బస్సు ఎక్కుతుండగా ప్రమాదం

బస్సు ఎక్కుతుండగా ప్రమాదం

● మహిళకు తీవ్రగాయాలు

తాడ్వాయి(ఎల్లారెడ్డి): బస్సు ఎక్కుతున్న క్రమంలో ప్రమాదవశాత్తు ఓ మహిళ కిందపడి తీవ్రగాయాలపాలైంది. ఘటనకు సంబంధించిన గ్రామస్తులు తెలిపిన వివరాలు ఇలా ఉన్నాయి.. మండలంలోని చిట్యాల గ్రామానికి చెందిన కంసవ్వ బుధవారం తాడ్వాయికి వచ్చింది. అనంతరం కామారెడ్డికి వెళ్లేందుకు తాడ్వాయి పాతబస్టాండ్‌లో బస్సు ఎక్కుతుండగా ప్రమాదవశాత్తు జారిపడింది. బస్సులో ప్రయాణికుల రద్దీ ఉండడంతో కిందపడిపోయిన కంసవ్వ కాళ్లపై నుంచి బస్సు వెనుక టైర్లు వెళ్లాయి. కంసవ్వ కుడికాలు నుజ్జునుజ్జుకాగా ఆమెను చికిత్స నిమిత్తం 108 అంబులెన్స్‌లో కామారెడ్డి ఏరియా ఆస్పత్రికి తరలించారు. పోలీసులు ఘటనాస్థలానికి చేరుకుని ఆర్టీసీ బస్సును స్టేషన్‌కు తరలించారు.

నగలు, నగదు అప్పగింత

కామారెడ్డి టౌన్‌: తాడ్వాయిలో చోటు చేసుకున్న ప్రమాదంలో తీవ్రగాయాలపాలైన కంసవ్వను చికిత్స నిమిత్తం ఏరియా ఆస్పత్రికి తీసుకురాగా, ఆమెకు సంబంధించిన నగలు, నగదును పోలీసులు కుటుంబ సభ్యులకు అప్పగించారు. క్షతగాత్రురాలి ఒంటిపై ఉన్న బంగారు గుండ్లు, పుస్తెలతాడు, చెవి రింగులతోపాటు నగదును ఆస్పత్రిలో విధులు నిర్వర్తిస్తున్న పోలీస్‌ కానిస్టేబుల్‌ లక్ష్మణ్‌ బాధితురాలి కుటుంబ సభ్యులకు అప్పగించారు. కంసవ్వను మెరుగైన చికిత్స కోసం హైదరాబాద్‌కు రిఫర్‌ చేశారు.