ఆటో డ్రైవర్‌ నిజాయితీ

ఆటో డ్రైవర్‌ నిజాయితీ

డాబాగార్డెన్స్‌: నేలపై రూ.10 కనిపిస్తే చాలు ఠక్కున తీసుకుని జేబులో పెట్టుకునే మనుషులున్న ఈ రోజుల్లో నిజాయితీ చాటుకున్నాడు ఓ ఆటో డ్రైవర్‌. పాలకొండ నుంచి విశాఖకు డి.శ్రీనివాసరావు మంగళవారం ఉదయం 10.45 గంటలకు ద్వారకాబస్టేషన్‌లో ఆర్టీసీ బస్సు దిగాడు. బస్సు దిగే క్రమంలో అతని జేబులో నుంచి రూ.9,500 పడిపోయాయి. కంగారులో ఆ ప్రయాణికుడు వెళ్లిపోయాడు. ద్వారకాబస్టేషన్‌ వద్ద సర్వీస్‌ చేస్తున్న గొంప సూరిబాబు (ఆటో నంబరు ఏపీ39టీడీ 4234)అనే ఆటో డ్రైవర్‌కు ఆ డబ్బులు దొరికాయి. దీంతో అక్కడ విధులు నిర్వహిస్తున్న స్టేషన్‌ మేనేజర్‌ జీవీ రమేష్‌, ఏఎస్సై బీఎస్‌ నారాయణ, ఆర్‌డీ వి.ప్రసాద్‌కు డబ్బులు అందజేశాడు. ఇంతలో ప్రయాణికుడు శ్రీనివాసరావు డబ్బులు పడిపోయాయంటూ..స్టేషన్‌ మేనేజర్‌ను కలిశాడు. వివరాలు మొత్తం తెలుసుకుని ఆ డబ్బులు అందజేశారు. ఆటో డ్రైవర్‌ నిజాయితీని ఇటు ద్వారకాబస్టేషన్‌ సిబ్బంది..ఆర్టీసీ ప్రయాణికుడు అభినందించారు.