మానవాళి ముక్తికొరకు మనుజావతారుడైన దైవం...జగతిలో భీతి బాపేందుకు దిగివచ్చిన దైవ తనయుడు...సర్వలోకానికి శాంతి సందేశం..దివిలోనూ భువిలోనూ వేడుక...పరలోక దూతావళి పరవశించి పాడిన వేళప్రతి హృదిలో క్రిస్మస్‌ ఆనందం...జగతిలో పాపం నిండినప్పుడు ప్రేమతో కలిసి జీవించాల్సిన ధరణి వాసుల హృదయాలు అసూయ, ద్వేషంతో రగులుతున్నప్పుడు చీకటి జలధిలో మునిగిన వారికి, శృంఖలాల్లో మగ్గేవారికి మరణ ఛాయలో బతికే వారికి ఒక ఆశాకిరణంగా... అరుణోదయ కాంతిగా... విమోచకుడిగా... జగద్రక్షకుడిగా రెండు వేల సంవత్సరాల క్రితం యేసుప్రభువు ఈ భువిపైకి అరుదెంచాడు. అదొక సుమనోహర ఘట్టం.. సర్వలోకాన్ని సంభ్రమాశ్చర్యాలతో విశేషంగా ఆకట్టుకున్న మధుర కావ్యం. తమను రక్షించే మెస్సయ్య కోసం సుదీర్ఘంగా ఎదురుచూస్తున్న విశ్వాసుల్లో నింపిన అంతులేని ఆనందం వెరసి స్తోత్ర గీతంగా స్తుతి గానంగా మారిన వైనం.. అందుకు యూదా దేశంలోని బెత్లెహేము వేదిక అయింది.ఆ సమయంలో రాజైన హేరోదు యెరూషలేము రాజధానిగా రాజ్యమేలుతున్నాడు. యూదా ప్రజలంతా తమను విమోచించే మెస్సయ్యా కోసం ఎదురు చూస్తున్న తరుణం. ఆ భాగ్యం కన్య అయిన మరియకు లభించింది. అప్పటికే గలిలయలోని నజరేతులో దావీదు వంశస్తుడైన యోసేపునకు మరియ ప్రదానం చేయబడింది. పరమ దేవుని ఆజ్ఞ మేరకు ప్రభువు దూత గబ్రియేలు ద్వారా ఈ శుభ వర్తమానం అందింది. ‘దయా ప్రాంప్తురాలా!’... అంటూ గబ్రియేలు ప్రత్యక్షమైనప్పుడు అప్పుడే యవ్వన్రపాయంలో అడుగుపెడుతున్న మరియ ఎంతో భయపడింది.ఎందుకంటే ఆ కాలంలో దేవుడు కాని ఆయన దూతల దర్శనం అరుదుగా మారింది. ప్రవక్తలకు ప్రవచనాలు నిలిచి పొయాయి. నిశ్శబ్దకాలంగా చెప్పబడింది. అటువంటి తరుణంలో దేవుని దూత మరియ వద్దకు వచ్చి ‘భయపడకుము నీవు ధన్యురాలవు, దేవుని వలన నీవు కృప ΄పొందావు. నీవు గర్భము ధరించి కుమారుని కంటావు. ఆయన సర్వోన్నతుని కుమారుడనబడతాడు. అతని రాజ్యము అంతము లేనిదై వుంటుందని’ పేర్కొన్నాడు. దూత మాటలు మరింత విస్మయానికి భయానికి గురిచేశాయి. ఇది దేవాది దేవుని నుంచి వచ్చిన పిలుపుగా మరియ తెలుసుకుంది. ‘అయ్యో నేను పురుషుని ఎరుగని దానినే ఇది ఏలాగు సాధ్యం?’ అని అడిగింది.‘మరియా! భయపడకు. దేవుని పరిశుద్ధాత్మ శక్తి నీ మీదికి వస్తుంది సర్వోన్నతుని శక్తి నిన్ను కమ్ముకుంటుంది. పుట్టబోవు శిశువు పరిశుద్ధుడై దేవుని కుమారుడనబడతాడని దేవదూత చెప్పిన మాటలను బట్టి ఇది దైవకార్యంగా గ్రహించి ప్రభువు దాసురాలను నీ మాట చొప్పున నాకు జరుగును గాక అని చెప్పి దేవాది దేవుని తన గర్భంలో మోయడానికి సిద్ధపడింది. వాస్తవానికి వివాహం కాకుండా ఆ రోజుల్లో యూదా స్త్రీ గర్భవతి అయితే రాళ్ళతో కొట్టి చంపే ఆచారం ఉండేది. దేవుని దయ΄పొంది అంతులేని విశ్వాసంతో దేవుని ఆజ్ఞను శిరసావహించడానికి ముందుకు వచ్చింది కాబట్టే మరియ స్త్రీలందరి లో ధన్యురాలిగా కొనియాడబడింది.అయితే మరియ గర్భవతియైన సంగతి తెలుసుకున్న యోసేపు కలత చెందాడు. నీతిమంతుడు కాబట్టి ఆమెను నలుగురిలో నగుబాటు చేయకుండా రహస్యంగా విడనాడాలని నిశ్చయించుకున్నాడు. ప్రభువు దూత స్వప్నమందు ప్రత్యక్షమై మరియ గర్భము ధరించింది ఏ పురుషుని వలన కాదని పరిశుద్ధాత్మ వలన జరిగినదని మరియను చేర్చుకొనడానికి ఏమాత్రమూ సందేహపడవద్దని పుట్టబోవు శిశువునకు యేసు అని పేరు పెట్టాలని తన ప్రజలందరి పాపములనుండి ఆయనే రక్షిస్తాడని తెలుపడంతో యోసేపులో ఆవేదన తొలగిపొయింది. అంతేకాదు మరియ యేసుకు జన్మనిచ్చేవరకూ ఆమెను ముట్టకుండా జాగ్రత్త పడ్డాడు.ఇదే సమయంలో ఆరు నెలలకు ముందు మరొక ఆశ్చర్యకరమైన సంగతి జరిగింది. మరియ సమీప బంధువు రాలైన ఎలీసబెతు ఆమె భర్త జెకర్యా కురు వృద్ధులు. ఆ వయస్సులో దేవుడు వారికి సంతాన ప్రాంప్తి అనుగ్రహించాడు. దేవుని హస్తం వారికి తోడుగా వుండి ఒక మగ శిశువును దయచేసాడు. ఆ శిశువే తర్వాతి కాలంలో బాప్తీస్మం ఇచ్చు యోహానుగా పిలువబడి యేసు ప్రభు పరిచర్యకు ముందు ఆయన మార్గం సరళం చేసే సాధనమయ్యాడు.లేఖన ప్రవచనాలు నెరవేర్చిన క్రిస్మస్‌ యేసుక్రీస్తు జననం రెండు వేల సంవత్సరాల క్రితం జరిగినా ఆయన ఆదిసంభూతుడు. ఆల్ఫా ఒమేగా ఆయనే. ఆదియు అంతమునై యున్నాడు. మొదటివాడు కడపటి వాడుగా ఉన్నవాడు. జగత్‌ పునాది వేయకముందే వున్న యేసు కాలం సంపూర్ణమైనప్పుడు సాతాను చెరలో చిక్కుకున్న మానవుడు పాపానికి బందీగా మారి దేవుని సన్నిధికి దూరంగా వెళుతున్న తరుణంలో ఆధ్యాత్మికంగా ఆత్మీయంగా పతనమై ఏ నిరీక్షణ లేని సమయంలో నిత్య జీవమిచ్చి తిరిగి దేవునితో ఐక్యపర్చేందుకు భూమి మీద దేవుని కుమారుడిగా క్రీస్తు అవతరించాడు.యేసు పుట్టుకను క్రీస్తుకు పూర్వం 700 సంవత్సరాల క్రితమే మీకా, యెషయా ప్రవక్తలు ప్రవచించడం విశేషం. ‘బెత్లెహేము ఎఫ్రాతా యూదా కుటుంబంలో స్వల్పగ్రామమైనను నా కొరకు ఇశ్రాయేలీయులను ఏల బోవువాడు నీలో నుండి వచ్చును’ అని మీకా ప్రవచించగా ‘ఆలకించుడి కన్యక గర్భవతియై కుమారుని కనును అతనికి ఇమ్మానుయేలను పేరు పెట్టబడును’ అని యెషయా ప్రవక్త ప్రవచించాడు. ఇమ్మానుయేలనగా దేవుడు మనకు తోడని అర్థం.యేసు పుట్టుక ఆవశ్యకత గూర్చి యెషయా వివరించాడు. ‘ప్రభువు ఆత్మ నా మీదికి వచ్చియున్నది దీనులకు సువార్తమానం ప్రకటించుటకు, నలిగిన హృదయం కలవారిని దృఢ పరచుటకు చెరలో నున్న వారికి విడుదల, బంధింపబడిన వారికి విముక్తి ప్రకటించుటకు ఆయన నన్ను పంపియున్నాడు’ అని యెషయా ప్రవక్త చెప్పిన లేఖనాలు తన రాక ద్వారా నిజమయ్యాయని యేసుప్రభు తనపరిచర్యలో చెప్పడం విశేషం.ప్రజా సంఖ్యలో రాయబడటానికి యోసేపు మరియలు నజరేతు నుండి బెత్లెహేముకు రావాల్సి వచ్చింది. రెండింటి మధ్య 90 మైళ్ళ దూరం. రెండు వేల సంవత్సరాల క్రితం ఎలాంటి ప్రయాణ సాధనాలు లేనిరోజుల్లో నిండు చూలాలైన మరియను వెంటబెట్టుకొని బహు ప్రయాస కోర్చి చలికాలంలో బెత్లెహేము చేరుకున్నారు దంపతులు. జన సంఖ్య కోసం ఆ గ్రామం అప్పటికే క్రిక్కిరిసి పొయి ఉండటంతో ఎక్కడా స్థలం లేక ఓ పశువుల కొట్టమే వారికి అశ్రయమైంది. అర్థరాత్రి వేళలో క్రీస్తు జన్మించడంతో పశువుల తొట్టె క్రీస్తు పాన్పుగా మారిపొయింది. పరలోకాన్ని విడచివచ్చి పశువుల కొట్టంలో బాల యేసు పరుండాల్సి వచ్చింది. అతి సామాన్య కుటుంబంలో అతి సామాన్యంగా యేసు జన్మించాడు.యేసు పుట్టుక శుభవార్త మొదట తెలిసింది సామాన్యులకే. ఊరి వెలుపల ΄÷లంలో గొఱె<లను కాచుకుంటున్న పశు కాపరుల వద్దకు ప్రభువు దూత వచ్చి వారి మధ్య నిలచినప్పుడు ప్రభువు మహిమ వారిచుట్టూ ప్రకాశించగా వారెంతో భయపడ్డారు. అందుకు దూత ‘భయపడకుడి ప్రజలందరికీ కలుగబోవు మహా సంతోషకరమైన సువర్తమానము మీకు తీసుకు వచ్చాను. దావీదు పట్టణమందు నేడు రక్షకుడు మీ కొరకు పుట్టియున్నాడు. ఈయన ప్రభువైన క్రీస్తు’ అంటూ శిశువు ఆనవాలు తెలియజేయడం జరిగింది. అప్పుడు పరలోకం నుంచి వచ్చిన దేవదూతల సమూహం ‘సర్వోన్నతమైన స్థలములో దేవునికి మహిమ ఆయనకు ఇష్టులైన వారికి భూమి మీద సమాధానం కలుగునుగాక’ అంటూ దేవుని స్తుతిస్తూ పాటలు పాడారు. యేసు పుట్టుక కేవలం యూదా ప్రాంంతానికే పరిమితం కాలేదు. యేసుక్రీస్తు జన్మవిశేషం తెలియజేస్తూ ఆకాశంలో ఓ వింత తార వెలిసింది. దాన్ని చూసిన ముగ్గురు తూర్పు దేశపు జ్ఞానులు యూదుల రోజును వెతుక్కుంటూ యెరూషలేము చేరుకున్నారు. తుదకు బెత్లెహేము లో పుట్టాడని తెలుసుకొని శిశువును పూజించి తాము తెచ్చిన బంగారం, సాంబ్రాణి, బోళం కానుకలను సమర్పించి అత్యానందభరితులై తిరిగి వెళ్లారు. ఈ విధంగా యేసు పుట్టుక ఒక విశ్వ వేడుకగా మారింది.రక్షణ తెచ్చిన క్రిస్మస్‌ యేసు పుట్టుక సర్వమానవాళికి రక్షణ అందించిది. యేసు పుట్టుక పరమార్థమే అది. పాప పంకిలమైన మానవ జాతిని రక్షించడానికే యేసు జన్మించాడు. దేవుని ఆజ్ఞ మీరడం ద్వారా దేవుడు సృజించిన తొలి మానవుడు ఆదాము, అతని భార్య హవ్వ ఈ లోకానికి పాపాన్ని శాపాన్ని తీసుకు వచ్చారు. ఆ పాపానికి ప్రతిఫలంగా నర జాతి మొత్తానికి మరణం సం్రపాప్తించింది. అయితే ఆ శాపాన్ని పాపాన్ని కొట్టివేసి తద్వారా వచ్చిన మరణభయాన్ని తొలగించేందుకు క్రీస్తు అందించిన శిలువ యాగం ద్వారా రక్షణ ΄పొంది నిత్యజీవానికి వారసులై సదా కాలం క్రీస్తుతో నివసించే భాగ్యాన్ని క్రిస్మస్‌ మనకు అందించింది. క్రిస్మస్‌ ద్వారా రక్షకుడు ఈ లోకానికి వచ్చి ప్రజలందరి రక్షణార్థం పాపపరిహారార్థ బలిగా శిలువపై తనను తాను సమర్పించుకున్నాడు. యేసు శిలువలో కార్చిన రక్తం ద్వారా పాప విమోచన. యేసు రక్తం ప్రతి పాపం నుండి మనలను పవిత్రులుగా చేస్తుంది. మానవుడు దేవునితో పరలోకంలో ఉండే భాగ్యం అందించడానికి దేవుడు మానవుడిగా అవతరించాల్సి వచ్చింది. అందుకు క్రీస్తు పుట్టుక వేదికగా మారింది. అప్పుడు ఈ ధరిత్రి మీద మానవునిగా జన్మించిన యేసు ఇప్పుడూ నీవు ఆహ్వానిస్తే నీ హృదిలో ఆత్మరూపుడై వసించడానికి సిద్ధంగా ఉన్నాడు. నీలో నిత్యసంతోషం నింపుతాడు. అందరికీ క్రిస్మస్‌ శుభాకాంక్షలు. సంతోషం... సమాధానం తెచ్చిన క్రిస్మస్‌ యేసుక్రీస్తు పుట్టుకే మానవాళికి గొప్ప శుభవార్త. క్రీస్తు పుట్టుక సమయంలో కురేనియ, సిరియా దేశమునకు అధిపతి అయిన కైసరు ఔగుస్తు మొదటి ప్రజాసంఖ్య ప్రకటించాడు. ఇలాంటి ఎన్నో చారిత్రాత్మక అంశాలతో తెలియ చేయబడిన క్రీస్తు జననం ఒక కల్పితకథ కాదు ఒక చారిత్రాత్మక సత్యం. ఆయన కారణజన్ముడు. చారిత్రాత్మక పురుషుడు. క్రీస్తుకు ముందు... క్రీస్తు తర్వాతగా కాలం రెండుగా విభజింపబడటయే ఇందుకు ఓ గొప్ప ఉదాహరణ.– బందెల స్టెర్జి రాజన్‌ సీనియర్‌ పాత్రికేయులు

డిసెంబర్‌ వచ్చిందంటే చాలు హైదరాబాద్‌ నగరం నూతనోత్సాహాన్ని పుంజుకుంటుంది. ఒకవైపు ఇయర్‌ ఎండ్, న్యూ ఇయర్‌ వేడుకలు, మరోవైపు క్రిస్మస్‌ సంబరాలతో నగరం అంతా పార్టీ మూడ్‌లో ఉంటుంది. ఇందులో భాగంగా నగరంలో ఇప్పటికే విభిన్న వేదికల్లో వినోద కార్యక్రమాలు, వేడుకలు మొదలయ్యాయి. కల్చరల్‌ డైవర్సిటీకి కేర్‌ ఆఫ్‌ అడ్రస్‌గా నిలిచే హైదరాబాద్‌లో సర్వమత సమ్మేళనంలో భాగంగా క్రిస్మస్‌ వేడుకలు సైతం ఘనంగా నిర్వహిస్తుంటారు. ప్రీ క్రిస్మస్‌ వేడుకల్లో భాగంగా కేక్‌ మిక్సింగ్‌ సందడి నెలకొంది. నూతన ఏడాదికి స్వాగతం పలికేందుకు ఇయర్‌ ఎండ్‌ వేడుకలకు కూడా సన్నద్ధం అవుతున్నాయి. ఈ నేపథ్యంలో నిర్వహించే కేక్‌ మిక్సింగ్‌పైనే ఈ కథనం.. నగరంలో గత కొన్ని సంవత్సరాలుగా కేక్‌ మిక్సింగ్‌.. ట్రెండ్‌ కొనసాగుతోంది. మొదట్లో క్రిస్మస్‌ ఫ్రీ ఈవెంట్స్‌లో భాగంగా కేక్‌ మిక్సింగ్‌ నిర్వహించేవారు. కానీ ఈ మధ్యకాలంలో ప్రతి ఒక్కరూ కేక్‌ మిక్సింగ్‌లో పాల్గొంటూ వినూత్న సంస్కృతికి నాంది పలుకుతున్నారు. నగరంలోని ఫైవ్‌ స్టార్‌ హోటల్స్, రిసార్ట్స్, ఎన్జీవోలు, విద్యా వ్యాపార సంస్థల్లో, ఇతర ఎంటర్‌టైన్మెంట్‌ వేదికలుగా కేక్‌ మిక్సింగ్‌ వేడుకలను ఘనంగా నిర్వహిస్తున్నారు. ఈ ఈవెంట్లలో పలువురు సెలబ్రిటీలు సైతం పాల్గొని సందడి చేస్తున్నారు. ఇందులో భాగంగానే ఇప్పటికే నోవోటెల్‌ హైదరాబాద్, గోల్కొండ హోటల్, తాజ్‌ కృష్ణ, తాజ్‌ వివంత వంటి ఫైవ్‌ స్టార్‌ హోటల్స్‌తో పాటు ఇతర వేదికల్లో కేక్‌ మిక్సింగ్‌ వేడుకలు మొదలై కొనసాగుతూనే ఉన్నాయి.సెలిబ్రిటీల సందడి.. నగర జీవన శైలిలో భాగమైన ఈ కార్యక్రమాలకు సెలిబ్రిటీల నుండి కూడా మంచి ఆదరణ లభిస్తుంది. నిర్వాహకులు సైతం పలువురు సెలిబ్రిటీలు, సామాజికవేత్తలు, ఐకానిక్‌ వ్యక్తులను ఈ కేక్‌ మిక్సింగ్‌ వేడుకలకు ముఖ్య అతిథులుగా ఆహా్వనిస్తూ నగరవాసులను తమ వైపుకు తిప్పుకుంటున్నారు. ఇలా ఈ ఏడాది నగర వేదికగా ఇప్పటికే జరిగిన పలు వేడుకల్లో సినీ తారలు, సింగర్లు, స్పోర్ట్స్‌ స్టార్స్‌ పాల్గొని సందడి చేశారు.వివిధ రకాల డ్రై ఫ్రూట్స్‌.. ప్రీ క్రిస్మస్‌ వేడుకల్లో భాగంగా, కేక్‌ మిక్సింగ్, గ్రేప్‌ స్టాంపింగ్‌ ప్రధానంగా నిర్వహిస్తారు. ఈ కేక్‌ మిక్సింగ్‌లో దాదాపు 25 రకాల డ్రై ఫ్రూట్స్, పలు రకాల స్పైసెస్, రం, బ్రాందీ, విస్కీ లాంటి లిక్కర్‌ కలుపుతారు. ఇందులో వాడే పదార్థాల మిశ్రమం మంచి పోషకాలతో ఆరోగ్య ప్రదాయిని గానూ ఉంటున్నాయి. ఈ మిశ్రమాన్నంతా కొద్ది రోజులపాటు సోక్‌ (పులియ బెట్టడం) చేసి ఆ తరువాత ఫ్లమ్‌ కేక్‌ తయారు చేస్తారు. పాశ్చాత్య సంస్కృతిలో భాగంగా తయారు చేసిన ఈ ఫ్లమ్‌ కేక్‌ క్రిస్మస్‌ వేడుకల్లో అందరికీ ఫేవరెట్‌. కేక్‌ మిక్సింగ్‌లో చిన్నలు, పెద్దలు అందరూ కలిసి లిక్కర్‌తో డ్రై ఫ్రూట్స్‌ కలుపుతూ ఎంజాయ్‌ చేస్తారు.గ్రేప్‌ స్టాంపింగ్‌.. కేక్‌ మిక్సింగ్‌తో పాటు ఈ మధ్యకాలంలో గ్రేప్‌ స్టాంపింగ్‌ విరివిగా నిర్వహిస్తున్నారు. ఈ గ్రేప్‌ స్టాంపింగ్‌లో ఒక పెద్ద చెక్క బుట్టలో అధిక మొత్తంలో ద్రాక్ష పళ్లను వేసి సామూహికంగా వాటిని తొక్కుతూ ద్రాక్ష రసాన్ని తీసి దాని నుండి వైన్‌ తయారు చేస్తారు. ఈ వైన్‌ కూడా క్రిస్మస్‌ వేడుకల్లో ప్రధాన అంశమే ఇలాంటి సాంస్కృతిక వినోదపరమైన కార్యక్రమాలకు నగరంలోని యువత సాఫ్ట్‌ వేర్‌ ఉద్యోగులు కూడా అమితాసక్తి చూపిస్తున్నారు. ఈ నెలలో వీకెండ్‌ వచ్చిందంటే చాలు ఎక్కడెక్కడ ఇలాంటి కార్యక్రమాలు జరుగుతున్నాయో తెలుసుకొని అందులో పాలుపంచుకుంటున్నారు. ఈ ఫొటోలను సోషల్‌ మీడియా వేదికగా షేర్‌ చేస్తూ సందడి చేస్తున్నారు. నూతనోత్సాహం కోసం.. కేక్‌ మిక్సింగ్‌ కూడా మన జీవన పరమార్థాన్ని తెలిపే ఓ వేడుకే. ఈ కేక్‌ మిక్సింగ్‌ లో కలిపే డ్రై ఫ్రూట్స్‌ నట్స్‌ సుగంధద్రవ్యాల లాగే మన అందరి జీవితాలు కలుపుగోలుగా అందంగా ఉండాలని అర్థం. అంతేకాకుండా ప్రతి ఏడాదీ నూతనోత్సాహాన్ని అందించడానికి ముందస్తు వేడుక. నగరంలో ఈ మధ్యకాలంలో ఈ సంస్కృతికి ఆదరణ బాగా పెరిగింది. – ఎస్పీ శైలజ, ప్రముఖ సింగర్, (ఈ మధ్య జరిగిన ఓ కేక్‌ మిక్సింగ్‌ వేడుకలో భాగంగా).

క్రీస్తు పుట్టుక సర్వ సృష్టికి పర్వదినం.. మనుజ కుమారుడిగా ఆ దేవాది దేవుడే ఈ భూతలంపైకి అరుదెంచిన అపురూప ఘట్టం. సర్వ మానవాళికి రక్షణ సౌభాగ్యం. ప్రతి ఒక్కరికి దేవుడు అందించిన శుభదినం. ► పరలోకం పరవశించిన వేళ మానవాళి రక్షణకు యేసు జననం అనివార్యమయినప్పుడు అది విశ్వవేడుకగా మారిపోయింది. రెండు వేల సంవత్సరాల క్రితం ఆ దేవాదిదేవుడే నరరూపిగా అరుదెంచేందుకు సిద్ధపడ్డాడు. నశించిపోతున్న మానవులందరికి తనని తాను బలి అర్పణగా అర్పించుకునేందుకు సిద్ధపడ్డ కరుణామయుని జననం కోసం అటు పరలోకం ఇటు భూలోకం సమాయత్తమయ్యాయి. దైవ సంకల్పం నెరవేర్చేందుకు పరలోక దూతాళి దిగివచ్చింది. గలిలయలోని నజరేతు గ్రామంలో దావీదు వంశస్థుడైన యోసేపునకు ప్రదానం చేయబడిన కన్యయైన మరియ వద్దకు పరలోకం నుంచి ముందుగా శుభవార్త తీసుకువచ్చారు. దయాప్రాప్తురాలా నీకు శుభం. ఆ దేవాది దేవుని కృపపొందిన నీవు ఒక కుమారుని కంటావు.. ఆ శిశువు గొప్పవాడై సర్వోన్నతుని కుమారుడనబడతాడు ఆయన రాజ్యం అంతం లేనిదై ఉంటుంది. ఇదంతా పరిశుద్ధాత్మ ద్వారా జరుగుతుంది కాబట్టి నీవు భయపడాల్సిన పనిలేదు. సర్వోన్నతుని శక్తి నీకు తోడుగా ఉంటుందని అభయమిచ్చాడు. మరియతో పాటు దేవదూత యోసేపునకు స్వప్నమందు ప్రత్యక్షమై ఇదంతా దేవుని సంకల్పంతో జరుగుతుంది కాబట్టి నీ భార్యను చేర్చుకొనుటకు సందేహింప వద్దని, పుట్టబోవు శిశువు తన ప్రజలను వారి పాపాల నుంచి రక్షిస్తాడు కాబట్టి యేసు అని నామకరణం చేయాలని చెబుతాడు. ఈ విధంగా మానవ ప్రమేయం లేకుండా పరమ దేవుడు పరిశుద్ధాత్మ శక్తి తో మరియ ద్వారా అవని మీద అవతరించడానికి మార్గం సుగమం అయింది. ► భూలోకం మైమరచిపోయిన వేళ యేసు పుట్టుక సమయంలో యోసేపు మరియను తీసుకుని తన సొంత గ్రామమైన బెత్లెహేముకు బయలుదేరతాడు. నిండు చూలాలైన మరియకు స్థలం లేకపోవడం వలన ఓ పశువు పాకే ప్రభు జన్మస్థలమైంది. ఒక శిశువు పొత్తిగుడ్డలతో చుట్టబడి ఓ సత్రములో పరుండి యుండుట మీరు చూచెదరన్న ప్రవచనం ఆ విధంగా నెరవేరింది. ఆ రాత్రి ఊరి వెలుపల గొఱె

సాక్షి, నెట్‌వర్క్‌: రాష్ట్ర వ్యాప్తంగా ప్రజలు ఆదివారం క్రిస్మస్‌ పర్వదినాన్ని ఘనంగా జరుపుకున్నారు. శనివారం అర్ధరాత్రి నుంచే ప్రముఖ చర్చిల్లో ఏసు­క్రీస్తు జనన దృశ్యాలు భక్తులను ఆకట్టుకున్నాయి. అర్ధరాత్రి కేక్‌లు కట్‌ చేసి సంతోషాన్ని పంచుకున్నారు. ఉదయం నుంచి సాయంత్రం వరకు చర్చిల్లో ప్రత్యేక ప్రార్థనలు నిర్వహించారు. పెద్ద సంఖ్యలో పాల్గొన్న భక్తులకు ఫాదర్లు పండుగ సందేశాన్ని వివరించారు. విజయవాడలోని గుణదల మేరి మాత పుణ్యక్షేత్రంలో రెక్టర్‌ ఫాదర్‌ ఏలేటి విలియం జయరాజ్‌ ఆధ్వర్యంలో ప్రత్యేక ప్రార్థనలు నిర్వహించారు. అనంతరం సమష్టి దివ్య బలిపూజ సమర్పించారు. ప్రతి ఒక్కరూ క్రీస్తు నడిచిన మార్గంలో పయనించాలని గుంటూరు జిల్లా మేత్రాసన గురువులు చిన్నాబత్తిన భాగ్యయ్య పిలుపునిచ్చారు. భక్తి గీతాలాపనలు, క్రిస్మస్‌ సందేశాలు, మిరుమిట్లు గొలిపే విద్యుద్దీపాలంకరణలతో బాల ఏసు నగరో­త్సవం ఆద్యంతం పలు ప్రాంతాల్లో కన్నుల పండువగా సాగింది. ఏసు జనన నాటిక, పలు సాంస్కృతిక కార్యక్రమాలు భక్తులను అలరించాయి. ఆయా ప్రాంతాల్లో మంత్రులు, ఎంపీలు, ఎమ్మెల్యేలు వేడుకల్లో పాల్గొన్నారు.  క్రీస్తు బోధనలు విశ్వమానవ సహోదరత్వానికి దోహదం   గవర్నర్‌ విశ్వభూషణ్‌ హరిచందన్‌ సాక్షి, అమరావతి : శాంతి, కరుణ, సహనం, ప్రేమలను ప్రపంచానికి చాటిన ఏసుక్రీస్తు బోధనలు విశ్వమానవ సహోదరత్వానికి దోహదం చేస్తాయని గవర్నర్‌ విశ్వభూషణ్‌ హరిచందన్‌ అన్నారు. రాజ్‌ భవన్‌ దర్బార్‌ హోలులో ఆదివారం జరిగిన క్రిస్మస్‌ వేడుకల్లో ఆయన పాల్గొన్నారు. ఈ సందర్భంగా మాట్లాడుతూ మానవీయ విలువలు మృగ్యమైపోతున్న నేటి కాలంలో క్రీస్తు బోధనలు ఆచరణీయం అన్నారు. మనల్ని ద్వేషించే వారిని కూడా ప్రేమించడమే నిజమైన సంతోషమన్నారు. శాంతి, స్వేచ్ఛ, ఆనందానికి ఏకైక మార్గం ప్రేమ మాత్రమేనని.. ద్వేషాన్ని ప్రేమతో, కోపాన్ని దయతో భర్తీ చేసినప్పుడు జీవితంలో మరింత శాంతిని పొందగలుగుతారని వివరించారు. బిషప్‌ రాజారావు సందేశం ఇచ్చారు. అనంతరం మత పెద్దలు పాకలపాటి ప్రభాకర్, మట్టా జయకర్, ఎబినేజర్‌ తదితరులు గవర్నర్‌ను ఘనంగా సన్మానించారు. వారికి గవర్నర్‌.. మదర్‌ థెరిస్సా మెమోంటోలను బహూకరించారు.  

సాక్షి, హైదరాబాద్‌: తెలంగాణ రాష్ట్ర, దేశ ప్రజలకు సీఎం కె.చంద్రశేఖర్‌ రావు క్రిస్మస్‌ శుభాకాంక్షలు తెలియజేశారు. శాంతి, కరుణ, సహనం, ప్రేమ విలువలను ప్రపంచానికి చాటిన ఏసుక్రీస్తు బోధనలు విశ్వమానవ సహోదరత్వానికి దోహదం చేశాయని ఆయన పేర్కొన్నారు. శాస్త్ర, సాంకేతిక రంగాలు పురోగమిస్తున్నప్పటికీ.. మానవీయ విలువలు మృగ్యమైపోతున్న నేటి కాలంలో.. క్రీస్తు బోధ నలు ఆచరణీయమని స్పష్టం చేశారు. శత్రువునైనా క్షమించే గొప్ప గుణం, సాటి మనుషులపై ప్రేమ, కరుణ, సహనం అనే సద్గుణాల ఆచరణ అనివార్యమైనదని తెలిపారు. ఏసుక్రీస్తు దీవెనలు ప్రజలందరికీ లభించాలని ముఖ్యమంత్రి ఆకాంక్షించారు. మంత్రుల శుభాకాంక్షలు  రాష్ట్రవ్యాప్తంగా క్రైస్తవులు కుటుంబ సమేతంగా ఆనందోత్సాహాలతో క్రిస్మస్‌ పండుగ జరుపుకోవాలని మంత్రులు హరీశ్‌రావు, తలసాని శ్రీనివాస్, శ్రీనివాస్‌గౌడ్, గంగుల కమలాకర్‌ ఆకాంక్షించారు. యేసు క్రీస్తు దీవెనలు ప్రతి ఒక్కరికీ లభించాలని ప్రార్థించారు. ఈ మేరకు వారు శని వారం వేర్వేరు ప్రకటనల్లో క్రైస్తవులకు క్రిస్మస్‌ శుభాకాంక్షలు తెలిపారు.  

సాక్షి, హైదరాబాద్‌: గవర్నర్‌ తమిళిసై సౌందర రాజన్‌ రాష్ట్ర ప్రజలకు క్రిస్మస్‌ శుభాకాంక్షలు తెలిపారు. యేసుక్రీస్తు జన్మదినాన్ని జరుపుకోవడం, ఆయన ఆదర్శాలను గౌరవించడం సంతోషకరమని తెలిపారు. ఆయన జీవితం ప్రేమ, క్షమాపణ, సత్యం, కరుణ, సోదరభావం, త్యాగానికి ప్రతీకని అభివర్ణించారు. ఈ క్రిస్‌మస్‌ అందరికీ అనంతమైన ఆనందం, ప్రేమ, శాంతిని అందించాలని ఆకాంక్షించారు.  

సాక్షి, సిటీబ్యూరో:  క్రిస్మస్‌ పండుగ సందర్భంగా ప్రతి సంవత్సరం లాగే ఈసారి కూడా నిరుపేద క్రైస్తవ కుటుంబాలకు క్రిస్మస్‌ కానుకగా నూతన వస్త్రాలు పంపిణీ చేసి విందు ఏర్పాటు చేసేందుకు అధికార యంత్రాంగం చర్యలకు ఉపక్రమించింది. నగర పరిధిలోని చర్చిల వారిగా నిరుపేద క్రైస్తవులకు గిఫ్ట్‌ ప్యాక్‌ పంపిణీకి ఏర్పాట్లు, విందు నిర్వహణ కోసం నియోజకవర్గానికి  లక్ష రూపాయల చొప్పున కేటాయించింది. ఒక్కో నియోజకవర్గానికి ఒక ప్రత్యేక అధికారిని నియమించారు. మరోవైపు  ప్రభుత్వం పక్షాన   ఎల్‌బీ స్టేడియంలో పెద్ద ఎత్తున విందు ఇవ్వనుంది. గ్రేటర్‌ పరిధిలో సుమారు లక్ష క్రైస్తవ కుటుంబాలకు  క్రిస్మస్‌ కానుకల ల«బ్ధి చేకూరనుంది.    ఘనంగా ఏర్పాట్లు చేయాలి :  తలసాని  క్రిస్మస్‌ వేడుకలను ఘనంగా నిర్వహించేందుకు అన్ని ఏర్పాట్లు చేయాలని మంత్రి తలసాని శ్రీనివాస్‌ యాదవ్‌ అధికారులను ఆదేశించారు. గురువారం మాసాబ్‌ ట్యాంక్‌ లోని తన కార్యాలయంలో హోంమంత్రి మహమూద్‌ అలీ తో కలిసి క్రిస్మస్‌ వేడుకల నిర్వహణ పై నగరంలోని ఎమ్మెల్సీలు, ఎమ్మెల్యేలు,  అధికారులతో సమీక్ష నిర్వహించారు. క్రిస్మస్‌ను పేదలు కూడా సంతోషంగా జరుపుకోవాలనే ఆలోచనతో పేదలకు ప్రభుత్వం గిఫ్ట్‌ ప్యాక్‌ లు (దుస్తులు) పంపిణీ చేస్తున్న విషయాన్ని గుర్తుచేశారు. సమావేశంలోమంత్రి మహమూద్‌ అలీ, మండలి ప్రభుత్వ విప్‌ ప్రభాకర్‌ రావు, ఎమ్మెల్సీలు  స్టీఫెన్‌ సన్, సురభి వాణి దేవి, హసన్‌ జాఫ్రీ, ఎమ్మెల్యేలు మాగంటి గోపినాథ్, దానం నాగేందర్, కాలేరు వెంకటేష్, ముఠా గోపాల్, కౌసర్‌ మొహినోద్దిన్‌ తదితరులు పాల్గొన్నారు.   

UK Omicron Lockdown:: వేగంగా వ్యాపిస్తున్న ఒమిక్రాన్‌ వేరియెంట్‌ విస్తృతిని అడ్డుకోవడానికి కిస్మస్‌ తర్వాత రెండు వారాల లాక్‌డౌన్‌ విధించే ప్రణాళిక యునైటెడ్‌ కింగ్‌డమ్‌ (యూకే) ప్రభుత్వం సిద్ధం చేసినట్లు తెలుస్తోంది. కోవిడ్‌–19 కట్టడికి శాస్త్రవేత్తల సలహా బృందం (సేజ్‌) ప్రధాని బోరిస్‌ జాన్సన్‌ ముందు ఉంచిన పలు ప్రతిపాదనల్లో రెండు వారాల లాక్‌డౌన్‌ సిఫారసు కూడా ఉంది. యూకేలో గురువారం 88,376, శుక్రవారం 93,045 కేసులు వచ్చాయి. లండన్‌లో శుక్రవారం ఒక్కరోజే 26 వేలకు పైగా కేసులు నమోదు కావడంతో నగర మేయర్‌ సాదిక్‌ ఖాన్‌ హెల్త్‌ ఎమర్జెన్సీని ప్రకటించారు. ఒకవైపు ఆసుపత్రుల్లో చేరే వారే సంఖ్య పెరుగుతుండగా... మరోవైపు సిబ్బంది గైర్హాజరు పెరుగుతోంది. దాని కి తోడు లండన్, స్కాట్లాండ్‌లలో ఒమిక్రాన్‌ కేసులు ఎక్కవగా నమోదవుతున్నాయి. సాధారణ పరిస్థితుల్లో ప్రభుత్వాసుత్రుల్లో అందేస్థాయి సేవలు అందకపోవచ్చనే సంకేతాలను మేయర్‌ ఇచ్చారు. ► నెదర్లాండ్‌లో ఆదివారం నుంచి కఠిన లాక్‌డౌన్‌ను అమలు చేయనున్నట్లు అపద్ధర్మ ప్రధాని మార్క్‌ రుట్టే ప్రకటించారు. ఒమిక్రాన్‌తో ఐదోవేవ్‌ విరుచుకుపడుతున్నందువల్ల తప్పట్లేదన్నారు.   ► ఫ్రాన్స్‌ నూతన సంవత్సర వేడుకలపై నిషేధం విధించింది. ‘జనవరి ఆరంభానికల్లా ఒమిక్రాన్‌ ప్రధాన వేరియెంట్‌గా అవతరించే అవకాశాలున్నాయి. ఐదోవేవ్‌ వచ్చేసింది, పూర్తిస్థాయిలో విరుచుపడుతోంది’ అని ఫ్రాన్స్‌ ప్రధాని జీన్‌ కాస్తక్స్‌ ప్రకటించారు. క్రిస్మస్‌కు పెద్ద సంఖ్యలో గుమిగూడొద్దని, వేడుకల్లో పాల్గొనే కుటుంబసభ్యుల సంఖ్యను కూడా పరిమితం చేయాలని కోరారు. ► డెన్మార్క్‌ థియేటర్లను, సంగీత కచేరి నిర్వహించే హాళ్లను, మ్యూజియంలు, అమ్యూజ్‌మెంట్‌ పార్కులను మూసివేసింది. డెల్టా కంటే ఒమిక్రాన్‌ వేగమెక్కువ: డబ్లు్యహెచ్‌ఓ జెనీవా: కరోనా కొత్త వేరియంట్‌ ఒమిక్రాన్‌ను 89 దేశాల్లో గుర్తించారని ప్రపంచ ఆరోగ్య సంస్థ(డబ్లు్యహెచ్‌ఓ) తెలిపింది. డెల్టా కన్నా ఇది చాలా వేగంగా వ్యాపిస్తోందని, దీని వ్యాప్తి అధికంగా ఉన్న ప్రాంతాల్లో 1.5–3 రోజుల్లోనే ఇది రెట్టింపవుతోందని హెచ్చరించింది. అందుబాటులో ఉన్న గణాంకాల ఆధారంగా శుక్రవారం ఒమిక్రాన్‌పై సంస్థ ఒక నివేదికను విడుదల చేసింది. సమూహ వ్యాప్తి జరుగుతున్న చోట డెల్టాను ఈ వేరియంట్‌ మించిపోగలదని తెలిపింది.

డిసెంబర్‌ నెల అంటేనే క్రిస్మస్‌ సీజన్‌. నెల ప్రారంభం నుంచి క్రిస్మస్‌ వేడుకలు ప్రారంభమవుతాయి. ఇంటిని అలంకరించడండతో మొదలు కొని అన్నీ ఏర్పాట్లతో బిజీబిజీగా గడుపుతుంటారు. క్రిస్మస్‌ వేడుకల్లో ప్రధాన ఆకర్షణగా నిలిచేది క్రిస్మస్‌ ట్రీ. క్రిస్మస్ రాక ముందు నుంచే ఈ చెట్టును తమ ఇంటిలో ప్రత్యేకంగా తయారు చేసుకుంటారు. సరిగ్గా ఇలాగే ఓ పెద్ద క్రిస్మస్ చెట్టును ఇంటికి తీసుకొచ్చారు. దానిని అందంగా ముస్తాబు చేస్తుండగా ఓ విషపూరితమైన పాము కనిపించింది. ఆ ఘటన ఆస్ట్రేలియాలో చోటుచేసుకుంది. చదవండి: ఓరి వీడి వేశాలో... తల ఆరబెట్టాలంటే ఇలా చేయాలా! ఆస్ట్రేలియాలోని అడిలైడ్ నగరంలో నివసిస్తున్న ఓ కుటుంబం క్రిస్మస్ వేడుకల్లో భాగంగా క్రిస్మస్ ట్రీని ఇంటికి  తీసుకొచ్చారు. దానికి రిబ్బన్లు, రంగుల దీపాలు, కొవ్వొత్తులతో అలంకరిస్తున్నారు. ఇంతలోనే ఒక్కసారిగా క్రిస్మస్ చెట్టు నుంచి వింత శబ్దాలు రావడం మొదలయ్యాయి. వారంతా దాన్ని తీక్షణంగా పరిశీలించగా.. రిబ్బన్ స్థానంలో ఓ విషపూరితమైన పాము చుట్టుకుని కనిపించింది.  దీనితో భయభ్రాంతులకు గురైన ఆ కుటుంబం వెంటనే స్నేక్ క్యాచర్‌కు సమాచారాన్ని ఇచ్చారు. సుమారు గంటన్నర పాటు శ్రమించిన అతడు.. ఆ పామును చెట్టును నుంచి తీసి దూరంగా అడవుల్లో విడిచిపెట్టారు. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. చదవండి: ఇంట్లో క్రిస్మస్‌ వేడుకలు.. ఎలా వచ్చిందో గానీ సడన్‌గా ప్రత్యక్షమైంది!

చుట్టూ గాఢాంధకారం... నల్లని మబ్బుల చాటున చంద్రుడు గుర్రు పెట్టి నిదరోతున్నాడు. గ్రామం గాఢ నిద్రలో ఉంది కదా అని ప్రకృతి కూడా అప్పుడే నిద్రకు ఉపక్రమించింది. పైరగాలి మాత్రం కొద్దిగా మేలుకొని మెల్లని, చల్లని గాలులను వీయిస్తోంది. ఆ గాలికి మైమరచి కొండలు ప్రశాంతంగా నిద్రపోతున్నాయి. ఆ కొండల పక్కనే ఓ చిన్న బొరియ. దాని నిండా పలు రకాల పశువులు.  ఇంతలో దూరంగా ఇద్దరు వ్యక్తులు.. చూడటానికి భార్యాభర్తల్లా ఉన్నారు. అసలే అర్ధరాత్రి. చలి గజగజ వణికిస్తోంది. చలికి ఆ స్త్రీ రెండు చేతులు చెవులపై అదిమి పెట్టింది. భార్య చలికి తట్టుకోలేక పోవడాన్ని గమనించి అతడు తన పై వస్త్రాన్ని తీసి ఆమెకు కప్పాడు. సరిగ్గా అప్పుడే చంద్రుడు నిద్రలేచాడు. నల్లని మబ్బుల కనురెప్పలను తెరచి లోకాన్ని చూసాడు. ఏదో చూడకూడని దాన్ని చూశాడు కాబోలు.. తన బాహువులను చూడమన్నట్లు వెన్నెలను విరగబూయించడం ప్రారంభించాడు. గాఢ నిద్రలో మునిగిన గ్రామం చంద్రుడి వెలుగును పట్టించుకోలేదు.  ఆ జాబిల్లి వెలుగులో పశువులన్నీ ఓ మానవీయ ఘటనను చూశాయి. తమ వద్దకు వస్తున్న ఆ జంట చూడముచ్చటగా ఉంది. ఆమె నిండు గర్భిణి. ఏ క్షణమైనా ప్రసవం జరిగేలా ఉంది. వీరికి దారి చూపడానికే చంద్రుడు నిద్ర లేచాడా అన్నట్లు ఉందా పరిస్థితి. పసుల పాకలోని జంతువులు నిద్ర లేచాయి. ‘‘ఏంటి వీళ్ళు... ఇటే వస్తున్నారు. ఇప్పటికే ఇరుకుగా ఉంది. వీరెక్కడ సరిపోతారు’’ అందో గాడిద. ‘‘సరేలే ఉన్న దాంట్లో ఇరుక్కుంటారేమో నీకేంటి?’’ అంది పక్కనే ఉన్న మరో గాడిద. ‘‘సరిగ్గా చూడండెహే.. పాపం ఆవిడ ప్రసవానికి సిద్ధంగా ఉంది. నోర్మూసుకుని దారి ఇవ్వండి లేకపోతే తెలుసుగా, కొమ్ములకు ఈ మధ్యే పదును పెట్టా..’’ అని హెచ్చరించింది పక్కనే ఉన్న ఓ పొట్టేలు.  ‘‘నిజమే.. అందరూ లేవండి.. మనం ఆ మూలకు వెళదాం’’ అంది గొర్రె. అప్పుడే నిద్ర లేచిన ఓ బుజ్జి మేక తనను కొంటె చూపుతో చూస్తున్న చంద్రుణ్ణి చూసింది. తర్వాత వాళ్ళ అమ్మతో.. ‘‘అమ్మా ఏమయిందే, ఇంకా తెల్లారలేదుగా.. అప్పుడే ఎందుకు లేపుతున్నావ్‌?’’ అని అడిగింది. ఇంతలో వారు లోనికి రానేవచ్చారు. పశువులన్నీ మరో మూలకు చేరి వారికి కొంచెం చోటిచ్చాయి. అనుకున్నదే అయింది. ఆ స్త్రీ వచ్చిన కొద్దిసేపటికే బంగారులాంటి కొడుకు పుట్టాడు. బుజ్జి మేక ఆ బాలుడి దగ్గర చేరి చెంగు చెంగున గెంతుతోంది. అది చూసి మిగిలిన బుజ్జి మేకలు, గొర్రె పిల్లలు మే.. మే అని పిల్లాడి చుట్టూ చేరి ఆడుకుంటున్నాయి.  ‘‘ఎవరి సహాయం లేకపోయినా సుఖ ప్రసవం జరిగింది.. సంతోషం’’ అంది పొట్టేలు పక్కనే ఉన్న గాడిదతో... ‘‘నిజమే బాలుడు చూడ ముచ్చటగా ఉన్నాడు, నా మీద ఎక్కి కూర్చుంటే నగరమంతా తిప్పుతాను’’ అంది గాడిద. ఇంతలో ఓ గొర్రె పిల్ల కల్పించుకొని.. ‘‘అమ్మా చూడవే... ఈ బాబు అచ్చం నాలాగే ఉన్నాడు’’అంది. ‘‘నిజమేలేవే.. కొంచెం దూరంగా గెంతు.. బిడ్డ మీద పడేలా ఉన్నావు’’ అంది తల్లి. ఇంతలో బిడ్డ దగ్గరకు ఓ ఆవు, పెయ్య దూడ కలిసి వచ్చాయి. ఆ పెయ్య దూడ తన తల్లితో.. ‘‘అమ్మా.. బాబు చూడు నాలాగే ఎర్రగా ఉన్నాడు. ఒక్క మచ్చ కూడా లేదు’’ అంది. నిజమేనన్నట్లు ఆ ఆవు తలూపింది. ఇంతలో మబ్బులన్నీ నిద్ర లేచి గట్టిగా ఆవులించాయి. ఆ శబ్దానికి జంతువులన్నీ భయపడ్డాయి. ఇంతలో ఆ పాకలో గొప్ప వెలుగు పుట్టింది. ఆ వెలుగులో రెక్కలు కట్టుకున్న అందమైన జీవులు ప్రత్యక్షమయ్యాయి. ఏమిటీ వింత అని పెద్ద జంతువులన్నీ గుడ్లు మిటకరించి చూస్తున్నాయి. చిన్ని గాడిదలు, బుజ్జి మేకలు, గొర్రె పిల్లలు, పెయ్య దూడలు, కోడె దూడలు మాత్రం ఆనందంతో శబ్దాలు చేస్తూ చెంగు చెంగున గెంతుతూ నాట్యం చేస్తున్నాయి. బిడ్డ పుట్టుకతో, జంతు నాట్యాలతో పరవశులైన ఆ రెక్కల జీవులు బిడ్డను పొగిడి తిరిగి వెళ్లిపోయారు...అప్పటి వరకూ ఎగిరిన పసు పిల్లలు అన్నీ అలసిపోయి బిడ్డ చుట్టూ హాయిగా పడుకున్నాయి. పెద్ద జంతువులన్నీ కాసేపు ముచ్చట్లు కొనసాగించి అలాగే నిద్రపోయాయి. వేదనను అనుభవించిన ఆ స్త్రీ సంతోష మైకంతో, ఆత్మీయ ఆనందంతో నిద్రలోకి జారుకుంది. అప్పటివరకు గర్భవతియైన తన భార్యను కాపాడిన భర్త కూడా పడుకున్నాడు. అప్పుడే కన్ను తెరిచిన ఆ బిడ్డ మాత్రం కళ్లు ఇంతింత చేసుకుని లోకాన్ని ప్రేమ, కరుణ, శాంతి దిశగా మేల్కొలపాల్సిన అవసరం ఉందని అనుకుంటూ, తనకు జన్మనిచ్చిన తల్లి వైపు... ఆదరించిన తండ్రి వైపు కృతజ్ఞతతో చూశాడు.  ఆ బిడ్డ మాత్రం... సంతోషంతో తనవైపే చూస్తున్న జాబిల్లిని, ఆనంద బాష్పాలను మంచు రూపంలో కురిపిస్తున్న నల్లని మబ్బులను... తన పుట్టుకను గాంచి మిగుల ఆనందపడిన పశు పిల్లలను, వాటి తల్లులను చూస్తున్నాడు. ఏదో ఒక రోజు నీ మీద నగరానికి వస్తానని గాడిదకు మనసులోనే మాటిచ్చాడు. అచ్చం నాలాగే ఉన్నాడన్న గొర్రె పిల్లకు, ఎర్రగా ముద్దుగా ఒక్క మచ్చ కూడా లేదన్న పెయ్య దూడకు మీరన్నవన్నీ నిజమే అని తన మనసులో అనుకుంటూ చిరునవ్వుల వర్షం కురిపించాడు. – సృజన్‌ సెగెవ్‌ సాక్షి, హైదరాబాద్‌

దట్టంగా మంచుకురిసే రాత్రి జీసస్‌ పుట్టాడు. ఎంత తీపి కబురు. అందరి నోరూ తీపి చేయాల్సిన కబురు. ఏం చేద్దాం. కేక్‌ చేద్దాం. ఏం కేక్‌. ప్లమ్‌ కేక్, రమ్‌ కేక్, చాక్లెట్‌ కేక్, మార్బుల్‌ కేక్‌... కేక్‌ల పండుగుల ఇది. ఒకరికి కేక్‌ పంచి సంతోషించే పండుగ. ఎప్పుడూ కొనడమేనా. ఈసారి చేయొచ్చుగా? ట్రిపుల్‌ లేయర్‌ చాకొలేట్‌ కేక్‌ ఈ కేకును తయారుచేయడం కొంచెం కష్టమే. కాని ఇది పూర్తయ్యాక చూసుకుంటే అలసట అంతా మరచిపోవచ్చు. ఇక తిన్నాక, నోటి నుంచి మాటలు రావు. అంత ఆనందంగా ఆస్వాదిస్తూ తింటారు ఈ కేక్‌ని. కావలసినవి: మొదటి లేయర్‌ కోసం: మైదా పిండి – ఒకటిన్నర కప్పులు; బేకింగ్‌ పౌడర్‌ – ముప్పావు టీ స్పూను; బేకింగ్‌ సోడా – అర టీ స్పూను, ఉప్పు – పావు టీ స్పూను; బటర్‌ – అర టీ స్పూను; పంచదార – ముప్పావు కప్పు; వెనిలా ఎక్స్‌ట్రాక్ట్‌ – అర టేబుల్‌ స్పూను; కోడి గుడ్లు – 2; బటర్‌ మిల్క్‌ – ముప్పావు కప్పు. బటర్‌ క్రీమ్‌ కోసం: పంచదార – ఒక కప్పు; కోడిగుడ్డు తెల్ల సొనలు – 4; నిమ్మరసం – అర టీ స్పూను; ఉప్పు – చిటికెడు; బటర్‌ – ఒక కప్పు. కుకీ డఫ్‌ లేయర్‌ కోసం: మొలాసెల్‌  – 2 టీ స్పూన్లు; చాకొలేట్‌ చిప్స్‌ – పావు కప్పు. ఓరియో లేయర్‌ కోసం: ఓరియో బిస్కెట్స్‌ (బ్రౌన్‌ కలర్‌) – 3 బ్రౌనీ లేయర్‌ కోసం: డచ్‌ ప్రోసెస్డ్‌ కోకో పౌడర్‌ – 2 టేబుల్‌ స్పూన్లు గార్నిషింగ్‌ కోసం: బ్రౌనీ కుకీస్, ఓరియోలు (టాపింగ్‌ కోసం) – 2 టేబుల్‌ స్పూన్లు; గనాచే (కుకింగ్‌ చాకొలేట్‌ + పాలు కలిపి తయారుచేసినది) – 2 కప్పులు. తయారీ: ►350 డిగ్రీల దగ్గర అవెన్‌ను ప్రీ హీట్‌ చేయాలి ►తొమ్మిది అంగుళాల కేక్‌ పాన్‌ను బటర్, మైదాలతో గ్రీజ్‌ చేయాలి ►ఒక పాత్రలో మైదా పిండి, బేకింగ్‌ పౌడర్, బేకింగ్‌ సోడా, ఉప్పు వేసి బాగా కలియబెట్టాలి ►మరొక పాత్రలో పంచదార, బటర్‌ వేసి బాగా గిలకొట్టి క్రీమ్‌ తయారుచేసుకోవాలి ►కోడి గుడ్డు సొనలు, వెనిలా ఎక్స్‌ట్రాక్ట్‌ జత చేసి మరోమారు బీటర్‌తో బాగా గిలకొట్టాలి ►మైదా పిండిలో సగ భాగాన్ని జత చేయాలి ►సగం బటర్‌ మిల్క్‌ జత చేసి గిలకొట్టాక, మిగిలిన మైదా పిండి, బటర్‌ మిల్క్‌ జత చేసి మరోమారు బాగా గిలకొట్టాలి ►ఈ మిశ్రమాన్ని మూడు సమాన భాగాలుగా విడదీసి, ఒక్కో లేయర్‌కు తీసుకున్న పదార్థాలను ఒక్కో దానికి విడివిడిగా జత చేయాలి ►కేక్‌పాన్‌లో ఒక లేయర్‌ తరవాత మరొక లేయర్‌కి కలుపుకున్న మిశ్రమాలను జాగ్రత్తగా వేసి, అవెన్‌లో ఉంచి సుమారు 35 నిమిషాలు బేక్‌ చేయాలి. బటర్‌ క్రీమ్‌ కోసం: ఒక సాస్‌పాన్‌లో కొద్దిగా నీళ్లు పోసి మరిగించాలి ∙వేరొక పాత్రలో పంచదార, కోడిగుడ్డు తెల్ల సొన నిమ్మ రసం, ఉప్పు వేసి ఆ పాత్రను మరుగుతున్న నీళ్ల గిన్నెలో ఉంచాలి ∙పదార్థాలన్నీ వేడెక్కి, పంచదార కరిగేవరకు కలిపి దింపేసి, ఈ మిశ్రమాన్ని బటర్‌లో వేసి కొద్దిసేపు కలియబెట్టాలి (ఇలా చేయడం వల్ల మృదువుగా అయ్యి, కేక్‌ మీద సమానంగా వేయటానికి సులువుగా ఉంటుంది) ∙బేక్‌ చేసుకున్న కేక్‌ బేస్‌ను బయటకు తీసి, మొదటి లేయర్‌ను ఒక ప్లేట్‌లో ఉంచాలి ∙బటర్‌ క్రీమ్‌ను అర అంగుళం మందంలో మొదటి లేయర్‌ మీద సమానంగా పోయాలి ∙రెండవ లేయర్‌ను ఉంచి దాని మీద కూడా ఇదే విధంగా చేసి, మూడో లేయర్‌ను ఉంచాలి ∙గనాచేతో అలంకరించాలి ∙టాపింగ్స్‌ కోసం తీసుకున్న వాటిని కూడా జత చేయాలి. మార్బుల్‌ కేక్‌ ఈ కేక్‌కి తయారుచేసే బేస్‌ని చాకొలేట్‌ మార్బుల్‌ అంటారు. ఎవరి ఆలోచనకు వారు పదును పెట్టుకుని, మిక్స్‌డ్‌ ఫ్రూట్‌ జామ్‌ లేదా తాజా పండ్లు... బ్లూ బెర్రీలు, స్ట్రాబెర్రీలు ఏవైనా సరే... బ్యాటర్‌కి జత చేస్తే –   కేక్‌ కలర్‌ఫుల్‌గా వస్తుంది. కావలసినవి: మైదా పిండి – 2 కప్పులు; బేకింగ్‌ పౌడర్‌ – 2 టీ స్పూన్లు; పంచదార పొడి – ఒక కప్పు కంటె ఎక్కువ; ఉప్పు – చిటికెడు; బటర్‌ – అర కప్పు (సాల్టెడ్‌ బటర్‌ వాడుతుంటే ఉప్పును ఉపయోగించక్కర్లేదు); కోడి గుడ్లు – 2; వెనిలా ఎక్స్‌ట్రాక్ట్‌ – ఒక టీ స్పూను; ఫుడ్‌ కలర్‌ – చిటికెడు; పాలు – ఒక కప్పు; కోకో పొడి – 3 టేబుల్‌ స్పూన్లు తయారీ: ►ముందుగా అవెన్‌ను 350 డిగ్రీల దగ్గర ప్రీ హీట్‌ చేయాలి ►కేక్‌ పాన్‌ను బటర్‌ తో గ్రీజ్‌ చేయాలి ►ఒక పెద్ద పాత్రలో మైదా పిండి, బేకింగ్‌ పౌడర్, ఉప్పు, పంచదార పొడి, బటర్, కోడి గుడ్డు సొనలు, వెనిలా ఎసెన్స్, పాలు వేసి బాగా గిలకొట్టాలి (అన్నీ కలిసి బాగా మెత్తగా అయ్యేవరకు గిలకొడితే కేక్‌ స్మూత్‌గా వస్తుంది) ►సగం కంటె ఎక్కువ భాగాన్ని కేక్‌ పాన్‌లో పోయాలి ►ఆ పైన వెనిలా ఎక్స్‌ట్రాక్ట్‌ను, ఫుడ్‌ కలర్‌ మిశ్రమం, కోకో పొడి ఒక దాని మీద ఒకటి పోయాలి ►చాకుతో కాని ఒక పుల్లతో కాని ఈ మిశ్రమాన్ని జాగ్రత్తగా సరిచేయాలి (మార్బుల్‌ ఎఫెక్ట్‌ వచ్చేలాగ) ►అవెన్‌లో ఉంచి సుమారు 40 నిమిషాలు బేక్‌ చేయాలి ►బయటకు తీసి చల్లారాక సర్వ్‌ చేయాలి. యూలే ద లాగ్‌ చాలామందికి ప్లమ్‌ కేక్, రమ్‌ కేక్‌ తెలుసు. మీరెప్పుడైనా యూలే ద లాగ్‌ కేక్‌ తయారుచేసుకున్నారా! ఇది చూడటానికి చెక్క దూలంలాగ ఉంటుంది. అందువల్ల ఈ కేక్‌ను చూడగానే సంతోషంతో పాటు సెలవును ఆస్వాదిస్తున్న భావన కూడా కలుగుతుంది. కావలసినవి: కేక్‌ కోసం: కోడి గుడ్లు – 6; పంచదార – ముప్పావు కప్పు; కోకో పొడి – అర కప్పు; వెనిలా ఎక్స్‌ట్రాక్ట్‌ – ఒక టీ స్పూను ఐసింగ్‌ కోసం: డార్క్‌ చాకొలేట్‌ తురుము – ఒక కప్పు కంటె కొద్దిగా ఎక్కువ; పంచదార – ఒక కప్పు కంటె కొద్దిగా ఎక్కువ; సాఫ్ట్‌ బటర్‌ – ఒక కప్పు; వెనిలా ఎక్స్‌ట్రాక్ట్‌ – ఒక టేబుల్‌ స్పూను. అలంకరించడం కోసం: 2 టేబుల్‌ స్పూన్ల పంచదార, పార్లే జి బిస్కెట్స్, ఎరుపు రంగు ఫుడ్‌ కలర్‌ (చెర్రీలు తయారుచేయడానికి); మెరింగ్‌ మష్రూమ్స్, చాకొలేట్‌ సాయిల్, క్రిస్మస్‌ ట్రీ పుల్లలు తయారీ: ►ముందుగా అవెన్‌ను 350 డిగ్రీల దగ్గర ప్రీహీట్‌ చేయాలి ►ఒక పెద్ద పాత్రలో కోడి గుడ్డు తెల్ల సొనలను వేసి బీటర్‌తో బాగా గిలకొట్టాలి ►బాగా మెత్తగా అయిన తరవాత పావు కప్పు పంచదార కొద్దికొద్దిగా వేస్తూ మళ్లీ గిలకొడుతుండాలి ►వేరొక పాత్రలో కోడిగుడ్డు పచ్చ సొనలను వేసి పంచదార జత చేస్తూ గిలకొట్టాలి ►వెనిలా ఎక్స్‌ట్రాక్ట్‌ జత చేయాలి ∙కోకో పొడిని జల్లెడ పట్టి, మెత్తటి పొడిని కొద్దికొద్దిగా జత చేస్తూ గిలకొట్టాలి ►కోడి గుడ్డు తెల్ల సొన మిశ్రమాన్ని కొద్దికొద్దిగా జత చేస్తూ, అన్నీ బాగా కలిసేలా గిలకొట్టాలి (ఎంత ఎక్కువసేపు గిలకొడితే అంత మెత్తగా వస్తుంది కేక్‌) ►నలుచదరం లేదా దీర్ఘచతురస్రాకారంలో ఉన్న కేక్‌పాన్‌లో బేకింగ్‌ షీట్‌ లేదా ఫాయిల్‌ (కింద కొద్దిగా పంచదార వేస్తే కేక్‌ అతుక్కోకుండా తేలికగా వస్తుంది) ఉంచి, దాని మీద ఈ మిశ్రమాన్ని సమానంగా పరిచి, అవెన్‌లో ఉంచి, సుమారు 20 నిమిషాల పాటు బేక్‌ చేయాలి ►చల్లారిన తరవాత, జాగ్రత్తగా ప్లేట్‌లోకి తీసుకోవాలి. ఐసింగ్‌తయారీ: ►చాకొలేట్‌ను ముందుగా కరిగించాలి (మైక్రోవేవ్‌లోకాని వేడి నీళ్ల మీద కాని) ►ఒక పాత్రలో పంచదార, బటర్‌ వేసి బాగా గిలకొట్టాలి ►కరిగించిన చాకొలేట్, వెనిలా ఎక్స్‌ట్రాక్ట్‌ జత చేసి మెత్తగా వచ్చేవరకు కలుపుతుండాలి ►బాగా మెత్తగా అయిన తరవాత కేక్‌ మీద సమానంగా పరిచి, కేక్‌ను (ఫాయిల్‌తో) నెమ్మదిగా రోల్‌ చేయాలి (వదులుగా కాకుండా టైట్‌గా వచ్చేలా జాగ్రత్తగా రోల్‌ చేసి, చివరగా ప్రెస్‌ చేయాలి) ►అంచులను జాగ్రత్తగా కట్‌ చేయాలి ►మిగిలిన భాగాన్ని చిన్న చిన్న ముక్కలుగా చేయాలి ►అంతే!!! అందమైన కేక్‌ సిద్ధమైనట్లే. సాల్టెడ్‌ క్యారమెల్‌ షీట్‌ కేక్‌ కావలసినవి: మైదా పిండి – రెండు కప్పుల కంటె కొద్దిగా ఎక్కువ; బటర్‌ – ఒక కప్పు; పంచదార – అర కప్పు; బ్రౌన్‌ సుగర్‌ – ఒక కప్పు ; పెద్ద కోడిగుడ్లు – 2; వెనిలా ఎక్స్‌ట్రాక్ట్‌ – 2 టీ స్పూన్లు; తాజా పెరుగు – అర కప్పు; బేకింగ్‌ సోడా  – ఒక టీ స్పూను; ఉప్పు – అర టీ స్పూను; చిక్కటి పాలు (హోల్‌ మిల్క్‌) – ఒక కప్పు. తయారీ: ►ముందుగా అవెన్‌ను 350 డిగ్రీల దగ్గర ప్రీ హీట్‌ చేయాలి ►12 అంగుళాల చతురస్రాకారంలో ఉన్న కేక్‌ పాన్‌లను ముందుగా కొద్దిగా బటర్‌తో గ్రీజ్‌ చేయాలి ►ఒక పెద్ద పాత్రలో పంచదార, బటర్‌ వేసి బాగా కలిపి, మెత్తగా వచ్చేవరకు గిలకొట్టాలి ►కోడి గుడ్డు సొనలు, వెనిలా ఎక్స్‌ట్రాక్ట్, పెరుగు జత చేసి మరోమారు గిలకొట్టాలి ►మరొక పాత్రలో మైదా పిండి, బేకింగ్‌ సోడా, ఉప్పు వేసి బాగా కలిపి, సగ భాగాన్ని కోడి గుడ్డు మిశ్రమానికి జత చేయాలి ►అర కప్పు పాలు జత చేసి నెమ్మదిగా గిలకొట్టాలి ►మిగిలిన పిండిని జత చేస్తూ, మిశ్రమం మెత్తగా వచ్చేలా బాగా బీట్‌ చేయాలి ►ట్రేలో పోసి, అవెన్‌లో ఉంచి 25 నిమిషాల పాటు బేక్‌ చేయాలి ►బయటకు తీసి, చల్లారాక, సాల్టెడ్‌ కారమెల్‌ను పైన చల్లి అందించాలి. కేక్‌ పాప్స్‌ కావలసినవి: కేక్‌ పాప్స్‌ కోసం: పొడిపొడిగా మిగిలిపోయిన కేక్‌ (క్రంబ్‌ల్డ్‌ కేక్‌) – 2 కప్పులు; హెవీ క్రీమ్‌ – ఒక కప్పు కోటింగ్‌ కోసం: తగినంత డార్క్‌ చాకొలేట్‌ లేదా వైట్‌ చాకొలేట్‌; తగినంత నట్స్‌ పొడి; కార్డ్‌బోర్డ్‌ బాక్స్‌. తయారీ: ►ఒక పాత్రలో క్రీమ్, క్రంబ్‌ల్డ్‌ కేక్‌ వేసి బాగా కలపాలి (ఈ పొడి కొద్దిగా ఎక్కువ ఉన్నా పరవాలేదు) ►రెండు అంగుళాల పరిమాణంలో బాల్స్‌లా చేతితో చేసి, పొడవాటి పుల్లలకు గుచ్చి, పక్కన పెట్టాలి ►డార్క్‌ చాకొలేట్‌ లేదా వైట్‌ చాకొలేట్‌ను కరిగించాలి (ఒక మామూలు గిన్నెలో వీటిని ఉంచి, మరుగుతున్న గిన్నె మీద ఈ గిన్నె ఉంచి కరిగించాలి) ►కరుగుతున్న చాకొలేట్‌ లో కేక్‌ బాల్స్‌ పుల్లలను ముంచి, తీసేసి, కార్డ్‌ బోర్డు మీద ఉంచాలి ►నట్స్‌ పొడి చల్లాలి ►చల్లారాక అందించాలి (వీటిని ఫ్రిజ్‌లో ఉంచితే నాలుగైదు రోజుల వరకు చెడి పోకుండా ఉంటాయి)

పేదలు పండుగను సంతోషంగా జరుపుకోవడానికే.. నిరుపేదలు పండుగను సంతోషంగా జరుపుకోవడానికి ప్రభుత్వం దుస్తులు పంపిణీ చేయడంతో పాటు విందు కార్యక్రమం నిర్వహిస్తోంది. జిల్లాలో 4వేల మందికి క్రిస్మస్‌ దుస్తులు మంజూరయ్యాయి. ఈ దుస్తుల పంపిణీ మంగళవారం నుంచి మొదలుకానుంది. ప్రతి నియోజకవర్గంలో 1,000 మంది చొప్పున జిల్లాలో 4వేల మందికి ప్రేమవిందుకు రూ. 8లక్షలు వచ్చాయి.  –  ఎల్‌.శ్రీనివాస్, జిల్లా మైనార్టీ సంక్షేమ శాఖ అధికారి అర్వపల్లి (నల్గొండ) : క్రిస్మస్‌ గిఫ్ట్‌లు వచ్చేశాయి. ఈనెల 10వ తేదీనుంచి జిల్లాలో దుస్తులు పంపిణీ చేయనున్నారు. ఈ మేరకు మైనార్టీ సంక్షేమ శాఖ అన్ని ఏర్పాట్లు చేస్తోంది. పేదలు సుఖ సంతోషాలతో పండుగలు జరుపుకోవడానికి రాష్ట్ర ప్రభుత్వం అన్ని కులాల వారికి ప్రతి ఏటా దుస్తుల పంపిణీతో పాటు విందు ఏర్పాటు చేస్తోంది. అందులో భాగంగా సీఎం కేసీఆర్‌ క్రైస్తవులకు క్రిస్మస్, ముస్లింలకు రంజాన్, హిందువులకు సంబంధించి మహిళలకు బతుకమ్మ చీరలు పంపిణీ చేస్తున్నారు. ఈ సారి క్రిస్మస్‌కు క్రైస్తవుల కోసం జిల్లాలో 4వేల జతల దుస్తులు రాగా పంపిణీకి జిల్లా మైనార్టీ సంక్షేమ శాఖ ఏర్పాట్లు చేసింది. ఈ నెల 25న జరిగే క్రిస్మస్‌కు ముందే దుస్తుల పంపిణీ, విందు పూర్తికానుంది.  జిల్లాలో 4వేల మంది క్రైస్తవులకు..  జిల్లాలో 16వేల మంది క్రైస్తవులు ఉండగా ఇందులో 4వేల మంది పేదలకు దుస్తులు పంపిణీ చేయనున్నారు. ఒక్కో నియోజకవర్గానికి 1,000 మంది చొప్పున నాలుగు నియోజకవర్గాల్లో 4వేల మందికి దుస్తులు ఉచితంగా ఇవ్వనున్నారు. వీటికి సంబంధించిన గిఫ్ట్‌ ప్యాకెట్లను ఇప్పటికే హుజూర్‌నగర్, తుంగతుర్తి నియోజకవర్గ కేంద్రాలకు చేర్చారు. సూర్యాపేట, కోదాడ నియోజకవర్గాలకు సోమవారం దుస్తులను చేర్చనున్నారు. ఈ నెల 10 తేదీ నుంచి నుంచి గ్రామాల వారీగా దుస్తుల పంపిణీ మొదలు కానుంది.  ప్రేమ విందుకు రూ. 8లక్షలు మంజూరు: క్రైస్తవులకు క్రిస్మస్‌ సందర్భంగా ప్రేమవిందుకు ప్రభుత్వం జిల్లాకు రూ. 8లక్షలు మంజూరు చేసింది. అయితే ఒక్కో నియోజకవర్గానికి రూ. 2లక్షల చొప్పున జిల్లానుంచి సూర్యాపేట, కోదాడ, హుజూర్‌నగర్, తుంగతుర్తి నాలుగు నియోజకవర్గాలకు ఈ నిధులు కేటాయించారు. నియోజకవర్గానికి 1,000 మంది క్రైస్తవులకు విందు ఏర్పాటు చేయనున్నారు. ఈ నెల 16వ తేదీ నుంచి నుంచి19 వరకు ప్రేమవిందు  కార్యక్రమం పూర్తికానుంది. దీనికోసం మండలాల వారీగా తహసీల్దార్లు.. క్రైస్తవులతో కమిటీలు ఏర్పాటు చేసి కార్యక్రమాన్ని విజయవంతం చేయనున్నారు. 

అనంతమైన ప్రేమను పంచడానికి ఏసు తన శరీరాన్ని రక్తసిక్తం చేసుకున్నాడు. సత్యమార్గం బోధించడానికి ఏసు తన భుజంపై శిలువ మోశాడు. కష్టతరమైన మార్గం ఆవల అగ్ని కంటే స్వచ్ఛమైన జీవనం మనిషిని వెలిగించును అని బోధించాడు. ఆస్తి అడగలేదు... క్షమను అడిగాడు. బంగారం అడగలేదు... కరుణ అడిగాడు.నీ నుంచి నీ దేహభాగాలను అడగలేదు... కేవలం పొరుగువారిని ప్రేమించమన్నాడు. తాత్కాలిక భోగలాలస దుఃఖహేతువు.  నీ నడవడిక బలిమి పరలోకానికి సేతువు. క్రీస్తుమార్గం నిజమనిషి మార్గం. ప్రతి మానవుని మార్గం. ఏ మతమైనా మంచితనం, ప్రేమ, దయ, ఉన్నతమైన గుణాల గురించి ఎక్కువగా ప్రస్తావిస్తుంది. ఈ లక్షణాలన్నీ ప్రతి మనిషిలోనూ ఉండాలని బోధిస్తుంది. తద్వారా లోకమంతా ప్రశాంతంగా, హాయిగా ఉండాలని ఆకాంక్షిస్తుంది. మనిషి మతం నుంచి అనుక్షణం ఎంత వీలైతే అంత మంచిని ఎరుకతో గ్రహించి తీసుకుంటూ ఉండాలి. దృష్టిని చెదరనీక ముక్కుసూటిగా వెళుతూ మంచి మార్గంలో నడవడానికి ప్రయత్నించాలి. ప్రయాసపడాలి. మతానికి తాను వెలుతురు కావాలిగాని తన స్వార్థానికి మతాన్ని వెలుతురుగా మార్చుకొనరాదు.క్రిస్మస్‌ సందర్భంగా క్రీస్తు ఎల్లప్పుడూ బోధించే ప్రేమతత్వం, క్షమాగుణం గురించి ఈరోజు గుర్తు చేసుకోవడం ఆనందమే కాదు అవసరం కూడా.మనిషి సహజంగానే ఆశాజీవి. అతడు తనకెప్పుడూ మంచి జరగాలని తన జన్మకు జీవునికి ఒక ప్రయోజనం కలగాలని ఆశిస్తూ ఉంటాడు. అతడికి వచ్చేది ఏదీ లేకపోతే తాను ఏదీ ఇవ్వడు. ఇదే తీరులో పరలోక ప్రవేశానికి కూడా అతడు ప్రయత్నిస్తాడు. మనిషి లక్ష్యం ఎప్పుడూ పరలోక రాజ్యాన్ని చేరుకోవాలనే ఉంటుంది. మనిషి తన జీవనంలో ఏ మంచి చేసినా క్రీస్తు నామమందు ఏ పనిలో లగ్నమైనా అతని దృష్టి సదా పరలోక రాజ్యంపైనే ఉంటుంది. ఎందుకంటే భూమిపై జీవితం అశాశ్వతం. పరలోక జీవనమే శాశ్వతం. అలా అని ఆరాధకుడు భావిస్తాడు. అయితే పరలోక రాజ్యం ఊరికే వస్తుందా? ఇందుకు రెండు ముఖ్యమైన కార్యాలు చేస్తుండాలి. ఒకటి ఎల్లప్పుడూ దేవుని నామాన్ని స్మరిస్తూ, ఆయన్ని ఆరాధిస్తుండాలి. మరొకటి ఆయన సూచించిన మార్గాలలో జీవితాలను గడపాలి. ఆ మార్గాలు: అబద్ధపు సాక్ష్యాలు ఇవ్వకూడదు.. తల్లిదండ్రులను సన్మానించాలి.. వ్యభిచరించకూడదు.. దొంగిలించకూడదు... నిన్ను వలె నీ పొరుగువారిని ప్రేమించాలి... క్షమాగుణం కలిగి ఉండాలి... ఇవన్నీ మన జీవితాల్లో ప్రతినిత్యం అనుసరిస్తూ ఉంటే పరలోక రాజ్యం సాధ్యం. ఇవన్నీ చేయాలంటే మనిషికి కష్టంగా ఉంటుంది. దానికి బదులు తేలికైనది, సులభమైనది అయిన దేవుడిని కీర్తించడం ద్వారా మనిషి తన పని సులవవుతుందని భావించడంలో అతడి అల్పత్వం, స్వార్థం బయట పడుతుంటుంది. తోబుట్టువుపై పగ, ద్వేషం పెట్టుకుని క్షమించడం రాక, మనసులో ఈర్ష్య పెట్టుకుని పొరుగింటివారిని హత్తుకోవడం రాక రెండు గంటలు మోకాళ్ల మీద దేవుని కన్నీటి ప్రార్థనలు చేయడం లాభదాయకం అన్న ఆలోచన ఎంత వరకు సమంజసం అన్నది ఆలోచించాలి. అలా చేస్తే నిజంగానే పరలోకం అనేది ఉంటే దాని ప్రవేశం కలుగుతుందా? ప్రభువు చెప్పిన శాంతిని మనం పెంపొందుతుందా?  నిజమైన శాంతి క్షమాపణలో ఉంటుంది అని మనమంతా గ్రహించాలి. అప్పుడే మనం కరుణా హృదయులుగా క్రీస్తులో విరాజిల్లుతాం.   క్రీస్తు చెప్పే ఎన్నో మంచి విషయాలను మనం పుస్తకాల ద్వారా ప్రసంగాల ద్వారా ప్రార్థనా కూటముల ద్వారా వింటున్నాం. ఆ సమయంలో ప్రభావితం అవుతాం. అయితే ఆ ప్రభావాన్ని ఘనంగా నిలబెట్టుకోవడంలోనే విఫలమవుతూ ఉంటాం. దైవం మనిషి రూపం ధరించి సాధించినది మనిషి జన్మ ఎత్తిన మనకు సాధ్యం కాకుండా పోతుందా? క్రీస్తు చెప్పేది చేసేది ఎప్పుడూ ఆత్మపరిశీలన గురించే. నిన్ను నువ్వు ఎంత పరిశుద్ధంగా ఉంచుకుంటున్నావు... తోటివారితో ఎంత స్వచ్ఛంగా ఉంటున్నావు అన్నదే క్రీస్తు బోధనల్లో ప్రధాన విషయం. క్రీస్తు చెప్పే ప్రతి అంశంలోనూ ప్రేమ, సమానత్వం ఉంటుంది. ‘నీ దగ్గరకు నేను బిచ్చగాని రూపంలో వస్తాను’ అంటాడు. అంటే ఒక అవసరం కోసం ఎదురు చూసేవారిలో తాను ఉంటానని, వారిని దేవునిలా ఆదరించమని అందులో ధ్వని. మనం ఒకరికి సహాయం చేసే పరిస్థితుల్లో ఉన్నప్పుడు కచ్చితంగా మనం ఆ సహాయం చేయాలి. మంచిని పెంచాలి. క్రీస్తు ఖరీదైన బట్టలకు వెంపర్లాడటం అటుంచి ఎక్కువ మోతాదులో బట్టలూ ధరించలేదు. రుచుల కోసం వెంపర్లాడలేదు. రక్తమోడుతున్న క్రీస్తే మనకు తెలుసు. క్రీస్తు వరాలు ఇవ్వడు. నీ జీవితాన్ని నువ్వే నిలబెట్టుకొమ్మని ఆశ, బలం ఇస్తాడు. నీ జీవితం నీ చేతుల్లో ఉందని మనకి గుర్తు చేస్తూనే నీకు ఆత్మస్థైర్యం ఉన్నప్పుడు నువ్వు దేన్నైనా సాధించగలవని భరోసా ఇస్తూ ఆశీర్వదిస్తాడు. బైబిల్‌ని చేత ధరించడంతోపాటు దానిని హృదయంలో దింపుకోవడంలోనే మనిషి వెలుతురువైపు ప్రయాణించడం ఉంటుంది. నిజానికి బైబిల్‌ గొప్ప కౌన్సెలర్‌. మన నడవడికను గురించి ఈ కాలానికీ అవసరమైన సంస్కరణను చక్కగా సూచిస్తుంది. ఎంతో మధురమైన వాక్యాలను బోధిస్తుంది. వాటిని బట్టీ పట్టడంతో పాటు అర్థం చేసుకొని ఎదగడం కూడా మనం చేయాలి. తనను తాను చిన్న బిడ్డగా మార్చుకొని మార్పు పొంది తగ్గించుకునేవాడే పరలోక రాజ్యంలో గొప్పవాడని చెప్తుంది బైబిల్‌. ఇలా ఉన్నవారిని ఎవరైనా అభ్యంతరపరిస్తే వారి మెడకు పెద్ద తిరుగలి రాయి కట్టబడినవాడై మిక్కిలి లోతైన సముద్రంలో ముంచివేయబడుట తథ్యమని మనల్ని ఒక భయానికి గురి చేసైనా మంచిని పెంపొందిస్తుంది. ప్రేమ, క్షమాగుణం కలిగి, తల్లిదండ్రులను ప్రేమించడం అనే లక్షణాన్ని కలిగి ఉండటాన్నే అసలైన ఆస్తిగా బోధిస్తాడు క్రీస్తు. దానికి మించి మన దగ్గర ఉన్న ఇతర ఆస్తులను పేదలకు ఇచ్చేయమంటాడు.అప్పుడే నీకు పరలోకంలో జీవం ఉందంటాడు. ధనవంతుడు పరలోక రాజ్యంలో ప్రవేశించడం కంటే సూది బెజ్జంలో ఒంటె దూరుట సులభమని చెప్తాడు. రేపటి కోసం ఆస్తులు పోగు చేసుకోవద్దని చెప్పాడు.ఈరోజుకోసం తిండీ గుడ్డా ఉంటే చాలన్నాడు. ఎందుకంటే ఆహార్యం కంటే దేహం గొప్పదన్నవాడు క్రీస్తు. ఈ ఇచ్చిపుచ్చుకోవడం అనే ప్రక్రియ ఉంటేనే శాంతి, సమాధానం, మంచి గుణం బతికుంటుందని క్రీస్తు తత్వం చెబుతున్నాడని అర్థమవుతుంది. అదే క్రమంలో ప్రేమ దేవుని మూలంగా కలుగతున్నది. దేవుడు ప్రేమ స్వరూపి. దేవుడు మన కోసం సిలువేసుకోవడంలోనే అమితమైన ప్రేమ ఉంది అంటుంది బైబిల్‌. సమస్త లోకాన్ని ప్రేమతో నింపమంటుంది. ఇలా సకలం ప్రేమమయం కావాలంటే నీలో ముందు వంచన ఉండకూడదు. నువ్వు ఒకరిపై తీర్పులకు సిద్ధమైనప్పుడు నీ కంటిలో ఉన్న దూలాన్ని చూసుకోక నీ సహోదరుడి కంట్లోని నలుసుని ఎందుకు చూస్తున్నావంటాడు యేసు. క్రీస్తు రెండవ రాకడకు మనల్ని సిద్ధం చేస్తాడు దేవుడు. క్రీస్తు పరిశుద్ధ ఆత్మ అయి మళ్లీ ఈ భూమ్మీదకు రెండవసారి వచ్చేసరికి మనం సంసిద్ధంగా ఉండాలంటాడు. అంటే ధర్మశాస్త్రం చెప్పిన ఆశయాలను అనుసరించాలి అని అర్థం. మంచి వారిని దేవుడు పరలోకానికి తీసుకువెళతాడన్న చెడ్డవారిని ఇక్కడే వదిలేస్తాడన్న భయమే మనల్ని మంచితనంలోకి నడిపించాలి. అయితే మనం ఎంతవరకూ భయపడుతున్నాం అన్నది మనకు తెలియాలి. ఈరోజు మనిషి తమ జీవితాన్ని నిజంగా క్రీస్తు చెప్పిన తత్త్వంతో నింపుకున్నాడా లేదా అనేది తరచి చూసుకోవాలి. పరలోక రాజ్యానికై ఎదురు చూడటం కంటే నిజంగా అందుకు యోగ్యులుగా మారే లక్షణాల సాధన కోసం శ్రద్ధ పెట్టే సంకల్పం తీసుకోవాలి. ఎందుకంటే క్రీస్తులానే జీవించేవాడు క్రైస్తవుడు. వాడు నిజమైన మానవుడు. హ్యాపీ క్రిస్మస్‌. పరలోక రాజ్యం ఊరికే వస్తుందా? ఇందుకు రెండు ముఖ్యమైన కార్యాలు చేస్తుండాలి. ఒకటి ఎల్లప్పుడూ దేవుని నామాన్ని స్మరిస్తూ, ఆయన్ని ఆరాధిస్తుండాలి. మరొకటి ఆయన సూచించిన మార్గాలలో జీవితాలను గడపాలి. ఆ మార్గాలు: అబద్ధపు సాక్ష్యాలు ఇవ్వకూడదు.. తల్లిదండ్రులను సన్మానించాలి.. వ్యభిచరించకూడదు.. దొంగిలించకూడదు... నిన్ను వలె నీ పొరుగువారిని ప్రేమించాలి... క్షమాగుణం కలిగి ఉండాలి... ఇవన్నీ మన జీవితాల్లో ప్రతినిత్యం అనుసరిస్తూ ఉంటే పరలోక రాజ్యం సాధ్యం.   ∙మానస ఎండ్లూరి

సాక్షి, శ్రీకాకుళం : క్రిస్మస్‌ పర్వదినం సందర్భంగా ఆంధ్రప్రదేశ్‌ ప్రతిపక్ష నేత, వైఎస్సార్‌సీపీ అధినేత వైఎస్‌ జగన్‌మోహన్‌ రెడ్డి కొనసాగిస్తున్న ప్రజాసంకల్పయాత్రకు మంగళవారం విరామం ఇచ్చారు. క్రైస్త‌వ సోద‌ర, సోద‌రీమ‌ణులు క్రిస్మ‌స్‌ను జ‌రుపుకోవ‌డానికి వెసులుబాటు క‌ల్పించేందుకు పాదయాత్రకు విరామం ప‍్రకటించారు. రేపు పాత‌ప‌ట్నం నియోజ‌క‌వర్గం మెళియాపుట్టి మండ‌లం చాప‌ర గ్రామం దగ్గర పాదయాత్ర శిబిరంలో వైఎస్‌ జగన్‌ ఉంటారని, మెళియపుట్టి నుంచి బుధవారం తిరిగి జననేత పాదయాత్రను ప్రారంభిస్తారని వైఎస్సార్‌సీపీ రాష్ట్ర ప్రధాన కార్యదర్శి తలశిల రఘురాం తెలిపారు.  

సాక్షి, హైదరాబాద్‌: క్రిస్‌మస్‌ పండుగ నేపథ్యంలో రాష్ట్ర ప్రభుత్వం పేద క్రిస్టియన్‌ మైనార్టీ కుటుంబాలకు కానుక ఇవ్వబోతోంది. దాదాపు 2.13 లక్షల కుటుంబాలకు కొత్త వస్త్రాలను ఇవ్వాలని, రుచికరమైన వంటకాలతో విందు ఇవ్వాలని నిర్ణయించింది. ఈ మేరకు రాష్ట్ర క్రిస్టియన్‌ మైనార్టీ ఫైనాన్స్‌ కార్పొరేషన్‌కు రూ.15 కోట్లు విడుదల చేసింది. ఈ మేరకు అధికారులు వస్త్రాల పంపిణీ, విందు ఏర్పాట్లలో తలమునకలయ్యారు. గిఫ్ట్‌ప్యాక్‌ రూపంలో.. రాష్ట్రంలో 2.13 లక్షల పేద క్రిస్టియన్‌ కుటుంబాలున్నట్లు ఆ శాఖ గణాంకాలు చెబుతున్నాయి. వారికి ఈ నెల 18న రాష్ట్రవ్యాప్తంగా 313 కేంద్రాల్లో విందు భోజనం ఏర్పాటు చేస్తున్నట్లు క్రిస్టియన్‌ మైనార్టీ ఫైనాన్స్‌ కార్పొరేషన్‌ ఎండీ విక్టర్‌ తెలిపారు. ఇక పేద క్రిస్టియన్‌ కుటుంబాలకు ఇచ్చే నూతన వస్త్రాలను గిఫ్ట్‌ప్యాక్‌ రూపంలో అందజేయనున్నారు. పురుషులకు ప్యాంటు, షర్ట్, మహిళలకు చీర, రవిక, బాలికలకు డ్రెస్‌ మెటీరియల్‌ అందులో ఉంటాయి. ఇప్పటికే వస్త్రాలను కొనుగోలు చేసిన అధికారులు గిఫ్ట్‌ప్యాక్‌లను సిద్ధం చేస్తున్నారు. భారీ మొత్తంలో పంపిణీ ప్రక్రియ ఉండటంతో పక్కాగా పర్యవేక్షిస్తున్నట్లు విక్టర్‌ తెలిపారు. పంపిణీలో పారదర్శకతకు ప్రాధాన్యం ఇస్తున్నామని, క్రిస్‌మస్‌ పండుగలోపు పంపిణీ పూర్తిచేస్తామని చెప్పారు. ఇక ఈనెల 22న బిషప్‌లు, పాస్టర్లు, ఇతర క్రైస్తవ ప్రముఖులకు ముఖ్యమంత్రి కేసీఆర్‌ నిజాం కాలేజీ మైదానంలో విందు ఏర్పాటు చేశారని తెలిపారు. విశిష్ట సేవలందించిన క్రైస్తవ ప్రముఖులు, సంస్థలకు సీఎం చేతుల మీదుగా అవార్డులు అందించనున్నట్లు వెల్లడించారు. 

నరసాపురం : బంగారం ధరలు మళ్లీ నేల చూపులు చూస్తున్నాయి. చాలారోజుల తరువాత బంగారం ధరలు తగ్గుతున్నాయి. మూడు నెలల క్రితం రూ.30 వేలు మార్కు దాటిన బంగారం ధర తగ్గుతూ వస్తోంది. వెండిదీ అదే దారి. క్రిస్మస్, సంక్రాంతి పండగళ వేళ బంగారం ధరలు తగ్గుముఖం పట్టడంతో బంగారం కొనుగోళ్లకు ఇదే అనువుగా జనం భావిస్తున్నారు. దీంతో బంగారం కొనుగోలు చేయాలనుకునే వారు జ్యూయలరీ షాపులకు క్యూ కడుతున్నారు. బంగారం దుకాణాలు కళకళలాడుతున్నాయి. అయితే ధరలు ఇంకా తగ్గొచ్చనే అంచనాలతో కొందరిలో ఇప్పుడే బంగారం కొనాలా? మరికొన్ని రోజులు ఆగాలా ? అనే సందిగ్ధం కూడా నెలకొని ఉంది. మరీ భారీగా ధరలు తగ్గవని, బంగారం కొనుగోలుకు ఇదే మంచి సమయమని బులియన్‌ వర్గాలు పేర్కొంటున్నాయి. ప్రస్తుతం రూ.30 వేల దిగువకు బంగారం ధరలు చేరుకున్నాయి. కాసు రూ.21,760 సోమవారం నరసాపురం గోల్డ్‌ మార్కెట్‌లో 24 క్యారెట్ల బంగారం 10 గ్రాములు రూ.29,110గా ఉంది. 22 క్యారెట్ల ఆభరణాల బంగారం 10 గ్రాములు రూ.27,220గా నమోదైంది. అంటే ఆభరణాల బంగారం కాసు (8 గ్రాములు) ధర రూ.21,760గా ట్రేడవుతోంది. గత రెండు, మూడు నెలలుగా కాస్త అటు, ఇటుగా ఇవే ధరలు ట్రేడవుతున్నాయి. అయితే గతవారం రోజుల నుంచి కాసు బంగారం ధరలో దాదాపు రూ.950 తగ్గుదల కనిపిస్తోంది.  దీంతో కొన్ని నెలలుగా బంగారం వైపు చూడటానికి జంకిన పేద, మధ్య తరగతి వారు పండగవేళలు కూడా కావడంతో జ్యూయలరీ షాపుల మెట్లెక్కుతున్నారు. వెండి ధరల్లో అయితే ఒకరకంగా భారీ తగ్గుదల కనిపిస్తోంది. కిలో వెండి ధర రూ.36–37 వేల మధ్య ట్రేడవుతోంది. కిలో వెండి ధర దాదాపు 3 వేల వరకూ తగ్గింది. అంతర్జాతీయ మార్కెట్‌ పరిస్థితుల నేపథ్యంలో రానున్న రోజుల్లో ధరలు మరికాస్త తగ్గుతాయని భావిస్తున్నారు. ఒడిదుడుకుల నుంచి గాడిలోకి.. ఐదేళ్ల క్రితం వరకూ బంగారం ధరలు విపరీతంగా పెరుగుతూ వచ్చాయి. 2013లో అయితే ఏకంగా 10 గ్రాముల బంగారం రూ. 34 వేలకు చేరి ఆల్‌టైమ్‌ హై నమోదు చేసుకుంది. బంగారం దిగుమతి సుంకాల విషయంలో కేంద్ర ప్రభుత్వం తీసుకున్న చర్యలు, చైనా, ఆస్ట్రేలియా, లాటిన్‌ అమెరికా దేశాలు భారీగా బంగారం నిల్వలను అమ్మకాలకు పెట్టడంతో అంతర్జాతీయంగా బంగారం డిమాండ్‌ తగ్గి ధరలు దిగి వచ్చాయి. ఈ దశలో గత రెండేళ్ల నుంచి బంగారం ధరలు నిలకడగా ఉంటున్నాయి. నోట్ల రద్దు, జీఎస్టీ ప్రభావంతో ధరలు విపరీతంగా తగ్గుతాయని అంచనా కట్టారు. కానీ అలా జరగలేదు. ధరలు పెరగడంతో బులియన్‌ వ్యాపారం ఒడిదుడుకుల్లో సాగింది. కొనుగోలుదారుల్లో కూడా అయోమయం. ఎక్కువ ధరల్లో బంగారం కొన్న జిల్లావాసులు దారుణంగా నష్టపోయారు. ఇప్పుడూ అదేరకమైన అయోమయ పరిస్థితి నెలకొని ఉంది. ధరల హెచ్చుతగ్గుల్లో స్వల్పమార్పులే ఉంటాయని బులియన్‌ వ్యాపారులు విశ్లేషిస్తున్నారు. భారీగా పెరిగిన అమ్మకాలు ధరలు తగ్గడంతో జిల్లాలో రోజుకు రూ.2 కోట్ల వరకూ అమ్మకాలు పెరిగినట్టుగా అంచనా వేస్తున్నారు. ఒక్క నరసాపురం మార్కెట్‌లోనే హోల్‌సేల్, రిటైల్‌ కలిపి రోజుకు రూ.3 కోట్ల వరకూ అమ్మకాలు జరుగుతాయి. జిల్లాలో ఇక్కడి నుంచి భారీగా హోల్‌సేల్‌ వ్యాపారం జరుగుతుంది. నరసాపురంతో పాటు ఏలూరు, తణుకు, తాడేపల్లిగూడెం, భీమవరం పట్టణాల్లో పెద్దెత్తున అమ్మకాలు జరుగుతాయి. ధరలు తగ్గడంతో జిల్లా మొత్తం మీద రోజుకు అదనంగా రూ.2 కోట్ల వరకు అమ్మకాలు పెరిగాయని బులియన్‌ వర్గాలు చెబుతున్నాయి. వరుస పండగలతో పాటు పెళ్లిళ్ల సీజన్‌ కూడా ముందు ఉండడంతో అమ్మకాలు మరింత పెరగవచ్చని అంచనా. మరోవైపు బంగారాన్ని అనువైన పెట్టుబడిగా భావించే ముదుపర్లు కూడా బిస్కెట్‌ కొనుగోళ్లపై దృష్టిపెడుతున్నట్టు నరసాపురం జ్యూయలరీ అసోసియేషన్‌ కార్యదర్శి వినోద్‌కుమార్‌జైన్‌ తెలిపారు. ఇప్పట్లో పెద్దగా ధరలు పెరగవు ప్రస్తుతం అంతర్జాతీయ మార్కెట్‌లో పరిస్థితుల రీత్యా ధరలు పెరగవు. అలాగని ఇంకా భారీగా తగ్గే అవకాశాలు కనిపించడంలేదు. ప్రస్తుతం అమ్మకాలు బాగా పెరిగాయి. ధరలు ఇలాగే ఉంటే సంక్రాంతి నాటికి అమ్మకాలు మరింత పెరుగుతాయి. – అజిత్‌కుమార్‌ జైన్, జ్యూయలరీ వ్యాపారి


 కుదిరితే ఓసారి... వీలైతే రెండు మూడుసార్లు... ప్రతి ఏడాది ఫ్యామిలీతో మహేశ్‌బాబు విహార యాత్రలకు వెళతారు. ఇప్పుడు కూడా ఆయన విదేశాల్లోనే ఉన్నారట. షూటింగ్‌కి చిన్ని బ్రేక్‌ చెప్పి, భార్యాపిల్లలు నమ్రతా శిరోద్కర్, గౌతమ్, సితారలతో పాటు బావ గల్లా జయదేవ్‌ తదితర కుటుంబ సభ్యులతో స్విట్జర్లాండ్‌లోని జురిచ్‌ నగరంలో క్రిస్మస్‌ పండగను సెలబ్రేట్‌ చేసుకున్నారు. కొత్త సంవత్సర వేడుకలనూ మహేశ్‌ ఫ్యామిలీ విదేశాల్లోనే జరుపుకోనున్నారని సమాచారం. ఈ సెలవులు పూర్తయిన తర్వాత జనవరి మొదటివారంలో మహేశ్‌బాబు హైదరాబాద్‌ రానున్నారట.
 
 ఆ తర్వాత ఏ.ఆర్‌. మురుగదాస్‌ దర్శకత్వంలో నటిస్తున్న సినిమా కొత్త షెడ్యూల్‌ ప్రారంభించనున్నారు. తెలుగు, తమిళ భాషల్లో ‘ఠాగూర్‌’ మధు, ఎన్వీ ప్రసాద్‌లు నిర్మిస్తున్న ఈ సినిమాలో మహేశ్‌ ఇంటిలిజెంట్‌ బ్యూరో ఆఫీసర్‌గా నటిస్తున్నట్లు సమాచారం. ఇప్పటివరకూ జరిపిన షూటింగ్‌తో 70 శాతం చిత్రీకరణ పూర్తయిందని యూనిట్‌ సన్నిహిత వర్గాలు పేర్కొన్నాయి. జనవరి 7న హైదరాబాద్‌లో కొత్త షెడ్యూల్‌ ప్రారంభం కానుంది. ఫిబ్రవరిలో పాటల చిత్రీకరణకు విదేశాలు వెళ్లాలనుకుంటున్నారు. మధ్యలో ముంబయ్, పూణెలలోనూ కొన్ని రోజులు షూటింగ్‌ చేయనున్నారు. రకుల్‌ప్రీత్‌ సింగ్‌ హీరోయిన్‌గా నటిస్తున్న ఈ చిత్రానికి ‘సంభవామి’ అనే టైటిల్‌ పరిశీలనలో ఉంది. జనవరిలో టైటిల్‌ ప్రకటిస్తామని నిర్మాతలు తెలిపారు.


 నెల్లూరు(బృందావనం): యేసు ప్రభువును కీర్తిస్తూ మధురమైన క్రైస్తవ భక్తిగీతాలు.. చిన్నారుల నృత్యాలు.. క్రిస్మస్‌ పండగను ప్రతిబింబించే అలంకరణలు.. దేవుని వాక్య సందేశాలు.. కనువిందుచేసే విద్యుద్దీపాలంకరణలు..శాంతాక్లాజ్‌  సందడి నడుమ నగరంలోని వీఆర్‌ ఉన్నత పాఠశాల మైదానంలో రెండు రోజులు జరిగే సింహపురి క్రిస్మస్‌ మహోత్సవాలు మంగళవారం రాత్రి ఘనంగా ప్రారంభమయ్యాయి. ఐక్య సింహపురి క్రిస్మస్‌ కమిటీ ఆధ్వర్యంలో నిర్వహించిన మహోత్సవాలకు వేలాదిగా క్రైస్తవులు విచ్చేశారు. ఈ సందర్భంగా ఐక్యసింహపురి క్రిస్మస్‌ కమిటీ సభ్యుడు బర్నబాస్‌ మాట్లాడారు. మూడేళ్లుగా నగరంలో సింహపురి క్రిస్మస్‌ మహోత్సవాలను కులమతాలకతీతంగా, ప్రజల సహకారంతో విశేషంగా నిర్వహిస్తున్నామన్నారు. తొలుత ముఖ్యఅతిథులు నెల్లూరు నగర, రూరల్‌ ఎమ్మెల్యేలు డాక్టర్‌ పోలుబోయిన అనిల్‌కుమార్‌యాదవ్, కోటంరెడ్డి శ్రీధర్‌రెడ్డి, బీజేపీ నగరాధ్యక్షుడు మండ్ల ఈశ్వరయ్య, ఫాదర్‌ జోసఫ్‌ క్రిస్మస్‌ ట్రీని ఆవిష్కరించారు. ప్రజలందరికీ దేవుని కృప కలగాలని ఫాదర్‌ జోసఫ్‌ ప్రార్థనలు చేశారు. అనంతరం ప్రజలందరికీ ముందస్తు క్రిస్మస్‌ శుభాకాంక్షలను తెలుపుతూ బెలూన్లను ప్రజల హర్షధ్వానాల మధ్య ముఖ్యఅతిథులు ఎగురవేశారు. అనంతరం అంతర్జాతీయ సువార్తీకుడు ప్రొఫెసర్‌ ప్రకాశ్‌ గంటెల ప్రజలు, ప్రధాని నరేంద్రమోదీ, సీఎం చంద్రబాబునాయుడు, ప్రతిపక్షనేత జగన్‌మోహన్‌రెడ్డికి యేసుప్రభువు దయచూపాలని ప్రార్థించారు. అనంతరం ఎమ్మెల్యేలు అనిల్‌, కోటంరెడ్డి శ్రీధర్‌రెడ్డి మాట్లాడారు. ప్రజలందరికీ యేసుప్రభువు కరుణకటాక్షాలు లభించాలని, సుఖసంతోషాలతో, అష్ట ఐశ్వర్యాలతో జీవించాలని కోరారు. జగన్‌మోహన్‌రెడ్డి, విజయమ్మ, షర్మిలకు దైవ ఆశీస్సులు లభించేలా  క్రైస్తవ సోదరులు ప్రార్థించాలన్నారు. డిసెంబర్‌ 21న జగన్‌మోహన్‌రెడ్డి పుట్టినరోజు అని, ఆయన కోసం క్రైస్తవులు ప్రత్యేక ప్రార్థనలు చేయాలన్నారు. క్రిస్మస్‌ శుభాకాంక్షలను తెలియజేశారు. ప్రొఫెసర్‌ ప్రకాశ్‌ గంటెల దైవ వర్తమానం అందించారు. తదుపరి కేక్‌కటింగ్‌ జరిగింది. క్యాండిల్‌ సర్వీస్‌ను నిర్వహించారు. కార్పొరేటర్‌ బొబ్బల శ్రీనివాసయాదవ్, వైఎస్సార్‌ కాంగ్రెస్‌ పార్టీ, టీడీపీ నాయకులు వేలూరు సురేష్‌బాబు, ఊరందూరు సురేంద్రబాబు, రష్యా యువతి బలేరియా, తదితరులు పాల్గొన్నారు.
  
  


 గాంధీనగర్ (కాకినాడ) :ద్వేషదావాగ్ని ప్రజ్వరిల్లే వేళ.. దయావర్షమై కురిసిన వాడు క్రీస్తు. అణువణువునా స్వార్థపు ముళ్లు మొలిచిన మానవాళి నడుమకు దివ్యసుమంలా దిగివచ్చి, ప్రేమ పరిమళాన్ని పంచిన వాడు క్రీస్తు! తనపై కత్తివేటు వేసిన వాడికి కష్టమొచ్చినా.. గుండె కరిగి నీరయ్యే ఆ కరుణామయుడు, ఆ దైవకుమారుడు కన్ను తెరిచిన పావనదినం క్రిస్మస్‌ను గురువారం జిల్లా అంతటా భక్తిశ్రద్ధలతో జరుపుకొన్నారు. చర్చిలలో ఉదయం నుంచి జరిగిన ప్రత్యేక ప్రార్థనలకు క్రైస్తవులు కుటుంబసమేతంగా హాజరయ్యారు. కాకినాడ, రాజమండ్రి, అమలాపురం, తుని, పిఠాపురం, రంపచోడవరం తదితర ప్రాంతాల్లో చర్చిలు భక్తులతో కిటకిటలాడాయి. యువతీయువకులు ప్రత్యేక ప్రార్థనల్లో క్రిస్మస్ గీతాలను ఆలపించారు.
  
  అమలాపురంలో కోనసీమ గోదావరి డెల్టామిషన్, రాజమండ్రిలో సెయింట్‌పాల్స్ లూథరన్ చర్చి, ఏసుప్రేమాలయం, ఆల్కట్‌తోటలోని హిల్ పాలియా, కాకినాడలో హౌస్ ఆఫ్ ప్రేయర్, ఏపీఎస్పీ బాప్టిస్ట్ చర్చి, క్రేగ్ మెమోరియల్ బాప్టిస్ట్ చర్చి, క్రేగ్ ఇమానియల్ బాప్టిస్ట్ చర్చిలలో క్రిస్మస్ వేడుకలను పెద్ద ఎత్తున నిర్వహించారు. క్రిస్మస్ సందర్భంగా నిర్వహించిన పోటీల్లో విజేతలకు బహుమతులందజేశారు. చర్చిల ఆధ్వర్యంలో పేదలకు నూతన వస్త్రాలు పంపిణీ చేశారు. జిల్లా పాస్టర్స్ అసోసియేషన్ అధ్యక్షుడు రెవరెండ్ ప్రతాప్‌సిన్హా, కార్యదర్శి డానియేల్‌పాల్, కోశాధికారి దొమ్మేటి శామ్యూల్‌సాగర్‌ల ఆధ్వర్యంలో వేడుకలను ఘనంగా నిర్వహించారు. శాసనమండలిలో ప్రభుత్వ చీఫ్ విప్ చైతన్యరాజు కాకినాడలోని పలు చర్చిలు సందర్శించి క్రైస్తవులకు శుభాకాంక్షలు తెలిపారు. వేడుకల్లో సీనియర్ పాస్టర్లు రెవరెండ్ జాన్‌బెంజ్, రెవరెండ్ ఏసురత్నం, జోసఫ్ బెన్ని, రెవరెండ్ విజయ్‌కుమార్, జాన్‌లాజర్స్ తదితరులు పాల్గొన్నారు.
  
  అమలాపురం మన్నాలో..
  అమలాపురం : అమలాపురం మన్నా జూబ్లీ చర్చి అధ్వర్యంలో బుధవారం రాత్రి మిరియాం గ్రౌండ్స్‌లో అంతర్జాతీయ కిస్మస్ సంబరాలు ఘనంగా జరిగాయి. మన్నా మినిస్ట్రీస్ అధినేత కార్ల్ డేవిడ్ కొమనాపల్లి (లాల్) క్రిస్మస్ వేడుకలను ప్రారంభించారు. 2015 క్యాలెండర్‌ను పాస్టర్ జ్యోతిరాజు ఆవిష్కరించారు. ఒంటెలతో ఊరేగుతూ క్రిస్మస్ సంబరాలు నిర్వహించారు. బాణ సంచా కాల్చుతూ గ్రాండ్ పినాలే బెలూన్ పార్కును ఏర్పాటుచేశారు. ‘ఇజ్రాయిల్ నాతో’ నాటక ప్రదర్శన ఆకట్టుకుంది. వేలాదిమంది  పాల్గొన్న ఉత్సవాల్లో సరోన్ రోజ్ కొమానపల్లి, ఎర్నెస్ట్ తాతపూడి, తాతపూడి ఈస్టర్, ఎన్.ఎబర్ తదితరులు పాల్గొన్నారు.
  


  సాక్షి ప్రతినిధి, కడప: వృత్తిరీత్యా కొందరు, వ్యాపార రీత్యా మరికొందరు వివిధ రాష్ట్రాల్లో స్థిరపడ్డారు. క్రిస్‌మస్ పండుగ వారందర్నీ ఒకే వేదికకు చేర్చింది. పసిబిడ్డల నుంచి 90 ఏళ్లు పైబడ్డ వృద్ధుల వరకూ ఓకే మందిరంలోకి చేరారు. సంయుక్తంగా ప్రార్థనలు చేశారు. ఒకర్ని మరొకరు ఆత్మీయంగా పలకరించుకుంటూ యోగక్షేమాలు తెలుసుకున్నారు. దివంగత ముఖ్యమంత్రి వైఎస్ రాజశేఖరరెడ్డికి నివాళులు అర్పించారు. అటు తర్వాత సహపంక్తి భోజనాలు చేశారు. వైఎస్ కుటుంబసభ్యులతో బుధవారం ఇడుపులపాయ కళకళలాడింది.క్రిస్‌మస్ పండుగ వచ్చిందంటే ఎక్కడెక్కడో స్థిరపడ్డ ‘వైఎస్’ కుటుంబసభ్యులు ఇడుపులపాయకు చేరుకోవడం ఆనవాయితీ.  అందులో భాగంగా ఈ ఏడాది తమిళనాడు, కర్ణాటక, తెలంగాణ, ఆంధ్రప్రదేశ్ రాష్ట్రాలలో స్థిరపడిన వైఎస్ కుటుంబ సభ్యులంతా బుధవారం ఉదయం ఇడుపులపాయకు చేరుకున్నారు.  
  
  సంయుక్త ప్రార్థనలలో నాలుగు తరాలు.. : ఇడుపులపాయ ప్రత్యేక ప్రార్థన మందిరంలో వైఎస్ కుటుంబానికి చెందిన నాలుగు తరాల కుటుంబ సభ్యులు ప్రత్యేక ప్రార్థనలు చేశారు. వైఎస్ రాజారెడ్డి సోదర సోదరీమణులు వారి కుటుంబ సభ్యులు, వైఎస్‌రాజశేఖరరెడ్డి సోదర సోదరీమణులు వారి కుటుంబ సభ్యులు, వైఎస్ జగన్‌మోహన్‌రెడ్డి కుటుంబ సభ్యులు, ఇప్పటి తరం చిన్నారులైన రాజారెడ్డి సహచరులు అంతా ప్రత్యేక ప్రార్థనలలో నిమగ్నమయ్యారు. అనంతరం అక్కడే ఏర్పాటు చేసిన భోజనాలను ఆరగించారు. మొదటి తరం కుటుంబ సభ్యులనుంచి భవిష్యత్ తరం సభ్యుల వరకు దివంగత ముఖ్యమంత్రి సతీమణి వైఎస్ విజయమ్మ, కోడలు వైఎస్ భారతి పేరు పేరునా పలకరించి యోగక్షేమాలు తెలుసుకున్నారు.  
  
  నాగభూషణం కుటుంబానికి పరామర్శ:
  చక్రాయపేట మండల వైఎస్‌ఆర్‌సీపీ యూత్ కన్వీనర్ వెంకటసుబ్బయ్య సోదరుడు నాగభూషణం ఇటీవల గుండెపోటుతో మరణించారు. ఈ నేపథ్యంలో ఏపీ ప్రతిపక్షనేత వైఎస్ జగన్‌మోహన్‌రెడ్డి బుధవారం మధ్యాహ్నం దేవరగుట్టపల్లె గ్రామానికి వెళ్లి వెంకటసుబ్బయ్య కుటుంబీకులను పరామర్శించారు. ఈ సందర్భంగా వైఎస్ జగన్‌రెడ్డిని చూడగానే మృతుడు నాగభూషణం సతీమణి ఈశ్వరమ్మ, తల్లి రెడ్డమ్మ బోరున విలపించారు. అధైర్యపడొద్దని కుటుంబానికి అండగా ఉంటామని  వారిని ఓదార్చారు.
  ప్రజలతో మమేకం :
  హైదరాబాద్ నుంచి ఏపీ ప్రతిపక్షనేత వైఎస్ జగన్‌మోహన్‌రెడ్డి బుధవారం తెల్లవారుజామున వెంకటాద్రి ఎక్స్‌ప్రెస్ రైలులో ఎర్రగుంట్లలో దిగి ఇడుపులపాయకు చేరుకున్నారు. మహానేత వైఎస్‌ఆర్ సమాధి ఘాట్ వద్ద నివాళులర్పించిన అనంతరం ప్రత్యేక ప్రార్థనలలో పాల్గొన్నారు. అనంతరం ఇడుపులపాయలోని అతిథి గృహంలో ప్రజలతో మమేకమయ్యారు. సమస్యలు అడిగి తెలుసుకున్నారు. ఈ సందర్భంగా భారీగా తరలి వచ్చిన జనం క్రిస్మస్ శుభాకాంక్షలు తెలియజేశారు. పలువురు వైఎస్ జగన్‌మోహన్‌రెడ్డి అసెంబ్లీలో అధికార పక్షంపై ప్రతిపక్ష పాత్రను సమర్థవంతంగా పోషించారని కొనియాడుతూ అభినందించారు.
  
  జగన్‌ను కలిసిన పలువురు నేతలు : ఇడుపులపాయలో ఉన్న ప్రతిపక్షనేత వైఎస్ జగన్‌మోహన్‌రెడ్డిని బుధవారం పలువురు నేతలు కలిశారు. ముందుగా వైఎస్‌ఆర్ కాంగ్రెస్‌పార్టీ జిల్లా అధ్యక్షులు ఆకేపాటి అమరనాథరెడ్డి, కర్నూలు జిల్లా బనగానపల్లె వైఎస్‌ఆర్‌సీపీ నాయకులు ఎర్రబోతుల వెంకటరెడ్డి, రాజంపేట ఎంపీ మిథున్‌రెడ్డి చిన్నాన్న పి.ద్వారకనాథరెడ్డి తదితరులు కలిసి అనేక అంశాలపై చర్చించారు. వీరేకాకుండా వివిధ జిల్లాలనుంచి మండలస్థాయి నాయకులు, కార్యకర్తలు వచ్చి వైఎస్ జగన్ కలవడంతోపాటు క్రిస్మస్ శుభాకాంక్షలు తెలియజేశారు.
  
  ఇడుపులపాయలో నిర్వహించిన ప్రత్యేక ప్రార్థనలలో వైఎస్ కుటుంబ సభ్యులు, ప్రతిపక్షనేత వైఎస్ జగన్‌మోహన్‌రెడ్డితోపాటు తల్లి వైఎస్ విజయమ్మ, సతీమణి వైఎస్ భారతి, సోదరి షర్మిలమ్మ, బ్రదర్ అనిల్‌కుమార్, వైఎస్ సోదరులు వైఎస్ సుధీకర్‌రెడ్డి, వైఎస్ రవీంద్రనాథరెడ్డి, దివంగత వైఎస్ జార్జిరెడ్డి కుమారులు అనిల్‌కుమార్‌రెడ్డి, సునీల్‌కుమార్‌రెడ్డి, మాజీ ఎమ్మెల్యే పురుషోత్తమరెడ్డి, వైఎస్ మేనత్తలు కమలమ్మ, రాజమ్మ, వైఎస్ వివేకా సతీమణి వైఎస్ సౌభాగ్యమ్మ, ప్రముఖ పారిశ్రామికవేత్త వైఎస్ ప్రకాష్‌రెడ్డి, సతీమణి పద్మావతమ్మ, వైఎస్ జోసఫ్‌రెడ్డి, పులివెందుల మున్సిపల్ చైర్ పర్సన్ వైఎస్ ప్రమీలమ్మ, మాజీ వైస్ చెర్మైన్ వైఎస్ మనోహర్‌రెడ్డి, తొండూరు మండల ఇన్‌ఛార్జి వైఎస్ మధురెడ్డి, ైడాక్టర్ సత్యానందరెడ్డి, థామస్‌రెడ్డి, వెఎస్ సోదరి విమలమ్మ కుమారుడు యువరాజారెడ్డిలతోపాటు వైఎస్ భాస్కర్‌రెడ్డి సతీమణి వైఎస్ లక్షుమ్మ, ఎంపీ వైఎస్ అవినాష్‌రెడ్డి సతీమణి సమత, డాక్టర్ ఇసీ గంగిరెడ్డి సతీమణి సుగుణమ్మ, తదితరులతోపాటు వైఎస్ కుటుంబ సభ్యుల బంధువులు, వేడుకలలో పాల్గొన్నారు.
  


  టీనగర్: యేసుక్రీస్తు పుట్టిన రోజైన క్రిస్మస్ పండుగను నేడు క్రైస్తవులు ఆనందోత్సాహాలతో జరుపుకోనున్నారు. క్రిస్మస్ పండుగను పురస్కరించుకుని రాష్ట్ర వ్యాప్తంగా క్రైస్తవ ఆలయాల్లో బుధవారం రాత్రి ప్రత్యేక ప్రార్థనలు నిర్వహించారు. పెద్ద సంఖ్యలో క్రైస్తవులు హాజరై ప్రార్థనల్లో పాల్గొన్నారు. క్రీస్తు పుట్టుక గురించి మత బోధకులు సందేశాలను అందించారు. అదేవిధంగా భక్తులకు మతబోధకులు ఆశీస్సులను అందజే శారు. ఇందులో భాగంగా క్రిస్మస్ వేడుకలకు నగరం ముస్తాబైంది. నగరంలోని టీనగర్, మైలాపూరు, ప్యారిస్, పెరంబూరు, శాంతోమ్, సెంట్ థామస్ మౌంట్, ఎగ్మూరు, తిరువాన్మియూరు, అడయారు, అన్నానగర్, తాంబరం, వలసరవాక్కం, వ్యాసర్పాడి, కొడుంగయూరు, మాధవరం తదితర ప్రాంతాలలోని చర్చిలు విద్యుత్ దీపాలతో కళకళలాడుతున్నాయి.
  
  రంగురంగుల విద్యుత్ దీపాలు క్రిస్మస్ ప్రత్యేకతను వివరించే అలంకరణలు చేపట్టారు. యేసు క్రీస్తు పుట్టుకను తెలియపరిచే రీతిలో పశువుల పాకలను, వివిధ ఘట్టాలను అనేక  మందిరాల్లో ఏర్పాటుచేశారు. చెన్నైలో ప్రత్యేక ప్రార్థనల కోసం కాథలిక్, సీఎస్‌ఐ, ఈఎస్‌ఐ, బాప్టిస్ట్, టీఇఎల్‌సి తదితర ఆలయాల్లో ఏర్పాట్లు చేశారు. శాంతాక్లాస్ వేషధారణలతో పలువురు భక్తులను అలరించారు. అనేక మంది భక్తులు బృందాలుగా విడిపోయి వీధుల్లో క్రిస్మస్ గీతాలను ఆలపించారు. ప్రార్థనలు ముగిసిన వెంటనే భక్తులు ఒకరికొకరు మెర్రీ క్రిస్మస్, హ్యాపీ క్రిస్మస్ అంటూ శుభాకాంక్షలు తెలుపుకున్నారు. ఈ సందర్భంగా అనేక ఆలయాల వద్ద పోలీసు భద్రత ఏర్పాటుచేశారు. రాత్రంతా నగర వ్యాప్తంగా పోలీసు గస్తీ తిరగాలని ఉన్నతాధికారులు ఉత్తర్వులిచ్చారు. క్రిస్మస్ సందర్భంగా నగరంలో పటిష్ట బందోబస్తు ఏర్పాటు చేశారు.
  


 మహబూబ్‌నగర్ : జిల్లాలో చర్చీలన్నీ క్రిస్మస్ పండుగ శోభను సంతరించుకున్నాయి. రంగురంగుల విద్యుత్ దీపాలతో ప్రార్థన మందిరాలు ప్రత్యేకంగా ముస్తాబయ్యాయి. పదిహేను రోజులుగా సెమీక్రిస్మస్ వేడుకలను జరుపుకుంటున్నారు. నేడు క్రీస్తు పుట్టినరోజును పురస్కరించుకుని క్రైస్తవులు ఇళ్లపై స్టార్‌లైట్‌ను ఏర్పాటు చేశారు. ఆయన జననం ప్రపంచ మానవాళికి శాంతి సందేశమిచ్చిందని, ఆ కరుణామయుడి జన్మదినం అందరికీ ఎంతో శుభదినం కావాలని పలువురు సందేశకులు ఆకాంక్షించారు.
  
  పాలమూరుకు క్రిస్మస్ కల సంతరించుకుంది. కరుణామయుడి జన్మదిన వేడుకలను ఘనంగా నిర్వహించేందుకు జిల్లాలోని ప్రధాన పట్టణాల్లో చ ర్చీలను సర్వాంగసుందరంగా ముస్తాబు చేశారు. రంగురంగుల విద్యుత్‌కాంతుల్లో చర్చీలు ధగధగ మెరిసిపోతున్నాయి. గద్వాల, మహబూబ్‌నగర్, జడ్చర్ల, షాద్‌నగర్, నాగర్‌కర్నూల్, వనపర్తి ప్రాంతాల్లో సెమీక్రిస్మస్ వేడుకలు ఘనంగా నిర్వహించారు. బేకరీలు, స్టార్స్ దుకాణాలు కిటకిటలాడాయి. కొనుగోలుదారులను ఆకట్టుకునేలా దుకాణాల ముందు క్రిస్మస్ ట్రీలు, క్రిస్మస్ తాతబొమ్మలతో ప్రత్యేకంగా అలంకరించారు.                   


 ‘‘క్రిస్మస్ పండుగను అమితంగా ప్రేమించేవారిలో నేను ముందుంటా’’ అంటున్నారు అందాల తార రెజీనా. క్రిస్మస్ వస్తే... ఈ బ్యూటీ ఆనందానికి పట్టపగ్గాలుండవట! వారం రోజుల ముందే ఆమె ఇంట్లో వేడుకలు మొదలైపోతాయట. ‘‘ప్రపంచంలో ఎక్కడున్నా సరే... క్రిస్మస్‌కు వారం రోజుల ముందే చెన్నయ్ చేరతా. ముందు ఇల్లంతా అలంకరిస్తాం. అంతా కలిసి ఆరాధనలో పాల్గొంటాం. టపాసులు కాలుస్తాం. ప్రతిరోజూ చర్చికెళ్లి చేసే ప్రార్థనలు సరేసరి. మిడ్‌నైట్ ఒకటిన్నర సమయంలో పక్కింటివాళ్ల తలుపు కొట్టి మరీ వాళ్లకు శుభాకాంక్షలు చెబుతాను. వాళ్లు తిట్టుకున్నా నేను మాత్రం చెప్పడం మానను. వాళ్లకు కూడా అది అలవాటైపోయింది. ఏడాదిలో నాకు అత్యంత ఇష్టమైన రోజు క్రిస్మస్సే’’ అని చెప్పారు రెజీనా.
  


 అంటే ముందు గుర్తొచ్చేది శాంటా క్లాజ్. ఎరుపు, తెలుపు కలయికలో తయారు చేసిన దుస్తులు, గుబురు గడ్డం, నెత్తి మీద టోపీతో.. శాంటా తాతయ్య భలే ఉంటారు. అందుకే ఆ తాతయ్యను చూస్తే పిల్లలకు బోల్డంత సంబరంగా ఉంటుంది. ఇక, ఈ పండగ తాలూకు మరో ప్రత్యేక ఆకర్షణ - క్రిస్మస్ ట్రీ. చెట్టును రంగుల కాగితాలు, దీపాలు, రంగుల బంతులతో అందంగా అలంకరించడంలో ఓ మజా ఉంటుంది. కొన్ని రోజులుగా పలువురు హాలీవుడ్ తారలు ఈ సందడితో బిజీగా ఉన్నారు. డ్రూబారీ మోర్, జెన్నీ మెక్ కార్తీ, జెస్సికా ఆల్బా, కెల్లీ క్లాక్‌సన్, లిండ్సే లోహన్ వంటి తారల్లో కొంతమంది శాంటాక్లాజ్‌తో ఫొటోలు దిగితే, కొంతమంది శాంటా సూట్ ధరించి పండగ చేసుకున్నారు. మొత్తానికి, అంతా క్రిస్మస్ సందడే!
  


 * లింగా చిత్రం విడుదలై రెండు వారాలు పూర్తి కాలేదు. దాని ఫీవర్ తగ్గిందనే ప్రచారం జరుగుతున్నా ఈ వారం తెరపైకొచ్చిన బాలీవుడ్ సూపర్‌స్టార్ అమీర్‌ఖాన్ చిత్రం పీకే హవా కొనసాగుతూనే ఉంది. ఇంతలో క్రిస్మస్ పండుగ వచ్చేసింది. దీంతో ఈ పండుగ సందర్భంగా ఐదు తమిళ చిత్రాలతోపాటు ఒక తెలుగు, మరొక ఆంగ్ల చిత్రం విడుదలకు సిద్ధమైపోతున్నాయి. అవేమిటో, వాటి వివరాలు చూసేద్దామా? క్రిస్మస్ పండుగ సందర్భంగా ఈ నెల 25న కయల్, వెళ్లక్కారదురై, మెగామాన్, కప్పల్, ఎండ్రుమ్ ఆనందం వంటి ఐదు తమిళ చిత్రాలతోపాటు తెలుగు చిత్రం చిన్నదాన నీ కోసం, ఆంగ్ల చిత్రం నైట్ ఎట్ ది మ్యూజియం విడుదలకు సిద్ధం అవుతున్నాయి.
  
 * ప్రభుసాల్మన్ కయల్
  వీటిలో మైనా, కుంకి చిత్రాల సృష్టికర్త ప్రభుసాల్మన్. తాజా సెల్యులాయిడ్ కయల్ క్రిస్మస్ బరిలోకి దిగుతోంది. నటి ఆనంది టైటిల్ పాత్ర పోషించిన ఈ చిత్రంలో నవ నటుడు హీరోగా నటించారు. డి.ఇమాన్ సంగీతాన్ని అందించిన కయల్ చిత్రాన్ని గాడ్ పిక్చర్స్ సంస్థ నిర్మించగా ఎస్కేప్ ఆర్టిస్ట్ మోషన్ పిక్చర్స్ అధినేత ఎస్.మదన్ విడుదల చేస్తున్నారు.
 
 * రెండో చిత్రం వెళ్లక్కార దురై విక్రమ్ ప్రభు, శ్రీ దివ్య జంటగా నటించిన ఈ చిత్రానికి ఎస్.ఎళిల్ దర్శకుడు. జిఎన్ అన్భళగన్ నిర్మాతగా మారి గోపురం ఫిలింస్ పతాకంపై నిర్మించిన తొలి చిత్రం ఇది. ఈ చిత్రానికి డి.ఇమాన్‌నే సంగీత బాణీలు కట్టారు.
  
 * మూడో చిత్రం మెగామాన్. ఆర్య, హన్సిక హీరో హీరోయిన్లుగా నటించిన ఈ చిత్రానికి మగిళ్ తిరుమణి దర్శకుడు. నేమ్‌చంద్ జపక్, ఎ.హిందేష్ జపక్ నిర్మించిన ఈ చిత్రంలో ఆర్య యాక్షన్ హీరోగా కనిపించనున్నారు.
  
 * నాలుగో చిత్రం కప్పల్. వైభవ్ సోనం బాజ్వా హీరో హీరోయిన్లుగా నటించిన ఈ చిత్రం ద్వారా శంకర్ శిష్యుడు కార్తీక్ జి.క్రిష్ దర్శకుడిగా పరిచయమవుతున్నారు. ఇది వినోదంతో కూడిన ప్రేమ కథా చిత్రం. ఈ చిత్రాన్ని దర్శకుడు శంకర్ తన ఎస్.పిక్చర్స్ పతాకం ద్వారా విడుదల చేస్తున్నారు.
  
 * ఐదో చిత్రం ఎండ్రుమే ఆనందం. మహేంద్రన్ హీరోగా నటించిన ఈ చిత్రానికి వివేక్ భారతి దర్శకుడు. అణై సుగుణ సినీ ఆర్ట్స్ సమర్పణలో నార్గవి టాకీస్ సంస్థ నిర్మించింది.
  
 * వీటితోపాటు నితిన్ హీరోగా నటించిన చిన్నదాన నీ కోసం చిత్రం, నైట్ ఆఫ్ ది మ్యూజియం అనే ఆంగ్ల చిత్రం తెరపైకి రానున్నాయి.
  


  నూతన సంవత్సరం వస్తుందంటే చాలు స్టార్ హీరోయిన్ల నుంచి చిన్నా చితకా తారల వరకు మంచి గిరాకీ ఉంటుంది. అయితే మన అమలాపాల్, హన్సికలు మాత్రం విదేశాల్లో జరుపుకోవడానికి సిద్ధమయ్యూరు. స్టార్ హోటల్ నుంచి ఫామ్ హౌస్‌ల వరకు పార్టీలు, నృత్యాలంటూ న్యూ ఇయర్ కార్యక్రమాలు నిర్వహిస్తుంటారు. ప్రతి ఏటా డిసెంబర్ 31 అర్ధరాత్రి దాటేవరకు విందు వినోదాలతో మజా కార్యక్రమాలు నిర్వహించడం ఆనవాయితీ. దీంతో ఏ సినీ తారను ఎంపిక చేయాలన్న విషయాల గురించి హోటళ్ల యాజ మాన్యం, ఎంత పారితోషికం డిమాండ్ చేయాలన్న అంశం గురించి హీరోయిన్లు ఆలోచిస్తుంటారు.
  
  నటి హన్సిక విషయానికొస్తే ప్రతి ఏడాది లాస్‌వేగాస్‌కు తన స్నేహితురాళ్లతో కలిసి వెళ్లి పబ్‌లు, పార్టీలు అంటూ ఎంజాయ్ చేస్తుంటారు. ఎప్పటిలానే ఈసారి లాస్‌వేగాస్‌కు వెళ్లడానికి రెడీ అవుతున్నారట. అంతకు ముందుగా ఈ క్రేజీ బ్యూటీ తమిళ చిత్రం షూటింగ్ కోసం ఇటలీ వెళ్లాలి. ఈ నెలాఖరు ఖల్లా తిరిగి రానున్నారట. ఆ వెంటనే నూతన సంవత్సరం వేడుకలను లాస్‌వేగాస్‌లో జరుపుకోవడానికి బయలుదేరనున్నారని సమాచారం. దర్శకుడు విజయ్‌ను ప్రేమించి పెళ్లి చేసుకున్న నటి అమలాపాల్ నూతన సంవత్సరాన్ని తన భర్తతో కలిసి లాస్ ఏంజెల్స్‌లో జరుపుకోవడానికి సిద్ధమవుతున్నారు.
  
  దీని గురించి ఈ ముద్దుగుమ్మ తెలుపుతూ కేరళలో క్రిస్మస్ పండుగను జరుపుకుని నూతన సంవత్సర     వేడుకల్ని విజయ్‌తో కలిసి లాస్‌ఏంజిల్స్‌లో జరుపుకోనున్నట్లు తన ట్విట్టర్‌లో పేర్కొన్నారు. ఈ పయనంలో కెనడా దేశాలు కూడా చుట్టి రానున్నట్లు తెలిపారు. అందువలన ఆ రోజు కోసం ఎగ్జైటింగ్‌గా ఎదురు చూస్తున్నట్లు వెల్లడించారు. మరికొందరు హీరోయిన్లు తమిళనాడుతోపాటు, ఇతర రాష్ట్రాలలోని స్టార్ హోటల్స్‌లో డాన్స్‌కు బేరసారాలు జరుపుకుంటున్నట్లు సమాచారం.
  


  క్రిస్మస్ పండుగను పురస్కరించుకుని కయల్ చిత్రం తెరపైకి రావడానికి సిద్ధం అవుతోంది. మైనా, కుంకీ చిత్రాల సృష్టికర్త ప్రభుసాల్మన్ ప్రయోగం కయల్. మైనాతో అమలాపాల్‌ను, కుంకితో లక్ష్మీమీనన్‌ను హీరోయిన్లు గా అందలం ఎక్కించిన ఈ దర్శకుడు తాజాగా కయల్ చిత్రం ద్వారా ఆనందికి నటిగా సరికొత్త జీవితాన్ని ఇవ్వడానికి రెడీ అయ్యారు. ఎస్కేప్ ఆర్టిస్ట్ మోషన్ పిక్చర్స్, గాడ్ పిక్చర్స్ సంస్థలు సంయుక్తంగా నిర్మించిన ఈ చిత్రంలో నవ నటుడు చంద్రన్ కథానాయకుడిగా పరిచ యం అవుతున్నారు. ఆనంది నాయకిగా నటిస్తుండగా విన్సెంట్, ఆర్తి, జెమినీ రాజేశ్వరి, యార్‌కన్నన్, భారతీకన్నన్, జేకాప్, యోగి దేవరాజ్ తదితరులు ముఖ్యపాత్రలు పోషిం చారు.
  
  డి.ఇమాన్ సంగీతాన్ని, వి.మహేంద్రన్ ఛాయాగ్రహణం అందించిన ఈ చిత్రం ఇటీవలే సెన్సార్ కార్యక్రమాలు పూర్తి చేసుకుంది. సెన్సార్ బృందం చిత్రంలోని ఒక్క సన్నివేశాన్ని కూడా కట్ చేయకుండా మంచి వైవిధ్యభరిత చిత్రం అంటూ అభినందించి యు సర్టిఫికెట్ ఇచ్చిందని యూనిట్ వర్గాలు తెలిపారుు. సాధారణంగా ప్రభుసాల్మన్ చిత్రాల్లో పాటల కు మంచి ఆదరణ ఉంటుందని ఈ చిత్రంలోని పాటలన్నీ ఇప్పటికే మంచి విజయాన్ని అందుకున్నాయని కయల్ చిత్రాన్ని ఈ నెల 25న విడుదల చేయనున్నట్లు చిత్ర యూనిట్ వర్గాలు వెల్లడించారు.
  


 నటి హన్సిక నటించిన తాజా చిత్రం మెగామాన్ క్రిస్మస్ పండుగ సందర్భంగా ఈ నెల 25న విడుదలకు సిద్ధం అవుతోంది. ఆర్య హీరోగా నటించిన ఈ చిత్రానికి మగిళ్ తిరువేణి దర్శకుడు. ఈ చిత్రంలో హన్సిక పోషిం చిన పాత్రపై పలు రకాల ప్రచారాలు హల్‌చల్ చేస్తున్నాయి. హన్సిక హీరోయిన్‌గా మంచి క్రేజ్ ఉంది. ఇటీవల విడుదలైన అరణ్మణై చిత్రంతో సహా వరుస విజయాలను అందుకుంటున్న నటి హన్సిక. అదే విధంగా విజయ్ వంటి స్టార్ హీరోల సరసన నటిస్తూ క్రేజీ హీరోయిన్‌గా వెలుగొందుతున్నారు. వ్యక్తిగతంగా కూడా పలువురు పిల్లలను దత్తత తీసుకోవడం వంటి పలు సేవా కార్యక్రమాలతో మంచి ఉదార స్వభావం గల నటిగా పేరు తెచ్చుకున్నారు.
  
  అలాంటి నటి మెగామాన్ చిత్రంలో పోషించిన పాత్ర చిన్న పిల్లలు మెచ్చేదిగా ఉండకపోవడమే కాకుండా వారిని భయపెట్టేదిగాను, ఆమె వ్యక్తిగతానికి పూర్తి విరుద్దమైనది గాను ఉంటుందనే ప్రచారం సోషల్‌నెట్ వర్క్స్‌లో జోరందుకుంది. దీనికి స్పందించిన హన్సిక అదంతా అసత్య ప్రచారం అని కొట్టి పారేశారు. తాను మెగామాన్ చిత్రంలో హీరోయిన్‌గా నటించానని తెలిపారు. దీన్ని ఎవరో కావాలనే దుష్ర్పచారం చేస్తున్నారని ఆరోపించారు. మెగామాన్ చిత్రం ఒక మంచి కమర్షియల్ ఎలిమెంట్స్‌తో కూడిన చిత్రం అని అలాంటి చిత్రంలో పిల్లలను భయపెట్టే పాత్రగా తనకెందుకుంటుందని హన్సిక ప్రశ్నిస్తున్నారు.