భరించలేని భంగపాటు. దాయాది చేతిలో దారుణ ఓటమి. చాంపియన్స్‌ ట్రోఫీ ఫైనల్లో పాకిస్తాన్‌ చేతిలో టీమిండియా చిత్తుగా ఓడింది. అనిశ్చితికి మారుపేరైన పాక్‌ మ్యాచ్‌ ఆద్యంతం తిరుగులేని పట్టుదల ప్రదర్శిస్తే, సూపర్‌స్టార్లతో నిండిన టీమిండియా మాత్రం పేలవమైన ఆటతీరుతో ఉసూరుమనిపించింది. వాళ్ల బ్యాట్స్‌మెన్‌ చెలరేగిన పిచ్‌పైనే మన పరుగుల వీరులు మూకుమ్మడిగా చేతులెత్తేశారు. ఒకరి వెనక ఒకరు పెవిలియన్‌ బాటపట్టారు. ఫలితం... ఏకంగా 180 పరుగుల తేడాతో దారుణ పరాభవం!! చిరకాల ప్రత్యర్థికి కనీస పోటీ కూడా ఇవ్వకుండానే మనవాళ్లు చాప చుట్టేసిన తీరును తట్టుకోలేక సగటు అభిమాని గుండె బద్దలైంది.