ఐఎస్‌ఎల్‌ ఫైనల్‌ కోల్‌కతాలో

న్యూఢిల్లీ: భారత్‌లో ఫిఫా అండర్‌–17 ప్రపంచకప్‌ సాకర్‌ అనూహ్యంగా విజయవంతమైంది. తుదిపోరులో భారత్‌ లేకపోయినా... కోల్‌కతాలో ఇంగ్లండ్, స్పెయిన్‌ల మధ్య జరిగిన ఫైనల్‌కు ప్రేక్షకులు బ్రహ్మరథం పట్టారు. ఈ నేపథ్యంలో ఇండియన్‌ సూపర్‌ లీగ్‌ (ఐఎస్‌ఎల్‌) ఫుట్‌బాల్‌ టోర్నీ టైటిల్‌ పోరునూ కోల్‌కతాకు మార్చేశారు. మొత్తానికి ప్రారంభ, ఫైనల్‌ మ్యాచ్‌ల వేదికలు మారాయి. కొచ్చిలో తొలి మ్యాచ్‌... కోల్‌కతాలో ఫైనల్‌ మ్యాచ్‌ జరుగుతాయని నిర్వాహకులు తెలిపారు.

ఈ రెండు మినహా మిగతా మ్యాచ్‌లన్నీ షెడ్యూలు ప్రకారమే జరుగుతాయని ఫుట్‌బాల్‌ స్పోర్ట్స్‌ డెవలప్‌మెంట్‌ లిమిటెడ్‌ (ఎఫ్‌ఎస్‌డీఎల్‌) తెలిపింది. ఈ నెల 17 నుంచి ఐఎస్‌ఎల్‌ నాలుగో సీజన్‌ మొదలవుతుంది. వచ్చే ఏడాది మార్చి 17న జరిగే ఫైనల్‌తో ముగుస్తుంది. షెడ్యూల్‌ ప్రకారం తొలి మ్యాచే కోల్‌కతాలో జరగాలి. కానీ అదిప్పుడు కొచ్చికి తరలింది.