‘పోటుగాడు’, ‘జేమ్స్ బాండ్’ చిత్రాల కథానాయిక సాక్షీ చౌదరి ప్రధాన పాత్రలో ‘ప్లేయర్’ ఫేం పర్వీన్ రాజ్, పూజిత జంటగా రొమాంటిక్ కామెడీ ఎంటర్‌టైనర్‌గా ఓ చిత్రం తెరకెక్కుతోంది. లార్డ్ శివ క్రియేషన్స్ పతాకంపై శేషసాయి మరుప్రోలు దర్శకత్వంలో ఎంవీఎస్ సాయి కృష్ణారెడ్డి నిర్మిస్తున్న ఈ చిత్రం రెండో షెడ్యూల్ జరుపుకుంటోంది.
 
 ఈ సందర్భంగా దర్శకుడు మాట్లాడుతూ -‘‘యువతరం ఆలోచనలు ఎలా ఉన్నాయి? వాటి వల్ల జరిగే నష్టం ఏంటి? ఆ ఆలోచనల నుంచి తమ పిల్లల్ని తల్లిదండ్రులు ఎలా కాపాడుకోవాలనే కథాంశంతో తెరకెక్కిస్తున్నాం. ఈ నెలాఖరుకు రెండో షెడ్యూల్ పూర్తి చేస్తాం’’ అని తెలిపారు. ‘‘క్వాలిటీ విషయంలో రాజీ పడకుండా తెరకెక్కిస్తున్నాం.
 
 సాక్షీ చౌదరి పాత్ర ఇందులో ఆకట్టుకునే విధంగా ఉంటుంది. అన్నివర్గాల ప్రేక్షకులకు నచ్చేలా తెరకెక్కిస్తున్నాం’’ అని నిర్మాత పేర్కొన్నారు. పోసాని కృష్ణమురళి, సప్తగిరి, పూజిత తదితరులు నటిస్తున్న ఈ చిత్రానికి సంగీతం: కిషన్ కవాడియా, కెమేరా: కె.శంకరరావు.


 చిన్ననాటి నుంచి తాను ప్రేమించిన అబ్బాయి మరో అమ్మాయిని ప్రేమించి మోసం చేశాడని తెలుసుకున్న  ఓ అమ్మాయి ఆవేశంలో ఏం చేసిందనే కథాంశంతో రూపొందుతోన్న చిత్రం ‘కొత్త కొత్తగా ఉన్నది’.  సమర్, అక్షిత, కిమయ నాయకానాయికలుగా సతీష్ గుండేటి దర్శకత్వంలో పేర్ల ప్రభాకర్, గోపి తౌట నిర్మిస్తున్నారు.   నిర్మాతలు మాట్లాడుతూ - ‘‘రొమాంటిక్ కామెడీ ఎంటర్‌టైనర్‌గా  ఈ  చిత్రం తెరకెక్కుతోంది.  త్వరలోనే  పాటలు విడుదల చేయనున్నాం’’ అన్నారు. ఈ చిత్రానికి సంగీతం: వంశీ, ఛాయాగ్రహణం: కృష్ణప్రసాద్.


  రొమాంటిక్ కామెడీ ఎంటర్‌టైనర్‌గా ప్రేక్షకులకు ఆద్యంతం వినోదం అందించేలా తెరకెక్కిన చిత్రం ‘నిన్నే కోరుకుంటా’. విజయ్‌భాస్కర్, వివేక్, పూజిత ముఖ్యతారలుగా మరిపి విద్యాసాగర్ నిర్మించిన ఈ చిత్రానికి గణమురళి దర్శకుడు. ఈ చిత్రం త్వరలో విడుదల కానుంది. ‘‘నేటి యువతీయువకుల మనస్తత్వాలకు అద్దం పట్టే చిత్రం ఇది. యూత్‌ఫుల్ కామెడీ ఎంటర్‌టైనర్‌గా ఈ చిత్రాన్ని తెరకెక్కించాం’’ అని నిర్మాత చెప్పారు. ఈ చిత్రానికి మాటలు: సాహు, ప్రకాశ్, మాధవ్, సంగీతం: ప్రణవ్.