దుబాయ్‌: మహిళల క్రికెట్‌కు మరింత ఆదరణ పెరుగుతోందనడానికి తాజా నిదర్శనమిది. ఈ ఏడాది ఫిబ్రవరి–మార్చిలో ఆస్ట్రేలియా గడ్డపై జరిగిన మహిళల టి20 ప్రపంచకప్‌ను వివిధ డిజిటల్‌ వీడియో స్ట్రీమింగ్‌ వేదికలపై చూసిన వీక్షకుల సంఖ్యను అంతర్జాతీయ క్రికెట్‌ మండలి (ఐసీసీ) ప్రకటించింది. దీని ప్రకారం ఈ టోర్నీని మొత్తం 110 కోట్ల మంది వీక్షించారు. 2018 టి20 ప్రపంచకప్‌తో పోలిస్తే ఇది ఏకంగా 20 రెట్లు ఎక్కువ కావడం విశేషం. ఇంకా చెప్పాలంటే 2017 మహిళల వన్డే వరల్డ్‌కప్‌తో పోలిస్తే ఈసారి వీడియో వ్యూస్‌ 10 రెట్లు ఎక్కువగా ఉండటం గమనార్హం. ఈ రెండు సందర్భాల్లో భారత జట్టు ఫైనల్లో ఆడటం కూడా దీనికి ఒక కారణం. ఓవరాల్‌గా కూడా 2019 పురుషుల వరల్డ్‌కప్‌ తర్వాత ఎక్కువ వ్యూస్‌ వచ్చిన ఐసీసీ ఈవెంట్‌గా ఈ వరల్డ్‌ కప్‌ రెండో స్థానంలో నిలిచింది. నాకౌట్‌ మ్యాచ్‌లలో 2018తో పోలిస్తే ఏకంగా 423 శాతం వ్యూయర్‌షిప్‌ పెరగడం మరో ఘనత.

మెల్‌బోర్న్‌: ఇటీవల ఆస్ట్రేలియాలో జరిగిన మహిళల టీ20 వరల్డ్‌కప్‌ ఫైనల్‌ మ్యాచ్‌ను వీక్షించిన ఓ అభిమానికి కరోనా వైరస్‌ సోకింది. అతనికి కరోనా లక్షణాలు ఉన్నట్లు తేలడంతో చికిత్స అందిస్తున్నారు.ఆ మ్యాచ్‌కు రికార్డు స్థాయిలో 86 వేల మందికి పైగా ప్రేక్షకులు హాజరైన నేపథ్యంలో ఓ వ్యక్తికి కరోనా సోకినట్లు నిర్దారణ కావడం ఇప్పుడు ఆస్ట్రేలియాను వణికిస్తోంది. మార్చి 8వ తేదీన ఆస్ట్రేలియా-భారత్‌ల మధ్య ఫైనల్‌ మ్యాచ్‌ జరిగిన సంగతి తెలిసిందే.  ఆ మ్యాచ్‌లో ఆసీస్‌  ఘన విజయం సాధించి ఐదోసారి కప్‌ను ఎగరేసుకుపోయింది.(మహిళల క్రికెట్‌లో ప్రపంచ రికార్డు!) కాగా, ఆ మ్యాచ్‌ను వీక్షించడానికి వచ్చిన వ్యక్తికి కరోనా సోకిందని ఆస్ట్రేలియాలోని ఆరోగ్య సేవల విభాగం స్పష్టం చేసింది. దాంతో అక్కడ ఆందోళన మరింత ఎక్కువైంది. కరోనా వైరస్‌ నిర్దారణ అయిన వ్యక్తి మ్యాచ్‌ను చూసే క్రమంలో నార్త్‌ స్టాండ్‌లోని లెవల్‌2లో ఎన్‌ 42 సీట్లో కూర్చున్నట్లు మెల్‌బోర్న్‌ క్రికెట్‌ గ్రౌండ్‌(ఎంసీజీ) నిర్వాహకులు గుర్తించారు. దాంతో ఆ పరిసర ప్రాంతాల్లో కూర్చొన్న మిగతా అభిమానులు జాగ్రతగా ఉండాలని సూచించారు. వారికి ఏదైనా అనారోగ్యం సోకితే వెంటనే డాక్టర్‌ను సంప్రదించాలని పేర్కొన్నారు. (షఫాలీని అలా చూడటం కష్టమైంది: బ్రెట్‌ లీ)

మెల్‌బోర్న్‌: టీ20 ప్రపంచకప్‌లో భారత మహిళల జట్టు చివరి మెట్టుపై బోల్తా పడింది. లీగ్‌ దశలో అప్రతిహతవిజయాలతో దూసుకపోయిన హర్మన్‌ సేన.. ఫైనల్‌ పోరులో మాత్రం పూర్తిగా తేలిపోయింది. లీగ్‌ దశలో ఆల్‌రౌండ్‌ ప్రదర్శనతో ఆకట్టుకున్న భారత జట్టు.. టైటిల్‌ పోరులో అట్టర్‌ ఫ్లాఫ్‌ షోతో నిరుత్సాహపరిచింది. ముఖ్యంగా లీగ్‌ దశలో బ్యాటింగ్‌ భారాన్ని మోసిన యువ సంచలనం షఫాలీ వర్మ తుది పోరులో చేతులెత్తేసింది.  ఈ క్రమంలో తను ఔటైన తర్వాత, ఓటమి తర్వాత షఫాలీ కన్నీటి పర్యంతమయ్యారు. అయితే సారథి హర్మన్‌ప్రీత్‌ కౌర్‌, సహచర క్రికెటర్లు ఆమెను ఓదార్చే ప్రయత్నం చేసినప్పటికీ వెక్కివెక్కి ఏడ్వసాగింది. (మనకూ ఒక రోజు వస్తుంది: గంగూలీ) ఇది సహచర క్రీడాకారిణులతో పాటు ప్రపంచ క్రికెట్‌ను కూడా కదిలించింది. దీనిపై ఆసీస్‌ దిగ్గజ బౌలర్‌ బ్రెట్‌ లీ.. ఐసీసీకి రాసిన తన కాలమ్‌లో ప్రత్యేకంగా ప్రస్తావించాడు. ‘ షఫాలీ ఏడ్వడం నాకు బాధనిపించింది. మ్యాచ్‌ ముగిసిపోయాక ఆమె కన్నీట పర్యంతం కావడం నాకు చాలా కష్టంగా అనిపింది. కానీ గర్వించదగ్గ క్రికెటర్‌. ఆస్ట్రేలియాలో ఆమె ప్రదర్శన అద్భుతంగా సాగింది. తొలి టోర్నమెంట్‌ ఆడటానికి ఇక్కడకు వచ్చిన షఫాలీ తన టాలెంట్‌తో ఆకట్టుకున్నారు. మానసికంగా ఆమె చాలా ధృఢంగా అనిపించారు. ఇక్కడ నుంచి ఆమె మరింత పరిణితి సాధిస్తుందని అనుకుంటున్నా. ఈ టోర్నమెంట్‌లో సాధించిన అనుభవంతో ఆమె మరింత రాటుదేలడం ఖాయం. ఆస్ట్రేలియాలో ఆడే తదుపరి టోర్నీల్లో ఆమె చేసే భారీ స్కోర్లు ఎవ్వర్నీ ఆశ్చర్యపరచకపోవచ్చు. సానుకూల ధోరణితో ముందుకు సాగుతుందనే అనుకుంటున్నా. ఇది భారత్‌ మహిళలకు తీవ్ర నిరాశను మిగిల్చిన రాత్రి. కానీ వారు మరింత ఆశావాహ ధృక్పథంతో రాటుదేలతారు. దీంతో వారు క్రికెట్‌ ఏమీ ముగిసిపోలేదు. ఇది కేవలం ఆరంభం మాత్రమే అనుకోండి’ అని బ్రెట్‌ లీ రాసుకొచ్చాడు. (ఐసీసీ అత్యుత్తమ వరల్డ్‌కప్‌ జట్టు ఇదే..)

దుబాయ్‌:  మహిళల టీ20 వరల్డ్‌కప్‌ ట్రోఫీని ఆసీస్‌ కైవసం చేసుకోగా, భారత్‌ రన్నరప్‌గా నిలిచింది. డిఫెండింగ్‌ చాంపియన్‌గా బరిలోకి దిగిన ఆసీస్‌ మరోసారి కప్‌ను కైవసం చేసుకుని ఐదోసారి విజేతగా నిలిచింది.  దీనిలో భాగంగా అంతర్జాతీయ క్రికెట్‌ మండలి(ఐసీసీ)తమ అత్యుత్తమ వరల్డ్‌కప్‌ టోర్నమెంట్‌ జట్టును ప్రకటించింది. ఈ మెగా టోర్నీలో అత్యుత్తమ ప్రదర్శన కనబరిచిన 12 మంది వుమెన్‌ క్రికెటర్లను ఎంపిక చేసింది. ఈ జట్టుకు ఆసీస్‌ కెప్టెన్‌ మెగ్‌ లానింగ్‌ను కెప్టెన్‌గా ఎంపిక చేసిన ఐసీసీ.. భారత్‌ నుంచి ఇద్దరికి మాత్రమే చోటు కల్పించింది.(మనకూ ఒక రోజు వస్తుంది: గంగూలీ) ఇందులో స్పిన్నర్‌ పూనమ్‌ యాదవ్‌ కు ఐసీసీ ఎలెవన్‌ జాబితాలో చోటు దక్కగా, 12వ క్రీడాకారిణిగా షెఫాలీ వర్మను ఎంపిక చేసుకుంది. ప్రధానంగా వరల్డ్‌కప్‌ గెలిచిన ఆసీస్‌ జట్టు నుంచి ఐదుగురు క్రికెటర్లకు తమ జట్టులో చోటిచ్చిన ఐసీసీ.. ఇంగ్లండ్‌ నుంచి నలుగుర్నీ తీసుకుంది. దక్షిణాఫ్రికా జట్టు నుంచి ఒక క్రీడాకారిణికి మాత్రమే అవకాశం కల్పించింది.  ఐసీసీ వరల్డ్‌కప్‌ టీమ్‌ ఆఫ్‌ ద టోర్నమెంట్‌ ఇదే.. మెగ్‌ లానింగ్‌(కెప్టెన్‌)(ఆస్ట్రేలియా), అలెసా హీలీ(వికెట్‌ కీపర్‌)(ఆస్ట్రేలియా), బెత్‌ మూనీ(ఆస్ట్రేలియా), నాట్‌ స్కీవర్‌(ఇంగ్లండ్‌), హీథర్‌ నైట్‌(ఇంగ్లండ్‌), లౌరా వాల్వార్డ్‌(దక్షిణాఫ్రికా), జెస్‌ జొనాసేన్‌(ఆస్ట్రేలియా), సోఫీ ఎక్సలీస్టోన్‌(ఇంగ్లండ్‌),   అన్యా ష్రబ్‌సోల్‌(ఇంగ్లండ్‌), మెగాన్‌ స్కట్‌(ఆస్ట్రేలియా), పూనమ్‌ యాదవ్‌(భారత్‌), షెఫాలీ వర‍్మ(భారత్‌, 12వ మహిళ) Introducing your Women's #T20WorldCup 2020 Team of the Tournament 🌟 pic.twitter.com/Eb4wQUc7Ls — T20 World Cup (@T20WorldCup) March 9, 2020

న్యూఢిల్లీ: మహిళల టీ20 వరల్డ్‌కప్‌లో భారత జట్టు ఫైనల్‌కు చేరినా కెప్టెన్‌ హర్మన్‌ ప్రీత్‌ కౌర్‌ మాత్రం తీవ్రంగా నిరాశపరిచారు. ఈ మెగా టోర్నీ అంతా కలిపి ఆమె 30 పరుగులు మాత్రమే చేశారు. లీగ్‌ దశలో 28 పరుగులు చేసిన హర్మన్‌.. ఆసీస్‌తో జరిగిన తుది పోరులో 2 పరుగులకే నిష్క్రమించారు. దాంతో పాటు మిగతా భారత బ్యాటర్స్‌ కూడా విఫలం కావడంతో ఘోర ఓటమి తప్పలేదు. అయితే భారత్‌ ఫైనల్‌కు చేరడంపై బీసీసీఐ అధ్యక్షుడు సౌరవ్‌ గంగూలీ, టీమిండియా కెప్టెన్‌ కెప్టెన్‌ విరాట్‌ కోహ్లి తదితరులు ప్రశంసలు కురిపిస్తుంటే,  భారత మహిళా క్రికెట్‌ జట్టు మాజీ కెప్టెన్‌ శాంతా రంగస్వామి మాత్రం విమర్శలు కురిపించారు. ప్రధానంగా హర్మన్‌ నాయకత్వాన్ని ఆమె వేలెత్తి చూపారు. ఇక హర్మన్‌ సారథ్య బాధ్యతల నుంచి తప్పుకోవాల్సిన సమయం వచ్చేసిందని పరోక్షంగా హెచ్చరించారు. లీడర్‌గా కంటే బ్యాటర్‌గా నిరూపించుకోవడమే ఇప్పుడు హర్మన్‌కు చాలా అవసరమన్నారు. (మన వనిత... పరాజిత) ‘ ఇది నన్ను తీవ్రంగా నిరుత్సాహపరిచింది. ఎంతో పటిష్టమైన బ్యాటింగ్‌ లైనప్‌ కల్గిన భారత జట్టు పేలవంగా టోర్నీ ముగించడం బాధించింది. స్మృతీ మంధాన, జెమీమా రోడ్రిగ్స్‌, హర్మన్‌లు విశేషమైన టాలెంట్‌ ఉన్న క్రీడాకారిణులు. వారు ఈ టోర్నీ మొత్తం విఫలమయ్యారు. ప్రధానంగా హర్మన్‌ ఫెయిల్యూర్‌ కావడమైతే నిలకడగా జరిగింది. ఎన్నో ఆశలు పెట్టుకున్న వేదా కృష్ణమూర్తి కూడా రాణించలేదు. హర్మన్‌ తన కెప్టెన్సీపై సమీక్షించుకోవాలి. కెప్టెన్సీ ఎప్పుడు తప్పుకోవాలో ఆమెకు తెలుసు. హర్మన్‌ ఎంతో పరిణితి చెందిన క్రికెటర్‌. ఇప్పుడు హర్మన్‌ కెప్టెన్‌ కంటే కూడా బ్యాటింగ్‌లో నిరూపించుకోవాల్సిన అవసరం ఏర్పడింది’ అని శాంతా రంగస్వామి పేర్కొన్నారు.  ఇక భారత మాజీ వుమెన్స్‌ క్రికెటర్‌ డయానా ఎడ్జుల్లీ.. ఫైనల్లో భారత క్రీడాకారిణుల ప్రదర్శనపై విమర్శలు గుర్పించారు. ఎవరికి వారు ఆత్మపరిశోధన చేసుకోవాలంటూ సూచించారు. మరొకవైపు భారత మహిళా క్రికెట్‌ జట్టు మాజీ కోచ్‌ తుషాన్‌ ఆర్ధో కూడా విమర్శలు చేశారు. తానియా భాటియాను మూడో స్థానంలో బ్యాటింగ్‌కు పంపడంపై మండిపడ్డారు. (మనకూ ఒక రోజు వస్తుంది: గంగూలీ)

మెల్‌బోర్న్‌: ఐసీసీ మహిళల టీ20 ప్రపంచకప్‌ను ఆసీస్‌ మరోసారి ముద్దాడింది. టీ20 ప్రపంచకప్‌ ఫైనల్లో భాగంగా ఆదివారం టీమిండియాతో జరిగిన మ్యాచ్‌లో ఆసీస్‌ 85 పరుగుల తేడాతో ఘన విజయం సాధించి మెగా కప్‌ను ఐదోసారి అందుకుంది. తొలుత బ్యాటింగ్‌కు దిగిన ఆసీస్‌ నిర్ణీత ఓవర్లలో  4 వికెట్ల నష్టానికి 184 పరుగులు చేసింది.  స్టార్‌ బ్యాటర్‌ అలీసా హీలీ (75; 39 బంతుల్లో 7 ఫోర్లు, 5 సిక్సర్లు) విధ్వంసానికి తోడు.. మరో ఓపెనర్‌ బెత్‌ మూనీ (61 నాటౌట్‌; 43 బంతుల్లో 9ఫోర్లు) హాఫ్‌ సెంచరీతో రాణించారు. దీప్తి శర్మ రెండు వికెట్లు పడగొట్టింది. అనంతరం బ్యాటింగ్‌కు దిగిన టీమిండియా 19.1 ఓవర్లలో 99 పరుగులకు ఆలౌటై పరాజయం చెందింది.(మనకూ ఒక రోజు వస్తుంది: గంగూలీ) కాగా,  ఈ టీ20 కప్‌ ఫైనల్‌ మ్యాచ్‌లో ఒక ప్రపంచ రికార్డు నమోదైంది. రికార్డు సంఖ్యలో  86,174 మంది ప్రేక్షకులు మ్యాచ్‌కు హాజరయ్యారు. దాంతో ఇది సరికొత్త రికార్డును నమోదు చేసింది. ప్రపంచ మహిళల క్రికెట్‌ చరిత్రలో రికార్డు వీక్షక్షులు హాజరైన మ్యాచ్‌గా నిలిచింది. ఇక ఆస్ట్రేలియాలో ఇప్పటివరకూ జరిగిన మహిళల స్పోర్ట్స్‌ ఈవెంట్‌ పరంగా చూసినా ఎక్కువ మంది హాజరైన మ్యాచ్‌ ఇదే. అంతర్జాతీయ మహిళల దినోత్సవం రోజున జరిగిన మ్యాచ్‌కు ఇంతటి విశేష ఆదరణ రావడం ఇక్కడ మరో విశేషం. ఓవరాల్‌గా చూస్తే మహిళల స్పోర్ట్స్‌ ఈవెంట్‌లో అత్యధిక మంది వీక్షకుల హాజరైన మ్యాచ్‌ 1999లో కాలిఫోర్నియాలో జరిగిన సాకర్‌ వరల్డ్‌కప్‌ ఫైనల్‌. 21 ఏళ్ల నాటి మహిళల సాకర్‌ ఫైనల్‌ మ్యాచ్‌కు 90, 185 మంది ప్రేక్షకులు హాజరయ్యారు. (మన వనిత... పరాజిత)

న్యూఢిల్లీ: మహిళల టీ20 ప్రపంచకప్‌ ఫైనల్‌లో ఆస్ట్రేలియాలో చేతిలో ఓటమి పాలైనప్పటికీ భారత జట్టుకు విశేషమైన మద్దతు లభిస్తోంది. బీసీసీఐ అధ్యక్షుడు సౌరవ్‌ గంగూలీ, టీమిండియా కెప్టెన్‌ విరాట్‌ కోహ్లి, మాజీ బ్యాట్స్‌మన్ గౌతం గంభీర్, సెహ్వాగ్‌లతో పాటు పలువురు క్రికెటర్లు అండగా నిలిచారు. ‘మహిళల క్రికెట్‌ జట్టుకు అభినందనలు. రెండు బ్యాక్‌ టు బ్యాక్‌ వరల్డ్‌కప్‌ ఫైనల్స్‌కు వెళ్లాం( 2017లో వన్డే వరల్డ్‌కప్‌ ఫైనల్‌ను ఉద్దేశించి). కానీ వాటిని కోల్పోయాం. ఈ రెండు మెగా టోర్నీల్లో బాగా ఆకట్టుకున్నాం. మనకు ఏదొక రోజు వస్తుంది.. జట్టుకు, ప్లేయర్స్‌కు అండగా ఉందాం’ అని గంగూలీ ట్వీట్‌ చేశాడు.  (మన వనిత... పరాజిత) ‘ప్రపంచకప్ మొత్తం మీరు పోరాడిన తీరు చూసి గర్వంగా ఉంది. మీరు పుంజుకుని మరింత బలంగా వస్తారన్న నమ్మకం నాకుంది’ అని కోహ్లి ట్వీట్ చేశాడు. ‘ కొన్ని సంవత్సరాల క్రితం మహిళల క్రికెట్‌ వైపు చూసే వారు ఉండేవారు కాదు. ఇప్పుడు లక్షల్లో అభిమానులు మహిళల క్రికెట్‌ వైపు చూస్తున్నారు. ఇది మంచి పరిణామం. క్రికెట్‌ వరల్డ్‌కప్‌లు అనేవి వస్తూ పోతూ ఉంటాయి. కానీ ఈరోజు మన అమ్మాయిలు ఫైనల్‌కు చేరడం ప్రతీ ఇండియన్‌ గర్ల్‌ గర్వించే క్షణం’ అని గంభీర్‌ పేర్కొన్నాడు. ఇక జస్‌ప్రీత్‌ బుమ్రా, మయాంక్ అగర్వాల్ కూడా భారత అమ్మాయిలపై ప్రశంసలు కురిపించారు. (కన్నీళ్లు కనిపించనీయవద్దు!) Well done the Women’s team @bcci @JayShah .. Two back to back World Cup finals .. but we lost .. u we’re super .. we will get there someday .. love the team and players — Sourav Ganguly (@SGanguly99) March 8, 2020 Proud of all the efforts put in by the Indian Women's Cricket Team throughout their #T20WorldCup campaign. I'm confident that you girls will bounce back stronger than ever. 🙌 @BCCIWomen — Virat Kohli (@imVkohli) March 8, 2020  

సాక్షి, అమరావతి : ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి భారత మహిళా క్రికెట్‌ జట్టుకు అభినందనలు తెలియజేశారు. ‘ మహిళల టీ20 వరల్డ్‌కప్‌లో భారత మహిళా క్రికెట్ జట్టు పోరాటానికి అభినందనలు. ఓటమి విజయానికి తొలిమెట్టు. మీరు ఇంత దూరం రావటం మాకు ఎంతో గర్వకారణం, మీ పయనం ఇక్కడితో ఆగిపోలేదు. విజేత ఆస్ట్రేలియాకు అభినందనలు’ అని ట్విటర్‌ వేదికగా పేర్కొన్నారు. కాగా, ఆదివారం మెల్‌బోర్న్‌ వేదికగా జరిగిన మహిళల టీ20 ప్రపంచకప్‌లో ఆస్ట్రేలియాతో తలపడ్డ భారత్‌ ఓటమిని చవిచూసిన సంగతి తెలిసిందే.  చదవండి : కన్నీళ్లు కనిపించనీయవద్దు!    Kudos to the Indian Women's Cricket Team for their remarkable performance in @T20WorldCup. Defeat is just one stepping stone away from success. We are immensely proud of how far you have come, & you have a long way to go! Congratulations to the Australian team. #INDvsAUS — YS Jagan Mohan Reddy (@ysjagan) March 9, 2020

సాక్షి క్రీడా విభాగం: మీకు తెలిసిన 16 ఏళ్ల వయసు ఉన్న అమ్మాయి ఏం చేస్తూ ఉంటుంది? శ్రద్ధగా చదువుకుంటూనో లేక సరదాగా ఆటపాటల్లోనో, ఇంకా చెప్పాలంటే ఏ టిక్‌టాక్‌లోనో బిజీగా ఉంటుంది. కానీ షఫాలీ వర్మ దేశం మొత్తం ఆశలను మోస్తూ 86 వేలకు పైగా జనం మధ్యలో మైదానంలోకి దిగి ‘గార్డ్‌’ తీసుకుంది. గత మ్యాచ్‌ల తరహాలో ఈసారి ఆమె సఫలం కాలేదు. అంతకుముందు సునాయాస క్యాచ్‌ను వదిలేసి ప్రత్యర్థికి అవకాశం ఇచ్చిన అపరాధ భావం కూడా వెంటాడి ఉంటుంది. అందుకే ఆట ముగిశాక ఆ టీనేజర్‌ ఓటమి బాధను తట్టుకోలేకపోయింది. కన్నీళ్లపర్యంతమైన షఫాలీని ఓదార్చడం సహచరుల వల్ల కాలేదు. అయితే ఈ పరాజయం ఆమె ఒక్కదానిది కాదు. అంతర్జాతీయ అరంగేట్రం చేసిన ఈ ఆరు నెలల్లో షఫాలీ ఆశించిన దానికంటే అసాధారణ ప్రదర్శన కనబర్చింది. అసలు షఫాలీ ఆట లేకుండా మన టీమ్‌ తుది పోరు వరకు చేరేదా అనేది కూడా సందేహమే! ఎందుకంటే 5 ఇన్నింగ్స్‌లలో కలిపి షఫాలీ 163 పరుగులు చేస్తే... జట్టులో టాప్‌–3 బ్యాటర్లు అనదగ్గ స్మృతి, హర్మన్ కౌర్‌, జెమీమా కలిసి 14 ఇన్నింగ్స్‌లలో చేసిన పరుగులు 164 మాత్రమే.   ►ముఖ్యంగా గత కొంత కాలంగా హర్మన్, స్మృతి ఈ ఫార్మాట్‌లో అన్నీ తామే అయి జట్టును నడిపిస్తూ వచ్చారు. మిథాలీ రాజ్‌ను అసాధారణ పరిస్థితుల్లో పక్కకు నెట్టేసిన తర్వాత వీరిద్దరే కీలకంగా మారారు. పైగా బిగ్‌బాష్‌ లీగ్, కియా సూపర్‌ లీగ్‌లలో ఆడిన అనుభవంతో వరల్డ్‌కప్‌లో వీరిపై భారీ అంచనాలు ఉన్నాయి. అయితే ఐదు ఇన్నింగ్స్‌లలో నాలుగు సార్లు ‘సింగిల్‌ డిజిట్‌’కే పరిమితమైన హర్మన్‌కు పుట్టిన రోజు చేదు అనుభవాన్ని మిగిల్చింది. స్మృతి ఒక్క మ్యాచ్‌లోనూ 20 దాటలేకపోయింది. (చదవండి: మన వనిత... పరాజిత) ►షఫాలీకి ముందు సంచలన టీనేజర్‌గా వెలుగులోకి వచ్చిన జెమీమాకు ఆటపై శ్రద్ధ తగ్గినట్లుంది! బంగ్లాదేశ్‌పై మాత్రమే ఫర్వాలేదనిపించిన ఆమె ఫైనల్లో ఆడిన నిర్లక్ష్యపు షాట్‌ చూస్తే ఆశ్చర్యం కలుగుతుంది. ఈ ముగ్గురూ విఫలమైన చోట విశ్వ విజేతగా నిలవాలనుకోవడం అత్యాశే అవుతుందేమో.   ►బౌలింగ్‌లో భారత్‌ పూర్తిగా స్పిన్‌ బలగాన్నే నమ్ముకుంది. ప్లాన్‌ ‘బి’ లేకుండా మెగా టోర్నీలో ఒకే తరహా వ్యూహానికి కట్టుబడటం ఫైనల్లో నష్టం కలిగించింది. ఎంసీజీలాంటి ఫ్లాట్‌పిచ్‌పై అది పని చేయలేదు. మన పేస్‌ మరీ బలహీనంగా ఉండటం కూడా సమస్యగా మారింది.   ►మ్యాచ్‌ ఫీజుల పెంపు, కాంట్రాక్ట్‌లు, అలవెన్స్‌లు, ఇతర సౌకర్యాలు అత్యుత్తమ ప్రదర్శనకు హామీ ఇవ్వలేవు. ఇకపై సీరియస్‌గా మహిళల జట్టు ఆటను కూడా సమీక్షించాల్సిన అవసరం ఉంది. మహిళల క్రికెట్‌ను ముందుకు తీసుకెళ్లాలంటే ఫైనల్లో తప్పనిసరి గెలవాలని ఏమీ లేదు. ఇప్పుడు ఉన్న జోష్‌ను, జోరును కొనసాగించేందుకు బీసీసీఐకి ఇదే సరైన సమయం. ఎన్నో కష్టాలు దాటి ఇక్కడి వరకు వచ్చాననే కథలకు ఇక గుడ్‌బై చెప్పాలి. ఎందుకంటే ఇప్పుడు మహిళల క్రికెట్‌కు కూడా ప్రపంచ స్థాయి అత్యుత్తమ సౌకర్యాలు ఉన్నాయి. ఆసీస్‌ విజయానికి కారణంగా చెబుతున్న బిగ్‌బాష్‌ లీగ్‌ తరహాలో ఐపీఎల్‌ను నిర్వహించడం అంత సులువు కాదు. సీనియర్‌ స్థాయిలో కనీసం 40 మంది అగ్రశ్రేణి ప్లేయర్లు కూడా మనకు అందుబాటులో లేరు. అయితే ఇకపై ఎక్కువ విరామం లేకుండా దేశవాళీలో కూడా వీలైనన్ని ఎక్కువ టోర్నీలు నిర్వహించాల్సిన అవసరం ఉంది. షఫాలీ, రిచా ఘోష్‌లాంటి ప్లేయర్లు చాలెంజర్‌ ట్రోఫీ నుంచే వెలుగులోకి వచ్చారు.   చివరగా... తాజా పరాజయం బాధించవచ్చు. కానీ భవిష్యత్తులో మరింత ఎదిగేందుకు ఈ టోర్నీ ప్రదర్శన స్ఫూర్తిగా నిలవాలి తప్ప నిరాశగా మారిపోకూడదు. ఫైనల్‌ తర్వాత దిగ్గజ క్రికెటర్‌ బిషన్‌ సింగ్‌ బేడి చెప్పినట్లు... ‘కన్నీళ్లను ఎక్కడా బయటపడనీయవద్దు. ఓడినప్పుడైతే అసలే వద్దు’!   

మరో ప్రపంచ కప్‌ ఫైనల్‌... మళ్లీ అదే ఓటమి వ్యథ... విశ్వ వేదికపై భారత మహిళల క్రికెట్‌ జట్టు వేదన పునరావృతమైంది. గత వన్డే వరల్డ్‌ కప్‌ ఫైనల్లో చివరి వరకు పోరాడి పరాజయం వైపు ఉండిపోయిన మన బృందం ఈసారి టి20 వరల్డ్‌ కప్‌ ఫైనల్లో కూడా ఓటమి పక్షానే నిలవాల్సి వచ్చింది. రికార్డు సంఖ్యలో మైదానంలో 86,174 మంది ప్రేక్షకులు, అటు ప్రత్యర్థిగా ఆతిథ్య జట్టు, భారీ లక్ష్యం... అన్నీ కలగలిసి తీవ్ర ఒత్తిడిలో హర్మన్‌ బృందం కుప్పకూలింది. కనీస పోటీ కూడా ఇవ్వలేక చేతులెత్తేసిన తీరు అభిమానులను తీవ్ర నిరాశకు గురి చేసింది.  లీగ్‌ దశలో భారత్‌ చేతిలో ఓడినా... అసలు పోరులో ఆస్ట్రేలియా జూలు విదిల్చింది. లోపాలు సరిదిద్దుకొని సరైన వ్యూహంతో బరిలోకి దిగి భారత్‌ను దెబ్బ కొట్టింది. సొంతగడ్డపై తిరుగులేని ప్రదర్శనతో ఐదోసారి పొట్టి ప్రపంచ కప్‌ను తమ ఖాతాలో వేసుకుంది. ఓపెనర్లు హీలీ, మూనీ ఇచ్చిన ఆరంభం భారీ స్కోరుకు బాటలు వేయగా, బౌలింగ్‌లో మెగాన్‌ షూట్, జొనాసెన్‌ చెలరేగి ప్రత్యర్థి ఆటకట్టించారు. టోర్నీలో ప్రయాణం తడబడుతూనే సాగినా ... చివరకు తమ స్థాయిని ప్రదర్శించి ఆసీస్‌ ఐదోసారి జగజ్జేతగా నిలిచింది. మెల్‌బోర్న్‌: భారత మహిళల క్రికెట్‌ జట్టు ప్రపంచ విజేతగా నిలవాలంటే మరికొంత కాలం ఆగాల్సిందే! టి20 వరల్డ్‌ కప్‌లో తొలిసారి ఫైనల్‌ చేరి అరుదుగా లభించిన అవకాశాన్ని అందుకోవడంలో విఫలమైన మన జట్టు మళ్లీ రన్నరప్‌గానే ముగించింది. మెల్‌బోర్న్‌ క్రికెట్‌ గ్రౌండ్‌ (ఎంసీజీ)లో ఆదివారం జరిగిన ఫైనల్లో ఆస్ట్రేలియా 85 పరుగుల భారీ తేడాతో భారత్‌పై ఘన విజయం సాధించింది. టాస్‌ గెలిచి ముందుగా బ్యాటింగ్‌కు దిగిన ఆసీస్‌ 20 ఓవర్లలో 4 వికెట్ల నష్టానికి 184 పరుగులు చేసింది. ‘ప్లేయర్‌ ఆఫ్‌ ద మ్యాచ్‌’ అలీసా హీలీ (39 బంతుల్లో 75; 7 ఫోర్లు, 5 సిక్సర్లు)... ‘ప్లేయర్‌ ఆఫ్‌ ద టోర్నీ’ బెత్‌ మూనీ (54 బంతుల్లో 78 నా టౌట్‌; 10 ఫోర్లు) తొలి వికెట్‌కు 70 బంతుల్లోనే 115 పరుగులు జోడించి జట్టు విజయంలో కీలక పాత్ర పోషించారు. భారత్‌ 19.1 ఓవర్లలో 99 పరుగులకే ఆలౌటైంది. దీప్తి శర్మ (35 బంతుల్లో 33; 2 ఫోర్లు) మినహా అంతా విఫలమయ్యారు. షూట్‌ (4/18), జొనాసెన్‌ (3/20) భారత ఇన్నింగ్స్‌ పతనాన్ని శాసించారు. హీలీ విధ్వంసం...  స్పిన్‌ బలాన్ని నమ్ముకున్న భారత్‌... దీప్తి శర్మతో తొలి ఓవర్‌ వేయించింది. అయితే మొదటి బంతిని ముందుకు దూసుకొచ్చి ఆడి బౌండరీగా మలచిన హీలీ తన ఉద్దేశాన్ని స్పష్టం చేసింది. అదే ఓవర్లో మరో రెండు ఫోర్లు కొట్టిన హీలీ... శిఖా వేసిన తర్వాతి ఓవర్లో మరో రెండు ఫోర్లు కొట్టింది. పవర్‌ప్లే తర్వాత కూడా హీలీ దూకుడు తగ్గలేదు. రాజేశ్వరి వేసిన ఓవర్లో ఆమె వరుసగా రెండు సిక్సర్లు కొట్టింది. ఇందులో మొదటిది ఏకంగా 83 మీటర్ల దూరంలో పడింది! అనంతరం 30 బంతుల్లోనే ఆమె అర్ధ సెంచరీ పూర్తయింది. ఆ తర్వాత శిఖా వేసిన ఇన్నింగ్స్‌ 12వ ఓవర్లో హీలీ పండగ చేసుకుంది. వరుసగా మూడు బంతుల్లో ఆమె 6, 6, 6 బాదింది. ఈ ఓవర్లో మొత్తం 23 పరుగులు వచ్చాయి. తొలి వికెట్‌ భాగస్వామ్యం సెంచరీ దాటిన తర్వాత ఎట్టకేలకు రాధ యాదవ్‌ బౌలింగ్‌లో మరో భారీ షాట్‌ ఆడే ప్రయత్నంలో హీలీ అవుట్‌ కావడంతో భారత్‌ ఊపిరి పీల్చుకుంది. హీలీకి జతగా మరోవైపు మూనీ చక్కటి బ్యాటింగ్‌ ప్రదర్శన కనబర్చింది. ఆమె 41 బంతుల్లో హాఫ్‌ సెంచరీ పూర్తి చేసుకుంది. వీరిద్దరి తర్వాత వచ్చిన ఇతర బ్యాటర్‌లను నిలువరించడంలో భారత్‌ సఫలమైంది. ఫలితంగా చేతిలో 9 వికెట్లు ఉన్నా... చివరి 5 ఓవర్లలో ఆసీస్‌ 42 పరుగులే చేయగలిగింది. దీప్తి మినహా...  ఈ టోర్నీ తొలి మ్యాచ్‌లో షూట్‌ వేసిన మొదటి ఓవర్లో షఫాలీ 4 ఫోర్లతో 16 పరుగులు రాబట్టింది. కానీ ఈసారి షూట్‌ వంతు! తొలి ఓవర్‌ మూడో బంతికే హీలీ అద్భుత క్యాచ్‌కు షఫాలీ (2) వెనుదిరిగింది. జొనాసెన్‌ వేసిన రెండో ఓవర్లో మెడకు బంతి తగలడంతో తానియా (2) రిటైర్డ్‌హర్ట్‌గా నిష్క్రమించగా,  జెమీమా (0) పేలవ షాట్‌తో వెనుదిరిగింది. ఆ తర్వాత మాలినెక్స్‌ కూడా తన మొదటి ఓవర్లోనే స్మృతి (11) పని పట్టింది. జొనాసెన్‌ తర్వాతి ఓవర్లో డీప్‌లో క్యాచ్‌ ఇచ్చి కెప్టెన్‌ హర్మన్‌ కౌర్‌ (4) అవుట్‌ కావడంతో భారత్‌ గెలుపు ఆశలు సన్నగిల్లాయి. వేద (24 బంతుల్లో 19; 1 ఫోర్‌), తానియా స్థానంలో కన్‌కషన్‌ సబ్‌స్టిట్యూట్‌గా వచ్చిన రిచా ఘోష్‌ (18; 2 ఫోర్లు)తో కలిసి దీప్తి కొద్దిసేపు పోరాడే ప్రయత్నం చేసినా లాభం లేకపోయింది. ఆ రెండు క్యాచ్‌లు... ఆసీస్‌లాంటి జట్టుకు ‘లైఫ్‌’ ఇస్తే ఎలా ఉంటుందో ఫైనల్‌ మ్యాచ్‌ మళ్లీ చూపించింది. రెండుసార్లు తమకు వచ్చిన అవకాశాలను భారత్‌ జారవిడుచుకొని మూల్యం చెల్లించింది. తొలి ఓవర్‌ ఐదో బంతికి హీలీ వ్యక్తిగత స్కోరు 9 వద్ద ఇచ్చిన సునాయాస క్యాచ్‌ను కవర్స్‌లో షఫాలీ వర్మ వదిలేయగా... రాజేశ్వరి తన మొదటి ఓవర్లోనే మూనీ తన వ్యక్తిగత స్కోరు 8 వద్ద ఇచ్చిన రిటర్న్‌ క్యాచ్‌ను నేలపాలు చేసింది. వీరిద్దరే ఆ తర్వాత చెలరేగి భారత్‌ కథ ముగించారు. ►5 ఆస్ట్రేలియాకు ఇది 5వ ప్రపంచకప్‌ టైటిల్‌.  7 సార్లు టోర్నీ జరిగితే ఇంగ్లండ్, వెస్టిండీస్‌ ఒక్కోసారి నెగ్గాయి. ►30 అలీసా హీలీ అర్ధ సెంచరీకి తీసుకున్న బంతులు. ఏ ఐసీసీ టోర్నీ ఫైనల్లోనైనా (పురుషులతో సహా) ఇదే ఫాస్టెస్ట్‌ హాఫ్‌ సెంచరీ. ►184 ఫైనల్లో ఆసీస్‌  స్కోరు. ఏ టి20 ప్రపంచకప్‌లోనైనా (పురుషులతో సహా) ఇదే అత్యధిక స్కోరు. ►85 భారత్‌కు ఇది రెండో (85 పరుగులు) అతి పెద్ద పరాజయం. గతంలో దక్షిణాఫ్రికా చేతిలో 105 పరుగులతో ఓడింది. ►52 శిఖా పాండే ఇచ్చిన పరుగులు. ప్రపంచ కప్‌ మ్యాచ్‌లో ఒక బౌలర్‌ ఇచ్చిన అత్యధిక పరుగులు ఇవే. 86, 174 ఎంసీజీలో ఫైనల్‌ మ్యాచ్‌కు హాజరైన ప్రేక్షకుల సంఖ్య. ఒక మహిళల క్రికెట్‌ మ్యాచ్‌కు ఎక్కడైనా హాజరైన అత్యధిక ప్రేక్షకుల సంఖ్య ఇది కాగా... ఆస్ట్రేలియా గడ్డపై ఏ క్రీడాంశంలోనైనా మహిళల మ్యాచ్‌కు హాజరైన అత్యధిక ప్రేక్షకుల సంఖ్య కూడా ఇదే. స్కోరు వివరాలు ఆస్ట్రేలియా ఇన్నింగ్స్‌: అలీసా హీలీ (సి) వేద (బి) రాధ 75; బెత్‌ మూనీ (నాటౌట్‌) 78; మెగ్‌ లానింగ్‌ (సి) శిఖా పాండే (బి) దీప్తి శర్మ 16; గార్డ్‌నర్‌ (స్టంప్డ్‌) తానియా (బి) దీప్తి  శర్మ 2; హేన్స్‌ (బి) పూనమ్‌ 4; క్యారీ (నాటౌట్‌) 5; ఎక్స్‌ట్రాలు 4; మొత్తం (20 ఓవర్లలో 4 వికెట్లకు) 184.  వికెట్ల పతనం: 1–115; 2–154; 3–156; 4–176.  బౌలింగ్‌: దీప్తి శర్మ 4–0–38–2; శిఖా పాండే 4–0–52–0; రాజేశ్వరి 4–0–29–0; పూనమ్‌ యాదవ్‌ 4–0–30–1; రాధ యాదవ్‌ 4–0–34–1. భారత్‌ ఇన్నింగ్స్‌: షఫాలీ వర్మ (సి) అలీసా హీలీ (బి) షూట్‌ 2; స్మృతి మంధాన (సి) క్యారీ (బి) మాలినెక్స్‌ 11; తానియా (రిటైర్డ్‌హర్ట్‌) 2; జెమీమా రోడ్రిగ్స్‌ (సి) క్యారీ (బి) జొనాసెన్‌ 0; హర్మన్‌ప్రీత్‌ కౌర్‌ (సి) గార్డ్‌నర్‌ (బి) జొనాసెన్‌ 4; దీప్తి శర్మ (సి) మూనీ (బి) క్యారీ 33; వేద కృష్ణమూర్తి (సి) జొనాసెన్‌ (బి) కిమిన్స్‌ 19; రిచా ఘోష్‌ (సి) క్యారీ (బి) షూట్‌ 18; శిఖా పాండే (సి) మూనీ (బి) షూట్‌ 2; రాధ (సి) మూనీ (బి) జొనాసెన్‌ 1; పూనమ్‌ (సి) గార్డ్‌నర్‌ (బి) షూట్‌ 1; రాజేశ్వరి (నాటౌట్‌) 1; ఎక్స్‌ట్రాలు 5; మొత్తం (19.1 ఓవర్లలో ఆలౌట్‌) 99.  వికెట్ల పతనం: 1–2; 1–5 (రిటైర్డ్‌హర్ట్‌), 2–8; 3–18; 4–30; 5–58; 6–88; 7–92; 8–96; 9–97; 10–99.   బౌలింగ్‌: మెగాన్‌ షూట్‌ 3.1–0–18–4; జొనాసెన్‌ 4–0–20–3; మాలినెక్స్‌ 4–0–21–1; కిమిన్స్‌ 4–0–17–1; క్యారీ 4–0–23–1. 

ఐసీసీ మహిళల టీ20 ప్రపంచకప్‌-2020 ఫైనల్‌లో భారత్‌ ఓటమిపై టీం కెప్టెన్‌ హర్మన్‌ ప్రీత్‌కౌర్‌ స్పందించింది. మ్యాచ్‌ అనంతరం ఆమె మాట్లాడుతూ.. ప్రపంచకప్‌లో తమ జట్టు ఆటతీరుపై పూర్తిస్థాయిలో సంతృప్తిగా ఉన్నానని ఆశాభావం వ్యక్తం చేసింది. అలాగే టోర్నీఅంతా గొప్పగా రాణించి.. కీలకమైన ఫైనల్‌లో ఓడటం బాధకరమని పేర్కొంది. ‘ప్రస్తుతమున్న టీంపై ఎంతో నమ్మకముంది. రానున్న ఆరునెలల కాలం తమకు ఎంతో కీలకం. ఆటలో గెలుపోటములు సహజం. కొన్నిసార్లు విజయం సాధిస్తే.. మరికొన్ని సార్లు ఓటమి చవిచూడాల్సి వస్తుంది. అనుభవాల నుంచి ఎంతో నేర్చుకోవాలి. దురదృష్టవశాత్తూ ఫైనల్‌లో ఓడాం. భవిష్యత్తులో గొప్పగా రాణిస్తామన్న నమ్మకం నాకుంది’ అని వెల్లడించింది. కాగా టీ20 ప్రపంచకప్‌ ఫైనల్లో భాగంగా ఆదివారం టీమిండియాతో జరిగిన మ్యాచ్‌లో ఆసీస్‌ 85 పరుగుల తేడాతో ఘన విజయం సాధించిన విషయం తెలిసిందే.(ఈసారి కూడా చాంపియన్‌ ఆస్ట్రేలియానే)

మెల్‌బోర్న్‌: ఎన్నో ఆశలు.. మరెన్నో అంచనాలు.. అంతకుమించిన  ఆకాంక్షల మధ్య టీ20 ప్రపంచకప్‌ కోసం ఆస్ట్రేలియాలో అడుగుపెట్టిన భారత మహిళల జట్టు చివరి మెట్టుపై బోల్తా పడింది. లీగ్‌ దశలో అప్రతిహతవిజయాలతో దూసుకపోయిన హర్మన్‌ సేన.. ఫైనల్‌ పోరులో మాత్రం పూర్తిగా తేలిపోయింది. లీగ్‌ దశలో ఆల్‌రౌండ్‌ ప్రదర్శనతో ఆకట్టుకున్న భారత జట్టు.. టైటిల్‌ పోరులో అట్టర్‌ ఫ్లాఫ్‌ షోతో నిరుత్సాహపరిచింది. ముఖ్యంగా లీగ్‌ దశలో బ్యాటింగ్‌ భారాన్ని మోసిన యువ సంచలనం షఫాలీ వర్మ తుది పోరులో చేతులెత్తేసింది.  ఆస్ట్రేలియా భారీ లక్ష్యం నిర్దేశించినప్పటికీ షఫాలీ రూపంలో అందరిలోనూ ఓ ధైర్యం ఏర్పడింది. అభిమానులతో పాటు టీమ్‌ మేనేజ్‌మెంట్‌ సైతం పవర్‌ ప్లే ముగిసే వరకైన హరియాణ క్రికెటర్‌ క్రీజులో ఉండాలని కోరుకుంది. కానీ తొలి ఓవర్‌లోనే ఊహించని విధంగా అవుటై తీవ్ర నిరుత్సాహానికి గురిచేసింది. షఫాలీ అవుటవ్వడంతోనే టీమిండియా ఓటమికి పునాది రాయి పడిందని విశ్లేషకులు అభిప్రాయపడ్డారు. ఇక అవుటైన తీరు పట్ల ఈ యువ క్రికెటర్‌ తీవ్ర అసహనానికి గురై భారంగా క్రీజుల వదిలి వెళ్లింది.  ఈ క్రమంలో తను ఔటైన తర్వాత, ఓటమి తర్వాత షఫాలీ కన్నీటి పర్యంతమయ్యారు. అయితే సారథి హర్మన్‌ప్రీత్‌ కౌర్‌, సహచర క్రికెటర్లు ఆమెను ఓదార్చే ప్రయత్నం చేసినప్పటికీ వెక్కివెక్కి ఏడ్వసాగింది. ప్రస్తుతం షఫాలీ కన్నీరు పెట్టుకున్న ఫోటోలు, సోషల్‌ మీడియాలో వైరల్‌ అయ్యాయి. దీంతో నెటిజన్లు ఆమెకు బాసటగా నిలిచారు. ‘కేవలం పదహారేళ్ల వయసులోనే ప్రపంచ శ్రేణి బౌలర్లను గడగడలాడించావు. నీ ప్రతిభకు అనుభవం తోడైతే టీమిండియాకు మరెన్నో చిరస్మరణీయ విజయాలను అందిస్తావు. టైటిల్‌ గెలవకున్నా మా హృదయాలను గెలుచుకున్నారు’అంటూ ఓ నెటిజన్‌ కామెంట్‌ చేశాడు.    It's ok Shafali verma, you've achieved more than what a 16 year old can do 🔥🔥 don't be sad 😭😭 We are proud you shafali #T20WorldCup #INDvAUS #TeamIndia #T20WorldCupFinal pic.twitter.com/smd68dEp5s — Official Vikash Kumar Verma (@Officialverma5) March 8, 2020 చదవండి: ఈసారి కూడా చాంపియన్‌ ఆస్ట్రేలియానే షఫాలీ వర్మ అరుదైన ఘనత

మెల్‌బోర్న్‌: చాంపియన్‌ ఆట తీరుతో ఆస్ట్రేలియా మరోసారి మెరిసింది.. ఐసీసీ మహిళల టీ20 ప్రపంచకప్‌-2020 విజేతగా నిలిచింది. టీ20 ప్రపంచకప్‌ ఫైనల్లో భాగంగా ఆదివారం టీమిండియాతో జరిగిన మ్యాచ్‌లో ఆసీస్‌ 85 పరుగుల తేడాతో ఘన విజయం సాధించింది. తొలుత బ్యాటింగ్‌కు దిగిన ఆసీస్‌ నిర్ణీత ఓవర్లలో  4 వికెట్ల నష్టానికి 184 పరుగులు చేసింది.  స్టార్‌ బ్యాటర్‌ అలీసా హీలీ (75; 39 బంతుల్లో 7 ఫోర్లు, 5 సిక్సర్లు) విధ్వంసానికి తోడు.. మరో ఓపెనర్‌ బెత్‌ మూనీ (61 నాటౌట్‌; 43 బంతుల్లో 9ఫోర్లు) హాఫ్‌ సెంచరీతో రాణించారు. దీప్తి శర్మ రెండు వికెట్లు పడగొట్టింది. అనంతరం బ్యాటింగ్‌కు దిగిన టీమిండియా 19.1 ఓవర్లలో 99 పరుగులకు ఆలౌటైంది. ప్రధాన బ్యాటర్లు షషాలీ (2), మంధాన(11), రోడ్రిగ్స్‌(0), హర్మన్‌(4) ఘోరంగా నిరుత్సాహపరిచారు. చివర్లో దీప్తి శర్మ(33) రాణించడంతో టీమిండియా కనీసం గౌరవప్రదమైన స్కోర్‌నైనా సాధించింది. ఆసీస్‌ బౌలర్లలో మెగాన్‌ షూట్‌ నాలుగు వికెట్లతో టీమిండియా పతనాన్ని శాసించగా.. జోనాసన్‌ మూడు వికెట్లు పడగొట్టింది.  పోరాటం లేదు.. ఒత్తిడితో చిత్తు భారీ లక్ష్యంతో బరిలోకి దిగిన టీమిండియా గెలుపు వైపు పోరాటం సాగించలేదు. వరుసగా వికెట్లు కోల్పోవడంతో హర్మన్‌ సేన ఒత్తిడిని కొన్ని తెచ్చుకున్నట్టయింది. దీంతో కనీస ప్రదర్శనను కూడా బ్యాటర్లు ఇవ్వలేకపోయారు. షఫాలీ వర్మ నుంచి ఆరంభమైన వికెట్ల పతనం ఓటమి వరకు సాగుతూ వెళ్లింది. ఆసీస్‌ బ్యాటర్స్‌ రెచ్చిపో​యిన చోట.. మనోళ్లు తేలిపోయారు. ఏ ఒక్క బ్యాటర్‌ కూడా కడవరకు క్రీజులో నిలువలేకపోయారు. అనుభవమున్న హర్మన్‌, మంధాన, వేద కృష్ణమూర్తిలు సైతం ప్రత్యర్థికి దాసోహమయ్యారు. వీరిలో ఏ ఒక్కరు క్రీజులో ఉన్నా యువ ప్లేయర్స్‌ ధైర్యంగా ఆడేవారు.  ఆసీస్‌ చాంపియన్‌ ఆట.. ఫైనల్‌ పోరులో ఆస్ట్రేలియా చాంపియన్‌ ఆటను ప్రదర్శించింది. ఆల్‌రౌండ్‌ ప్రదర్శనతో టీమిండియాపై అన్ని విభాగాల్లో పై చేయి సాధించింది. తొలుత బ్యాటింగ్‌లో అదరగొట్టిన ఆసీస్‌ ప్లేయర్స్‌.. ఆ తర్వాత బౌలింగ్‌, ఫీల్డింగ్‌లో మెరిసిపోయారు. గెలిచే వరకు ఎక్కడా కూడా అలసత్వం ప్రదర్శించలేదు. దీంతో మహిళల టీ20 ప్రపంచకప్‌ గెలవడానికి అన్ని విధాల అర్హమైనదిగా నిలిచింది. దీంతో ఐదో సారి టీ20 ఫార్మట్‌లో జగజ్జేతగా నిలిచింది. మరోవైపు తొలి సారి ఫైనల్‌కు చేరిన టీమిండియాకు తీవ్రమైన నిరాశ తప్పలేదు.  చదవండి: థ్యాంక్యూ వసీం జాఫర్‌.. హార్దిక్‌ నామస్మరణతో మార్మోగిన స్టేడియం

మెల్‌బోర్న్‌: ఆస్ట్రేలియా నిర్దేశించిన 185 పరుగుల భారీ లక్ష్యంతో బరిలోకి దిగిన టీమిండియాకు ఆదిలోనే భారీ షాక్‌ తగిలింది. 30 పరుగులకే నాలుగు కీలక వికెట్లు కోల్పోయి పీకల్లోతు కష్టాల్లో పడింది. టీమిండియా బ్యాటింగ్‌​ ప్రారంభమైన మూడో బంతికే షఫాలీ వర్మ(2) పెవిలియన్‌ బాట పట్టింది. మెగాన్‌ షూట్‌ వేసిన బంతిని అంచనా వేడంలో విఫమైన షఫాలీ కీపర్‌ క్యాచ్‌ ఔట్‌ వెనుదిరిగారు. ఈ క్రమంలో అనూహ్యంగా క్రీజులోకి వచ్చిన తానియా భాటియా (2 రిటైర్డ్‌ హర్ట్‌) గాయం కారణంగా మైదానాన్ని వీడింది.  ఈ సమయంలో జట్టను ఆదుకుంటాదనుకున్న జెమీమా రోడ్రిగ్స్‌ (0) అత్యంత నిర్లక్ష్యపు షాట్‌తో వికెట్‌ పారేసుకుంది. దీంతో 8 పరుగులకే రెండు కీలక వికెట్లను టీమిండియా చేజార్చుకుంది. అయితే సీనియర్‌ బ్యాటర్‌ స్మృతి మంధాన రెండు ఫోర్లతో ఆశలు రేకెత్తించింది. అయితే సోఫియా ఊరిస్తూ వేసిన బంతికి మంధాన (11) బోల్తాపడింది. దీంతో స్టార్‌ బ్యాటర్లు వరుసగా పెవిలియన్‌కు క్యూ కట్టి టీమిండియా గెలుపు ఆశలపై నీళ్లు చల్లారు. అయితే కీలక సమయంలో ఆదుకుంటాదని భావించిన సారథి హర్మన్‌ (4) కూడా తీవ్రంగా నిరాశపరిచింది. అయితే ఇప్పటికే గెలుపుపై ఆశలు సన్నగిల్లినప్పటికీ.. మిగతా బ్యాటర్లు ఏ మేరకు ఆకట్టుకుంటారో చూడాలి. 

మెల్‌బోర్న్‌: స్టార్‌ బ్యాటర్‌ అలీసా హీలీ (75; 39 బంతుల్లో 7 ఫోర్లు, 5 సిక్సర్లు) విధ్వంసానికి తోడు.. మరో ఓపెనర్‌ బెత్‌ మూనీ (78 నాటౌట్‌; 54 బంతుల్లో 10ఫోర్లు) కూల్‌ హాఫ్‌ సెంచరీ సాధించడంతో ఆస్ట్రేలియా భారీ స్కోర్‌ నమోదు చేసింది. ఐసీసీ మహిళల టీ20 ప్రపంచకప్‌ ఫైనల్లో భాగంగా టీమిండియాకు 185 పరుగుల భారీ లక్ష్యాన్ని ఆసీస్‌ నిర్దేశించింది. ఈ భారీ లక్ష్యం పెద్దదయినా గెలిస్తే టీమిండియా నయా చరిత్ర సృష్టిస్తుంది. దీంతో యావత్‌ భారత్‌ టీమిండియా గెలవాలని ఆకాంక్షిస్తున్నారు.  టాస్‌ గెలిచి బ్యాటింగ్‌కు దిగిన ఆసీస్‌కు ఓపెనర్లు ఘనమైన ఆరంభాన్ని అందించారు. టీమిండియా పస లేని బౌలింగ్‌ చెత్త ఫీల్డింగ్‌ వారికి కలిసొచ్చింది. దీంతో ఆకాశమే హద్దుగా చెలరేగి ఆడారు. దీంతో ఓ క్రమంలో 200కు పైగా భారీ స్కోర్‌ నమోదు చేస్తారని భావించారు. అయితే చివర్లో తేరుకున్న భారత బౌలర్లు వరుసగా వికెట్లు పడగొట్టడంతో ఆసీస్‌ను కట్టడి చేయగలిగారు. దీంతో నిర్ణీత 20 ఓవర్లలో 4 వికెట్ల నష్టానికి 184 పరుగులు చేసింది. భారత బౌలర్లలో దీప్తి శర్మ రెండు, రాధా యాదవ్‌, పూనమ్‌ యాదవ్‌లు తలో వికెట్‌ పడగొట్టారు.    

మెల్‌బోర్న్‌: ఐసీసీ మహిళల టీ20 ప్రపంచకప్‌లో భాగంగా టీమిండియాతో జరుగుతున్న ఫైనల్‌ పోరులో ఆస్ట్రేలియా ఓపెనర్లు ఆకాశమే హద్దుగా చెలరేగి ఆడుతున్నారు. ముఖ్యంగా అలీసా హీలీ విధ్వంసం సృష్టిస్తోంది. ఓవర్‌కు కనీసం ఒకటి రెండు బౌండరీలు సాధిస్తూనే సింగిల్స్‌ తీస్తూ స్కోర్‌ బోర్డును పరుగులు పెట్టించారు. టీమిండియా పస లేని బౌలింగ్‌కు తోడు చెత్త ఫీల్డింగ్‌ ఆసీస్‌కు కలిసొచ్చింది.  ఈ క్రమంలో హీలీ 30 బంతుల్లోనే హాఫ్‌ సెంచరీ సాధించింది. హాఫ్‌ సెంచరీ తర్వాత మరింత రెచ్చిపోయిన హీలో వరుస బౌండరీలతో హోరెత్తించింది. ముఖ్యంగా శిఖా పాండే వేసిన 11వ ఓవర్‌లో హ్యాట్రిక్‌ సిక్సర్‌ సాధించింది. దీంతో ఈ ఓవర్‌లో ఏకంగా 23 పరుగులు పిండుకుంది. అయితే రాధా యాదవ్‌ వేసిన 12వ ఓవర్‌లో హీలీ(75; 39 బంతుల్లో 7 ఫోర్లు, 5 సిక్సర్లు) భారీ షాట్‌కు యత్నించి బౌండరీ లైన్‌ వద్ద క్యాచ్ ఔట్‌గా వెనుదిరిగింది. దీంతో తొలి వికెట్‌​కు 114 పరుగుల భాగస్వామ్యానికి తెరపడింది.  మరోవైపు బెత్‌ మూనీ కూడా హీలీ అండతో ధాటిగా బ్యాటింగ్‌ సాగించింది. ఈ క్రమంలో మూనీ కూడా 41 బంతుల్లో అర్థ సెంచరీ పూర్తి చేసుకుంది. ఆమెకు ఇది తొమ్మిదో టీ20 హాఫ్‌ సెంచరీ కావడం విశేం. హీలికి 9 పరుగుల వద్ద, మూనీలకు 4 పరుగుల వద్ద ఇచ్చిన క్యాచ్‌లను టీమిండియా ఫీల్డర్లు నేలపాలు చేశారు.  

మెల్‌బోర్న్‌: ఆస్ట్రేలియాతో జరుగుతున్న ఐసీసీ మహిళల టీ20 ప్రపంచకప్‌ ఫైనల్‌ మ్యాచ్‌లో టీమిండియాకు ఆశించిన శుభారంభం లభించలేదు. చెత్త ఫీల్డింగ్‌ కారణంగా టీమిండియా ప్లేయర్స్‌ ఆసీస్‌ ఓపెనర్లిద్దరికీ అవకాశం ఇచ్చారు. ఇన్నింగ్స్‌ ఆరంభంలోనే దొరికిన అవకాశంతో అలీసా హీలీ, బెత్‌ మూనీలు రెచ్చిపోతున్నారు. ఆసీస్‌ టాస్‌ గెలిచి బ్యాటింగ్‌ ఎంచుకోవడంతో అలీసా హీలీ, బెత్‌ మూనీలు బ్యాటింగ్‌కు దిగారు. దీప్తి శర్మ వేసిన తొలి ఓవర్‌లో హీలీ అటాకింగ్‌కు దిగింది. వరుస ఫోర్లతో రెచ్చిపోయింది.  అయితే  తొలి ఓవర్‌ల ఐదో బంతికి హీలీ ఇచ్చిన క్యాచ్‌ను షఫాలీ వర్మ జారవిడిచింది. దీంతో హీలీకి తొలి అవకాశం దక్కింది. హీలి ఇచ్చిన క్యాచ్‌ నేలపాలు చేసిని సమయంలో ఆమె చెసినవి 9 పరుగులు మాత్రమే. ఇక టీమిండియా మరో చెత్త ఫీల్డింగ్‌ కారణంగా మరో ఓపెనర్‌ బెత్‌ మూనికి కూడా లైఫ్‌ లభించింది. ఇన్నింగ్స్‌ నాలుగో ఓవర్‌లో మూనీ ఇచ్చిన రిటర్న్‌ క్యాచ్‌ను రాజేశ్వరి గైక్వాడ్‌ నేలపాలు చేసింది. ఈ సమయంలో మూని స్కోర్‌ 4 పరుగులు మాత్రమే. ఇక ఇన్నింగ్స్‌ ఆరంభం నుంచే ఓ వైపు బౌండరీలు బాదుతూనే మరోవైపు చకచకా సింగ్స్‌లు తీస్తూ స్కోర్‌ బోర్డును పరుగులు పెట్టించారు. 

మెల్‌బోర్న్‌ : ఐసీసీ మహిళల టీ20 ప్రపంచకప్‌ ఫైనల్‌ పోరులో ప్రపంచ నంబర్‌ వన్‌ ఆస్ట్రేలియాతో టీమిండియా అమీతుమీకి సిద్దమైంది. ఈ మ్యాచ్‌లో టాస్‌ గెలిచిన ఆసీస్‌ తొలుత బ్యాటింగ్‌ ఎంచుకుంది. కీలక ఫైనల్‌ పోరులో ఛేదనలో ఒత్తిడి ఉంటుందున్న ఉద్ధేశంతో టాస్‌ గెలిచిన ఆసీస్‌ సారథి మెగ్‌ లానింగ్‌ బ్యాటింగ్‌ వైపే మొగ్గు చూపింది. ఇక ఇరు జట్లలో ఎలాంటి మార్పులు చోటుచేసుకోలేదు. ఇక ఫైనల్‌ పోరులో టీమిండియా నయా సంచలనం షఫాలీ వర్మపైనే అందరి దృష్టి ఉంది. ఈ మ్యాచ్‌లో ఈ చిచ్చర పిడుగు ఏ రీతిలో బ్యాటింగ్‌ చేస్తుందో వేచి చూడాలి. సారథి హర్మన్‌ ప్రీత్‌ కౌర్‌ ఈ రోజు బర్త్‌డే. దీంతో బర్త్‌డే స్పెషల్‌ ఇన్నింగ్స్‌ ఆడాలని భావిస్తోంది.  మరోవైపు కీలకమైన మ్యాచ్‌కు ముందు తమ స్టార్‌ ప్లేయర్‌ ఎలీస్‌ పెర్రీ గాయంతో దూరం కావడం ఆసీస్‌కు పెద్ద దెబ్బ. అయితే కెప్టెన్‌ లానింగ్, బెత్‌ మూనీ, అలీసా హీలీలతో జట్టు బ్యాటింగ్‌ పటిష్టంగా ఉంది. బౌలింగ్‌లో ఆ జట్టు ప్రధానంగా జెస్‌ జొనాసన్, మెగాన్‌ షూట్‌లపై ఆధారపడుతోంది. కాగా,  మహిళల టీ20 ప్రపంచకప్‌ గెలిచి భారత మహిళలకు వుమెన్స్‌ డే కానుక ఇవ్వాలని టీమిండియా ఆటగాళ్లు భావిస్తున్నారు. వరుసగా ఆరోసారి ఫైనల్‌ చేరిన ఆసీస్‌ ఇప్పటికే నాలుగుసార్లు విజేతగా నిలవగా, భారత్‌ మొదటిసారి ఫైనల్‌ బరిలోకి దిగుతోంది. లీగ్‌ దశలో ఇరు జట్ల మధ్య జరిగిన పోరులో భారత్‌ గెలిచింది. చదవండి: మన క్రికెట్‌ మహిళా సైన్యం... ఆసీస్‌ పేసర్‌కు షఫాలీ భయం!

లక్ష మంది ప్రేక్షకులు... దాదాపు రెండేళ్ల క్రితం అంతర్జాతీయ క్రికెట్‌ మండలి (ఐసీసీ) మహిళల టి20 ప్రపంచ కప్‌–2020 ఫైనల్‌ వేదికను మెల్‌బోర్న్‌గా ప్రకటించినప్పుడు ఆశించిన సంఖ్య! మహిళా దినోత్సవం రోజున ఈ పోరును నిర్వహిస్తే అభిమానుల్లో ఆసక్తిని మరింత పెంచవచ్చని భావించిన నిర్వాహకుల ఆలోచన ఇప్పుడు సరిగ్గా కార్యరూపం దాలుస్తోంది. రికార్డు స్థాయిలో అభిమానుల హాజరయ్యే అవకాశం ఉన్న మెల్‌బోర్న్‌ క్రికెట్‌ గ్రౌండ్‌లో (ఎంసీజీ) రెండు అత్యుత్తమ జట్లు తుది పోరులో తలపడుతుండటంతో మహిళా క్రికెట్‌ చరిత్రలో ఎన్నడూ లేని క్రేజ్‌ ఈ ఫైనల్‌కు వచ్చేసింది. ఇక సమరం హోరాహోరీగా సాగడమే తరువాయి. మొదటిసారి ఫైనల్లోకి ప్రవేశించిన జట్టు ఒకవైపు... నాలుగు సార్లు ఇప్పటికే చాంపియన్‌గా నిలిచిన టీమ్‌ మరోవైపు. సమష్టితత్వంతో వరుస విజయాలు సాధించి భారత్‌ తుది పోరుకు అర్హత సాధించగా... తొలి మ్యాచ్‌ ఓటమిని దాటి తమదైన ప్రొఫెషనలిజంతో ఆస్ట్రేలియా ముందంజ వేసింది. తొలి టైటిల్‌ సాధించే లక్ష్యంతో హర్మన్‌ సేనపై కాస్త ఒత్తిడి ఉండగా, ఇప్పటికే ఇలాంటి ఫైనల్స్‌ ఆడిన అనుభవంతో రాటుదేలిన ఆడ కంగారూలు ప్రశాంతంగా కనిపిస్తున్నారు. ప్రపంచ వ్యాప్తంగా టీవీల ముందే కాదు... ఎంసీజీలో కూడా భారీ సంఖ్యలోనే హాజరయ్యే భారత అభిమానుల ప్రపంచకప్‌ కల నెరవేరుతుందా! మెల్‌బోర్న్‌: క్రికెట్‌ ప్రపంచంలో అత్యధిక ఆదరణ ఉన్న జట్టుకు, ప్రపంచ నంబర్‌వన్‌ జట్టుకు మధ్య విశ్వ వేదికపై తుది సమరానికి సమయం వచ్చేసింది. నేడు ఇక్కడి ఎంసీజీలో జరిగే మహిళల టి20 ప్రపంచకప్‌ ఫైనల్లో ఆతిథ్య ఆస్ట్రేలియాతో భారత జట్టు తలపడనుంది. వరుసగా ఆరోసారి ఫైనల్‌ చేరిన ఆసీస్‌ ఇప్పటికే నాలుగుసార్లు విజేతగా నిలవగా, భారత్‌  మొదటిసారి ఫైనల్‌ బరిలోకి దిగుతోంది. లీగ్‌ దశలో ఇరు జట్ల మధ్య జరిగిన పోరులో భారత్‌ గెలిచింది. గ్రూప్‌ ‘ఎ’లో భారత జట్టు ఆడిన అన్ని మ్యాచ్‌లలో విజయం సాధించి సెమీఫైనల్‌కు చేరుకుంది. ఇదే గ్రూప్‌లో భారత్‌ చేతిలో ఓడిన అనంతరం ఆస్ట్రేలియా మిగిలిన మూడు మ్యాచ్‌లలో నెగ్గింది. ఇంగ్లండ్‌తో జరిగిన సెమీఫైనల్‌ వర్షం కారణంగా రద్దు కావడంతో భారత్‌ ముందంజ వేయగా...సెమీస్‌లో దక్షిణాఫ్రికాను ఓడించిన డిఫెండింగ్‌ చాంపియన్‌ ఫైనల్‌కు అర్హత సాధించింది. గత కొన్నేళ్లుగా టి20ల్లో ఆసీస్‌ ఆధిపత్యం బాగా సాగింది. అయితే వారిని నిలవరించగలిగిన ఏకైక జట్టు భారత్‌ మాత్రమే. గత ఐదేళ్లలో ఇరు జట్ల మధ్య 10 మ్యాచ్‌లు జరిగితే భారత్‌ 5 గెలిచి, 5 ఓడింది. ఓడిన మ్యాచ్‌లతో సమాన సంఖ్యలో మరే జట్టు ఆసీస్‌పై గెలవలేకపోయింది. ఇటీవలి ముక్కోణపు టోర్నీతో కలిపి చూస్తే ఇరు జట్ల మధ్య జరిగిన ఐదు మ్యాచ్‌లో భారత్‌ 3 గెలిచి ఆధిక్యంలో ఉంది. అందుకే సొంత మైదానంలో ఆడుతున్నా సరే... తమకు విజయం అంత సులువు కాదని ఆసీస్‌కూ బాగా తెలుసు. కీలకమైన మ్యాచ్‌కు ముందు తమ స్టార్‌ ప్లేయర్‌ ఎలీస్‌ పెర్రీ గాయంతో దూరం కావడం ఆసీస్‌కు పెద్ద దెబ్బ. అయితే కెప్టెన్‌ లానింగ్, బెత్‌ మూనీ, అలీసా హీలీలతో జట్టు బ్యాటింగ్‌ పటిష్టంగా ఉంది. బౌలింగ్‌లో ఆ జట్టు ప్రధానంగా జెస్‌ జొనాసన్, మెగాన్‌ షూట్‌లపై     ఆధారపడుతోంది. భారత జట్టుకు మరోసారి సంచలన ఓపెనర్‌ షఫాలీ వర్మ ఇచ్చే ఆరంభం కీలకం కానుంది. ఆమె తనదైన శైలిలో చెలరేగితే ప్రత్యర్థి బౌలర్లకు ఇబ్బందులు తప్పవు. షఫాలీని నిలువరించేందుకు ఆసీస్‌ అన్ని ప్రయత్నాలు చేయడం ఖాయం. అయితే మిగతా బ్యాటర్ల ప్రదర్శన అంత గొప్పగా లేకపోవడం ఆందోళన కలిగించే అంశం. తుది పోరులోనైనా తమ స్థాయికి తగినట్లు కెప్టెన్‌ హర్మన్, స్మృతి, జెమీమా చెలరేగాల్సి ఉంది. లేదంటే గెలుపు ఆశలు నెరవేరడం కష్టం. బౌలింగ్‌లో మరోసారి భారత్‌ స్పిన్‌నే నమ్ముకుంది. తమ స్పిన్నర్లు ఈ టోర్నీలో కెప్టెన్‌ హర్మన్‌ ఉపయోగించిన తీరు ప్రశంసనీయం. ముఖ్యంగా పూనమ్‌ యాదవ్‌ తొలి మ్యాచ్‌లో ఆసీస్‌కు భారీ షాక్‌ ఇచ్చింది. కాబట్టి ఈసారి ఆమె కోసం వారు మరింత మెరుగ్గా సిద్ధమై రావడం ఖాయం. ఇతర స్పిన్నర్లు కూడా ఒత్తిడి పెంచగలిగితే ప్రత్యర్థిని నిలువరించవచ్చు. వర్షం లేదు!   సెమీస్‌లో పోలిస్తే సంతోషకర విషయం ఆదివారం మెల్‌బోర్న్‌లో ఎలాంటి వర్ష సూచన లేదు. మ్యాచ్‌కు ఏ సమయంలోనా ఇబ్బంది ఉండకపోవచ్చు. అనూహ్యంగా వర్షం పడినా ఫైనల్‌కు రిజర్వ్‌ డే ఉంది. పిచ్‌ కూడా సాధారణ బ్యాటింగ్‌ వికెట్‌. మంచి స్కోరింగ్‌కు అవకాశం ఉంది. వరల్డ్‌ కప్‌ ఫైనల్‌ ఒత్తిడి ఉంటుంది కాబట్టి టాస్‌ గెలిచిన జట్టు బ్యాటింగ్‌ ఎంచుకోవడం ఖాయం. ఫైనల్‌ చేరారిలా (భారత్‌) లీగ్‌ దశలో...  ►ఆస్ట్రేలియాపై 17 పరుగులతో విజయం  ►బంగ్లాదేశ్‌పై 18 పరుగులతో గెలుపు  ►న్యూజిలాండ్‌పై 3 పరుగులతో విజయం  ►శ్రీలంకపై ఏడు వికెట్లతో గెలుపు సెమీఫైనల్‌...  ►ఇంగ్లండ్‌తో జరగాల్సిన మ్యాచ్‌ వర్షం కారణంగా రద్దయింది. లీగ్‌ దశలో ఎక్కువ పాయింట్లు సాధించినందుకు భారత్‌ ఫైనల్‌ చేరింది. (ఆస్ట్రేలియా) లీగ్‌ దశలో...  ►భారత్‌ చేతిలో 17 పరుగులతో ఓటమి  ►శ్రీలంకపై 5 వికెట్లతో గెలుపు  ►బంగ్లాదేశ్‌పై 86 పరుగులతో విజయం  ►న్యూజిలాండ్‌పై 4 పరుగులతో గెలుపు సెమీఫైనల్‌...  దక్షిణాఫ్రికాపై 5 పరుగులతో విజయం టోర్నీలో భారత్‌ టాప్‌–3 బ్యాటర్లు   1. షఫాలీ వర్మ (161 పరుగులు)  2. జెమీమా (85)  3. దీప్తి శర్మ (84) టాప్‌–3 బౌలర్లు  1. పూనమ్‌ యాదవ్‌ (9 వికెట్లు)  2. శిఖా పాండే (7)  3. రాధా యాదవ్, రాజేశ్వరి (5) టోర్నీలో ఆస్ట్రేలియా టాప్‌–3 బ్యాటర్లు 1. మూనీ (181 పరుగులు)  2. హీలీ (161)  3. లానింగ్‌ (116) టాప్‌–3 బౌలర్లు  1. షూట్‌ (9 వికెట్లు)  2. జొనాసన్‌ (7)  3. వేర్‌హామ్, క్యారీ (3)

భారత మహిళలు గర్జించే రోజు వచ్చేసింది. కంగారూ జట్టును కంగారెత్తించి తొలిసారి విశ్వకిరీటం సొంతం చేసుకునేందుకు భారత బృందం విజయం దూరంలో ఉంది. లీగ్‌ దశ నుంచి అజేయంగా దూసుకుపోతున్న 15 మంది సభ్యుల భారత్‌ బృందంలో 9 మంది భారత్‌ ఆడిన 4 మ్యాచ్‌లలోనూ బరిలోకి దిగారు. స్మృతి మంధాన అనారోగ్యం కారణంగా 3 మ్యాచ్‌లకే పరిమితమవగా, ఆమె స్థానంలో రిచా ఘోష్‌ ఆడింది. హైదరాబాద్‌ పేసర్‌ అరుంధతి రెడ్డి 2 మ్యాచ్‌లు ఆడిన తర్వాత ఆమె స్థానంలో స్పిన్నర్‌ రాధా యాదవ్‌కు మరో 2 మ్యాచ్‌లలో అవకాశం కల్పించారు. ఇద్దరు ప్లేయర్లు హర్లీన్‌ డియోల్, పూజ వస్త్రకర్‌లకు మాత్రం మ్యాచ్‌ ఆడే అవకాశం రాలేదు. జగజ్జేతగా నిలిచేందుకు గెలుపు దూరంలో ఉన్న భారత బృందానికి సంబంధించిన క్లుప్త సమాచారం... హర్మన్‌ప్రీత్‌ కౌర్‌ (కెప్టెన్, బ్యాటర్‌)  వయసు: 31 ఏళ్లు స్వస్థలం: మోగా (పంజాబ్‌)  అనుభవం: 113 టి20లు (2009లో అరంగేట్రం)  విశేషాలు: 2016 నుంచి జట్టు సారథిగా ఉంది. గత టి20 ప్రపంచ కప్‌ టోర్నీలో సెమీస్‌ వెళ్లినప్పుడు కూడా కెప్టెన్‌గా వ్యవహరించింది. స్మృతి మంధాన (బ్యాటర్‌)  వయసు: 23 ఏళ్లు స్వస్థలం: సాంగ్లి (మహారాష్ట్ర)  అనుభవం: 74 టి20లు (2013లో అరంగేట్రం)  విశేషాలు: జట్టులో టాప్‌ బ్యాటర్‌. ఎన్నో చిరస్మరణీయ ఇన్నింగ్స్‌లు ఆడింది. బిగ్‌బాష్‌ లీగ్‌లో ఆడిన అనుభవముంది. జెమీమా రోడ్రిగ్స్‌ (బ్యాటర్‌)   వయసు: 19 ఏళ్లు స్వస్థలం: ముంబై  అనుభవం: 43 టి20లు (2018లో అరంగేట్రం)  విశేషాలు: జట్టులో ప్రధాన బ్యాటర్‌. దేశవాళీ వన్డేల్లో డబుల్‌ సెంచరీ చేసిన ఘనత. గత ప్రపంచకప్‌లో స్టాండవుట్‌ ప్లేయర్‌గా ఎంపిక. తానియా భాటియా (వికెట్‌కీపర్‌)  వయసు: 22 ఏళ్లు స్వస్థలం: చండీగఢ్‌   అనుభవం: 49 టి20లు (2018లో అరంగేట్రం)  విశేషాలు: 13 ఏళ్లకే పంజాబ్‌ సీనియర్‌ టీమ్‌లో ఆడింది. కీపింగ్‌ నైపుణ్యంతో జట్టులో రెగ్యులర్‌ సభ్యురాలు. శిఖా పాండే (పేస్‌ బౌలర్‌) వయసు: 31 ఏళ్లు స్వస్థలం: గోవా  అనుభవం: 49 టి20లు (2014లో అరంగేట్రం)  విశేషాలు: ఈ ప్రపంచకప్‌లో ఓపెనింగ్‌ బౌలర్‌గా కీలక పాత్ర పోషించింది. ఎయిర్‌ఫోర్స్‌లో ఫ్లయిట్‌ లెఫ్టినెంట్‌గా పని చేస్తోంది. పూనమ్‌ యాదవ్‌ (లెగ్‌స్పిన్నర్‌)   వయసు: 28 ఏళ్లు స్వస్థలం: ఆగ్రా (ఉత్తర ప్రదేశ్‌)  అనుభవం: 66 టి20లు (2013లో అరంగేట్రం)  విశేషాలు:  ఈ ఏడాది బీసీసీఐ అత్యుత్తమ క్రికెటర్‌గా ఎంపిక. గుగ్లీలతో ప్రత్యర్థులను బోల్తా కొట్టించే నైపుణ్యం సొంతం. అరుంధతి రెడ్డి (పేసర్‌)  వయసు: 22 ఏళ్లు స్వస్థలం: హైదరాబాద్‌  అనుభవం: 20 టి20లు (2018లో అరంగేట్రం)  విశేషాలు: తెలుగు రాష్ట్రాలనుంచి భారత జట్టులో ఉన్న ఏకైక ప్లేయర్‌. బంగ్లాదేశ్‌తో మ్యాచ్‌లో రాణించింది. హర్లీన్‌ డియోల్‌ (ఆల్‌రౌండర్‌) వయసు: 21 ఏళ్లు స్వస్థలం: చండీగఢ్‌   అనుభవం: 6 టి20లు (2019లో అరంగేట్రం)  విశేషాలు: దూకుడులో జూనియర్‌ హర్మన్‌గా గుర్తింపు ఉంది. దేశవాళీలో హిమాచల్‌కు ఆడుతుంది. వరల్డ్‌కప్‌లో మ్యాచ్‌ దక్కలేదు షఫాలీ వర్మ (బ్యాటర్‌) వయసు: 16 ఏళ్లు స్వస్థలం: రోహ్‌టక్‌ (హరియాణా)  అనుభవం: 18 టి20లు (2019లో అరంగేట్రం)  విశేషాలు:  సంచలన ప్రదర్శనతో ఐసీసీ నంబర్‌వన్‌ ర్యాంక్‌. ఈ టోర్నీలో భారత టాప్‌ స్కోరర్‌. దీప్తి శర్మ (ఆల్‌రౌండర్‌)  వయసు: 22 ఏళ్లు స్వస్థలం: ఆగ్రా (ఉత్తరప్రదేశ్‌)  అనుభవం: 47 టి20లు (2014లో అరంగేట్రం)  విశేషాలు: వన్డేల్లో ప్రపంచ రికార్డు పార్ట్‌నర్‌షిప్‌లో భాగస్వామి. వన్డేల్లో మూడో అత్యధిక వ్యక్తిగత స్కోరు (188) సాధించిన ఘనత. వేద కృష్ణమూర్తి (బ్యాటర్‌) వయసు: 27 ఏళ్లు స్వస్థలం: చిక్‌మగళూరు (కర్ణాటక)  అనుభవం: 75 టి20లు (2011లో అరంగేట్రం)  విశేషాలు: దూకుడుగా ఆడగల సమర్థురాలు. మంచి డ్యాన్సర్‌గా గుర్తింపు. కరాటేలో బ్లాక్‌బెల్ట్‌ కూడా. రాధ యాదవ్‌ (లెఫ్టార్మ్‌ స్పిన్నర్‌) వయసు: 20 ఏళ్లు స్వస్థలం: ముంబై  అనుభవం: 34 టి20లు (2018లో అరంగేట్రం)  విశేషాలు:  నిలకడగా వికెట్లు తీసే బౌలర్‌. కూరగాయలు అమ్మే తండ్రి ప్రోత్సాహంతో క్రికెటర్‌గా ఎదిగిన తీరు స్ఫూర్తిదాయకం. రాజేశ్వరి గైక్వాడ్‌ (లెఫ్టార్మ్‌ స్పిన్నర్‌)  వయసు: 28 ఏళ్లు స్వస్థలం: బిజాపూర్, కర్ణాటక  అనుభవం: 27 టి20లు (2014లో అరంగేట్రం)  విశేషాలు: నాలుగు మ్యాచుల్లోనూ రాణించింది. భారత్‌ తరఫున వన్డే వరల్డ్‌ కప్‌లో అత్యుత్తమ బౌలింగ్‌ ప్రదర్శన రికార్డు. రిచా ఘోష్‌ (బ్యాటర్‌)  వయసు: 16 ఏళ్లు స్వస్థలం: సిలిగురి (పశ్చిమ బెంగాల్‌)  అనుభవం: 2 టి20లు (ముక్కోణపు టోర్నీలో అరంగేట్రం చేసి, ప్రపంచకప్‌లో ఒకే మ్యాచ్‌ ఆడింది)   విశేషాలు: దూకుడుగా ఆడగల మరో టీనేజర్‌. పూజ వస్త్రకర్‌ (పేసర్‌)  వయసు: 20 ఏళ్లు స్వస్థలం: షహ్‌దోల్‌ (మధ్య ప్రదేశ్‌)  అనుభవం: 20 టి20లు (2018లో అరంగేట్రం)  విశేషాలు: పేసర్‌గా మంచి గుర్తింపు తెచ్చుకున్నా... వరుస గాయాలతో కెరీర్‌ నిలకడగా సాగలేదు. గత ప్రపంచకప్‌ ఆడింది.

న్యూఢిల్లీ : ఐసీసీ మహిళల టీ20 ప్రపంచకప్‌లో భారత్ ఫైనల్ చేరడంలో కీలక పాత్ర పోషించిన యువ సంచలనం, డాషింగ్‌ ఓపెనర్‌ షఫాలీ వర్మ అరుదైన ఛాన్స్‌ కొట్టేసింది. అనతి కాలంలోనే అభిమానుల్లో మంచి క్రేజ్‌ సంపాదించుకున్న షఫాలీ వర్మను ప్రముఖ శీతల పానీయాల సంస్థ 'పెప్సీ' తమ బ్రాండ్‌ అంబాసిడర్‌గా నియమించుకుంది. టీ 20 ప్రపంచకప్‌ ప్రదర్శనతో షఫాలీ వర్మ పాపులారిటీ ఒక్కసారిగా పెరిగిపోవడంతో  పలు కంపెనీలు ఆమెకు కోట్లు కుమ్మరించడానికి సిద్ధమయ్యాయి. (ఆసీస్‌ పేసర్‌కు షఫాలీ భయం!) ఈ నేపథ్యంలోనే షఫాలీ వర్మతో పెప్సీ ఒక సంవత్సరం పాటు ఒప్పందం కుదుర్చుకుంది. ప్రముఖ బ్రాండ్‌తో షఫాలీ కి ఇదే తొలి ఒప్పందం.ఒక ఐకానిక్‌ బ్రాండ్‌ పెప్సీతో ఒప్పందం చేసుకోవడం చాలా థ్రిల్లింగ్‌గా ఉంది. మంచి పేరున్న బ్రాండ్‌ 'పెప్సీ'తో అనుబంధం పంచుకోవడం చాలా ఆనందంగా ఉంది. ఈ సంతోషాన్ని ఎలా వ్యక్తపరచాలో అర్ధం కావట్లేదు. మహిళలు తమ జీవితానికి సంబంధించి అన్ని విభాగాల్లోనూ దూసుకుపోతున్నారు. ఇది మా కాళ్లపై మేం నిలబడాల్సిన తరుణం' అని షఫాలీ వర్మ అరుదైన ఘనతవర్మ పేర్కొంది.  ప్రపంచకప్‌ ఫైనల్లోనూ షఫాలీ తన ఫామ్‌ను కొనసాగిస్తూ భారత్‌ను విశ్వవిజేతగా నిలపాలని అభిమానులు ఆశాభావం వ్యక్తం చేశారు. కాగా మహిళల టీ20 ప్రపంచకప్‌లో భాగంగా మార్చి 8(ఆదివారం) జరిగే పైనల్లో  టీమిండియా  ఆస్ట్రేలియాతో తుది పోరుకు సిద్ధమైంది. గతేడాది సెప్టెంబర్ నెలలో అంతర్జాతీయ క్రికెట్లో అరంగేట్రం చేసిన 16 ఏళ్ల బ్యాటింగ్ సంచలనం షఫాలీ వర్మ ఆరు నెలల కాలంలోనే ప్రపంచ నంబర్‌వన్‌గా అవతరించిన సంగతి తెలిసిందే. తాజాగా ఐసీసీ విడుదల చేసిన టీ20 ర్యాంకింగ్స్‌లో అగ్ర స్థానాన్ని కైవసం చేసుకుంది. ప్రపంచకప్‌లో మూడు మ్యాచుల్లో 11 బౌండరీలు, 8 సిక్స్‌లతో మొత్తంగా 114 పరుగులు చేసి 172.7 స్టైక్‌రేట్‌ను నమోదు చేసిన విషయం తెలిసిందే. ఇక టీ20 మ్యాచ్‌లలో 146.96 స్ట్రైక్ రేట్‌తో 485 పరుగులు చేసింది. (నంబర్‌ 1 బ్యాటర్‌గా షఫాలీ.. ఐసీసీ స్పెషల్‌ ట్వీట్‌!)

సిడ్నీ: మహిళల టీ20 వరల్డ్‌కప్‌లో భారత జట్టు ఫైనల్‌కు అర్హత సాధించడాన్ని దక్షిణాఫ్రికా కెప్టెన్‌ డేన్‌ వాన్‌ నీకెర్క్‌ జీర్ణించుకోలేనట్లే కనబడుతోంది. గురువారం సిడ్నీ వేదికగా భారత్‌-ఇంగ్లండ్‌ జట్ల మధ్య జరగాల్సిన తొలి సెమీ ఫైనల్‌ మ్యాచ్‌ వర్షం కారణంగా రద్దయ్యింది. దాంతో గ్రూప్‌ స్టేజ్‌లో అత్యధిక విజయాలతో భారత్‌ నేరుగా ఫైనల్‌కు అర్హత సాధించింది. ఇక్కడ రిజర్వ్‌ డే లేకపోవడంతో అత్యధిక లీగ్‌ పాయింట్లను ప్రామాణికంగా తీసుకోవడంతో భారత్‌ ఫైనల్లో అడుగుపెట్టింది. దీనిపై సఫారీ మహిళా క్రికెట్‌ జట్టు కెప్టెన్‌ వాన్‌ నీకెర్క్‌ పరోక్షంగా సెటైర్లు వేశారు. ( ఫైనల్‌కు టీమిండియా తొలిసారి) ఆసీస్‌తో జరిగిన రెండో సెమీ ఫైనల్లో దక్షిణాఫ్రికా ఓడిపోయి టోర్నీ నిష్క్రమించిన తర్వాత నీకెర్క్‌ వ్యంగ్యంగా మాట్లాడారు. ఫ్రీగా ఫైనల్‌ చేరడం కంటే సెమీస్‌లో ఓడిపోవడమే బెటర్‌ అంటూ భారత్‌ జట్టును ఉద్దేశించి తన మనసులోని అక్కసును వెళ్లగక్కారు.  ‘నేను కూర్చొని అబద్ధాలు చెప్పదల్చుకోలేదు. మేము గెలిచి ఫైనల్స్‌కు  వెళ్లాలనే ప్రయత్నం చేశాం. వర్షం వల్ల ఆగిపోతే అత్యధిక విజయాలతో మేము ఫైనల్స్‌ వెళతామనే ఆలోచన లేదు. ఫ్రీగా ఫైనల్‌ పాస్‌ను సంపాదించడం కంటే ఆడి ఓడిపోవడమే బెటర్‌’ అని నీకెర్క్‌ తన అసహనాన్ని వ్యక్తం చేశారు.  అది మన చేతుల్లో లేదు: హర్హా భోగ్లే నీకెర్క్‌ వ్యాఖ్యలపై భారత కామెంటేటర్‌ హర్షాభోగ్లే స్పందించారు. మనం మ్యాచ్‌ ఆడి ఫైనల్‌కు  వెళ్లామా. లేక ఫ్రీ పాస్‌తోనా అనేది మన చేతుల్లో ఏమీ ఉండదన్నారు. ఎవరు ఫైనల్‌కు చేరినా ఫ్రీగా వెళ్లరనే విషయం గుర్తుంచుకోవాలన్నారు. గ్రూప్‌ స్టేజ్‌లో బాగా ఆడిన కారణంగానే ఫైనల్స్‌కు అర్హత సాధించారని నీకెర్క్‌ వ్యాఖ్యలను తిప్పికొట్టారు. (అప్పుడు బౌండరీలు... ఇప్పుడు లీగ్‌ పాయింట్లు!)

మెల్‌బోర్న్‌: మహిళల టీ20 వరల్డ్‌కప్‌ ఫైనల్లో భారత్‌-ఆస్ట్రేలియా జట్లు ఆదివారం అమీతుమీ తేల్చుకోనున్నాయి. ఇక్కడ ఆసీస్‌ డిఫెండింగ్‌ చాంపియన్‌ అయితే, భారత్‌ తొలిసారి ఈ మెగా టోర్నీలో ఫైనల్‌కు చేరింది. దాంతో పోరు ఆసక్తికరమే. కాకపోతే మహిళల టీ20 వరల్డ్‌కప్‌లో ఆరంభపు మ్యాచ్‌ భారత్‌-ఆసీస్‌ జట్ల మధ్య జరిగితే, ముగింపు మ్యాచ్‌ కూడా వీరి మధ్య జరగడం ఇక్కడ విశేషం. కాగా, భారత్‌తో ఫైనల్లో తలపడటాన్ని ఒకింత ద్వేషిస్తున్నట్లు ఆసీస్‌ ఫాస్ట్‌ బౌలర్‌ మెగాన్‌ స్కట్‌ పేర్కొన్నారు. ఇందుకు భారత మహిళా ఓపెనర్లు షఫాలీ వర్మ, స్మృతీ మంధానాలే కారణమట. వీరిద్దరికి బౌలింగ్‌ వేయాలంటే తనకు ఒక రకమైన భయం ఏర్పడిందని మెగాన్‌ స్కట్‌ స్పష్టం చేశారు. (ఆసీస్‌ ఆరోసారి...) ‘ భారత మహిళల జట్టుతో ఫైనల్స్‌ ఆడటాన్ని అసహ్యించుకుంటున్నా. ఎందుకంటే షఫాలీ, స్మృతీల బ్యాటింగ్‌ నాకు వణుకు పుట్టిస్తోంది. ప్రధానంగా షఫాలీ ఎఫెన్స్‌కు నా వద్ద సమాధానం ఉండకపోవచ్చు. స్మృతీ, షఫాలీలు భారత​ జట్టుకు వెన్నుముక. వారు బలమైన షాట్లతో దాడి చేస్తున్నారు. ఈ వరల్డ్‌కప్‌కు ముందు జరిగిన ముక్కోణపు సిరీస్‌లో షఫాలీ కొట్టిన సిక్స్‌.. నా కెరీర్‌లో నేను చూసిన అత్యుత్తమ సిక్స్‌. ప్రత్యేకంగా వారికి నేను బౌలింగ్‌ చేయడం అంత మంచి కాదేమో. ఆ జోడికి నా బౌలింగ్‌ కూడా సరైన మ్యాచింగ్‌ కూడా కాకపోవచ్చు. ప్రత్యేకంగా చెప్పాలంటే పవర్‌ ప్లేలో వారికి నేను జోడిని కాను. వారి కోసం ప్రణాళికలు సిద్ధం చేసుకుంటున్నా’ అని మెగాన్‌ స్కట్‌ పేర్కొన్నారు. నిన్న దక్షిణాఫ్రికాతో జరిగిన సెమీ ఫైనల్‌ మ్యాచ్‌లో స్కట్‌ రెండు వికెట్లు సాధించడంతో పాటు 17 పరుగులు మాత్రమే ఇచ్చి ఆసీస్‌ విజయంలో కీలక పాత్ర పోషించారు. అయితే టీమిండియాతో జరుగనున్న ఫైనల్లో మంధాన, షఫాలీలకు కచ్చితమైన బౌలింగ్‌ వేయకపోతే మూల్యం చెల్లించుకోవాల్సి వస్తుందనే ఆందోళనలో ఉన్నారు మెగాన్‌. ఇందుకు కారణం ఈ టోర్నీ ఆరంభపు మ్యాచ్. ఆ మ్యాచ్‌లో ఆసీస్‌పై భారత్‌ విజయం సాధించి సిరీస్‌ను ఘనంగా ఆరంభించింది.  అయితే ఆసీస్‌ మ్యాచ్‌లో స్కట్‌ వేసిన తన వ్యక్తిగత తొలి ఓవర్‌లో షఫాలీ ధాటికి బెంబేలెత్తిపోయింది. ఆ ఓవర్‌లో షఫాలీ నాలుగు ఫోర్లు కొట్టి మెగాన్‌కు చుక‍్కలు చూపించింది. ఇదే భయం ఇప్పుడు ఆమెను మరింత కలవర పెడుతున్నట్లు కనబడుతోంది. (తొలిసారి ఫైనల్లో భారత మహిళలు)

సిడ్నీ: గత ఏడాది పురుషుల వన్డే ప్రపంచకప్‌ను ఇంగ్లండ్‌ జట్టు ‘బౌండరీ కౌంట్‌’ ద్వారా గెలుచుకున్నప్పుడు న్యూజిలాండ్‌ జట్టు గుండె బద్దలైంది. ఇదేం నిబంధన అంటూ అంతర్జాతీయ క్రికెట్‌ మండలి (ఐసీసీ)పై క్రికెట్‌ ప్రపంచం ధ్వజమెత్తింది. అయితే నిబంధనల ప్రకారమే గెలిచాం కాబట్టి మమ్మల్ని తప్పు పట్టవద్దంటూ ఇంగ్లండ్‌ పదే పదే చెప్పుకోవాల్సి వచ్చింది. ఇప్పుడు ఐసీసీ పెట్టిన ‘నో రిజర్వ్‌ డే’ నిబంధన అదే ఇంగ్లండ్‌ మహిళల జట్టు కొంప ముంచింది. టి20 ప్రపంచకప్‌లోనే కాకుండా ఓవరాల్‌గా కూడా భారత్‌పై ఉన్న ఘనమైన రికార్డు, తాజా ఫామ్‌ను బట్టి ఈ మ్యాచ్‌లో గెలవగలమని భావించిన ఇంగ్లండ్‌కు నిరాశ తప్పలేదు. ఈ నిష్క్రమణ అనంతరం టీమ్‌ కెప్టెన్‌ హెథర్‌ నైట్‌తో సహా మాజీ క్రికెటర్లు మైకేల్‌ వాన్, స్టువర్ట్‌ బ్రాడ్‌లు రిజర్వ్‌ డే లేకపోవడాన్ని ప్రశ్నిస్తున్నారు. రెండు సందర్భాల్లోనూ ఐసీసీ పనితీరుపైనే సందేహాలు రేకెత్తాయి. (అలా అయితే కష్టమయ్యేది: హర్మన్‌ప్రీత్‌) మన వన్డే కెప్టెన్‌ మిథాలీ రాజ్‌ చెప్పినట్లు సగటు భారత అభిమానిగా భారత్‌ ఫైనల్‌ చేరడం సంతోషం కలిగిస్తున్నా... ఇలా ఆడకుండా ముందుకు వెళ్లడం మాత్రం నిరాశపర్చే అంశం. అసలు టి20 ప్రపంచ కప్‌ అంటే తక్కువ వ్యవధిలో ముగిసిపోవాలి కాబట్టి రెండు సెమీస్‌లకు రిజర్వ్‌ డే అంటే కష్టం అంటూ ఐసీసీ ఇచ్చిన వివరణే హాస్యాస్పదం. ప్రపంచకప్‌లాంటి టోర్నీ రెండు రోజులు పెరిగినా ఎవరికీ అభ్యంతరం ఉండదు. అయితే టోర్నీకి ముందు నిబంధనల గురించి కెప్టెన్ల అంగీకారం తీసుకునే విషయంలోనే అసలు సమస్య ఉంది. మనం ఫోన్‌లో యాప్‌ డౌన్‌లోడ్‌ చేసుకునేటప్పుడో, ఏదైనా వెబ్‌సైట్‌లు వీక్షించేందుకు ప్రయత్నించినప్పుడు పైనుంచి కింది వరకు సుదీర్ఘ నిబంధనలు ఉంటే అవేవీ చదవకుండా చివర్లో ‘ఐ అగ్రీ’ అంటూ ఓకే చేయడం అందరికీ అనుభవమే! వరల్డ్‌ కప్‌ విషయంలోనూ అలాగే జరిగినట్లు అనిపించింది. వివరాలు ఏమీ తెలియకుండా, ప్రశ్నలు అడగకుండా కెప్టెన్లు సంతకం చేసేశారు. (ఆసీస్‌ ఆరోసారి...) ఇప్పుడు రిజర్వ్‌ డే గురించి అడిగితే ఇది చూపించి నిబంధనల్లో లేదని, అందరూ అంగీకరించారని చెబుతూ ఐసీసీ తప్పించుకుంది. మరో మాజీ క్రికెటర్‌ ఇయాన్‌ బిషప్‌ మాత్రం ఇది అందరికీ ఒక పాఠం కావాలంటూ సూచన చేశాడు. ‘ఇకపై ఏదైనా టోర్నీ ప్రారంభానికి ముందు నిబంధనలు పూర్తిగా చదువుకోవాలని ఆటగాళ్లు, క్రికెట్‌ బోర్డులకు తెలియాలి. అయితే నిజాయితీగా చెప్పాలంటే అదృష్టాన్ని నమ్ముకోకుండా మెగా టోర్నీలో మీ రాతను మీరే రాసుకోమని కూడా ఇది నేర్పించింది. నాకౌట్‌ మ్యాచ్‌లకే కాదు... టోర్నీ ఆరంభంలోనూ బాగా ఆడాల్సిన అవసరం ఉందని అర్థమైంది. ఇది చూపించి ముందంజ వేసిన భారత్‌కు అభినందనలు’ అని బిషప్‌ వ్యాఖ్యానించాడు.  వర్షం వెంటాడినా సరే... అదృష్టవశాత్తూ కుదించిన మ్యాచ్‌తోనైనా సరే ఆతిథ్య ఆస్ట్రేలియా ఫైనల్‌ చేరింది. ఆ మ్యాచ్‌ కూడా రద్దయి ఉంటే ఇంగ్లండ్‌లాగే ఆసీస్‌ కూడా నిష్క్రమించాల్సి వచ్చేది.