ఏటీఎం ఎత్తుకెళ్లారు

ఏటీఎం ఎత్తుకెళ్లారు

బొమ్మనహళ్లి: బెంగళూరు నగర జిల్లా పరిధిలోని ఆనేకల్‌ తాలూకాలో కెనరా బ్యాంకుకు చెందిన ఏటీఎంను దొంగలు ఎత్తుకెళ్లారు. సమీపంలోని నీలగిరి తోపులో ఏటీఎం నుంచి నగదు తీసే ప్రయత్నంలో ఉండగా జనం రావడంతో దొంగలు పారిపోయారు. అత్తిబెలె ఠాణా పరిధిలో మంచేనహళ్లి గ్రామంలో సోమవారం తెల్లవారుజామున 3:30 సమయంలో ఈ సంఘటన జరిగింది. దొంగల ముఠా కారులో ఏటీఎం సెంటర్‌కు వచ్చింది. సెక్యూరిటీ గార్డు లేకపోవడంతో లోపలకు వెళ్లి ఏటీఎంను యంత్రాలతో పెకలించి కారులో తీసుకెళ్లారు. దగ్గరిలోని నీలగిరి వనంలో దానిని బద్ధలు కొట్టసాగారు. అదే సమయంలో జనం అటువైపు రావడంతో భయపడిన దొంగలు ఏటీఎంను వదిలేసి కారులో ఉడాయించారు. దీంతో ఏం జరిగిందోనని వెళ్లి చూడగా ఏటీఎం కనిపించడంతో పోలీసులకు సమాచారమిచ్చారు. పోలీసులు చేరుకుని సెంటర్‌ని, ఏటీఎంని పరిశీలించి ఆధారాలను సేకరించారు. దొంగలకు ఏటీఎం చిక్కింది కానీ నగదు దొరకలేదని జనం చమత్కరించారు. దుండగుల కోసం పోలీసులు గాలింపు చేపట్టారు.

డబ్బు తీయలేకపోయారు

ఆనేకల్‌ తాలూకాలో దొంగల హల్‌చల్‌