రెండు ఆర్టీసీ బస్సులు ఢీ...డ్రైవర్ల దుర్మరణం

చిత్తూరు జిల్లా :  చిత్తూరు జిల్లాలో సోమవారం మధ్యాహ్నం ఘోర రోడ్డు ప్రమాదం చోటుచేసుకుంది. ఏర్పేడు మండలం మేర్లపాక వద్ద ఎదురెదురుగా వస్తున్న రెండు ఆర్టీసీ బస్సులు ఢీకొనడంతో ఈ ప్రమాదం జరిగింది.

తిరుపతి నుంచి వస్తున్న ఆర్టీసీ బస్సును, శ్రీకాళహస్తి నుంచి వస్తున్న మరో ఆర్టీసీ బస్సు ఢీకొట్టింది. ఈ ప్రమాదంలో బస్సు డ్రైవర్లు ఇద్దరు అక్కడిక్కడే మృతి చెందగా.. నలుగురి పరిస్థితి విషమంగా ఉంది. రెండు బస్సుల్లో సుమారు 100 మంది ప్రయాణికులు ఉన్నట్లు తెలుస్తోంది. ప్రయాణికులకు స్వల్పగాయాలయ్యాయి. సమాచారం అందుకున్న పోలీసులు క్షతగాత్రులను శ్రీకాళహస్తి ప్రభుత్వాసుపత్రికి తరలిస్తున్నారు. దీంతో ఆ రహదారిలో భారీగా ట్రాఫిక్ జామైంది.