ఆకాశవాణిలో ఉద్యోగాలకు దరఖాస్తుల ఆహ్వానం

ఆకాశవాణిలో ఉద్యోగాలకు దరఖాస్తుల ఆహ్వానం

బోట్‌క్లబ్‌ (కాకినాడసిటీ): ఆకాశవాణి విశాఖపట్నం ప్రాంతీయ వార్తా విభాగంలో క్యాజువల్‌ న్యూస్‌ రీడర్‌ కమ్‌ ట్రాన్స్‌లేటర్‌, క్యాజువల్‌ బ్రాడ్‌ కాస్ట్‌ అసిస్టెంట్‌గా పనిచేసేందుకు ఆసక్తి గల అభ్యర్థుల నుంచి దరఖాస్తులను ఆహ్వానిస్తున్నామని ఆ వార్తా విభాగాధిపతి వెంపాటి సాయి తెలిపారు. ఈ మేరకు గురువారం ప్రకటన విడుదల చేశారు. ఇవి క్యాజువల్‌ నియామకాలని, శాశ్వత కేంద్ర ప్రభుత్వ ఉద్యోగాలు కావన్నారు. పీఎఫ్‌, ఆరోగ్య పథకం, క్వాటర్లు, పెన్షన్‌ వంటి ప్రయోజనాలు ఉండవని స్పష్టం చేశారు. క్యాజువల్‌ న్యూస్‌ రీడర్‌ కమ్‌ ట్రాన్స్‌లేటర్‌ (తెలుగు) నియామకానికి అభ్యర్థులు గుర్తింపు పొందిన విశ్వవిద్యాలయం నుంచి డిగ్రీతో పాటు, తెలుగు, ఆంగ్ల భాషల్లో ప్రావీణ్యం, ఆంగ్లం నుంచి తెలుగులో తర్జుమా చేయగల నైపుణ్యం, మంచి స్వరం కలిగి, రేడియో, టీవీ జర్నలిజంలో అనుభవం ఉండాలన్నారు. తెలుగు టైపింగ్‌తో పాటు కంప్యూటర్‌ పరిజ్ఞానం అవసరమన్నారు. క్యాజువల్‌ బ్రాడ్‌ కాస్ట్‌ అసిస్టెంట్‌ నియామకానికి అభ్యర్థులకు రేడియో ప్రొడక్షన్‌లో ఏదైనా డిగ్రీ లేదా డిప్లమో అర్హత కలిగి ఉండాలన్నారు. తెలుగు, ఆంగ్ల భాషల్లో ప్రావీణ్యం, కంప్యూటర్‌ పరిజ్ఞానం, ఆడియో రికార్డింగ్‌, ఎడిటింగ్‌లో అనుభవం అవసరమన్నారు. 21 నుంచి 50 ఏళ్ల వయస్సు, విశాఖపట్నం ప్రాంతంలో నివసించే వారు అర్హులన్నారు. క్యాజువల్‌ విధానంలో నియమింపబడిన వారికి అసైన్‌మెంట్‌ ప్రాతిపదికన విధుల కేటాయింపు ఉంటుందన్నారు. మరిన్ని వివరాలకు 94406 74057 నంబర్‌ను సంప్రదించవచ్చన్నారు.

గడ్డివామి దగ్ధం

ఉప్పలగుప్తం: మండలంలోని గొల్లవిల్లి గ్రామంలో మధుర బాబులుకు చెందిన గడ్డివామి శుక్రవారం తెల్లవారుజామున కాలిపోయింది. గ్రామానికి చెందిన జి.రాముడు తన గడ్డివామికి నిప్పు పెట్టాడని బాబులు పోలీసులకు ఫిర్యాదు చేశాడు. సంఘటనా స్థలాన్ని బీఎస్‌పీ అమలాపురం నియోజకవర్గ ఇన్‌చార్జి పొలమూరి మోహన్‌బాబు సందర్శించారు. దీనిపై కేసు నమోదు చేసి దర్యాప్తు చేస్తున్నామని ఎస్పై సీహెచ్‌ రాజేష్‌ తెలిపారు.