడు. ఖాళీ సమయాల్లో రూబిబ్ క్యూబ్ ఆడుకుంటూ ఉంటానని, బయట తిరగడం తనకు అంతగా ఇష్టముండదని తెలిపాడు. రూబిబ్ క్యూబ్ లతో తాను తయారు చేసిన డ్రీమ్ గాళ్ ఫొటోను ఏం చేయాలన్నదే తన ముందున్న 'పజిల్' అని పేర్కొన్నాడు.


 మన బుడ్డోడు బొమ్మలేస్తే ఎంతో మురిసిపోతాం.. అందరికీ చూపించి.. గర్వంగా ఫీలైపోతాం. ఇదే టైపులో చైనాలోని షెన్‌యాంగ్ సిటీకి చెందిన జాంగ్ వాళ్లబ్బాయి(4) కూడా మస్తుగా బొమ్మలేస్తాడు. ఆ బొమ్మలంటే జాంగ్‌కు ఎంతిష్టమో.. ఇటీవల అక్కడి స్థానిక ఆస్పత్రివారు తండ్రీకొడుకుల బంధం బలోపేతం కోసం ఓ ప్రోగ్రాం పెట్టారు. బహుమతిగా దక్షిణ కొరియా ట్రిప్ అని ప్రకటించారు. జాంగ్ గెలిచాడు. కొడుకుతో కలిసి ఫ్లైటెక్కాడు. తన పుత్ర రత్నానికి ఇష్టమైన డ్రాయింగ్ బుక్, స్కెచ్ పెన్లను మరిచిపోకుండా.. బ్యాగులో సర్దిపెట్టాడు. వారు దక్షిణ కొరియాలో దిగారు.
  
  కొన్ని ప్రాంతాలు తిరిగారు. ఇటు జాంగ్ పుత్ర రత్నం ఖాలీ టైంలో బొమ్మలు గీసుకోవడం మొదలుపెట్టాడు. డ్రాయింగ్ బుక్ పూర్తయిపోయింది. ఏం చేయాలా అని ఆలోచించాడు. నాన్న పాస్‌పోర్టు బుక్ కనిపించింది. అక్కడ తన టాలెంట్ చూపించాడు. అయితే, ఆ టాలెంట్ దక్షిణ కొరియా ఇమ్మిగ్రేషన్ అధికారులకు నచ్చలేదు. ఇంతగా ‘చిత్ర’హింసకు గురైన పాస్‌పోర్టు చెల్లదని చెబుతూ.. జాంగ్ తిరిగి చైనా ఫ్లైటెక్కడానికి వీల్లేదన్నారు. దీంతో కొత్త పాస్‌పోర్టు కోసం స్థానిక ఎంబసీ చుట్టూ తిరిగి తిరిగి.. కొత్తది రావడంతో ఈ మధ్యే  జాంగ్.. తిరిగి చైనా విమానమెక్కాడట.