విరుష్కల ' పెళ్లి సందడి'!

న్యూఢిల్లీ: భారత్‌ క్రికెట్‌ జట్టు కెప్టెన్‌ విరాట్‌ కోహ్లి- బాలీవుడ్‌ నటి అనుష్క శర్మలు వివాహ బంధంతో ఒక్కటై  పది రోజులు గడుస్తున్నా ఇంకా వారి పెళ్లి సందడి మాత్రం కొనసాగుతోంది. ఇటీవల ఇటలీలో వివాహం చేసుకుని ఆపై హనీమూన్‌ కూడా అక్కడే జరుపుకున్న ఈ జంట.. బుధవారం న్యూఢిల్లీలో ప్రధాని నరేంద్ర మోదీని మర్యాదపూర్వకంగా కలిసి ఆశీర్వాదం తీసుకున్నారు. ఈ క్రమంలోనే గురువారం జరిగే తమ రిసెప్షన్‌ వేడుకకు మోదీని ఆహ్వానించినట్లు తెలుస్తోంది. ఈ రోజు(డిసెంబర్‌ 21) న్యూఢిల్లీలో తమ బంధువుల కోసం విరాట​-అనుష్కల జోడి ప్రత్యేకంగా రిసెప్షన్‌ ఏర్పాటు చేశారు. దీనికి కేవలం బంధువులతో పాటు కొంతమంది రాజకీయ ప్రముఖుల హాజరయ్యే అవకాశం ఉంది. ఆపై ఈనెల 26న మరొక రిసెప్షన్‌ నిర్వహిస్తారు. ముంబైలో జరుగనున్న ఆ రిసెప్షన్‌కు క్రికెటర్లు, బాలీవుడ్‌ తారలతో పాటు మరికొంతమంది సెలబ్రెటీలు హాజరుకానున్నారు.

ఈ నెల 11వ తేదీన ఇటలీలోని టస్కనీ రిసార్ట్‌లో విరాట్ కోహ్లి-అనుష్కలు హిందూ సంప్రదాయంలో వివాహం చేసుకుని ఒక్కటైన విషయం తెలిసిందే. ఈ వివాహ కార్యక్రమానికి ఇరు కుటుంబాల బంధువులతో పాటు అత్యంత సన్నిహితులు మాత్రమే హాజరయ్యారు. ఈ రోజు సాయంత్రం​ జరిగే రిసెప్షన్‌కు ఇరు కుటుంబాల బంధువులు పెద్ద సంఖ్యలో హాజరయ్యే అవకాశం ఉంది.