సర్వేను బహిష్కరించిన గౌరవెల్లి నిర్వాసితులు

పూర్తి పరిహారం రాలేదంటూ నిరసన

అక్కన్నపేట(హుస్నాబాద్‌): తమకు పూర్తిస్థాయిలో నష్టపరిహారం రాలేదంటూ గౌరవెల్లి ప్రాజెక్టు నిర్వాసితులు కులగణన సర్వేను బహిష్కరించి నిరసన తెలిపారు. అక్కన్నపేట మండలం కపూర్‌నాయక్‌తండా గ్రామ పరిధిలో దాదాపు 60 కుటుంబాల భూ నిర్వాసితులు ఇళ్లు నిర్మించుకుని ‘శ్రీరామ్‌తండా’అనే పేరుతో నివాసం ఉంటున్నారు. ఈ క్రమంలో గురువారం కులగణన సర్వే చేసేందుకు ఎన్యుమరేటర్లు తండాకు వెళ్లారు. సర్వేలో తాము పాల్గొనేదిలేదంటూ బహిష్కరించి, ఎన్యుమరేటర్లను వెనక్కి పంపించారు. ఈ సందర్భంగా పలువురు భూ నిర్వాసితులు మాట్లాడుతూ ఇప్పటికీ ఇళ్ల స్థలాలకు, భూములకు సంబంధించి పరిహారం రావల్సి ఉందన్నారు. పరిహారం చెల్లిస్తామని చెబుతున్నారే తప్ప మాకు చెల్లించలేదన్నారు. పెండింగ్‌లో ఉన్న పరిహారం పూర్తిస్థాయిలో చెల్లించేవరకు సర్వేలో పాల్గొనబోమని స్పష్టం చేశారు.