పనాజీ (గోవా): ‘ఫిడే’ ప్రపంచ కప్‌ చెస్‌ టోర్నమెంట్‌లో భారత ఆటగాడు అర్జున్‌ ఇరిగేశి క్వార్టర్‌ ఫైనల్‌ పోరు ‘టైబ్రేక్‌’కు చేరింది. అర్జున్, చైనా గ్రాండ్‌మాస్టర్‌ వె యి మధ్య మంగళవారం జరిగిన రెండో గేమ్‌ 32 ఎత్తుల్లో ‘డ్రా’గా ముగిసింది. వీరి మధ్య సోమవారం జరిగిన తొలి గేమ్‌ కూడా సమంగా ముగిసింది. దాంతో ఫలితం తేల్చేందుకు బుధవారం ‘టైబ్రేక్‌’ నిర్వహిస్తారు. రెండో గేమ్‌లో తెల్ల పావులతో బరిలోకి దిగిన అర్జున్‌ పలు సందర్భాల్లో ఆధిక్యం ప్రదర్శించినా... దానిని చివరి వరకు నిలబెట్టుకోలేకపోయాడు. ఈ టోర్నీలో మిగిలిన ఎనిమిది మంది ఆటగాళ్లలో అత్యుత్తమ ర్యాంకింగ్‌ ఉన్న అర్జున్‌ మిడిల్‌ గేమ్‌ను చూస్తే గెలుపు ఖాయమనిపించింది. కానీ కీలక దశలో ఒక ఎత్తును తప్పుగా వేయడంతో దీనిని వె యి సమర్థంగా వాడుకొని తప్పించుకోగలిగాడు. ఆ తర్వాత ‘డ్రా’ తప్ప మరో ఫలితానికి అవకాశం లేకపోయింది. అయితే ర్యాపిడ్‌ ఫార్మాట్‌లో అర్జున్‌కు ఎక్కువ విజయావకాశాలు ఉన్నాయి. మరో క్వార్టర్‌ ఫైనల్‌లో అలెగ్జాండర్‌ డొన్‌చెంకో (జర్మనీ)ను నాదిర్‌బెక్‌ యాకుబోవ్‌ (ఉజ్బెకిస్తాన్‌) సెమీఫైనల్లోకి అడుగు పెట్టాడు. ఆండ్రీ ఎసిపెంకో (రష్యా), స్యామ్‌ షాంక్‌లాండ్‌ (అమెరికా) మధ్య...జోస్‌ మార్టినెజ్‌ (మెక్సికో), జవోఖిర్‌ సిండ్రోవ్‌ (ఉజ్బెకిస్తాన్‌) మధ్య జరిగిన రెండో గేమ్‌లు కూడా ‘డ్రా’ ముగిశాయి. దాంతో ఈ రెండు మ్యాచ్‌లలో కూడా సెమీస్‌ చేరేదెవరో నేడు జరిగే ‘టైబ్రేక్‌’లోనే తేలనుంది.

పనాజీ (గోవా): ‘ఫిడే’ ప్రపంచ కప్‌ చెస్‌ టోర్నమెంట్‌లో భారత ఆటగాడు పెంటేల హరికృష్ణ ప్రిక్వార్టర్‌ ఫైనల్లో వెనుదిరిగాడు. రొమేనియాకు చెందిన మార్టీనెజ్‌ అల్‌కంటారా చేతిలో హరికృష్ణ పరాజయం పాలయ్యాడు. ఇద్దరి మధ్య జరిగిన రెండు గేమ్‌లు ‘డ్రా’గా ముగియడంతో ఆదివారం ‘టైబ్రేక్‌’ నిర్వహించారు. 15 నిమిషాల వ్యవధి ఉన్న తొలి రెండు ర్యాపిడ్‌ గేమ్‌లు ‘డ్రా’ కావడంతో 10 నిమిషాల మరో రెండు ర్యాపిడ్‌ గేమ్‌లు నిర్వహించారు. ఇందులో తొలి గేమ్‌లో హరికృష్ణ ఒక దశలో మెరుగైన స్థితిలోనే ఉన్నా...తెల్ల పావులతో ఆడిన మార్టీనెజ్‌ చివరకు 59 ఎత్తుల్లో విజయం సాధించాడు. తప్పనిసరిగా గెలవాల్సిన రెండో గేమ్‌లో నల్ల పావులతో ఆడిన హరికృష్ణ 30 ఎత్తున తర్వాత ‘డ్రా’ మాత్రమే చేయగలిగాడు. దాంతో అతను వరల్డ్‌ కప్‌నుంచి ని్రష్కమించాడు. క్వార్టర్‌ ఫైనల్లో జవోకిర్‌ సిందరోవ్‌ను మార్టీనెజ్‌ ఎదుర్కొంటాడు. ఇప్పుడు భారత్‌ ఆశలన్నీ అర్జున్‌ ఇరిగేశిపైనే ఉన్నాయి. నేడు జరిగే క్వార్టర్‌ ఫైనల్‌ పోరులో వె యి (చైనా)తో అర్జున్‌ తలపడతాడు. ఇతర గేమ్‌లలో డానిల్‌ దుబోవ్‌ను ఓడించి స్యామ్‌ శంక్‌లాండ్, అలెక్సీ గ్రెబ్‌నోవ్‌పై గెలిచి ఆండ్రీ ఎసిపెంకో, లీ క్వాంగ్‌ లీమ్‌పై విజయం సాధించి అలెగ్జాండర్‌ డోన్‌చెంకో క్వార్టర్‌ ఫైనల్లోకి ప్రవేశించారు.

పనాజీ: ప్రపంచకప్‌ చెస్‌ టోర్నమెంట్‌లో భారత నంబర్‌వన్, తెలంగాణ గ్రాండ్‌మాస్టర్‌ ఇరిగేశి అర్జున్‌ క్వార్టర్‌ ఫైనల్లోకి దూసుకెళ్లాడు. రెండుసార్లు ప్రపంచకప్‌ విజేత, అమెరికా గ్రాండ్‌మాస్టర్‌ లెవోన్‌ అరోనియన్‌తో జరిగిన ప్రిక్వార్టర్‌ ఫైనల్‌ పోరులో అర్జున్‌ 1.5–0.5తో గెలుపొందాడు. ప్రపంచ 23వ ర్యాంకర్‌ అరోనియన్‌తో శుక్రవారం జరిగిన తొలి గేమ్‌ను ‘డ్రా’ చేసుకున్న ప్రపంచ ఆరో ర్యాంకర్‌ అర్జున్‌... శనివారం జరిగిన ఏడో గేమ్‌లో నల్లపావులతో ఆడుతూ అర్జున్‌ 38 ఎత్తుల్లో విజయం సాధించి ముందంజ వేశాడు. మరోవైపు భారత్‌కే చెందిన మరో గ్రాండ్‌మాస్టర్‌ పెంటేల హరికృష్ణ భవితవ్యం టైబ్రేక్‌లో తేలనుంది. హరికృష్ణ, జోస్‌ ఎడువార్డో మారి్టనెజ్‌ అల్కంటారా (రొమేనియా) మధ్య జరిగిన ప్రిక్వార్టర్‌ ఫైనల్‌ 1–1తో సమంగా ముగిసింది. వీరిద్దరి మధ్య రెండో గేమ్‌ కూడా 35 ఎత్తుల్లో ‘డ్రా’ అయింది. దాంతో విజేతను నిర్ణయించేందుకు ఆదివారం టైబ్రేక్‌ గేమ్‌లు నిర్వహిస్తారు. సిందరోవ్‌ జవోఖిర్‌ (ఉజ్బెకిస్తాన్‌), నొదిర్‌బెక్‌ యాకు»ొయెవ్‌ (ఉజ్బెకిస్తాన్‌), వె యి (చైనా) కూడా క్వార్టర్‌ ఫైనల్లోకి ప్రవేశించారు.

పనాజీ: సొంతగడ్డపై జరుగుతున్న పురుషుల ప్రపంచకప్‌ చెస్‌ టోర్నీలో భారత గ్రాండ్‌మాస్టర్లు ఇరిగేశి అర్జున్, పెంటేల హరికృష్ణ ప్రిక్వార్టర్‌ ఫైనల్‌ తొలి గేమ్‌ను ‘డ్రా’గా ముగించారు. లెవోన్‌ అరోనియన్‌ (అమెరికా)తో జరిగిన తొలి గేమ్‌ను తెలంగాణ ప్లేయర్‌ అర్జున్‌ 41 ఎత్తుల్లో... అల్కంటారా మార్టినెజ్‌ (రొమేనియా)తో జరిగిన తొలి గేమ్‌ను ఆంధ్రప్రదేశ్‌ ప్లేయర్‌ హరికృష్ణ కూడా 41 ఎత్తుల్లోనే ‘డ్రా’ చేసుకున్నాడు. నేడు జరిగే రెండో గేమ్‌లో గెలిచిన వారు క్వార్టర్‌ ఫైనల్‌కు అర్హత సాధిస్తారు. ఒకవేళ రెండో గేమ్‌ ‘డ్రా’ అయితే... విజేతలను నిర్ణయించేందుకు ఆదివారం టైబ్రేక్‌ గేమ్‌లు నిర్వహిస్తారు.

పనాజీ: తాడో పేడో తేల్చుకోవాల్సిన టైబ్రేక్‌ గేముల్లో భారత నంబర్‌వన్, తెలంగాణ గ్రాండ్‌మాస్టర్‌ ఇరిగేశి అర్జున్‌... ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణ మెరిశారు. తద్వారా సొంతగడ్డపై జరుగుతున్న పురుషుల ప్రపంచకప్‌ చెస్‌ టోర్నమెంట్‌లో అర్జున్, హరికృష్ణ ప్రిక్వార్టర్‌ ఫైనల్లోకి ప్రవేశించారు. గురువారం జరిగిన నాలుగో రౌండ్‌ టైబ్రేక్‌లో ప్రపంచ 6వ ర్యాంకర్, 22 ఏళ్ల అర్జున్‌ 2–0తో ప్రపంచ 55వ ర్యాంకర్, 46 ఏళ్ల పీటర్‌ లెకో (హంగేరి)పై... ప్రపంచ 46వ ర్యాంకర్‌ హరికృష్ణ 1.5–0.5తో ప్రపంచ 52వ ర్యాంకర్‌ నిల్స్‌ గ్రాండెలియస్‌ (స్వీడన్‌)పై గెలుపొందారు. పీటర్‌ లెకోతో జరిగిన తొలి టైబ్రేక్‌ గేమ్‌లో అర్జున్‌ 40 ఎత్తుల్లో... రెండో టైబ్రేక్‌ గేమ్‌లో 57 ఎత్తుల్లో నెగ్గాడు. గ్రాండెలియస్‌తో జరిగిన తొలి టైబ్రేక్‌ గేమ్‌ను 35 ఎత్తుల్లో ‘డ్రా’ చేసుకున్న హరికృష్ణ... రెండో టైబ్రేక్‌ గేమ్‌లో 34 ఎత్తుల్లో విజయం సాధించాడు. ప్రజ్ఞానందకు నిరాశ భారత్‌కే చెందిన మరో గ్రాండ్‌మాస్టర్‌ ప్రజ్ఞానందకు నిరాశ ఎదురైంది. తమిళనాడుకు చెందిన ప్రపంచ 7వ ర్యాంకర్‌ ప్రజ్ఞానంద ప్రిక్వార్టర్‌ ఫైనల్లో వెనుదిరిగాడు. ప్రపంచ 45వ ర్యాంకర్‌ డానిల్‌ డుబోవ్‌ (రష్యా)తో జరిగిన టైబ్రేక్‌లో ప్రజ్ఞానంద 0.5–1.5తో ఓడిపోయాడు.

పనాజీ: సొంతగడ్డపై జరుగుతున్న పురుషుల ప్రపంచకప్‌ చెస్‌ టోర్నమెంట్‌లో భారత్‌ నుంచి ముగ్గురు గ్రాండ్‌మాస్టర్లు ఇరిగేశి అర్జున్, పెంటేల హరికృష్ణ, ప్రజ్ఞానంద బరిలో మిగిలారు. ఈ ముగ్గురు తదుపరి దశకు అర్హత సాధిస్తారో లేదో నేడు టైబ్రేక్‌ రౌండ్‌ తర్వాత తేలుతుంది. క్లాసికల్‌ ఫార్మాట్‌లో నిర్ణీత రెండు గేమ్‌ల తర్వాత అర్జున్‌–పీటర్‌ లెకో (హంగేరి); హరికృష్ణ–నిల్స్‌ గ్రాండెలియస్‌ (స్వీడన్‌); ప్రజ్ఞానంద–డానిల్‌ దుబోవ్‌ (రష్యా) 1–1తో సమంగా నిలిచారు. దాంతో విజేతలను నిర్ణయించేందుకు నేడు ర్యాపిడ్‌ ఫార్మాట్‌లో టైబ్రేక్‌ గేమ్‌లను నిర్వహిస్తారు. అర్జున్‌–పీటర్‌ లెకో రెండో గేమ్‌ 36 ఎత్తుల్లో... హరికృష్ణ–గ్రాండెలియస్‌ రెండో గేమ్‌ 38 ఎత్తుల్లో... ప్రజ్ఞానంద–దుబోవ్‌ రెండో గేమ్‌ 30 ఎత్తుల్లో ‘డ్రా’గా ముగిశాయి. మరోవైపు మరో ఇద్దరు భారత గ్రాండ్‌మాస్టర్లు కార్తీక్‌ వెంకటరామన్, ప్రణవ్‌ నాలుగో రౌండ్‌ను దాటలేకపోయారు. ఆంధ్రప్రదేశ్‌కు చెందిన రెండుసార్లు జాతీయ చాంపియన్‌ కార్తీక్‌ 0.5–1.5తో లె క్వాంగ్‌ లియెమ్‌ (వియత్నాం) చేతిలో... ప్రణవ్‌ 0.5–1.5తో నొదిర్‌బెక్‌ యాకు»ొయెవ్‌ (ఉజ్బెకిస్తాన్‌) చేతిలో ఓటమి చవిచూశారు. రెండో గేమ్‌లో కార్తీక్‌ 68 ఎత్తుల్లో... ప్రణవ్‌ 38 ఎత్తుల్లో ఓడిపోయారు. నొదిర్‌బెక్‌ యాకుబొయెవ్, లె క్వాంగ్‌ లియెమ్‌లతోపాటు లెవోన్‌ అరోనియన్‌ (అమెరికా), అల్కంటారా మార్టినెజ్‌ (మెక్సికో), అలెగ్జాండర్‌ డాన్‌షేoకో (జర్మనీ) కూడా ప్రిక్వార్టర్‌ ఫైనల్లోకి ప్రవేశించారు. నాలుగో రౌండ్‌లో అరోనియన్‌ 1.5–0.5తో రాడోస్లా (పోలాండ్‌)పై, అల్కంటారా 1.5–0.5తో సరానా అలెక్సీ (సెర్బియా)పై, డాన్‌షేoకో 1.5–0.5తో బ్లూబామ్‌ మథియాస్‌ (జర్మనీ)పై విజయం సాధించారు.

పనాజీ (గోవా): ప్రపంచ చాంపియన్‌ దొమ్మరాజు గుకేశ్‌ ప్రపంచ కప్‌ చెస్‌లో ముందంజ వేయడంలో విఫలమయ్యాడు. శనివారం జరిగిన మూడో రౌండ్‌లోనే అతను నిష్క్రమించాడు. జర్మనీకి చెందిన ఫ్రెడరిక్‌ స్వేన్‌ 1.5–0.5 తేడాతో గుకేశ్‌ను ఓడించాడు. నల్ల పావులతో తొలి గేమ్‌ను డ్రా చేసుకొని రెండో గేమ్‌లో విజయం కోసం బరిలోకి దిగిన గుకేశ్‌కు నిరాశాజనక ఫలితం ఎదురైంది. స్వేన్‌ ఒత్తిడిని అధిగమించి 55 ఎత్తుల్లో గెలుపొందాడు. ఇతర భారత ఆటగాళ్లలో అర్జున్‌ ఇరిగేశి, పెంటేల హరికృష్ణ, ప్రజ్ఞానంద, ప్రణవ్‌ నాలుగో రౌండ్‌లోకి అడుగు పెట్టారు. మూడో రౌండ్‌లో ప్రజ్ఞానంద 42 ఎత్తుల్లో ఆర్మేనియాకు చెందిన రాబర్ట్‌ హావ్‌హనిసన్‌పై గెలుపొందాడు. షంశుద్దీన్‌ (ఉజ్బెకిస్తాన్‌)తో జరిగిన పోరులో తొలి గేమ్‌ను గెలుచుకున్న అర్జున్‌ రెండో గేమ్‌లో ఎలాంటి ఒత్తిడికి లోను కాకుండా గేమ్‌ను డ్రాగా ముగించి 1.5–0.5తో ముందంజ వేశాడు. తర్వాతి పోరులో పీటర్‌ లెకో (హంగేరీ)తో అర్జున్‌ తలపడతాడు. డానియెల్‌ డార్దా (బెల్జియం)తో జరిగిన మూడో రౌండ్‌లో తొలి గేమ్‌ను గెలుచున్న హరికృష్ణ తర్వాతి గేమ్‌ను డ్రా చేసుకొని నాలుగో రౌండ్‌లోకి అడుగు పెట్టాడు. మరో వైపు ఈ టోర్నీలో అత్యధిక సీడింగ్‌ ఉన్న విదేశీ ఆటగాడు అనీశ్‌ గిరి (నెదర్లాండ్స్‌) కూడా నిష్క్ర మించాడు. రష్యాకు చెందిన అలెగ్జాండర్‌ డాన్‌చెన్‌కో 47 ఎత్తుల్లో అనీశ్‌ను చిత్తు చేశాడు. తమ మూడో రౌండ్‌లో తొలి గేమ్‌లను డ్రాలుగా ముగించిన విదిత్‌ గుజరాతీ, కార్తీక్‌ వెంకటరామన్, జీఎం నారాయణన్‌ ఆదివారం టైబ్రేక్‌ రౌండ్‌ ఆడతారు.

పనాజీ: ప్రపంచకప్‌ చెస్‌ టోర్నమెంట్‌ మూడో రౌండ్‌లో భారత నంబర్‌వన్, తెలంగాణ గ్రాండ్‌మాస్టర్‌ ఇరిగేశి అర్జున్‌... చెక్‌ రిపబ్లిక్‌లో స్థిరపడ్డ ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణ... తమిళనాడుకు చెందిన ప్రణవ్‌ శుభారంభం చేశారు. శుక్రవారం జరిగిన మూడో రౌండ్‌ తొలి గేమ్‌లో ప్రపంచ ఆరో ర్యాంకర్‌ అర్జున్‌ 30 ఎత్తుల్లోషమ్సిదిన్‌ వొఖిదోవ్‌ (ఉజ్బెకిస్తాన్‌)పై, ప్రపంచ 36వ ర్యాంకర్‌ హరికృష్ణ 25 ఎత్తుల్లో డేనియల్‌ దర్ధా (బెల్జియం)పై... ప్రపంచ 86వ ర్యాంకర్‌ ప్రణవ్‌ 102 ఎత్తుల్లో టిటాస్‌ స్ట్రెమావిసియస్‌ (లిథువేనియా)పై విజయం సాధించారు. నేడు జరిగే రెండో గేమ్‌ను అర్జున్, హరికృష్ణ, ప్రణవ్‌‘డ్రా’ చేసుకుంటే నాలుగో రౌండ్‌కు అర్హత సాధిస్తారు. మరోవైపు భారత్‌కే చెందిన క్లాసికల్‌ ఫార్మాట్‌ ప్రపంచ చాంపియన్‌ దొమ్మరాజు గుకేశ్, ప్రజ్ఞానంద, ప్రాణేశ్, దీప్తాయన్‌ ఘోష్, ఎస్‌ఎల్‌ నారాయణన్, విదిత్‌ సంతోష్‌ గుజరాతి, ఆంధ్రప్రదేశ్‌ గ్రాండ్‌మాస్టర్‌ కార్తీక్‌ వెంకటరామన్‌ మూడో రౌండ్‌లో తమ తొలి గేమ్‌లను ‘డ్రా’ చేసుకున్నారు. గుకేశ్‌–ఫ్రెడరిక్‌ స్వెన్‌ (జర్మనీ) గేమ్‌ 34 ఎత్తుల్లో... ప్రజ్ఞానంద–రాబర్ట్‌ హోవ్‌నిసియాన్‌ (అర్మేనియా) గేమ్‌ 30 ఎత్తుల్లో... ప్రాణేశ్‌–విన్సెంట్‌ కీమర్‌ (జర్మనీ) గేమ్‌ 85 ఎత్తుల్లో... దీప్తాయన్‌–గాబ్రియేల్‌ సర్గాసియన్‌ (అర్మేనియా) గేమ్‌ 60 ఎత్తుల్లో... నారాయణన్‌–యు యాంగీ (చైనా) గేమ్‌ 117 ఎత్తుల్లో... విదిత్‌–స్యామ్‌ షాంక్‌లాండ్‌ (అమెరికా) గేమ్‌ 32 ఎత్తుల్లో... కార్తీక్‌ వెంకటరామన్‌–డేనియల్‌ బొగ్డాన్‌ (రొమేనియా) గేమ్‌ 65 ఎత్తుల్లో ‘డ్రా’గా ముగిశాయి. నేడు వీరి మధ్య జరిగే గేమ్‌లో గెలిచిన వారు నాలుగో రౌండ్‌కు చేరుకుంటారు. గేమ్‌లు ‘డ్రా’ అయితే ఆదివారం టైబ్రేక్‌ ద్వారా విజేతలను నిర్ణయిస్తారు.

పనాజీ: ప్రపంచకప్‌ చెస్‌ టోర్నమెంట్‌లో భారత గ్రాండ్‌మాస్టర్, ప్రపంచ ఏడో ర్యాంకర్‌ ప్రజ్ఞానంద మూడో రౌండ్‌లోకి అడుగు పెట్టాడు. తెమూర్‌ కుయ్‌»ొకరోవ్‌ (ఆ్రస్టేలియా)తో గురువారం జరిగిన ‘టైబ్రేక్‌’లో ప్రజ్ఞానంద 4–2తో విజయం సాధించాడు. వీరిద్దరి మధ్య నిర్ణీత రెండు క్లాసికల్‌ గేమ్‌లు ‘డ్రా’ కావడంతో విజేతను నిర్ణయిచేందుకు టైబ్రేక్‌ను నిర్వహించారు. నిబంధనల ప్రకారం ముందుగా 15 నిమిషాల నిడివిగల రెండు ర్యాపిడ్‌ గేమ్‌లు నిర్వహించారు. ఈ రెండు గేమ్‌లు ‘డ్రా’గా ముగియడంతో స్కోరు 1–1తో సమమైంది. దాంతో ఫలితం తేలేందుకు ఈసారి 10 నిమిషాల నిడివిగల మరో రెండు గేమ్‌లు ఆడించారు. తొలి గేమ్‌లో ప్రజ్ఞానంద 38 ఎత్తుల్లో ఓడిపోయాడు. బరిలో నిలవాలంటే రెండో గేమ్‌లో ప్రజ్ఞానంద తప్పనిసరిగా గెలవాల్సిన పరిస్థితి ఏర్పడింది. ప్రజ్ఞానంద 31 ఎత్తుల్లో తెమూర్‌ను ఓడించడంతో స్కోరు 2–2తో సమమైంది. దాంతో ఈసారి 5 నిమిషాల నిడివిగల రెండు గేమ్‌లు ఆడించారు. తొలి గేమ్‌లో ప్రజ్ఞానంద 46 ఎత్తుల్లో గెలుపొంది 3–2తో ఆధిక్యంలోకి వెళ్లాడు. అనంతరం రెండో గేమ్‌లో ప్రజ్ఞానంద 41 ఎత్తుల్లో నెగ్గి 4–2తో విజయాన్ని ఖాయం చేసుకున్నాడు. భారత్‌కే చెందిన విదిత్, నారాయణన్, ప్రాణేశ్, ప్రణవ్‌ కూడా మూడో రౌండ్‌లోకి దూసుకెళ్లగా... నిహాల్‌ సరీన్, కార్తికేయన్‌ మురళీలకు నిరాశ ఎదురైంది. టైబ్రేక్‌లో విదిత్‌ 1.5–0.5తో ఫౌస్టోనో (అర్జెంటీనా)పై, నారాయణన్‌ 4–2తో వితియుగోవ్‌ (ఇంగ్లండ్‌)పై, ప్రాణేశ్‌ 2–0తోదిమిత్రిజ్‌ (జర్మనీ)పై, ప్రణవ్‌ 2–0తో తారి ఆర్యన్‌ (నార్వే)పై విజయం సాధించారు.

పనాజీ: ప్రపంచకప్‌ చెస్‌ టోర్నీలో తెలంగాణ గ్రాండ్‌ మాస్టర్, భారత నంబర్‌ వన్‌ ఇరిగేశి అర్జున్‌... ప్రపంచ చాంపియన్‌ దొమ్మరాజు గుకేశ్‌ మూడో రౌండ్లోకి ప్రవేశించారు. రెండో రౌండ్లో అర్జున్‌ 2–0తో పెట్రోవ్‌ మార్టిన్‌ (బల్గెరియా)పై... గుకేశ్‌ 1.5–0.5తో నోగేర్బెక్‌ కాజిబెక్‌ (కజకిస్తాన్‌)పై గెలుపొందారు. ఆంధ్రప్రదేశ్‌ గ్రాండ్‌ మాస్టర్లు పెంటేల హరికృష్ణ, కార్తీక్‌ వెంకటరామన్‌ కూడా మూడో రౌండ్లోకి అడుగు పెట్టారు. రెండో రౌండ్లో హరికృష్ణ 1.5–0.5తో నెస్తేరోవ్‌ (రష్యా)పై, కార్తీక్‌ వెంకటరామన్‌ 1.5–0.5తో అరవింద్‌ చిదంబరం (భారత్‌)పై విజయం సాధించారు.

పనాజీ: టైటిల్‌ ఫేవరెట్స్‌లో ఒకరైన భారత నంబర్‌వన్, ప్రపంచ ఆరో ర్యాంకర్‌ ఇరిగేశి అర్జున్‌ ప్రపంచకప్‌ చెస్‌ టోర్నీలో శుభారంభం చేశాడు. తొలి రౌండ్‌లో ‘బై’ పొంది నేరుగా రెండో రౌండ్‌ ఆడుతున్న తెలంగాణ గ్రాండ్‌మాస్టర్‌ అర్జున్‌ తొలి గేమ్‌లో గెలుపొందాడు. బల్గేరియా గ్రాండ్‌మాస్టర్‌ పెట్రోవ్‌ మారి్టన్‌తో మంగళవారం జరిగిన తొలి గేమ్‌లో నల్లపావులతో ఆడుతూ అర్జున్‌ 37 ఎత్తుల్లో విజయం సాధించాడు. పెట్రోవ్‌తో నేడు జరిగే రెండో గేమ్‌ను అర్జున్‌ ‘డ్రా’ చేసుకుంటే మూడో రౌండ్‌కు అర్హత సాధిస్తాడు. భారత ఇతర గ్రాండ్‌మాస్టర్లు దొమ్మరాజు గుకేశ్, ప్రజ్ఞానంద, పెంటేల హరికృష్ణ, దీప్తాయన్‌ ఘోష్, విదిత్‌ సంతోష్‌ గుజరాతి, కార్తీక్‌ వెంకటరామన్, అరవింద్‌ చిదంబరం, నిహాల్‌ సరీన్, ఇనియన్, కార్తికేయన్‌ మురళీ, ఎస్‌ఎల్‌ నారాయణన్, ప్రాణేశ్, రౌనక్‌ సాధ్వాని తమ ప్రత్యర్థులతో జరిగిన రెండో రౌండ్‌లోని తొలి గేమ్‌ను ‘డ్రా’ చేసుకున్నారు. భారత్‌కే చెందిన మరో గ్రాండ్‌మాస్టర్‌ ప్రణవ్‌ తన ప్రత్యర్థి టారీ ఆర్యన్‌ (నార్వే)పై 41 ఎత్తుల్లో గెలుపొందగా... సూర్యశేఖర గంగూలీ (భారత్‌) 37 ఎత్తుల్లో మాక్సిమి లాగ్రెవ్‌ (ఫ్రాన్స్‌) చేతిలో, అరోణ్యక్‌ ఘోష్‌ (భారత్‌) 30 ఎత్తుల్లో లెవోన్‌ అరోనియన్‌ (అమెరికా) చేతిలో ఓడిపోయారు. గుకేశ్‌–నొగెర్‌బెక్‌ కాజీబెక్‌ (కజకిస్తాన్‌) గేమ్‌ 84 ఎత్తుల్లో... ప్రజ్ఞానంద–తెముర్‌ కుయ్‌బోకరోవ్‌ (ఆస్ట్రేలియా) గేమ్‌ 60 ఎత్తుల్లో... దీప్తాయన్‌ ఘోష్‌–నెపోమ్‌నిషి (రష్యా) గేమ్‌ 30 ఎత్తుల్లో... విదిత్‌–ఓరో ఫౌస్టినో (అర్జెంటీనా) గేమ్‌ 28 ఎత్తుల్లో... కార్తీక్‌ వెంకటరామన్‌–అరవింద్‌ గేమ్‌ 55 ఎత్తుల్లో... నిహాల్‌ సరీన్‌–స్టామాటిస్‌ (గ్రీస్‌) గేమ్‌ 90 ఎత్తుల్లో... పెంటేల హరికృష్ణ–అర్సెని నెస్తోరోవ్‌ (రష్యా) గేమ్‌ 30 ఎత్తుల్లో... ఇనియన్‌–నుగుయెన్‌ థాయ్‌ డాయ్‌ వాన్‌ (చెక్‌ రిపబ్లిక్‌) గేమ్‌ 45 ఎత్తుల్లో... కార్తికేయన్‌ మురళీ–ఇదానీ (ఇరాన్‌) గేమ్‌ 76 ఎత్తుల్లో... నారాయణన్‌–విటియుగోవ్‌ (ఇంగ్లండ్‌) గేమ్‌ 57 ఎత్తుల్లో... ప్రాణేశ్‌–దిమిత్రిజ్‌ కొలార్స్‌ (జర్మనీ) గేమ్‌ 34 ఎత్తుల్లో... రౌనక్‌–రాబర్ట్‌ హోవ్‌నాసియన్‌ (అర్మేనియా) గేమ్‌ 67 ఎత్తుల్లో ‘డ్రా’గా ముగిశాయి.

అందివచ్చిన అవకాశాలను సద్వినియోగం చేసుకొని అద్భుత విజయాన్ని అందుకున్న భారత చెస్‌ ప్లేయర్‌ దివ్య దేశ్‌ముఖ్‌ చరిత్ర సృష్టించింది. మహిళల ప్రపంచకప్‌ చెస్‌ టోర్నీలో ఫైనల్లోకి ప్రవేశించిన తొలి భారతీయ క్రీడాకారిణిగా 19 ఏళ్ల దివ్య రికార్డు నెలకొల్పింది. జార్జియాలో జరుగుతున్న ఈ మెగా టోర్నీ సెమీఫైనల్లో మహారాష్ట్ర అమ్మాయి దివ్య 1.5–0.5తో 2017 ప్రపంచ చాంపియన్‌ టాన్‌ జోంగి (చైనా)పై గెలిచింది. మంగళవారం వీరిద్దరి మధ్య తొలి గేమ్‌ ‘డ్రా’కాగా... బుధవారం జరిగిన రెండో గేమ్‌లో తెల్ల పావులతో ఆడిన దివ్య 101 ఎత్తుల్లో టాన్‌ జోంగిని ఓడించి ఫైనల్‌ బెర్త్‌ను ఖరారు చేసుకుంది. ఈ విజయంతో దివ్య వచ్చే ఏడాది జరిగే క్యాండిడేట్స్‌ టోర్నీకి కూడా అర్హత సాధించింది. తాజా ప్రదర్శనతో దివ్య ఖాతాలో తొలి గ్రాండ్‌మాస్టర్‌ (జీఎం) నార్మ్‌ కూడా చేరింది. కోనేరు హంపి (భారత్‌)–లె టింగ్జి (చైనా) మధ్య సెమీఫైనల్‌ విజేతతో ఫైనల్లో దివ్య ఆడుతుంది. హంపి–లె టింగ్జి మధ్య బుధవారం జరిగిన రెండో గేమ్‌ కూడా 75 ఎత్తుల్లో ‘డ్రా’ కావడంతో ఇద్దరూ 1–1తో సమంగా నిలిచారు. హంపి–టింగ్జి మధ్య ఈరోజు టైబ్రేక్‌ గేమ్స్‌ నిర్వహించి విజేతను నిర్ణయిస్తారు.

న్యూఢిల్లీ: ఈ ఏడాది భారత్‌లో పురుషుల ప్రపంచకప్‌ చెస్‌ టోర్నమెంట్‌ జరుగనుంది. అక్టోబర్‌ 30 నుంచి నవంబర్‌ 27 వరకు ఈ టోర్నీని నిర్వహిస్తారు. అయితే వేదికను ఖరారు చేయాల్సి ఉంది. 23 ఏళ్ల తర్వాత ఈ మెగా ఈవెంట్‌కు భారత్‌ ఆతిథ్యమివ్వనుంది. చివరిసారి 2002లో హైదరాబాద్‌ వేదికగా ప్రపంచకప్‌ జరగ్గా... భారత దిగ్గజం విశ్వనాథన్‌ ఆనంద్‌ విజేతగా నిలిచాడు. అయితే ఈసారి జరగబోయేది క్యాండిడేట్స్‌ టోర్నీకి అర్హత సాధించే ప్రపంచకప్‌ ఈవెంట్‌. ఇందులో ప్రపంచవ్యాప్తంగా 206 మంది ఆటగాళ్లు తలపడతారు. ఇది నాకౌట్‌ టోర్నీ. ప్రతీ రౌండ్‌లో ఓడిన ఆటగాడు నిష్క్రమిస్తాడు. ‘కొన్నేళ్లపాటు చెస్‌ టోర్నీ వివిధ ఫార్మాట్లుగా జరిగింది. కానీ 2021 నుంచి నాకౌట్‌ పద్ధతిలోనే ప్రపంచకప్‌ నిర్వహిస్తున్నాం. ఒక రౌండ్‌ మూడు రోజుల పాటు జరుగుతుంది. రెండు క్లాసికల్‌ గేమ్‌లను నిర్వహిస్తారు. సమమైతే మూడో రోజు టైబ్రేక్‌ పోటీ ఉంటుంది’ అని అంతర్జాతీయ చెస్‌ సమాఖ్య తెలిపింది. 2023లో అజర్‌బైజాన్‌లో జరిగిన ప్రపంచకప్‌లో కార్ల్‌సన్‌ (నార్వే) విజేతగా... ప్రజ్ఞానంద (భారత్‌) రన్నరప్‌గా నిలిచారు.

బతుమి (జార్జియా): ‘ఫిడే’ మహిళల ప్రపంచ కప్‌ చెస్‌ టోర్నమెంట్‌లో భారత గ్రాండ్‌మాస్టర్‌ కోనేరు హంపి సెమీఫైనల్‌కు చేరువైంది. శనివారం యుజిన్‌ సాంగ్‌ (చైనా)తో జరిగిన క్వార్టర్‌ ఫైనల్‌ తొలి గేమ్‌లో హంపి విజయం సాధించింది. హంపి 53 ఎత్తుల్లో ప్రత్యర్థి ఆట కట్టించింది. ఈ పోరులో ఇద్దరి మధ్య జరిగే రెండో గేమ్‌ను హంపి ‘డ్రా’గా ముగించుకున్నా సరే సెమీ ఫైనల్లోకి ప్రవేశిస్తుంది. మరో క్వార్టర్‌ ఫైనల్‌ పోరులో ఇద్దరు భారత ప్లేయర్లు ద్రోణవల్లి హారిక, దివ్య దేశ్‌ముఖ్‌ తలపడగా... తొలి గేమ్‌ ‘డ్రా’గా ముగిసింది. 31 ఎత్తుల తర్వాత ఇద్దరు ప్లేయర్లు సమ ఉజ్జీలుగా నిలిచారు. క్వార్టర్‌ ఫైనల్‌ బరిలో నిలిచిన మరో భారత ప్లేయర్‌ ఆర్‌. వైశాలి కూడా తన తొలి గేమ్‌ను ‘డ్రా’ చేసుకుంది. వైశాలి, టాన్‌ జోంగీ (చైనా) మధ్య హోరాహోరీగా సాగిన ఈ పోరు 72 ఎత్తుల వరకు సాగి సమంగా ముగిసింది. హారిక, దివ్య మధ్య... వైశాలి, టాన్‌ జోంగీ మధ్య రెండో గేమ్‌లో ఎవరు గెలిస్తే వారు సెమీస్‌ చేరతారు. నాలుగో క్వార్టర్‌ ఫైనల్‌ మ్యాచ్‌ తొలి గేమ్‌లో టింగ్‌జీ లీ (చైనా) తొలి గేమ్‌లో 40 ఎత్తుల్లో స్థానిక ప్లేయర్‌ జాగ్‌నిడ్జ్‌ నానా (జార్జియా)ను ఓడించింది.

బతూమి (జార్జియా): మహిళల ప్రపంచకప్‌ చెస్‌ నాకౌట్‌ టోర్నమెంట్‌లో భారత గ్రాండ్‌మాస్టర్లు, తెలుగు తేజాలు ద్రోణవల్లి హారిక, కోనేరు హంపి మూడో రౌండ్‌లోకి ప్రవేశించారు. నందిత (భారత్‌)తో జరిగిన రెండో రౌండ్‌లో హారిక 1.5–0.5తో... హంపి 1.5–0.5తో అఫ్రూజా ఖామ్‌దమోవా (ఉజ్బెకిస్తాన్‌)పై గెలుపొందారు. గురువారం జరిగిన రెండో రౌండ్‌ రెండో గేమ్‌లో హారిక 37 ఎత్తుల్లో నందితను ఓడించగా... అఫ్రూజాతో గేమ్‌ను హంపి 44 ఎత్తుల్లో ‘డ్రా’ చేసుకుంది. బుధవారం జరిగిన తొలి గేమ్‌లో అఫ్రూజాపై హంపి నెగ్గగా... నందితతో గేమ్‌ను హారిక ‘డ్రా’ చేసుకుంది. భారత్‌కే చెందిన వైశాలి, దివ్య దేశ్‌ముఖ్‌ కూడా మూడో రౌండ్‌కు చేరుకున్నారు. మరో ముగ్గురు భారత ప్లేయర్లు వంతిక అగర్వాల్, పద్మిని రౌత్‌ మూడో రౌండ్‌లో చోటు కోసం నేడు టైబ్రేక్‌ గేమ్‌లు ఆడనున్నారు.

చెన్నై: ప్రపంచకప్‌ చెస్‌ టోర్నీలో అద్భుత ప్రదర్శనతో ఫైనల్‌ వరకు చేరిన భారత యువ గ్రాండ్‌మాస్టర్‌ ఆర్‌.ప్రజ్ఞానంద తన స్వస్థలం చెన్నై చేరుకున్నాడు. ప్రతిష్టాత్మక చదరంగ వేదికపై తనదైన ముద్ర వేసి తిరిగొచ్చిన ఈ 18 ఏళ్ల కుర్రాడిని సొంత నగరం ఆత్మీయంగా అక్కున చేర్చుకుంది. అతనికి విమానాశ్రయంలో ఘన స్వాగతం లభించింది. ఒకవైపు ఆత్మీయులు, సన్నిహితులు ఆనందంగా తమవాడికి వెల్‌కమ్‌ చెప్పగా, మరోవైపు తమిళనాడు ప్రభుత్వం అధికారికంగా స్వాగత కార్యక్రమాన్ని ఏర్పాటు చేసింది. ఆ రాష్ట్ర సాంప్రదాయ నృత్యాలు కరగట్టం, ఒయిలట్టంలతో విమానాశ్రయం బయట కళాకారులు ప్రజ్ఞానందకు స్వాగతం పలికారు. పూలు, శాలువాలు, పుష్పగుచ్చాలతో మిత్రులు, అభిమానులు ప్రజ్ఞను ముంచెత్తారు. ‘నాకు లభించిన ఈ స్వాగతం పట్ల చాలా సంతోషంగా ఉన్నాను’ అంటూ జాతీయ పతాకాన్ని చేతిలో ప్రదర్శిస్తూ ప్రజ్ఞానంద వ్యాఖ్యానించాడు. అతని తల్లి నాగలక్ష్మి కూడా తన ఆనందాన్ని దాచుకోలేకపోయింది. అనంతరం ప్రజ్ఞానంద, అతని తల్లిదండ్రులు నాగలక్ష్మి, రమేశ్‌బాబులను తమిళనాడు సీఎం ఎంకే స్టాలిన్, క్రీడా శాఖ మంత్రి ఉదయనిధి స్టాలిన్‌ సన్మానించారు. ఈ సందర్భంగా ప్రజ్ఞానందకు జ్ఞాపికతోపాటు రూ. 30 లక్షలు నగదు పురస్కారం అందజేశారు. అజర్‌బైజాన్‌లోని బాకులో జరిగిన ‘ఫిడే’ వరల్డ్‌ కప్‌ ఫైనల్లో వరల్డ్‌ నంబర్‌వన్‌ మాగ్నస్‌ కార్ల్‌సన్‌ చేతిలో ఓడిన ప్రజ్ఞానంద రన్నరప్‌గా నిలిచాడు.   

గత దశాబ్దకాలంగా పురుషుల చెస్‌లో మాగ్నస్‌ కార్ల్‌సన్‌కు ఎదురులేదు. ఈ నార్వే సూపర్‌స్టార్‌ క్లాసికల్, ర్యాపిడ్, బ్లిట్జ్‌ ఫార్మాట్‌లలో ప్రపంచ చాంపియన్‌గా నిలిచాడు. చెస్‌లో అత్యుత్తమ రేటింగ్‌ కూడా అందుకున్నాడు. అయితే అగ్రశ్రేణి చెస్‌ ఆటగాళ్ల మధ్య రెండేళ్లకోసారి నాకౌట్‌ పద్ధతిలో జరిగే ప్రపంచకప్‌ టో ర్నీలో మాత్రం కార్ల్‌సన్‌ శిఖరాన నిలువలేకపోయాడు. ఈసారి మాత్రం నిలకడైన ఆటతీరుతో కార్ల్‌సన్‌ తన కెరీర్‌లో తొలిసారి ప్రపంచకప్‌ టైటిల్‌ను సాధించాడు. కార్ల్‌సన్‌కు టైటిల్‌ దక్కినా అందరి దృష్టిని ఆకర్షించింది మాత్రం భారత యువ గ్రాండ్‌మాస్టర్‌ ప్రజ్ఞానందనే. తన అసమాన పోరాటపటిమతో... ఊహకందని ఎత్తులతో... తనకంటే ఎంతో మెరుగైన ప్రత్యర్థులను బోల్తా కొట్టిస్తూ... తమిళనాడుకు చెందిన 18 ఏళ్ల ఈ టీనేజర్‌ రెండో ప్రయత్నంలోనే ఈ టోర్నీలో ఫైనల్‌కు చేరాడు. కార్ల్‌సన్‌కు ఆద్యంతం గట్టిపోటీనిచ్చాడు. అనుభవలేమితో తుది మెట్టుపై తడబడ్డా... భవిష్యత్‌లో ప్రపంచ చాంపియన్‌ అయ్యే లక్షణాలు తనలో పుష్కలంగా ఉన్నాయని ప్రజ్ఞానంద చాటుకున్నాడు.    బాకు (అజర్‌బైజాన్‌): ఇన్నాళ్లూ భారత చెస్‌ అంటే ముందుగా విశ్వనాథన్‌ ఆనంద్‌ పేరు గుర్తుకొచ్చేది. కానీ ఇక నుంచి ఆనంద్‌తోపాటు తమిళనాడు కుర్రాడు ప్రజ్ఞానంద పేరు కూడా అభిమానుల మదిలో మెదులుతుంది. గత 25 రోజులుగా అజర్‌బైజాన్‌ రాజధాని బాకులో జరిగిన ప్రపంచకప్‌ టో ర్నీలో ఆరంభం నుంచి మేటి ఆటగాళ్లను మట్టికరిపించిన ఈ తమిళనాడు కుర్రాడు తుదిపోరులో నార్వే దిగ్గజం మాగ్నస్‌ కార్ల్‌సన్‌ను బోల్తా కొట్టించలేకపోయాడు. నిర్ణీత రెండు క్లాసికల్‌ గేముల్లో ప్రజ్ఞానంద నుంచి తీవ్ర పోటీ ఎదుర్కొని ‘డ్రా’తో సంతృప్తి పడ్డ 32 ఏళ్ల కార్ల్‌సన్‌ టైబ్రేక్‌లోని ర్యాపిడ్‌ గేముల్లో తన అనుభవాన్నంతా ఉపయోగించి గట్టెక్కాడు. తొలి గేమ్‌లో నల్ల పావులతో ఆడిన కార్ల్‌సన్‌ 47 ఎత్తుల్లో ప్రజ్ఞానందపై గెలుపొంది... రెండో గేమ్‌లో తెల్ల పావులతో ఆడి 22 ఎత్తుల్లో ‘డ్రా’ చేసుకొని ఓవరాల్‌గా 2.5–1.5తో విజయాన్ని ఖరారు చేసుకున్నాడు. ఐదుసార్లు ప్రపంచ చాంపియన్‌గా నిలిచిన కార్ల్‌సన్‌ 156 మంది ఆటగాళ్ల మధ్య నాకౌట్‌ పద్ధతిలో నిర్వహించే ప్రపంచకప్‌ టోర్నీలో మాత్రం తొలిసారి విజేతగా నిలిచాడు. మూడో స్థానం కోసం జరిగిన మ్యాచ్‌లో ఫాబియానో కరువానా (అమెరికా) 3–1తో నిజాత్‌ అబసోవ్‌ (అజర్‌బైజాన్‌)పై గెలిచాడు.   విజేతగా నిలిచిన కార్ల్‌సన్‌కు 1,10,000 డాలర్లు (రూ. 90 లక్షలు), రన్నరప్‌ ప్రజ్ఞానందకు 80 వేల డాలర్లు (రూ. 66 లక్షలు), మూడో స్థానం పొందిన కరువానాకు 60 వేల డాలర్లు (రూ. 49 లక్షలు)... నాలుగో స్థానంలో నిలిచిన అబసోవ్‌కు 50 వేల డాలర్లు (రూ. 41 లక్షలు) ప్రైజ్‌మనీగా లభించాయి.   ఈ ప్రపంచకప్‌ టోర్నీలో టాప్‌–3లో నిలిచిన ముగ్గురు ప్లేయర్లు వచ్చే ఏడాది జరిగే క్యాండిడేట్‌ టోర్నీకి అర్హత సాధించారు. తనకు సరైన పోటీనిచ్చే వారు లేకపోవడంతో ప్రపంచ చాంపియన్‌íÙప్‌లో పాల్గొనే ఆసక్తి లేదని గత ఏడాది ప్రకటించిన కార్ల్‌సన్‌ క్యాండిడేట్‌ టో ర్నీకి దూరంగా ఉండాలని నిర్ణయించుకున్నాడు. దాంతో రన్నరప్‌ ప్రజ్ఞానంద, కరువానా, అబసోవ్‌ క్యాండిడేట్‌ టో ర్నీకి అర్హత పొందారు. క్యాండిడేట్‌ టోర్నీ విజేత ప్రస్తుత ప్రపంచ చాంపియన్‌ డింగ్‌ లిరెన్‌ (చైనా)తో ప్రపంచ చాంపియన్‌షిప్‌ మ్యాచ్‌ ఆడతారు.   ఒక్కో రౌండ్‌ దాటి...   2019 ప్రపంచకప్‌లో తొలిసారి బరిలోకి దిగిన ప్రజ్ఞానంద నాలుగో రౌండ్‌లో వెనుదిరిగాడు. ఈసారి మాత్రం ఈ తమిళనాడు కుర్రాడు అద్భుత ప్రదర్శనతో అదరగొట్టాడు. విశ్వనాథన్‌ ఆనంద్‌ తర్వాత ఈ టోర్నీ చరిత్రలో ఫైనల్‌ చేరిన రెండో భారతీయ ప్లేయర్‌గా గుర్తింపు పొందాడు. ఓవరాల్‌గా ఈ టోర్నీలో భారత్‌ నుంచి ఓపెన్‌ విభాగంలో పది మంది గ్రాండ్‌మాస్టర్లు పోటీపడగా ఒకరు ఫైనల్‌కు, మరో ముగ్గురు క్వార్టర్‌ ఫైనల్‌కు చేరడం విశేషం.   ♦ 2690 రేటింగ్‌తో ప్రపంచ ర్యాంకింగ్స్‌లో 29వ స్థానంలో ఉన్న ప్రజ్ఞానందకు తొలి రౌండ్‌లో ‘బై’ లభించింది.   ♦ రెండో రౌండ్‌లో 2599 రేటింగ్‌ ఉన్న ఫ్రాన్స్‌ గ్రాండ్‌మాస్టర్‌ మాక్సిమి లగార్డె (ఫ్రాన్స్‌)పై 1.5–0.5తో గెలిచాడు.  ♦ మూడో రౌండ్‌లో చెక్‌ రిపబ్లిక్‌ గ్రాండ్‌మాస్టర్, 2689 రేటింగ్‌ ఉన్న డేవిడ్‌ నవారా (చెక్‌ రిపబ్లిక్‌)ను ప్రజ్ఞానంద ఓడించాడు.  ♦ నాలుగో రౌండ్‌లో ప్రజ్ఞానంద ప్రపంచ రెండో ర్యాంకర్, 2787 రేటింగ్‌ ఉన్న హికారు నకముర (అమెరికా)పై టైబ్రేక్‌లో 3–1తో సంచలన విజయం సాధించాడు.  ♦ ఐదో రౌండ్‌లో 1.5–0.5తో ఫెరెంక్‌ బెర్కెస్‌ (హంగేరి)పై గెలిచాడు.   ♦ క్వార్టర్‌ ఫైనల్లో ప్రజ్ఞానంద భారత్‌కే చెందిన మరో గ్రాండ్‌మాస్టర్, 2710 రేటింగ్‌ ఉన్న ఇరిగేశి అర్జున్‌పై టైబ్రేక్‌లో 5–4తో సంచలన విజయం సాధించాడు.   ♦ ప్రపంచ మూడో ర్యాంకర్, 2782 రేటింగ్‌ ఉన్న ఫాబియానో కరువానా (అమెరికా)తో జరిగిన సెమీఫైనల్లో ప్రజ్ఞానంద టైబ్రేక్‌లో 3.5–2.5తో గెలుపొంది ఫైనల్‌ చేరాడు.   

బకూ (అజర్‌బైజాన్‌): ప్రపంచకప్‌ చెస్‌ టోర్నీ ఓపెన్‌ విభాగంలో చాంపియన్‌ ఎవరో టైబ్రేక్స్‌ ద్వారా తేలనుంది. భారత యువ గ్రాండ్‌మాస్టర్‌ ప్రజ్ఞానంద, వరల్డ్‌ నంబర్‌వన్‌ కార్ల్‌సన్‌ (నార్వే) మధ్య ఫైనల్లో రెండో గేమ్‌ 30 ఎత్తుల్లో ‘డ్రా’గా ముగిసింది.  వరుసగా రెండో ‘డ్రా’ తర్వాత ఇద్దరూ 1–1తో సమంగా నిలిచారు. ఫలితంగా నేడు వీరిద్దరి మధ్య టైబ్రేక్‌ నిర్వహించి విజేతను నిర్ణయిస్తారు. ముందుగా ర్యాపిడ్‌ ఫార్మాట్‌లో 25 నిమిషాల నిడివిగల రెండు గేమ్‌లు ఆడిస్తారు. ఇందులో ఫలితం వస్తే ఫైనల్‌ను ముగిస్తారు. రెండు గేమ్‌ల తర్వాత కూడా సమంగా ఉంటే... ఈసారి 10 నిమిషాలు నిడివిగల రెండు గేమ్‌లు నిర్వహిస్తారు. ఇక్కడా ఫలితం తేలకపోతే 5 నిమిషాల నిడివిగల రెండు గేమ్‌లను ఆడిస్తారు. అయినా ఫలితం తేలకపోతే 3 నిమిషాల నిడివిగల గేమ్‌లను ఇద్దరిలో ఒకరు గెలిచే వరకు ఆడించి విజేతను ఖరారు చేస్తారు. 32 ఏళ్ల కార్ల్‌సన్‌ గతంలో క్లాసికల్, ర్యాపిడ్, బ్లిట్జ్‌ ఫార్మాట్‌లలో ప్రపంచ చాంపియన్‌గా నిలువగా... ప్రజ్ఞానంద కెరీర్‌లో తొలిసారి ప్రపంచకప్‌ ఫైనల్‌ ఆడుతున్నాడు.

బకూ (అజర్‌బైజాన్‌): ప్రపంచకప్‌ చెస్‌ టోర్నీ ఓపెన్‌ విభాగం టైటిల్‌ కోసం భారత యువ గ్రాండ్‌మాస్టర్‌ ప్రజ్ఞానంద, వరల్డ్‌ నంబర్‌వన్‌ మాగ్నస్‌ కార్ల్‌సన్‌ (నార్వే) మధ్య జరిగిన తొలి గేమ్‌ ‘డ్రా’గా ముగిసింది. తమిళనాడుకు చెందిన 18 ఏళ్ల ప్రజ్ఞానంద ఈ గేమ్‌లో తెల్ల పావులతో ఆడాడు. 35 ఎత్తుల తర్వాత ఫలితం తేలే అవకాశం లేకపోవడంతో ఇద్దరూ ‘డ్రా’కు సమ్మతించారు. ‘తొలి గేమ్‌లో నేను ఏ దశలోనూ ఇబ్బంది పడలేదు. రెండో గేమ్‌లో కార్ల్‌సన్‌తో గట్టి పోరాటమే చేయాల్సి ఉంటుంది. అతడిని నిలువరించేందుకు శాయశక్తులా ప్రయత్నిస్తా’ అని ప్రజ్ఞానంద వ్యాఖ్యానించాడు. వీరిద్దరి మధ్య నేడు రెండో గేమ్‌ జరుగుతుంది. ఈ గేమ్‌లో కార్ల్‌సన్‌ తెల్ల పావులతో ఆడతాడు. ఈ గేమ్‌లో గెలిచిన ప్లేయర్‌కు ప్రపంచకప్‌ టైటిల్‌ లభిస్తుంది. ఒకవేళ రెండో గేమ్‌ కూడా ‘డ్రా’ అయితే గురువారం టైబ్రేక్‌ గేమ్‌ల ద్వారా విజేతను నిర్ణయిస్తారు. 

బకూ (అజర్‌బైజాన్‌): ప్రపంచకప్‌ చెస్‌ టోర్నమెంట్‌ ఓపెన్‌ విభాగంలో భారత యువ గ్రాండ్‌మాస్టర్‌ ప్రజ్ఞానంద సెమీఫైనల్లోకి దూసుకెళ్లాడు. భారత్‌కే చెందిన మరో యువ గ్రాండ్‌మాస్టర్‌ ఇరిగేశి అర్జున్‌తో జరిగిన క్వార్టర్‌ ఫైనల్లో ప్రజ్ఞానంద 5–4తో గెలుపొందాడు. దిగ్గజం విశ్వనాథన్‌ ఆనంద్‌ తర్వాత ఈ టోర్నీ చరిత్రలో సెమీఫైనల్‌ దశకు చేరిన తొలి భారత ప్లేయర్‌గా ప్రజ్ఞానంద గుర్తింపు పొందాడు. తెలంగాణకు చెందిన 19 ఏళ్ల అర్జున్‌ కడదాకా పోరాడినా చివరకు తమిళనాడుకు చెందిన 17 ఏళ్ల ప్రజ్ఞానంద ఎత్తులకు చేతులెత్తేశాడు. బుధవారం ఇద్దరి మధ్య రెండు క్లాసికల్‌ గేమ్‌ల తర్వాత స్కోరు 1–1తో సమంగా నిలువడంతో... విజేతను నిర్ణయించేందుకు గురువారం ర్యాపిడ్‌ ఫార్మాట్‌లో టైబ్రేక్‌ గేమ్‌లు నిర్వహించారు. ముందుగా 25 నిమిషాల నిడివి గల రెండు గేమ్‌లు ఆడించారు. ఈ రెండూ ‘డ్రా’ కావడంతో ఇద్దరూ 2–2తో సమంగా నిలిచారు. అనంతరం 10 నిమిషాల నిడివిగల రెండు గేమ్‌లను ఆడించారు. తొలి గేమ్‌లో ప్రజ్ఞానంద 76 ఎత్తుల్లో గెలుపొందగా... రెండో గేమ్‌లో అర్జున్‌ 28 ఎత్తుల్లో నెగ్గాడు. దాంతో స్కోరు 3–3తో సమంగా నిలిచింది. ఈ దశలో 5 నిమిషాల నిడివిగల రెండు గేమ్‌లు ఆడించారు. ఇందులో తొలి గేమ్‌లో ప్రజ్ఞానంద 31 ఎత్తుల్లో నెగ్గగా... రెండో గేమ్‌లో అర్జున్‌ 36 ఎత్తుల్లో గెలుపొందడంతో స్కోరు 4–4తో సమంగా నిలిచింది. దాంతో ‘సడన్‌ డెత్‌’ టైబ్రేక్‌ మొదలైంది. ‘సడన్‌డెత్‌’లో తొలుత నెగ్గిన ప్లేయర్‌ను విజేతగా ప్రకటిస్తారు. ‘సడన్‌డెత్‌’ తొలి గేమ్‌లోనే ప్రజ్ఞానంద 72 ఎత్తుల్లో అర్జున్‌ను ఓడించి విజేతగా అవతరించాడు. శనివారం జరిగే సెమీఫైనల్స్‌ తొలి గేముల్లో ప్రపంచ నంబర్‌వన్‌ మాగ్నస్‌ కార్ల్‌సన్‌ (నార్వే)తో నిజాత్‌ అబసోవ్‌ (అజర్‌బైజాన్‌)... కరువానా (అమెరికా)తో ప్రజ్ఞానంద తలపడతారు.   

బకూ (అజర్‌బైజాన్‌): ప్రపంచకప్‌ చెస్‌ టోర్నీ ఓపెన్‌ విభాగంలో భారత గ్రాండ్‌మాస్టర్‌ విదిత్‌ సంతోష్‌ గుజరాతి సంచలనం సృష్టించాడు. ప్రపంచ ఐదో ర్యాంకర్, రష్యా గ్రాండ్‌మాస్టర్‌ ఇయాన్‌ నిపోమ్‌ని షితో జరిగిన ప్రిక్వార్టర్‌ ఫైనల్లో విదిత్‌ 4–2తో నెగ్గి క్వార్టర్‌ ఫైనల్లోకి దూసుకెళ్లాడు. నిర్ణీత రెండు క్లాసికల్‌ గేమ్‌ల తర్వాత ఇద్దరూ 1–1తో సమంగా ఉండటంతో విజేతను నిర్ణయించేందుకు సోమవారం ర్యాపిడ్‌ ఫార్మాట్‌లో టైబ్రేక్‌ గేమ్‌లు నిర్వహించారు. ముందుగా 25 నిమిషాల నిడివిగల రెండు ర్యాపిడ్‌ గేమ్‌లను ఆడించగా ఈ రెండూ ‘డ్రా’గా ముగిశాయి. దాంతో స్కోరు 2–2తో సమమైంది. అనంతరం 10 నిమిషాల నిడివిగల రెండు ర్యాపిడ్‌ గేమ్‌లను ఆడించారు. ఈ రెండింటిలో విదిత్‌ గెలుపొందడం విశేషం. తొలి గేమ్‌లో 60 ఎత్తుల్లో గెలిచిన విదిత్‌ రెండో గేమ్‌లో 52 ఎత్తుల్లో నెగ్గాడు. దాంతో విదిత్‌కు క్వార్టర్‌ ఫైనల్‌ బెర్త్‌ ఖరారైంది. ఈ టోర్నీలో నాలుగో భారత ప్లేయర్‌ క్వార్టర్‌ ఫైనల్‌ చేరాడు. ఇప్పటికే ఇరిగేశి అర్జున్, దొమ్మరాజు గుకేశ్, ప్రజ్ఞానంద క్వార్టర్‌ ఫైనల్‌ చేరారు. నేడు జరిగే క్వార్టర్‌ ఫైనల్స్‌ తొలి గేమ్‌లలో కార్ల్‌సన్‌ (నార్వే)తో గుకేశ్‌; నిజాత్‌ అబసోవ్‌ (అజర్‌బైజాన్‌)తో విదిత్‌; ప్రజ్ఞానందతో అర్జున్‌; కరువానా (అమెరికా)తో లీనియర్‌ (అమెరికా) తలపడతారు. హారిక ఓటమి మహిళల విభాగంలో భారత గ్రాండ్‌మాస్టర్‌ ద్రోణవల్లి హారిక పోరాటం ముగిసింది. క్వార్టర్‌ ఫైనల్లో హారిక 3.5–4.5తో అలెగ్జాండ్రా గోర్యాచ్‌కినా (రష్యా) చేతిలో ఓడిపోయింది. వీరిద్దరి మధ్య రెండు క్లాసికల్‌ గేమ్‌లు ‘డ్రా’గా ముగియడంతో విజేతను నిర్ణయించేందుకు ర్యాపిడ్‌ ఫార్మాట్‌లో టైబ్రేక్‌ గేమ్‌లు నిర్వహించారు. తొలి గేమ్‌లో గోర్యాచ్‌కినా, రెండో గేమ్‌లో హారిక గెలిచారు. దాంతో స్కోరు 2–2తో సమమైంది. అనంతరం నిర్వహించిన రెండు గేమ్‌లు ‘డ్రా’ కావడంతో స్కోరు 3–3తో సమమైంది. ఈసారి రెండు గేమ్‌లు నిర్వహించగా... తొలి గేమ్‌లో గోర్యాచ్‌కినా 43 ఎత్తుల్లో గెలిచి, రెండో గేమ్‌ను 95 ఎత్తుల్లో ‘డ్రా’ చేసుకొని సెమీఫైనల్‌ బెర్త్‌ను ఖరారు చేసుకుంది. 

బకూ (అజర్‌బైజాన్‌): ప్రపంచకప్‌ చెస్‌ టోర్నమెంట్‌ ఓపెన్‌ విభాగంలో భారత యువ గ్రాండ్‌మాస్టర్ల అద్భుత ప్రదర్శన కొనసాగుతోంది. ప్రిక్వార్టర్‌ ఫైనల్లో తెలంగాణ గ్రాండ్‌మాస్టర్‌ ఇరిగేశి అర్జున్, తమిళనాడు గ్రాండ్‌మాస్టర్లు దొమ్మరాజు గుకేశ్, ప్రజ్ఞానంద తమ ప్రత్యర్థులపై గెలిచి క్వార్టర్‌ ఫైనల్లోకి దూసుకెళ్లారు. ప్రిక్వార్టర్‌ ఫైనల్స్‌లో అర్జున్‌ 1.5–0.5తో నిల్స్‌ గ్రాండెలియస్‌ (స్వీడన్‌)పై, ప్రజ్ఞానంద 1.5–0.5తో ఫెరెంక్‌ బెర్కిస్‌ (హంగేరి)పై, గుకేశ్‌ 1.5–0.5తో హావో వాంగ్‌ (చైనా)పై గెలుపొందారు. క్వార్టర్‌ ఫైనల్స్‌లో ప్రపంచ నంబర్‌వన్‌ మాగ్నస్‌ కార్ల్‌సన్‌ (నార్వే)తో గుకేశ్‌; ప్రజ్ఞానందతో అర్జున్‌ తలపడతారు. శనివారం జరిగిన ప్రిక్వార్టర్‌ ఫైనల్స్‌ తొలి గేముల్లో నెగ్గిన అర్జున్, గుకేశ్‌ ఆదివారం జరిగిన రెండో గేమ్‌లను ‘డ్రా’ చేసుకొని... ప్రజ్ఞానంద 49 ఎత్తుల్లో గెలుపొంది క్వార్టర్‌ ఫైనల్‌ బెర్త్‌లను ఖరారు చేసుకున్నారు. నిపోమ్‌నిషి (రష్యా)తో జరుగుతున్న మరో ప్రిక్వార్టర్‌ ఫైనల్లో రెండో గేమ్‌ను కూడా విదిత్‌ (భారత్‌) ‘డ్రా’ చేసుకోవడంతో ఇద్దరూ 1–1తో సమఉజ్జీగా ఉన్నారు. వీరిద్దరి మధ్య నేడు ర్యాపిడ్‌ ఫార్మాట్‌లో టైబ్రేక్‌ నిర్వహించి విజేతను నిర్ణయిస్తారు. మహిళల విభాగంలో భారత గ్రాండ్‌మాస్టర్‌ ద్రోణవల్లి హారిక కూడా నేడు ర్యాపిడ్‌ ఫార్మాట్‌లో టైబ్రేక్‌ గేమ్‌లు ఆడనుంది. హారిక–అలెగ్జాండ్రా గోర్యాచ్‌కినా (రష్యా)తో క్వార్టర్‌ ఫైనల్లో రెండు గేమ్‌లు ముగిశాక ఇద్దరూ 1–1తో సమంగా నిలిచారు. దాంతో నేడు టైబ్రేక్‌ అనివార్యమైంది.

బకూ (అజర్‌బైజాన్‌): ప్రపంచ కప్‌ చెస్‌ టోర్నమెంట్‌లో తెలంగాణ ఆటగాడు ఇరిగేశి అర్జున్‌ కీలక విజయాన్ని అందుకున్నాడు. ఓపెన్‌ విభాగం ప్రిక్వార్టర్‌ ఫైనల్‌ తొలి రౌండ్‌లో నల్ల పావులతో ఆడి అర్జున్‌ గెలుపు నమోదు చేయడం విశేషం. ఈ గేమ్‌లో అర్జున్‌ 53 ఎత్తుల్లో స్వీడన్‌ గ్రాండ్‌మాస్టర్‌ నిల్స్‌ గ్రాండెలియస్‌ను ఓడించాడు. నేడు జరిగే రెండో రౌండ్‌ను అతను ‘డ్రా’గా ముగించినా సరే క్వార్టర్‌ ఫైనల్‌ చేరతాడు. మహిళల విభాగం క్వార్టర్‌ ఫైనల్లో ద్రోణవల్లి హారిక తొలి రౌండ్‌ను నల్లపావులతో ‘డ్రా’ చేసుకుంది. అలెగ్జాండ్రా గొర్యాకినా (రష్యా)తో జరిగిన ఈ పోరును 48 ఎత్తులో హారిక ముగించింది. ఓపెన్‌ విభాగం ప్రిక్వార్టర్‌ ఫైనల్‌ రౌండ్‌ తొలి గేమ్‌లో నల్లపావులతో ఆడి డి.గుకేశ్‌ కూడా విజయాన్ని అందుకున్నాడు. గుకేశ్‌ 38 ఎత్తుల్లో వాంగ్‌ హావో (చైనా)పై గెలుపొందాడు. ఇతర ప్రిక్వార్టర్‌ మ్యాచ్‌లలో ఫెరెన్స్‌ బెర్క్స్‌ (హంగేరీ)– ప్రజ్ఞానంద (45 ఎత్తుల్లో)...ఇయాన్‌ నెపొమినియాచి (రష్యా)– విదిత్‌ గుజరాతీ మధ్య (31 ఎత్తుల్లో) జరిగిన తొలి గేమ్‌లు ‘డ్రా’గా ముగిశాయి.   

బకూ (అజర్‌బైజాన్‌): ప్రపంచకప్‌ చెస్‌ టోర్నమెంట్‌ మహిళల విభాగంలో భారత గ్రాండ్‌మాస్టర్‌ ద్రోణవల్లి హారిక క్వార్టర్‌ ఫైనల్‌ చేరుకోగా... కోనేరు హంపి ప్రిక్వార్టర్‌ ఫైనల్లో వెనుదిరిగింది. ఎలైన్‌ రోబర్స్‌తో జరిగిన ప్రిక్వార్టర్‌ ఫైనల్లో హారిక 2.5–1.5తో గెలిచింది. నిర్ణీత రెండు క్లాసికల్‌ గేమ్‌ల తర్వాత ఇద్దరూ 1–1తో సమంగా ఉండటంతో శుక్రవారం ర్యాపిడ్‌ ఫార్మాట్‌లో టైబ్రేక్‌ను నిర్వహించారు. తొలి గేమ్‌ను హారిక 61 ఎత్తుల్లో ‘డ్రా’ చేసుకోగా... రెండో గేమ్‌లో హారిక 73 ఎత్తుల్లో నెగ్గి క్వార్టర్‌ ఫైనల్‌ బెర్త్‌ను ఖరారు చేసుకుంది. బెలా ఖొటెనాష్ లి (జార్జియా)తో జరిగిన ప్రిక్వార్టర్‌ ఫైనల్లో హంపి 1–3తో ఓడిపోయింది. ర్యాపిడ్‌ ఫార్మాట్‌ టైబ్రేక్‌ తొలి గేమ్‌లో హంపి 54 ఎత్తుల్లో... రెండో గేమ్‌లో 43 ఎత్తుల్లో పరాజయం పాలైంది.   గుకేశ్‌ ముందంజ...  ఓపెన్‌ విభాగంలో 18 ఏళ్ల భారత గ్రాండ్‌మాస్టర్‌ ప్రజ్ఞానంద పెను సంచలనం సృష్టించాడు. టైటిల్‌ ఫేవరెట్, ప్రపంచ రెండో ర్యాంకర్‌ హికారు నకముర (అమెరికా)పై ప్రజ్ఞానంద గెలుపొంది ప్రిక్వార్టర్‌ ఫైనల్‌ బెర్త్‌ను దక్కించుకున్నాడు. ర్యాపిడ్‌ ఫార్మాట్‌లోని రెండు గేముల్లో 2787 ఎలో రేటింగ్‌ ఉన్న నకమురను 2690 రేటింగ్‌ కలిగిన ప్రజ్ఞానంద ఓడించడం విశేషం. తమిళనాడుకు చెందిన ప్రజ్ఞానంద తొలి గేమ్‌లో 33 ఎత్తుల్లో, రెండో గేమ్‌లో 41 ఎత్తుల్లో విజయం సాధించాడు. తమిళనాడుకే చెందిన మరో గ్రాండ్‌మాస్టర్‌ దొమ్మరాజు గుకేశ్‌ 2.5–1.5తో ఆండ్రీ ఎసిపెంకో (రష్యా)ను ఓడించి ప్రిక్వార్టర్‌ ఫైనల్‌ చేరగా... నిహాల్‌ సరీన్‌ 1–3తో నెపోమ్‌నిశి (రష్యా) చేతిలో ఓడిపోయాడు.   

బకూ (అజర్‌బైజాన్‌): ప్రపంచకప్‌ చెస్‌ టోర్నమెంట్‌ మహిళల విభాగంలో భారత గ్రాండ్‌మాస్టర్‌ ద్రోణవల్లి హారిక... ఓపెన్‌ విభాగంలో నిహాల్‌ సరీన్, విదిత్‌ సంతోష్‌ గుజరాతి నాలుగో రౌండ్‌లోకి ప్రవేశించారు. సోమవారం జరిగిన మూడో రౌండ్‌ టైబ్రేక్‌ పోటీల్లో హారిక 5.5–4.5తో లెలా జవఖి‹Ùవిలి (జార్జియా)పై... నిహాల్‌ 2.5–1.5తో డేనియల్‌ బొగ్డాన్‌ (రొమేనియా)పై... విదిత్‌ 5–4తో మథియాస్‌ బ్లూ»ౌమ్‌ (జర్మనీ)పై విజయం సాధించారు. ఆదివారం రెండు క్లాసికల్‌ గేమ్‌లు ‘డ్రా’ కావడంతో హారిక–లెలా మధ్య విజేతను నిర్ణయించేందుకు సోమవారం టైబ్రేక్‌ గేమ్‌లు నిర్వహించారు. వీరిద్దరు ముందుగా 25 నిమిషాల నిడివి గల రెండు ర్యాపిడ్‌ గేమ్‌లు ఆడారు. రెండూ ‘డ్రా’గా ముగియడంతో 2–2తో సమంగా నిలిచారు. దాంతో 10 నిమిషాలు నిడివిగల రెండు ర్యాపిడ్‌ గేమ్‌లు నిర్వహించారు. ఇందులో చెరో గేమ్‌లో గెలవడంతో స్కోరు 3–3తో సమమైంది. అనంతరం 5 నిమిషాల నిడివిగల రెండు ర్యాపిడ్‌ గేమ్‌లు ఆడించగా...రెండూ ‘డ్రా’ కావడంతో స్కోరు 4–4తో నిలిచింది. దాంతో విజేతను నిర్ణయించేందుకు ఆఖరుగా 3 నిమిషాల నిడివిగల ‘సడన్‌డెత్‌’ గేమ్‌లు మొదలయ్యాయి. ‘సడన్‌డెత్‌’లో ‘డ్రా’ అయితే విజేత తేలేవరకు గేమ్‌లు నిర్వహిస్తారు, గెలిస్తే మాత్రం వెంటనే ముగిస్తారు. ఇందులో హారిక, లెలా తొలి గేమ్‌ ‘డ్రా’కాగా... రెండో గేమ్‌లో హారిక 59 ఎత్తుల్లో నెగ్గి నాలుగో రౌండ్‌ బెర్త్‌ను ఖరారు చేసుకుంది.

బకూ (అజర్‌బైజాన్‌): ప్రపంచకప్‌ చెస్‌ టోర్నమెంట్‌ ఓపెన్‌ విభాగంలో తెలంగాణ గ్రాండ్‌మాస్టర్‌ హర్ష భరతకోటి శుభారంభం చేశాడు. లెవాన్‌ పాంట్‌సులయ (జార్జియా)తో ఆదివారం జరిగిన తొలి రౌండ్‌ తొలి గేమ్‌లో హర్ష 40 ఎత్తుల్లో గెలిచాడు. గ్రెగరీ కైదనోవ్‌ (అమెరికా)తో జరిగిన తొలి రౌండ్‌ తొలి గేమ్‌ను ఆంధ్రప్రదేశ్‌ గ్రాండ్‌మాస్టర్‌ కార్తీక్‌ వెంకటరామన్‌ 38 ఎత్తుల్లో ‘డ్రా’ చేసుకున్నాడు. భారత గ్రాండ్‌మాస్టర్లు ఇరిగేశి అర్జున్, దొమ్మరాజు గుకేశ్, విదిత్, నిహాల్‌ సరీన్, ప్రజ్ఞానందలకు నేరుగా రెండో రౌండ్‌కు ‘బై’ కేటాయించారు.  మహిళల విభాగంలో మరీనా బ్రునెల్లో (ఇటలీ)తో జరిగిన తొలి రౌండ్‌ తొలి గేమ్‌ను ఆంధ్రప్రదేశ్‌ అమ్మాయి నూతక్కి ప్రియాంక 27 ఎత్తుల్లో ‘డ్రా’ చేసుకుంది. కోనేరు హంపి, ద్రోణవల్లి హారిక, వైశాలిలకు నేరుగా రెండో రౌండ్‌కు ‘బై’ లభించింది.   

ప్రపంచకప్‌ చెస్‌ టోర్నమెంట్‌ ఓపెన్‌ విభాగం నాలుగో రౌండ్‌ తొలి గేమ్‌లో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణకు పరాజయం ఎదురైంది. అమిన్‌ (ఇరాన్‌)తో జరిగిన తొలి గేమ్‌లో నల్లపావులతో ఆడిన హరికృష్ణ 57 ఎత్తుల్లో ఓడిపోయాడు. నేడు జరిగే రెండో గేమ్‌లో హరికృష్ణ తప్పనిసరిగా గెలిస్తేనే టోర్నీలో నిలుస్తాడు. మరోవైపు విదిత్‌ (భారత్‌) 49 ఎత్తుల్లో జెఫ్రీ జియాంగ్‌ (అమెరికా)పై విజయం సాధించాడు. మాక్సిమి లాగ్రెవ్‌ (ఫ్రాన్స్‌)తో జరిగిన తొలి గేమ్‌ను ప్రజ్ఞానంద 41 ఎత్తుల్లో ‘డ్రా’గా ముగించాడు.

సోచి (రష్యా): ప్రపంచకప్‌ చెస్‌ టోర్నమెంట్‌ ఓపెన్‌ విభాగంలో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణ నాలుగో రౌండ్‌లోకి ప్రవేశించాడు. కాన్‌స్టాన్‌టిన్‌ లుపులెస్కు (రొమేనియా)తో జరిగిన మూడో రౌండ్‌ మ్యాచ్‌లో భారత రెండో ర్యాంకర్‌ హరికృష్ణ 1.5–0.5తో విజయం సాధించాడు. ఆదివారం జరిగిన తొలి గేమ్‌లో గెలిచిన హరికృష్ణ, సోమవారం జరిగిన రెండో గేమ్‌ను 46 ఎత్తుల్లో ‘డ్రా’గా ముగించాడు. భారత్‌కే చెందిన నిహాల్‌ సరీన్‌ 0.5–1.5తో ఆంద్రికిన్‌ (రష్యా) చేతిలో ఓటమి పాలయ్యాడు. విదిత్‌–ఆధిబన్‌ (భారత్‌); ప్రజ్ఞానంద (భారత్‌)–క్రాసెన్‌కౌ (పోలాండ్‌) నిర్ణీత రెండు గేమ్‌ల తర్వాత 1–1తో సమంగా నిలిచారు. దాంతో విజేతను నిర్ణయించేందుకు నేడు టైబ్రేక్‌ గేమ్‌లు నిర్వహిస్తారు. మరోవైపు హిళల విభాగంలో ఆంధ్రప్రదేశ్‌ గ్రాండ్‌మాస్టర్‌ ద్రోణవల్లి హారిక 0.5–1.5తో గునీనా (రష్యా) చేతిలో ఓడిపోయి టోర్నీ నుంచి నిష్క్రమించింది.  

సోచి (రష్యా): ప్రపంచకప్‌ చెస్‌ నాకౌట్‌ టోర్నమెంట్‌లో ఓపెన్‌ విభాగంలో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణతోపాటు భారత్‌కే చెందిన ఆధిబన్, ప్రజ్ఞానంద, నిహాల్‌ సరీన్‌ మూడో రౌండ్‌లోకి ప్రవేశించారు. రెండో రౌండ్‌ మ్యాచ్‌ల్లో హరికృష్ణ 1.5–0.5తో యాసిర్‌ పెరెజ్‌ క్యూసాడా (క్యూబా)పై, ఆధిబన్‌ 2–0తో న్యూరిస్‌ డెల్గాడో రమిరెజ్‌ (పరాగ్వే)పై, ప్రజ్ఞానంద 2–0తో గాబ్రియెల్‌ సర్గాసియన్‌ (అర్మేనియా)పై, నిహాల్‌ 1.5–0.5తో సనన్‌ జుగిరోవ్‌ (రష్యా)పై గెలిచారు. నిర్ణీత రెండు గేమ్‌లు ముగిశాక విదిత్‌ (భారత్‌)–అలెగ్జాండర్‌ ఫియెర్‌ (బ్రెజిల్‌); గుకేశ్‌ (భారత్‌)–దుబోవ్‌ (రష్యా) 1–1తో సమంగా నిలిచారు. దాంతో విజేతను నిర్ణయించేందుకు శనివారం ‘టైబ్రేక్‌’ నిర్వహిస్తారు. అరవింద్‌ చిదంబరం (భారత్‌) 0.5–1.5తో నోదిర్బెక్‌ (ఉజ్బెకిస్తాన్‌) చేతిలో... ఇనియన్‌ (భారత్‌) 0–2తో తొమాస్‌షెవ్‌స్కీ (రష్యా) చేతిలో ఓడిపోయారు. మహిళల విభాగంలో ఆంధ్రప్రదేశ్‌ గ్రాండ్‌మాస్టర్‌ ద్రోణవల్లి హారిక మూడో రౌండ్‌లోకి ప్రవేశించింది. హారిక ప్రత్యర్థి మెదీనా (ఇండోనేసియా)కు కరోనా పాజిటివ్‌ రావడంతో ఆమె బరిలోకి దిగలేదు. భక్తి కులకర్ణి 0.5–1.5తో నటాలియా పొగోనినా (రష్యా) చేతిలో... వైశాలి 0–2తో బేలా ఖొటెనాష్‌విలి (జార్జియా) చేతిలో ఓడిపోయారు. పద్మిని రౌత్‌ (భారత్‌)–సారాసదత్‌ (ఇరాన్‌) 1–1తో సమంగా నిలువడంతో శనివారం టైబ్రేక్‌లో తలపడతారు.  

ప్రపంచకప్‌ చెస్‌ టోర్నమెంట్‌ మహిళల విభాగంలో భారత క్రీడాకారిణి పద్మిని రౌత్‌ శుభారంభం చేసింది. రష్యాలో సోమవారం మొదలైన ఈ టోర్నీ తొలి రౌండ్‌ తొలి గేమ్‌లో పద్మిని 36 ఎత్తుల్లో ఉల్వియా (అజర్‌బైజాన్‌)పై గెలిచింది. నేడు వీరిద్దరి మధ్యే రెండో గేమ్‌ జరుగుతుంది. దీనిని ‘డ్రా’ చేసుకుంటే పద్మిని రెండో రౌండ్‌కు చేరుకుంటుంది. మరో తొలి రౌండ్‌ గేమ్‌లో భారత్‌కే చెందిన వైశాలి 62 ఎత్తుల్లో కియు జౌ (కెనడా)పై నెగ్గింది. ద్రోణవల్లి హారిక, భక్తి కులకర్ణిలకు నేరుగా రెండో రౌండ్‌కు ‘బై’ లభించింది.

ఖాంటీ మన్‌సిస్క్‌ (రష్యా): ప్రపంచకప్‌ చెస్‌ టోర్నమెంట్‌ మూడో రౌండ్‌లో భారత గ్రాండ్‌మాస్టర్స్‌ పెంటేల హరికృష్ణ, విదిత్‌ సంతోష్‌ గుజరాతిలకు ఓటమి ఎదురైంది. సోమవారం జరిగిన మూడో రౌండ్‌ తొలి గేమ్‌లో నల్లపావులతో ఆడిన ఆంధ్రప్రదేశ్‌ ఆటగాడు హరికృష్ణ 52 ఎత్తుల్లో కిరిల్‌ అలెక్‌సీన్‌కో (రష్యా) చేతిలో... మహారాష్ట్ర ప్లేయర్‌ విదిత్‌ 93 ఎత్తుల్లో సో వెస్లీ (అమెరికా) చేతిలో ఓటమి చవిచూశారు. ప్రిక్వార్టర్‌ ఫైనల్‌ చేరే అవకాశాలు సజీవంగా ఉండాలంటే... నేడు జరిగే రెండో గేమ్‌లో హరికృష్ణ, విదిత్‌ తప్పనిసరిగా గెలవాల్సిందే. వీరిద్దరు కనీసం ‘డ్రా’ చేసుకున్నా ఈ టోర్నీలో భారత కథ ముగుస్తుంది.   

ఖాంటీ మన్‌సిస్క్‌ (రష్యా): ప్రపంచకప్‌ చెస్‌ టోర్నమెంట్‌ నుంచి భారత గ్రాండ్‌ మాస్టర్లు నిహాల్‌ సరీన్, ఆధిబన్‌ ని్రష్కమించారు. ఆదివారం జరిగిన రెండో రౌండ్‌ టైబ్రేక్‌ పోటీల్లో వీరిద్దరికీ పరాజయం ఎదురైంది. కేరళకు చెందిన 15 ఏళ్ల నిహాల్‌ 1.5–2.5తో ఎల్తాజ్‌ సఫార్లీ (అజర్‌బైజాన్‌) చేతిలో... తమిళనాడుకు చెందిన ఆధిబన్‌ 1.5–2.5తో యు యాంగి (చైనా) చేతిలో ఓటమి చవిచూశారు. శనివారం నిరీ్ణత రెండు గేమ్‌ల తర్వాత స్కోరు 1–1తో సమం కావడంతో విజేతను నిర్ణయించడానికి ఆదివారం టైబ్రేక్‌ గేమ్‌లు నిర్వహించారు. నిహాల్‌తో జరిగిన టైబ్రేక్‌ తొలి గేమ్‌లో ఎల్తాజ్‌ 61 ఎత్తుల్లో గెలిచి... రెండో గేమ్‌ను 25 ఎత్తుల్లో ‘డ్రా’ చేసుకున్నాడు. ఆధిబన్‌తో జరిగిన టైబ్రేక్‌ తొలి గేమ్‌లో యు యాంగి 54 ఎత్తుల్లో నెగ్గి... రెండో గేమ్‌ను 40 ఎత్తుల్లో ‘డ్రా’ చేసుకున్నాడు. నిహాల్, ఆధిబన్‌ ఓటమితో ఈ మెగా ఈవెంట్‌లో భారత్‌ తరఫున ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణ, మహారాష్ట్ర ప్లేయర్‌ విదిత్‌ సంతోష్‌ గుజరాతి మాత్రమే బరిలో మిగిలారు. నేడు జరిగే మూడో రౌండ్‌ తొలి గేమ్‌ల్లో కిరిల్‌ అలెక్‌సీన్‌కో (రష్యా)తో హరికృష్ణ... సో వెస్లీ (అమెరికా)తో విదిత్‌ తలపడతారు.   

ఖాంటీ మన్‌సిస్క్‌ (రష్యా): ప్రపంచకప్‌ చెస్‌ టోర్నమెంట్‌లో భారత్‌ గ్రాండ్‌ మాస్టర్‌ హరికృష్ణ మూడో రౌండ్‌కు అర్హత పొందాడు. శనివారం వ్లాదిమర్‌ ఫెడోసీవ్‌ (రష్యా)తో జరిగిన రెండోరౌండ్‌ రెండో గేమ్‌ను అతను 61 ఎత్తుల్లో డ్రా చేసుకొని 1.5–0.5 పాయింట్లతో ముందంజ వేశాడు. విదిత్‌ గుజరాతి కూడా మూడో రౌండ్‌కు చేరాడు

ఖాంటీ మన్‌సిస్క్‌ (రష్యా): ప్రపంచకప్‌ చెస్‌ టోర్నమెంట్‌ రెండో రౌండ్‌లో భారత ఆటగాళ్లకు మిశ్రమ ఫలితాలు లభించాయి. శుక్రవారం జరిగిన రెండో రౌండ్‌ తొలి గేమ్‌లో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణతోపాటు నిహాల్‌ సరీన్‌ గెలుపొందగా... విదిత్, ఆధిబన్‌ తమ గేమ్‌లను ‘డ్రా’ చేసుకున్నారు. మరోప్లేయర్‌ అరవింద్‌ చిదంబరం ఓడిపోయాడు. హరికృష్ణ 54 ఎత్తుల్లో వ్లాదిమిర్‌ ఫెడోసీవ్‌ (రష్యా)పై, నిహాల్‌ 37 ఎత్తుల్లో సఫార్లి ఎల్తాజ్‌ (అజర్‌బైజాన్‌)పై నెగ్గారు. నేడు హరికృష్ణ, నిహాల్‌ తమ గేమ్‌లను ‘డ్రా’ చేసుకుంటే మూడో రౌండ్‌కు అర్హత పొందుతారు.  ఈ టోర్నీలో హరికృష్ణకిది వరుసగా మూడో విజయం కావడం విశేషం. విదిత్‌–రఖ్‌మనోవ్‌ (రష్యా) గేమ్‌ 31 ఎత్తుల్లో; ఆధిబన్‌–యు యాంగీ (చైనా) గేమ్‌ 55 ఎత్తుల్లో ‘డ్రా’గా ముగిశాయి. అరవింద్‌ 37 ఎత్తుల్లో తొమవ్‌స్కీ (రష్యా) చేతిలో ఓటమి పాలయ్యాడు.   


 తిబిలిసి (జార్జియా): ప్రపంచ కప్‌ చెస్‌ టోర్నమెంట్‌లో తెలుగు ఆటగాడు పెంటేల హరికృష్ణ ఆట ముగిసింది. శుక్రవారం జరిగిన రెండో రౌండ్‌లో భారత్‌కే చెందిన సేతురామన్‌ చేతిలో హరికృష్ణ పరాజయం పాలయ్యాడు. ఇద్దరి మధ్య టైబ్రేక్‌లో రెండు ర్యాపిడ్‌ గేమ్‌లు జరిగాయి.
 
 తొలి గేమ్‌ 58 ఎత్తుల్లో డ్రాగా ముగిసింది. అయితే రెండో గేమ్‌లో తీవ్ర ఒత్తిడికి లోనైన హరికృష్ణ స్వీయ తప్పిదాలతో 62 ఎత్తుల్లో పరాజయం పాలయ్యాడు.  


 తిబిలిసి (జార్జియా): గతంలో రెండుసార్లు (2000, 2002లో) చాంపియన్‌గా నిలిచిన భారత గ్రాండ్‌మాస్టర్‌ విశ్వనాథన్‌ ఆనంద్‌కు ఈసారి ప్రపంచకప్‌ చెస్‌ టోర్నమెంట్‌లో చేదు అనుభవం ఎదురైంది. 15 ఏళ్ల తర్వాత ఈ మెగా ఈవెంట్‌లో మళ్లీ బరిలోకి దిగిన ఆనంద్‌ రెండో రౌండ్‌లోనే నిష్క్రమించాడు. ఆశలు సజీవంగా ఉండాలంటే ఆంటోన్‌ కొవల్‌యోవ్‌ (కెనడా)తో గురువారం జరిగిన రెండో గేమ్‌లో తప్పనిసరిగా గెలవాల్సిన ఆనంద్‌ 31 ఎత్తుల్లో ‘డ్రా’ చేసుకున్నాడు.
 
 దాంతో 0.5–1.5తో కొవల్‌యోవ్‌ చేతిలో ఆనంద్‌ ఓడిపోయాడు. మరోవైపు లీ క్వాంగ్‌ లియెమ్‌ (వియత్నాం)తో జరిగిన రెండో గేమ్‌ను విదిత్‌ 47 ఎత్తుల్లో ‘డ్రా’ చేసుకొని 1.5–0.5తో గెలుపొంది మూడో రౌండ్‌కు చేరాడు. పెంటేల హరికృష్ణ–సేతురామన్‌ల మధ్య; ఆదిబన్‌–నెపోమ్‌నియాచి (రష్యా)ల మధ్య రెండో గేమ్‌ కూడా ‘డ్రా’ కావడంతో స్కోరు 1–1తో సమమైంది. దాంతో శుక్రవారం టైబ్రేక్‌ ద్వారా విజేతలను నిర్ణయిస్తారు. 


 తిబిలిసి (జార్జియా): ప్రపంచకప్‌ చెస్‌ టోర్నమెంట్‌లో నిలవాలంటే తప్పనిసరిగా గెలవాల్సిన గేమ్‌లో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణ రాణించాడు. యూరీ గొంజాలెజ్‌ విడాల్‌ (క్యూబా)తో ఆదివారం జరిగిన తొలి గేమ్‌లో ఓడిపోయిన హరికృష్ణ... సోమవారం జరిగిన రెండో గేమ్‌లో 41 ఎత్తుల్లో గెలిచాడు. దాంతో స్కోరు 1–1తో సమమైంది. వీరిద్దరి మధ్య విజేతను నిర్ణయించడానికి మంగళవారం టైబ్రేక్‌ గేమ్‌లను నిర్వహిస్తారు. మరోవైపు విశ్వనాథన్‌ ఆనంద్‌ 1.5–0.5తో లీ తియాన్‌ యో (మలేసియా)పై, సేతురామన్‌ 1.5–0.5తో పొనొమరియోవ్‌ (ఉక్రెయిన్‌)పై, విదిత్‌ 1.5–0.5తో డెల్గాడో (పరాగ్వే)పై గెలిచి రెండో రౌండ్‌కు చేరుకోగా... దీప్‌ సేన్‌గుప్తా 0.5–1.5తో వాంగ్‌ హావో (చైనా) చేతిలో ఓడిపోయాడు.
 
 వలెజో పోన్స్‌ (స్పెయిన్‌)తో కార్తికేయన్‌ మురళీ; త్రుయోంగ్‌ సన్‌ (వియత్నాం)తో ఆదిబన్‌ స్కోరు 1–1తో సమం కావడంతో మంగళవారం టైబ్రేక్‌ గేమ్‌ల ద్వారా విజేతలను నిర్ణయిస్తారు. సోమవారం జరిగిన రెండో గేమ్‌ల్లో ఆనంద్‌ 71 ఎత్తుల్లో లీ తియాన్‌ యోతో... ఆదిబన్‌ 34 ఎత్తుల్లో త్రుయోంగ్‌ సన్‌తో ‘డ్రా’ చేసుకోగా... సేతురామన్‌ 58 ఎత్తుల్లో పొనొమరియోవ్‌పై, విదిత్‌ 44 ఎత్తుల్లో డెల్గాడోపై, కార్తికేయన్‌ మురళీ 45 ఎత్తుల్లో వలెజో పోన్స్‌పై గెలిచారు. దీప్‌ సేన్‌గుప్తా 48 ఎత్తుల్లో వాంగ్‌ హావో చేతిలో ఓటమి పాలయాయ్యాడు.


 తిబిలిసి (జార్జియా): ప్రపంచకప్‌ చెస్‌ టోర్నమెంట్‌లో తొలి రౌండ్‌ తొలి గేమ్‌లో ఆంధ్రప్రదేశ్‌ గ్రాండ్‌మాస్టర్‌ పెంటేల హరికృష్ణకు ఓటమి ఎదురైంది. యూరీ గొంజాలెజ్‌ విడాల్‌ (క్యూబా)తో ఆదివారం జరిగిన తొలి గేమ్‌లో హరికృష్ణ నల్లపావులతో ఆడుతూ 36 ఎత్తుల్లో ఓడిపోయాడు. హరికృష్ణ ఆశలు సజీవంగా ఉండాలంటే సోమవారం గొంజాలెజ్‌తో జరిగే రెండో గేమ్‌లో తప్పనిసరిగా గెలవాలి. మరోవైపు విశ్వనాథన్‌ ఆనంద్‌ 66 ఎత్తుల్లో తియాన్‌ లి యో (మలేసియా)పై గెలిచి శుభారంభం చేశాడు.
 
 ఇతర తొలి రౌండ్‌ గేముల్లో రుస్లాన్‌ పొనోమరియోవ్‌ (ఉక్రెయిన్‌)తో సేతురామన్‌ 16 ఎత్తుల్లో; ఎన్గుయెన్‌ త్రుయోంగ్‌ సన్‌ (వియత్నాం)తో ఆదిబన్‌ 15 ఎత్తుల్లో; వాంగ్‌ హావో (చైనా)తో దీప్‌ సేన్‌గుప్తా 34 ఎత్తుల్లో; డెల్గాడో రమిరేజ్‌ (పరాగ్వే)తో విదిత్‌ 32 ఎత్తుల్లో ‘డ్రా’ చేసుకున్నారు. వలేజో పోన్స్‌ (స్పెయిన్‌)తో జరిగిన గేమ్‌లో కార్తికేయన్‌ మురళి 64 ఎత్తుల్లో ఓటమి చవిచూశాడు.


 నేటి నుంచి ప్రపంచకప్‌ చెస్‌ టోర్నీ
  
 తిబిలిసి (జార్జియా): వచ్చే ఏడాది జరిగే క్యాండిడేట్స్‌ చెస్‌ టోర్నమెంట్‌కు అర్హత పొందడమే లక్ష్యంగా ఆదివారం మొదలయ్యే పురుషుల ప్రపంచకప్‌ చెస్‌ టోర్నమెంట్‌లో భారత అగ్రశ్రేణి క్రీడాకారులు విశ్వనాథన్‌ ఆనంద్, పెంటేల హరికృష్ణ బరిలోకి దిగనున్నారు. 128 మంది మేటి క్రీడాకారులు పాల్గొంటున్న ఈ నాకౌట్‌ టోర్నమెంట్‌లో తొలి రెండు స్థానాల్లో నిలిచిన వారు క్యాండిడేట్స్‌ చెస్‌ టోర్నీకి అర్హత సాధిస్తారు. తొలి రౌండ్‌లో తియాన్‌ లి యో (మలేసియా)తో విశ్వనాథన్‌ ఆనంద్‌; యూరీ గొంజాలెజ్‌ విడాల్‌ (క్యూబా)తో హరికృష్ణ తలపడతారు. ప్రతి రౌండ్‌లో రెండు గేమ్‌లు జరుగుతాయి. ఎక్కువ పాయింట్లు సాధించిన వారిని విజేతగా ప్రకటిస్తారు. ఒకవేళ స్కోరు సమమైతే టైబ్రేక్‌ గేమ్‌ల ద్వారా విజేతను నిర్ణయిస్తారు.
 
 ఆనంద్, హరికృష్ణలతోపాటు భారత్‌ నుంచి విదిత్‌ సంతోష్‌ గుజరాతి, ఆదిబన్, దీప్‌ సేన్‌గుప్తా, సేతురామన్, కార్తికేయన్‌ మురళీ తమ అదృష్టాన్ని పరీక్షించుకోనున్నారు. క్యాండిడేట్స్‌ టోర్నీ ద్వారా ప్రస్తుత ప్రపంచ చాంపియన్‌ మాగ్నస్‌ కార్ల్‌సన్‌ (నార్వే)తో వచ్చే ఏడాది జరిగే ప్రపంచ చాంపియన్‌షిప్‌ మ్యాచ్‌లో తలపడే ప్రత్యర్థిని నిర్ణయిస్తారు. ఇతర తొలి రౌండ్‌ మ్యాచ్‌ల్లో రుస్లాన్‌ పొనోమరియోవ్‌ (ఉక్రెయిన్‌)తో సేతురామన్‌; వలేజో పోన్స్‌ (స్పెయిన్‌)తో కార్తికేయన్‌ మురళి; ఎన్గుయెన్‌ త్రుయోంగ్‌ సన్‌ (వియత్నాం)తో ఆదిబన్‌; వాంగ్‌ హావో (చైనా)తో దీప్‌ సేన్‌ గుప్తా; డెల్గాడో (పరాగ్వే)తో విదిత్‌ తలపడతారు. ఎనిమిది సార్లు ప్రపంచకప్‌ జరగ్గా... భారత్‌ తరఫున విశ్వనాథన్‌ ఆనంద్‌ రెండుసార్లు (2000లో, 2002లో) విజేతగా నిలిచాడు. 15 ఏళ్ల తర్వాత ఆనంద్‌ మరోసారి ప్రపంచకప్‌లో బరిలోకి దిగుతుండటం విశేషం.


 బాకు (అజర్‌బైజాన్) : ప్రపంచ కప్ చెస్ టోర్నమెంట్‌లో భారత ఆటగాళ్ల పోరాటం ముగిసింది. భారత్ నుంచి బరిలో మిగిలిన గ్రాండ్‌మాస్టర్ సేతురామన్ మూడో రౌండ్‌లో నిష్ర్కమించాడు. షఖిరి యార్ మమెద్యరోవ్ (అజర్‌బైజాన్)తో జరిగిన మూడో రౌండ్‌లో సేతురామన్ 0.5-1.5 పాయింట్ల తేడాతో ఓడిపోయాడు. గురువారం జరిగిన తొలి గేమ్‌లో సేతురామన్ 41 ఎత్తుల్లో ఓడిపోగా... శుక్రవారం జరిగిన రెండో గేమ్‌ను సేతురామన్ 36 ఎత్తుల్లో ‘డ్రా’గా ముగించాడు.
 
 ఈ టోర్నీలో భారత ఆటగాళ్లు సూర్యశేఖర గంగూలీ, లలిత్, ఆదిబన్, విదిత్ తొలి రౌండ్‌లోనే ఓటమి చెందగా... హరికృష్ణ రెండో రౌండ్‌లో నిష్ర్కమించాడు.


 బాకు (అజర్‌బైజాన్) : ప్రపంచకప్ చెస్ టోర్నమెంట్ నుంచి భారత గ్రాండ్‌మాస్టర్ పెంటేల హరికృష్ణ నిష్ర్కమించాడు. భారత్‌కే చెందిన మరో గ్రాండ్‌మాస్టర్ సేతురామన్‌తో జరిగిన రెండో రౌండ్‌లో ఈ హైదరాబాద్ చెస్ ప్లేయర్ 0.5-1.5 తేడాతో ఓడిపోయాడు. సోమవారం జరిగిన తొలి గేమ్‌ను ‘డ్రా’ చేసుకున్న హరికృష్ణ... మంగళవారం జరిగిన రెండో గేమ్‌లో 46 ఎత్తుల్లో ఓడిపోయాడు. హరికృష్ణ ఓటమితో ఈ మెగా ఈవెంట్‌లో భారత్ నుంచి సేతురామన్ ఒక్కడే బరిలో మిగిలాడు. ఈ టోర్నీలో ఇతర భారత ఆటగాళ్లు సూర్యశేఖర గంగూలీ, లలిత్ బాబు, విదిత్ గుజరాతీ, ఆధిబన్ తొలి రౌండ్‌లోనే ఓటమి పాలయ్యారు.


  బాకు (అజర్‌బైజాన్) : ప్రపంచ కప్ చెస్ టోర్నీలో తెలుగు గ్రాండ్ మాస్టర్ పెంటేల హరికృష్ణ శుభారంభం చేశాడు. మ్యాక్స్ ఇల్లింగ్‌వర్త్ (ఆస్ట్రేలియా)తో జరుగుతున్న తొలి రౌండ్ మొదటి గేమ్‌లో హరికృష్ణ విజయం సాధించాడు. 59 ఎత్తులో హరి గేమ్ ముగించాడు. మరో వైపు లలిత్‌బాబు, వోటాసెక్ (పోలండ్) మధ్య జరిగిన గేమ్ 39 ఎత్తుల్లో ‘డ్రా’గా ముగిసింది. ఇతర భారత ఆటగాళ్లలో సేతురామన్ విజయం సాధించగా, గంగూలీ ఓడిపోయాడు. విదిత్ గుజరాతీ, ఆదిబన్ కూడా తమ గేమ్‌లను ‘డ్రా’ చేసుకున్నారు.


 నేటి నుంచి ప్రపంచకప్ చెస్  బరిలో లలిత్ బాబు కూడా
 
  బాకు (అజర్‌బైజాన్) : ప్రపంచ కప్ చెస్ టోర్నమెంట్‌లో సత్తా చాటేందుకు గ్రాండ్‌మాస్టర్ పెంటేల హరికృష్ణ సిద్ధమయ్యాడు. నేటి నుంచి ఇక్కడ జరగనున్న ఈ మెగా ఈవెంట్ లో మొత్తం 128 మంది ఆటగాళ్లు పాల్గొంటున్నారు. విశ్వనాథన్ ఆనంద్, కార్ల్‌సన్ మినహా ప్రపంచంలోని ప్రముఖ గ్రాండ్‌మాస్టర్లంతా బరిలో నిలిచారు. ప్రపంచ ర్యాంకింగ్స్‌లో 21వ స్థానంలో ఉన్న హరి తొలి రౌండ్‌లో ఆస్ట్రేలియాకు చెందిన మ్యాక్స్ ఇల్లింగ్‌వర్త్‌ను ఎదుర్కొంటాడు.
 
 హరికృష్ణ కాకుండా మరో ఐదుగురు భారత ఆటగాళ్లు ఆదిబన్, సూర్య శేఖర్ గంగూలీ, విది త్ గుజరాతీ, సేతురామన్, ఎంఆర్ లలిత్ బాబు ఈ టోర్నమెంట్‌లో పోటీ పడుతున్నారు. తెలుగు కుర్రాడు లలిత్ బాబుకు కఠినమైన ‘డ్రా’ ఎదురైంది. తొలి రౌండ్‌లో అతను 18వ ర్యాంకర్ వోటాసెక్ (పోలండ్)తో తలపడతాడు.