TV
హెల్మెట్ లేకుండా భారత్ బౌలర్లను చితక్కొడతా!
కరాచీ: భారత్-పాకిస్తాన్ల మధ్య క్రికెట్ మ్యాచ్ అంటేనే ఆయా దేశాల్లో ఒక యుద్ధ వాతావారణం కనిపిస్తోంది. ప్రత్యేకంగా క్రికెట్ అభిమానులైతే తమ దేశం గెలుపుకోసం కళ్లు కాయలు కాసేలా ఎదురుచూస్తుంటారు. అక్కడ గెలిచిన జట్టుకు పండుగైతే.. ఓడిన జట్టు పరిస్థితి ఇక చెప్పనక్కర్లేదు. ఆసియాకప్లో భారత్ చేతిలో పాకిస్తాన్ ఓటమి పాలు కావడం అక్కడ అభిమానుల్ని తీవ్ర ఆగ్రహానికి గురి చేసింది. పాకిస్తాన్ క్రికెటర్ల దిష్టి బొమ్మలు దహనం చేయడంతో పాటు, ఆ దేశ క్రికెట్కు వ్యతిరేకంగా నినాదాలు చేశారు.
ఇంతవరకూ ఊహించినదే అయితే ఒక అభిమాని మాత్రం మరో అడుగు ముందుకేసి భారత్ బౌలర్లను చితక్కొడతానంటూ సవాల్ విసిరాడు. భారత్పై బ్యాటింగ్ చేయడం ఎలాగో పాకిస్తాన్కు తెలియలేదు.. కనీసం నాకైనా అవకాశం ఇస్తే భారత బౌలర్ల పనిపడతానంటూ ఆ దేశ ప్రధానమంత్రి నవాజ్ షరీఫ్ తో పాటు, మాజీ క్రికెట్ కెప్టెన్ ఇమ్రాన్ ఖాన్లకు విజ్ఞప్తి చేశాడు. 'భారత్పై ఆడేందుకు నాకు ఒక అవకాశం ఇవ్వండి. హెల్మెట్ కూడా అవసరం లేకుండా భారత బౌలర్లను దుమ్ముదులుపుతా. నేను నా పద్ధతిలో భారత్ క్రికెట్ జట్టుకు గుణపాఠం చెబుతా' అని ఫేస్ బుక్లో పోస్ట్ చేశాడు. ఇలా పోస్ట్ చేసింది దుబాయ్ కు చెందిన పాకిస్తాన్ వీరాభిమాని. ఈ పోస్ట్కు దాదాపు ఆరువేల కామెంట్లు రాగా,34 వేల షేర్లు లభించడం విశేషం.
