ఎంప్లాయీస్‌ కాలనీలో భారీ చోరీ

ఎంప్లాయీస్‌ కాలనీలో భారీ చోరీ

నూజివీడు: స్థానిక ఎంప్లాయీస్‌ కాలనీలో మంగళవారం రాత్రి భారీ చోరీ జరిగింది. ఏపీసీపీడీసీఎల్‌ పట్టణ ఏడీ ఓలేటి దుర్గారావు ఇంట్లో దాదాపు 25 కాసుల బంగారు నగలను దుండగుడు దోచుకెళ్లారు. ఏడీ దుర్గారావు సమావేశం నిమిత్తం ఆగిరిపల్లి వెళ్లగా ఇంట్లో భార్య రమాదేవి, తల్లి ఉన్నారు. రాత్రి 10 గంటల సమయంలో తలుపులు వేయకుండా ఉండటంతో దుండగుడు ఇంట్లోకి చొరబడి బెడ్‌రూమ్‌లో బీరువా తెరిచి నగలు ఉన్న బ్యాగ్‌ను తీసుకుపోయాడు. కొద్దిసేపటికి రమాదేవి ఇంటి తలుపులు వేసేందుకు వచ్చి చోరీ జరిగినట్టు గుర్తించారు. ఈలోగా భర్త దుర్గారావు రావడంతో వెంటనే పోలీసులకు సమాచారమిచ్చారు. సీఐ పి.సత్య శ్రీనివాస్‌ ఘటనా స్థలిలో వివరాలను సేకరించారు. ఎవరూ నిద్రించకముందే చోరీ జరగడంపై ప్రజల్లో ఆందోళన వ్యక్తమౌతోంది.

వివరాల సేకరణ

బుధవారం ఉదయం ఏలూరు నుంచి క్లూస్‌ టీం వచ్చి బెడ్‌రూమ్‌లోని బీరువా, తలుపులు, గుమ్మాలకు పడిన వేలిముద్రలను సేకరించారు. ఎంప్లాయీస్‌ కాలనీలో ఉన్న సీసీ కెమెరా పుటేజీని పోలీసులు పరిశీలిస్తున్నారు.

25 కాసుల బంగారు నగలు అపహరణ