TV
చెన్నై వేదికగా ఆస్ట్రేలియాతో నిన్న జరిగిన వరల్డ్‌కప్‌ మ్యాచ్‌లో టీమిండియా స్టార్‌ బ్యాటర్‌ కేఎల్‌ రాహుల్‌ చిరస్మరణీయ ఇన్నింగ్స్‌ (115 బంతుల్లో 97 నాటౌట్‌; 8 ఫోర్లు, 2 సిక్సర్లు) ఆడి జట్టు గెలుపులో కీలకపాత్ర పోషించిన విషయం తెలిసిందే. ఈ ప్రదర్శన కారణంగా ప్లేయర్‌ ఆఫ్‌ ద మ్యాచ్‌ అవార్డు గెలుచుకున్న రాహుల్‌ ప్రజెంటేషన్‌ సెర్మనీ సందర్భంగా మ్యాచ్‌కు సంబంధించిన పలు విశేషాలు పంచుకున్నాడు.
2 పరుగులకే 3 వికెట్లు కోల్పోయిన దశలో క్రీజ్‌లో రావడంపై స్పందిస్తూ.. వాస్తవానికి ఎలాంటి ఆలోచన లేదు, ఆసీస్‌ను స్వల్ప స్కోర్‌కు పరిమితం చేయడంతో బాగా స్నానం చేసి విశ్రాంతి తీసుకుంటానని అనుకున్నాను. అయితే పిచ్‌ నుంచి పేసర్లకు సహకారం లభించడంతో మేము స్వల్ప వ్యవధిలో 3 వికెట్లు కోల్పోయాం. ఈ దశలో క్రీజ్‌లోకి వచ్చిన నాకు పిచ్‌లో ఏదో ఉందని అర్ధమైంది. అప్పటికే క్రీజ్‌లో ఉన్న విరాట్‌ కాసేపు నన్ను టెస్ట్‌ క్రికెట్‌లా ఆడమని అన్నాడు.
పిచ్‌పై కొత్త బంతితో పేసర్లకు, ఆ తర్వాత స్పిన్నర్లకు సహకారం లభించింది. చివరి 15-20 ఓవర్లలో మంచు కీలకపాత్ర పోషించింది. బంతి బాగా స్కిడ్‌ అయ్యింది. ఇది ఓ రకంగా మాకు సాయపడింది. మొత్తంగా ఈ పిచ్‌ రెండు షేడ్స్‌ కలిగి ఉంది. బ్యాటింగ్‌ చేసేందుకు అంత సులవైన వికెట్‌ కాదు.. అలాగనీ మరీ ఫ్లాట్‌ వికెట్‌ కూడా కాదు. ఓ మంచి క్రికెట్‌ వికెట్‌ అని చెప్పగలను. కొంత బౌలర్లకు, కొంత బ్యాటర్లకు అనుకూలమైనది. ఇలాంటి పిచ్‌లు సౌత్‌ ఇండియాలో మాత్రమే ఉంటాయి. చెన్నై పిచ్‌ ఇందులో ప్రత్యేకం.
కాగా, రాహుల్‌తో పాటు కోహ్లి (116 బంతుల్లో 85; 6 ఫోర్లు) కూడా కీలక ఇన్నింగ్స్‌ ఆడటంతో టీమిండియా ఆసీస్‌పై 6 వికెట్ల తేడాతో గెలుపొందింది. ఈ మ్యాచ్‌లో టాస్‌ గెలిచి తొలుత బ్యాటింగ్‌ చేసిన ఆసీస్‌.. బుమ్రా (10-0-35-2), రవీంద్ర జడేజా (10-2-28-3), కుల్దీప్‌ యాదవ్‌ (10-0-42-2), అశ్విన్‌ (10-1-34-1), సిరాజ్‌ (6.3-1-26-1), హార్దిక్‌ (3-0-28-1) ధాటికి 49.3 ఓవర్లలో 199 పరుగులకు ఆలౌట్‌ కాగా.. కోహ్లి, రాహుల్‌ల చిరస్మరణీయ ఇన్నింగ్స్‌ల సాయంతో భారత్‌ 41.2 ఓవర్లలో 4 వికెట్లు కోల్పోయి చారిత్రక విజయం సాధించింది.
ఆసీస్‌ బౌలర్లలో హాజిల్‌వుడ్‌ 3, స్టార్క్‌ ఓ వికెట్‌ పడగొట్టారు. భారత ఇన్నింగ్స్‌లో రోహిత్‌, ఇషాన్‌లతో పాటు శ్రేయస్‌ అయ్యర్‌ డకౌట్లయ్యారు. భారత్‌ తమ తదుపరి మ్యాచ్‌లో (అక్టోబర్‌ 11) న్యూఢిల్లీ వేదికగా ఆఫ్ఘనిస్తాన్‌తో తలపడుతుంది.
