పరుగుల ‘రాణి’కి రెండు స్వర్ణాలు..

పాల్వంచరూరల్‌: కాకతీయ యూనివర్సిటీ ఇంటర్‌ కళాశాలల అథ్లెటిక్స్‌ చాంపియన్‌షిప్‌లో సాంఘిక సంక్షేమ గురుకుల మహిళా డిగ్రీ కళాశాల విద్యార్థినులు ప్రతిభ చూపారు. 10 వేల మీటర్లు, ఐదు వేల మీటర్ల పరుగు పందెంలో పాయం ఉషారాణి ప్రథమ స్థానంలో నిలిచి రెండు బంగారు పతకాలను కైవసం చేసుకుంది. 1500 మీటర్లు, 800 మీటర్ల పరుగు పందెంలో ఎం.టాబు రెండు రజత పతకాలను సాధించింది. డిగ్రీ సెకండియర్‌ చదువుతున్న ఉషారాణిది ఆళ్లపల్లి మండలం నడిమిగూడెం కాగా, టాబుది దమ్మపేట మండలం అంకంపాలెం గ్రామం. ఈ మేరకు కళాశాల ప్రిన్సిపాల్‌ ఝాన్సీరాణి వివరాలు వెల్లడించి, విద్యార్థినులను అభినందించారు.