నయనతార జీవిత ఆధారంగా ప్రముఖ ఓటీటీ సంస్థ నెట్‌ఫ్లిక్స్‌ తెరకెక్కించిన డ్యాక్యుమెంటరీ సిరీస్‌‘నయనతార: బియాండ్‌ ది ఫెయిరీ టేల్‌’. అమిత్‌ కృష్ణన్‌ దర్శకత్వం వహించిన ఈ సిరీస్‌ నేటి(నవంబర్‌ 18) నుంచి నెట్‌ఫ్లిక్స్‌లో స్ట్రీమింగ్‌ అవుతోంది. ఒక గంట ఇరవైరెండు నిమిషాల నిడివిగల ఈ డ్యాక్యుమెంటరీ సిరీస్‌ ఎలా ఉంది? అందులో ఏం చూపించారు?🔸నయనతార జీవితం మొత్తాన్ని ఓ బ్యూటిఫుల్‌ స్టోరీగా మలిచి తెరపై అందంగా చూపించే ప్రయత్నం చేసింది నెట్‌ఫ్లిక్స్‌🔸నయనతార చిన్నప్పటి ఫోటోలను చూపుతూ..ఆమె స్కూల్‌ డేస్‌ సీన్‌తో ఈ డ్యాక్యుమెంటరీ ప్రారంభం అవుతుంది.🔸ఆమెకు సినిమా చాన్స్‌ ఎలా వచ్చింది? మాలీవుడ్‌ నుంచి కోలీవుడ్‌కి ఎలా ఎంట్రీ ఇచ్చిందనేది ఆయాన డైరెక్టర్లతో చెప్పించారు.🔸కెరీర్‌ తొలినాళ్లతో నయనతార పడిన ఇబ్బందులను, బాడీ షేమింగ్‌ చేసినప్పుడు తను పడిన మానసిక క్షోభను పంచుకున్నారు.🔸తన పర్సనల్‌ లైఫ్‌పై వచ్చిన కొన్ని విమర్శల కారణంగా సినిమా చాన్స్‌లు కోల్పోయినా.. తిరిగి ఎలా ట్రాక్‌లోకి వచ్చారనేది ఆసక్తికరంగా తెలియజేశారు.🔸శ్రీరామరాజ్యం సినిమాలో సీత పాత్రకు నయనతారను తీసుకున్నప్పడు వచ్చిన విమర్శలను చూసి ఆమె ఎంత బాధపడిందనే విషయాలను ఆయా దర్శక నిర్మాతలతో చెప్పించారు.🔸తనపై వచ్చిన విమర్శలన్నింటిని పక్కన పడేసి.. ‘లేడీ సూపర్‌ స్టార్‌’గా ఎలా ఎదిగారనేది ఆసక్తికరంగా చూపించారు.🔸ఫస్టాఫ్‌ మొత్తం నయనతార బాల్యం, సినీ కెరీర్‌ని చూపించి..సెకండాఫ్‌లో విఘ్నేశ్‌తో ప్రేమాయణం ఎలా మొదలైంది? వివాహ జీవితం ఎలా ఉందనేది చూపించారు.🔸‘నానుమ్‌ రౌడీ దాన్‌’సమయంలో వీరిద్దరి మధ్య ఎలాంటి సంభాషణలు జరిగాయి? విఘ్నేశ్‌కి నయన్‌ ఎలాంటి సపోర్ట్‌ని అందించింది? ఎలా ప్రేమలో పడిపోయారనేది చక్కగా చూపించారు.🔸పెళ్లికి ముందు వీరిద్దరి రిలేషన్‌షిప్‌ ఎలా కొనసాగిందో అనేది వారి మాటల్లోనే చూపించారు. ప్రేమలో ఉన్నప్పడు వారిపై వచ్చిన మీమ్స్‌ గురించి కూడా సరదాగా పంచుకున్నారు.🔸గ్లాస్‌ హౌస్‌లోనే నయనతార ఎందుకు పెళ్లి చేసుకోవాలనుకున్నారు? పెళ్లి రోజు వీరిద్దరు ధరించిన దుస్తుల వెనున ఉన్న కథ, వాటిని తయారు చేయడానికి డిజైనర్లు పడిన కష్టాలను చూపించారు.🔸ఇక ఈ డ్యాక్యుమెంటరీ చివరల్లో నయనతార-విఘ్నేశ్‌ల కవల పిల్లలను చూపిస్తూ.. ఆహ్లాదకరమైన ముగింపును ఇచ్చారు.🔸మొత్తంగా ‘నయనతార: బియాండ్‌ ది ఫెయిరీ టేల్‌’ సిరీస్‌ సరదాగా సాగుతూ.. నయనతార లైఫ్‌లో చోటు చేసుకున్న కొన్ని వివాదాలు.. విమర్శలను చూపిస్తూనే..వాటిని ఎదుర్కొని ఎలా ‘లేడీ సూపర్‌స్టార్‌’గా ఎదిగారనేది చూపించారు.

‘‘నానుమ్‌ రౌడీదాన్‌’ (నేనూ రౌడీనే) సినిమా నా కెరీర్‌లో మర్చిపోలేని అనుభూతుల్ని మిగిల్చింది’’ అంటున్నారు హీరోయిన్‌ నయనతార. విజయ్‌ సేతుపతి, నయనతార జంటగా విఘ్నేశ్‌ శివన్‌ దర్శకత్వం వహించిన చిత్రం ‘నేనూ రౌడీనే’. 2015 అక్టోబరు 21న విడుదలైన ఈ సినిమా సూపర్‌ హిట్‌గా నిలిచింది. ఈ చిత్రం విడుదలై తొమ్మిదేళ్లు పూర్తయిన సందర్భంగా ఆ స్టిల్స్‌తో కూడిన ఓ వీడియోను సోషల్‌ మీడియా వేదికగా షేర్‌ చేశారు నయనతార. ‘‘నేనూ రౌడీనే’ సినిమా నా జీవితాన్ని పూర్తిగా మార్చింది.నా కెరీర్‌ను గొప్పగా మలుపు తిప్పిన ఈ చిత్రం తొమ్మిదేళ్ల కిత్రం విడుదలై అద్భుతమైన విజయాన్ని సొంతం చేసుకొని మరచిపోలేని అనుభూతుల్ని అందించింది. ఈ విషయంలో ప్రేక్షకులకు రుణపడి ఉంటాను. ఇలాంటి గొప్ప సినిమాలో అవకాశం ఇచ్చినందుకు విఘ్నేశ్‌కు కృతజ్ఞతలు. ఈ సినిమాతో నటిగా కొత్త అనుభవాలు నేర్చుకున్నాను. ఈ సినిమా నాకు విఘ్నేశ్‌ను ఇచ్చింది’’ అనిపోస్ట్‌ చేశారు.కాగా ‘నేనూ రౌడీనే’ సినిమా చిత్రీకరణ సమయంలోనే నయనతార, విఘ్నేశ్‌ల మధ్య స్నేహం మొదలైంది. ఆ తర్వాత ఆ స్నేహం ప్రేమగా మారింది. 2021లో తమ ప్రేమను వెల్లడించిన వీరు 2022 జూన్‌ 9న వివాహబంధంలోకి అడుగుపెట్టారు. వీరిద్దరికీ ఉయిర్, ఉలగ్‌ అనే ట్విన్స్‌ ఉన్నారు.

నయాగరా జలపాతంలోని ప్రవాహాలు ఎంత సుందరంగా ఉంటాయో, నయనతార అంత అందంగా ఉంటారని చెప్పవచ్చేమో. జీవితంలో ఎన్నో ఆటంకాలను ఎదురొడ్డి నటన అనే నిత్య ప్రవాహంలో తెలియాడుతున్న నటి నయనతార. దర్శకుడు విఘ్నేశ్‌ శివన్‌ను ప్రేమించి పెళ్లి చేసుకున్న ఈ పరువాల సుందరి సరోగసీ విధానం ద్వారా ఇద్దరు కవల పిల్లలకు తల్లి కూడా అయ్యారు. ఆ పిల్లలకు కావాల్సినంత అమ్మ ప్రేమను అందిస్తూనే అగ్ర కథానాయకిగా కొనసాగుతున్నారు. మరో పక్క వాణిజ్య ప్రకటనల్లో నటిస్తూ, సొంత వ్యాపారాలను లాభాల బాటలో నడిపిస్తూ, నిర్మాతగానూ కొనసాగుతూ దటీజ్‌ నయనతార అనిపించుకుంటున్నారు. ఇకపోతే వేడుక ఏదైనా, ఎవరిదైనా నయనతార, విఘ్నేశ్‌ శివన్‌ దంపతులు తమ ప్రత్యేకతను చాటుకుంటారు. ఇటీవల ముంబయిలో అంబానీ ఇంట జరిగిన వివాహ వేడుకలోనూ నయనతార, విఘ్నేశ్‌ శివన్‌ కలిసి ప్రత్యేకంగా రొమాంటిక్‌ ఫోజులతో ఫొటోలు దిగి నెటిజన్లకు పని చెప్పారు. ఇకపోతే నటిగానూ బిజీగా ఉన్న నయనతార ప్రస్తుతం తమిళంలో టెస్ట్, మన్నాంగట్టి చిత్రాలను పూర్తి చేశారు. మలయాళంలో నివిన్‌బాలి సరసన ఒక చిత్రం చేస్తున్నారు. యష్‌కు జంటగా కన్నడంలో టాక్సీస్‌ చిత్రంలో నటించడానికి కమిట్‌ అయ్యారు. అలాగే త్వరలో మూక్తుత్తి అమ్మన్‌–2 చిత్రంలో నటించడానికి సిద్ధం అవుతున్నారు. వీటితో పాటు మరో చిత్రానికి నయనతార పచ్చజెండా ఊపినట్లు తాజా సమాచారం. ప్రిన్స్‌ పిక్చర్స్‌ పతాకంపై రూపొందనున్న ఈ ఉమెన్‌ సెంట్రిక్‌ కథా చిత్రంలో నయనతార కథానాయకిగా నటించనున్నట్లు తెలిసింది. భరద్వాజ్‌ రంగన్‌ కథను అందిస్తున్న ఈ చిత్రానికి సర్జన్‌ కేఎం దర్శకత్వం వహించనున్నట్లు సమాచారం. దీనికి సంబంధించిన పూర్తి వివరాలు త్వరలోనే వెలువడే అవకాశం ఉంది.

మహారాజా చిత్రంతో మరో సూపర్‌ హిట్‌ అందుకున్నాడు విజయ్‌ సేతుపతి. తన కెరీర్‌లో 50వ చిత్రం ఇంతటి ఘన విజయం సాధించడంతో విజయ్‌ సేతుపతి ఆనందం వ్యక్తం చేశాడు.అంతేకాదు ఈ సినిమాను జనాల్లోకి తీసుకెళ్లడానికి వరుస ఇంటర్వ్యూలు ఇస్తున్నాడు. తాజాగా ఓ చానల్‌కి ఇచ్చిన ఇంటర్వ్యూలో నయనతార భర్త, దర్శకుడు విఘ్నేశ్‌ శివన్‌తో జరిగిన గొడవపై స్పందించాడు. అతన్ని అపార్థం చేసుకోవడం వల్లే గొడవ జరిగిందని చెప్పారు.(చదవండి: మహారాజా మూవీ రివ్యూ)‘నానుమ్‌ రౌడీ థాన్‌’(తెలుగులో నేను రౌడీ) సినిమా షూటింగ్‌ మొదటి రోజే విఘ్నేశ్‌తో గొడవ జరిగింది. ఆ రోజు సాయంత్రం నేనే అతని ఫోన్‌ చేసి ‘నువ్వు నాకు నటన నేర్పుతున్నావా?’అని గట్టిగా అరిచాను. నాలుగు రోజుల తర్వాత నయనతార వచ్చి మా ఇద్దరికి నచ్చచెప్పింది. వాస్తవానికి నేను విక్కిని సరిగా అర్థం చేసుకోలేదు. స్క్రిప్ట్‌ చెప్పినప్పుడు కొత్తగా అనిపించి వెంటనే ఓకే చెప్పాను. కానీ షూటింగ్‌ రోజు ఆయన అంచనాకు తగ్గట్టుగా నటించలేదు. మొదటి నాలుగు రోజు నా పాత్రను సరిగా అర్థం చేసుకోలేకపోయాను. కొన్ని సన్నివేశాల్లో నటించినప్పుడు అభద్రతాభావానికి గురయ్యాను. ఒకరికొకరం అర్థం చేసుకున్నాక.. షూటింగ్‌ సాఫీగా సాగిపోయింది. విఘ్నేశ్‌ టాలెంట్‌ ఉన్న దర్శకుడు. ఎవరు టచ్‌ చేయని కథలను గొప్పగా తీయగలడు. ఇప్పడు మేమిద్దరం మంచి స్నేహితులయ్యాం’అని విజయ్‌ సేతుపతి చెప్పుకొచ్చాడు.

నటి నయనతా, విఘ్నేశ్‌ శివన్‌ దంపతులు బుధవారం ఉదయం తమ కులదైవాన్ని దర్శించుకున్నారు. వివరాలు.. గత ఏడాది అక్టోబర్‌ 9న సరోగసీ విధానం ద్వారా వీరు కవల పిల్లలకు తల్లిదండ్రులైన విషయం తెలిసిందే. కాగా ఆ పిల్లలకు ఇటీవల ఒక వేదికపై ఉయిర్‌ రుద్రోనీల్‌ ఎన్‌.శివన్, ఉలగ్‌ దైవీక్‌ ఎన్‌.శివన్‌ అనే పేర్లు పెట్టినట్లు పేర్కొన్నారు. ఈ నేపథ్యంలో ఈ దంపతులు బుధవారం ఉదయం తంజావూర్‌ జిల్లా పాపనాశం సమీపంలోని కులదైవం మేలవళత్తూర్‌ ఆట్రంగరై శ్రీ కాంచి కామాక్షి అమ్మవారి ఆలయంలో ప్రత్యేక పూజలు నిర్వహించారు. అదేవిధంగా తమ పిల్లల నామకరణ కార్యక్రమాన్ని నిర్వహించారు. తమ పిల్లల శ్రేయస్సు కోసం తమ చిత్రాల విజయాల కోసం ప్రార్థించి ప్రత్యేక పూజలు చేశారు. ప్రస్తుతం నయనతార హిందీలో అట్లీ దర్శకత్వంలో షారూఖ్‌ఖాన్‌కు జంటగా జవాన్‌ చిత్రంలో నటిస్తున్నారు. త్వరలో తన 75వ చిత్రంలో నటించడానికి సిద్ధం అవుతున్నారు. వీటితో పాటు నటుడు లారెన్స్‌ కథానాయకుడిగా నటించనున్న  చిత్రంలోనూ నటించడానికి పచ్చజెండా ఊపారు. ఈ చిత్రాన్ని దర్శకుడు లోకేశ్‌కనకరాజ్‌ నిర్మించనున్నారు. అదేవిధంగా దర్శకుడు విఘ్నేశ్‌ శివన్‌ అజిత్‌ హీరోగా చేయాల్సిన చిత్రం చేజారిపోయిన విషయం తెలిసిందే. తాజాగా నటుడు కమలహాసన్‌ నిర్మించనున్న చిత్రానికి దర్శకత్వం వహించడానికి సిద్ధం అవుతున్నట్లు, ఇందులో దర్శకుడు ప్రదీప్‌ రంగనాథన్‌ హీరోగా నటించనున్నట్లు ప్రచారం జరుగుతోంది.    @VigneshShivN #Nayanthara #trichy 🥰💖🔥 pic.twitter.com/YiokeYK7Gp — JADEJA SYED (@jadeja_syed) April 5, 2023

నయనతార భర్త, ప్రముఖ దర్శకుడు విఘ్నేష్‌ శివన్‌ చేసిన ఒక పని ఇప్పుడు చర్చనీయాంశంగా మారింది. ఆయన ఎందుకు అలా చేశాడు? ఇక ఆ జోడీ  కుదరనట్టేనా అని నెటిజన్స్‌ చర్చిస్తున్నారు. వివరాల్లోకి వెళితే.. కాతువాకుల రెండు కాదల్‌ చిత్రం తర్వాత కోలీవుడ్‌ స్టార్‌ అజిత్‌తో విఘ్నేష్‌ ఓ సినిమా తెరకెక్కించబోతున్నట్లు ప్రకటించిన సంగతి తెలిసిందే. అజిత్‌ కెరీర్‌లో ఇది 62వ సినిమా(AK62). ప్రముఖ నిర్మాణ సంస్థ లైకా ప్రొడక్షన్స్‌ భారీ స్థాయిలో ఈ చిత్రాన్ని నిర్మించబోతున్నట్లు ప్రకటించింది. దీంతో ఈసినిమా కోసం అజిత్‌ ప్రేక్షకులు ఎంతో ఆతృతగా ఎదురు చూస్తున్నారు. ఈ నేపథ్యంలో విఘ్నేష్‌ చేసిన ఓ పని పలు అనుమానాలకు తావిస్తోంది. విఘ్నేష్‌ ఈ ప్రాజెక్ట్‌ నుంచి వైదొలగినట్లు గతంలో వార్తలు వినిపించాయి. ఇప్పుడు ఆ వార్తలు నిజమే అన్నట్లుగా.. విఘ్నేష్‌ తన ట్విటర్‌ బయో  నుంచి AK 62 అనే పేరును గొలగించాడు. దీంతో నిజంగానే  ఆ సినిమా నుంచి విఘ్నేష్‌ తప్పుకున్నాడా? ఇక ఈ కాంబోలో సినిమా రాదా? అని నెటిజన్స్‌ చర్చించుకుంటున్నారు. అయితే నిర్మాణ సంస్థ మాత్రం ఈ విషయంపై ఎలాంటి ప్రకటన ఇవ్వకపోవడం గమనార్హం. కాగా లైకా ప్రొడక్షన్స్‌ మాత్రం పక్కా ఈ సినిమాను తెరకెక్కించబోతున్నట్లు తెలుస్తోంది. ఇప్పటికే ఈ సినిమా కోసం హీరోయిన్‌ని కూడా సెలెక్ట్‌ చేశారట. ఈ చిత్రంలో అజిత్‌ సరసన ఇద్దరు హీరోయిన్లు నటించనున్నారని, అందులో నటి ఐశ్వర్యరాయ్‌ ఒకరు కాగా, రెండో హీరోయిన్‌గా నటి కీర్తి సురేశ్‌ను ఎంపిక చేసినట్లు ప్రచారం జరుగుతోంది.

తమిళ సినిమా: ప్రముఖ సినీ నటి నయనతార, సినీ దర్శకుడు విఘ్నేష్‌ శివన్‌ దంపతులు సరోగసీ వివాదానికి పుల్‌స్టాప్‌ పడినట్లు కనిపిస్తోంది. నిబంధనలకు విరుద్ధంగా వారు సరోగసీ విధానంలో కవల పిల్లలకు తల్లిదండ్రులు కావడంపై దుమారం రేగుతున్న విషయం తెలిసిందే. దీనిపై దర్యాప్తు జరిపి నివేదిక సమర్పించేందుకు తమిళనాడు ప్రభుత్వం త్రిసభ్య కమిటీని ఏర్పాటు చేసింది. ఈ కమిటీ విచారణ కూడా చేపట్టింది. నయనతార తన సరోగసీ విధానానికి సంబంధించిన పూర్తి ఆధారాలను కమిటీకి సమర్పించినట్లు విశ్వసనీయంగా తెలిసింది. తాము ఆరేళ్ల క్రితమే రిజిస్టర్‌ మేరేజ్‌ చేసుకున్నట్లు ధ్రువీకరించే సర్టిఫికెట్లను నయనతార ఆ కమిటీకి అందించినట్లు సమాచారం. అదే విధంగా గత డిసెంబర్‌లో అద్దె గర్భం కోసం రిజిస్టర్‌ చేసుకుని.. ఇద్దరు మగ కవల పిల్లలకు జన్మనిచ్చినట్లు పేర్కొన్నారు. మరోవైపు సరోగసి విధానం ద్వారా తల్లిదండ్రులు కావాలంటే వివాహమై ఐదేళ్లు పూర్తి కావాల్సి ఉంది.

కోలీవుడ్ డైరెక్టర్ విఘ్నేశ్ శివన్ తో పెళ్లి తర్వాత నయనతారలో మార్పు మొదలైనట్లు తెలుస్తోంది. సినిమాల విషయంలో దర్శకనిర్మాతలకు ఆమె కొత్త కండీషన్స్‌ పెడుతున్నట్లు తమిళ సినీ వర్గాలు చెబుతున్నాయి. ఇకపై తనని సంప్రదించబోయే దర్శకనిర్మాతలు గ్లామర్ రోల్స్‌ కోసం కాకుండా ఉమెన్‌ సెంట్రిక్‌ మూవీస్‌తో తన దగ్గరికి రావాలన్నట్లు నయన్‌ కండీషన్‌ పెట్టిందట.  (చదవండి: బొట్టు పెట్టి..చేతిలో చీరపెట్టారు.. సాయి పల్లవి ఎమోషనల్‌) నిజానికి కొంత కాలంగా నయన్ గ్లామర్స్ రోల్స్ దూరంగా ఉంటోంది. స్టార్‌ హీరోలతో నటిస్తున్న మూవీస్ లో సైతం నయన్ కొన్ని లిమిట్స్ పెట్టుకుని నటించింది.ఎక్కువ శాతం ఉమెన్ సెంట్రిక్ మూవీస్ కు ప్రాధాన్యత ఇస్తూ వచ్చింది.పెళ్లి తర్వాత సినిమాలకు దూరం కాకపోయినా సెలక్టెడ్ గా మూవీస్ చేయాలనుకుంటోంది నయన్. ప్రస్తుతం నయన్ చేతిలో తెలుగు,తమిళ,హిందీ ప్రాజెక్ట్స్ ఉన్నాయి. వీటికి మాత్రం ఎలాంటి అబ్జెక్షన్ లేదని నయన్ తెలిపినట్లు సమాచారం. ఫ్యూచర్ ప్రాజెక్ట్ పై మాత్రమే కండీషన్స్ అప్లై అంటోందట లేడీ సూపర్ స్టార్. ప్రస్తుతం నయన్‌ షారుఖ్ ఖాన్ తో జవాన్ లో నటిస్తోంది. అలాగే గాడ్ ఫాదర్ లోచిరుతో కలసి స్క్రీన్‌ షేర్‌ చేసుకోబోతుంది.

కోలీవుడ్‌ లవ్‌బర్డ్స్‌ నయనతార, విఘ్నేశ్‌ శివన్‌లు త్వరలోనే వివాహ బంధంలోకి అడుగుపెట్టబోతున్నారు. తమ ప్రేమ ప్రయాణానికి ముగింపు పలికి.. పెళ్లి బంధం కొత్త జీవితాన్ని ప్రారంభించడానికి సిద్దమైనట్లు తెలుస్తోంది.ఇప్పటికే పెళ్లి డేట్‌, ప్లేస్‌ కూడా ఫిక్స్‌ చేసుకున్నారట. జూన్‌ 9న, పవిత్ర పుణ్యక్షేత్రం తిరుమల తిరుపతిలో నయన్‌, విఘ్నేశ్‌ల వివాహం జరగబోతున్నుట్ల తెలుస్తుంది. ఇందులో భాగంగానే  పెళ్లి వేదికను బుక్‌ చేసుకునేందుకే నయన్‌, విఘ్నేశ్‌లు శనివారం తిరుమల వచ్చినట్లు సమాచారం. అయితే తమ పెళ్లి గురించి వస్తోన్న వార్తలపై నయన్‌ కానీ, విఘ్నేశ్‌ కానీ ఇప్పటివరకూ అధికారికంగా ఎలాంటి ప్రకటన చేయలేదు. 'నేనూ రౌడీనే' సినిమా షూటింగ్‌ సమయంలో నయన్‌కు విఘ్నేశ్‌తో పరిచయం ఏర్పడింది. కొన్నాళ్ల తర్వాత ఆ పరిచయం కాస్త ప్రేమగా మారింది. వీరు కలిసి దిగిన పలు ఫొటోలను విఘ్నేశ్‌.. అప్పుడప్పుడు ఇన్‌స్టాలో పంచుకుంటూ ఉంటాడు. తాజాగా విఘ్నేశ్‌ దర్శకత్వం వహించిన  'కాతు వాకుల రెండు కాదల్‌' చిత్రంలో నయనతార నటించిన విషయం తెలిసిందే. విజయ్‌ సేతుపతి, సమంత ప్రధాన పాత్రల్లో నటించిన ఈ చిత్రం ఏప్రిల్‌ 28న విడుదలై.. బాక్సాఫీస్‌ వద్ద ఆశించిన స్థాయిలో కలెక్షన్లను రాబట్టలేకపోయింది. 

ప్రపంచ వ్యాప్తంగా ఎంతో ప్రతిష్టాత్మకంగా భావించే అవార్డు ‘ఆస్కార్‌’. ఒక్కసారైనా ఈ అవార్డుని సాధించాలని ప్రతి ఫిల్మ్‌ మేకర్‌ కోరుకుంటారు. అలాంటి ఫేమ్‌ ఉన్న ఈ అవార్డు కార్యక్రమం మార్చి 2022న లాస్‌ ఎంజెల్స్‌లో జరగనుంది. ఈ అవార్డుకి అంతర్జాతీయ చలనచిత్ర కేటగిరీ తమిళ చిత్రం ‘కూజాంగల్’ ఎంపికైంది. కేంద్ర ప్రభుత్వం ఏర్పాటు చేసిన 15 మంది సభ్యుల  జ్యూరీ మన దేశం నుంచి ఆస్కార్‌ నామినేషన్‌కు వెళ్లదగ్గ  మొత్తం 14 సినిమాలను వీక్షించింది. అందులో ఈ సినిమాను ఏకగ్రీవంగా ఎంపిక చేసింది. పీఎస్‌ వినోద్‌రాజ్‌ దర్శకుడిగా పరిచయమైన ఈ మూవీని రౌడీ పిక్చర్స్ బ్యానర్‌పై నటి నయనతార, డైరెక్టర్‌ విఘ్నేష్ శివన్ నిర్మించారు.  విదేశి ఉత్తమ మూవీ కేటగిరీలో ఆస్కార్‌ నామినేషన్స్‌కి పోటీపడుతున్నట్లు సోషల్‌ మీడియా వేదిక ఈ చిత్ర నిర్మాత విఘ్నేష్‌ షేర్‌ చేసుకున్నాడు. ‘‘అండ్‌ ది ఆస్కార్స్‌ గోస్‌ టు..’ అనే పదం వినేందుకు మరో రెండు అడుగుల దూరంలో ఉ‍న్నాం. ఎంతో ఆనందంగా ఉంది’ అని ఈ ఫిల్మ్‌ మేకర్‌ తెలిపాడు. చదవండి: ప్రియుడితో కలిసి దేవాలయాలను సందర్శించిన నయనతార There’s a chance to hear this! “And the Oscars goes to …. 🎉🎉🥰🥰🥰🥰 “ Two steps away from a dream come true moment in our lives …. ❤️❤️🥰🥰🥰🥰🥰🥰🥰#Pebbles #Nayanthara @PsVinothraj @thisisysr @AmudhavanKar @Rowdy_Pictures Can’t be prouder , happier & content 💝 pic.twitter.com/NKteru9CyI — Vignesh Shivan (@VigneshShivN) October 23, 2021

తంగమే... నయనతారను విఘ్నేష్‌ శివన్‌ అలానే పిలుస్తారు. అంటే బంగారమే అని అర్థం. ‘హ్యాపీ బర్త్‌డే తంగమే’ అని బుధవారం తన గర్ల్‌ ఫ్రెండ్‌కి శుభాకాంక్షలు చెప్పారు విఘ్నేష్‌. ‘‘నువ్వెప్పుడూ ఇలానే స్ఫూర్తినిస్తూ ఉండాలి. ఇంతే అంకితభావంతో, క్రమశిక్షణతో, ఇలానే నిజాయతీగా కొనసాగాలి. ఎప్పటికీ ఇలానే ఎదుగుతూ ఉండాలి. ఆ దేవుడు నీకెప్పుడూ ఆనందాన్ని, విజయాన్ని ఇవ్వాలని కోరుకుంటున్నాను. ఎంతో పాజిటివిటీతో మరో సంవత్సరం ఆరంభం అయింది’’ అని కూడా విఘ్నేష్‌ పేర్కొన్నారు. కొంత కాలంగా దర్శకుడు విఘ్నేష్, నయన ప్రేమలో ఉన్నారనే వార్తలు వస్తున్న విషయం తెలిసిందే. ఇక పుట్టినరోజు సందర్భంగా నయనతార రెండు లుక్స్‌తో అభిమానులను ఖుషీ చేశారు. ఒకటి తమిళ చిత్రం ‘నెట్రిక్కన్‌’, ఇంకోటి మలయాళ చిత్రం ‘నిళల్‌’. ‘నెట్రిక్కన్‌’ అంటే శివుడి మూడో కన్ను అని అర్థం. ఇందులో నయన అంధురాలిగా నటిస్తున్నారు. నగరంలో వరుస హత్యలకు గురయ్యే యువతుల నేపథ్యంలో ఈ సినిమా ఉంటుంది. ఓ సీరియల్‌ కిల్లర్‌ నయనను అంతం చేయడానికి ప్రయత్నించడం చిత్రం ప్రధానాంశం. ఈ చిత్రాన్ని విఘ్నేష్‌ శివన్‌ నిర్మిస్తున్నారు. ‘నిళల్‌’ మలయాళ సినిమా. నీడ అని అర్థం. ఇందులో హీరోకి దీటుగా ఉండే పాత్రను నయనతార చేస్తున్నారు.

లేడీ సూపర్‌స్టార్‌ నయనతార ఇప్పటివరకూ పలు లేడీ ఓరియంటెడ్‌ చిత్రాల్లో నటించారు. తాజాగా ఓ థ్రిల్లర్‌తో ముందుకొస్తున్నారు. ‘గృహం’ ఫేమ్‌ మిలింద్‌ రావ్‌ దర్శకత్వంలో ‘నెట్రిక్కన్‌’ అనే చిత్రంలో ప్రధాన పాత్రలో నటిస్తున్నారు నయనతార. నెట్రిక్కన్‌ అంటే మూడో కన్ను అని అర్థం. ఈ సినిమాలో నయనతార అంధురాలిగా నటిస్తున్నారని సమాచారం. ఈ చిత్రాన్ని నయనతార బాయ్‌ఫ్రెండ్‌ విఘ్నేష్‌ శివన్‌ నిర్మిస్తున్నారు. ఇది నయనతార కెరీర్‌లో 65వ సినిమా. ఈ చిత్రం ఫస్ట్‌ లుక్‌ను విడుదల చేశారు. ‘ఫస్ట్‌ లుక్‌కి వస్తున్న స్పందన చూస్తుంటే చాలా సంతోషంగా ఉంది. సినిమాకి సంబంధించి త్వరలోనే మరిన్ని అప్‌డేట్స్‌తో వస్తాం’ అన్నారు విఘ్నేష్‌ శివన్‌.

వీలున్నప్పుడల్లా వెకేషన్‌కు వెళ్లడం లవ్‌బర్డ్స్‌ విఘ్నేష్‌ శివన్, నయనతారకు అలవాటు. కోవిడ్‌ వల్ల కొన్ని నెలలుగా అందరూ ఇళ్లకే పరిమితం కావాల్సింది వచ్చింది. మొన్నే ఓనమ్‌ పండగకు నయనతార సొంతూరు కొచ్చిన్‌కి వెళ్లారు. నయనతో పాటు విఘ్నేష్‌ కూడా కొచ్చిలో పండగ జరుపుకున్నారు. ఆ తర్వాత ఇద్దరూ గోవా ట్రిప్‌ ప్లాన్‌ చేశారు. గోవాలో హాలిడే చేసుకుంటున్న ఫోటోలను విఘ్నేష్‌ తన ఇన్‌స్టాగ్రామ్‌ ద్వారా షేర్‌ చేశారు. ఈ హాలిడేలో విఘ్నేష్‌ తల్లి కూడా జాయిన్‌ అయ్యారు. ఇక సినిమాల విషయానికి వస్తే.. నయనతార నటిస్తున్న ‘నెట్రికన్‌’ అనే సినిమాను నిర్మిస్తున్నారు విఘ్నేష్‌. ఆయన దర్శకత్వం వహిస్తున్న ‘కాదువాక్కుల రెండు కాదల్‌’లో ఓ హీరోయిన్‌గా నటిస్తున్నారు నయనతార. త్వరలోనే ఈ చిత్రం సెట్స్‌ మీదకు వెళ్లనుంది.

తమిళ సినిమాలపై ఎక్కువ దృష్టిపెట్టినట్టున్నారు సమంత. ఆమె అంగీకరిస్తున్న సినిమాలన్నీ తమిళ భాషవే కావడం అందుకు కారణం. ‘మాయ, గేమ్‌ ఓవర్‌’ చిత్రాల దర్శకుడు అశ్విన్‌ శరవణన్‌ దర్శకత్వంలో ఓ సినిమా కమిటయ్యారు సమంత. ఇది ద్విభాషా చిత్రం అని సమాచారం. దాని తర్వాత విఘ్నేష్‌ శివన్‌ దర్శకత్వంలో ఓ సినిమా చేయడానికి అంగీకరించారు. విజయ్‌ సేతుపతి హీరోగా నటించనున్న ఈ సినిమాలో నయనతార, సమంత హీరోయిన్లు. ఇదో రొమాంటిక్‌ కామెడీ ఫిల్మ్‌ అని తెలిసింది. తాజాగా మరో తమిళ సినిమాకు కూడా ఓకే చెప్పారని కోలీవుడ్‌ టాక్‌. గౌతమ్‌ అనే నూతన దర్శకుడు చెప్పిన కథ సమంతకు బాగా నచ్చిందని, ఆ సినిమాలో నటించడానికి గ్రీన్‌ సిగ్నల్‌ ఇచ్చేశారని సమాచారం. ఈ సినిమాలో హీరో ఎవరు? ఏ జానర్‌ సినిమా అనేది ఇంకా ప్రకటించలేదు. ఇదిలా ఉంటే ‘కత్తి, తేరీ, మెర్సల్, ఇరంబుదురై, సూపర్‌ డీలక్స్‌’ వంటి సినిమాల్లో విభిన్నమైన పాత్రలతో తమిళ ప్రేక్షకులకు ఫేవరెట్‌ అయ్యారు సమంత. ప్రస్తుతం ఆమె ఒక్క తెలుగు సినిమా కూడా కమిట్‌ కాకపోవడం తెలుగు ఫ్యాన్స్‌కు చిన్న నిరాశే అని చెప్పొచ్చు.

దక్షిణాదిలో స్టార్‌ హీరోయిన్‌గా దూసుకెళుతున్న కథానాయిక నయనతార, దర్శకుడు విఘ్నేష్‌ శివన్‌ కొంత కాలంగా ప్రేమలో ఉన్న సంగతి తెలిసిందే. ఈ ఇద్దరూ త్వరలో పెళ్లి చేసుకోవాలనుకుంటున్నారనే వార్తలు వినిపిస్తున్నాయి. వైవాహిక జీవితం ఆనందంగా సాగాలని కోరుకుంటున్న ఈ జంట ఏ ఆటంకం కలగకుండా పలు పూజలు చేస్తున్నారని భోగట్టా. ఇప్పటికే ఈ ఇద్దరూ తమిళనాడు, కేరళలోని పలు ఆలయాలను సందర్శించారని తెలుస్తోంది. తాజాగా తమిళనాడులోని కుంభకోణం సమీపంలో గల తిరునాగేశ్వరం రాహు ఆలయాన్ని ఇద్దరూ సందర్శించనున్నారట. అక్కడ ప్రత్యేక పూజలు, ప్రమాణాలు చేయనున్నారట నయనతార, విఘ్నేష్‌. మరి.. పెళ్లి పీటల మీద ఎప్పుడు కూర్చుంటారనేది తెలియాల్సి ఉంది. ప్రచారంలో ఉన్న వార్తల సారాంశం ఏంటంటే... ఇప్పటికే ఈ ప్రేమికులు పలు దేశాలు చుట్టారు. అందుకని పెళ్లి తర్వాత ప్రత్యేకంగా హనీమూన్‌ ప్లాన్‌ చేయడంలేదని సమాచారం.

లేడీ సూపర్‌ స్టార్స్‌ నయనతార, సమంత హీరోయిన్లుగా, విజయ్‌ సేతుపతి హీరోగా తమిళంలో ఓ సినిమా తెరకెక్కుతోంది. విఘ్నేష్‌ శివన్‌ దర్శకత్వం వహించనున్న ఈ సినిమాకు ‘కాదువాక్కుల రెండు కాదల్‌’ అనే టైటిల్‌ ఖరారు చేశారు. ముక్కోణపు ప్రేమకథగా తెరకెక్కనున్న ఈ చిత్రం వినోద ప్రధానంగా సాగనుంది. ఈ సినిమా షూటింగ్‌ మేలో ప్రారంభం కావాల్సి ఉంది. కరోనా వల్ల  చిత్రీకరణ ఆగింది. తాజాగా ఆగస్ట్‌ నెల నుంచి ఈ సినిమా చిత్రీకరణను  ప్రారంభించాలనుకుంటున్నారని సమాచారం. ఇటీవలే టీవీ కార్యక్రమాల చిత్రీకరణకు తమిళనాడు ప్రభుత్వం అనుమతి ఇచ్చింది. త్వరలోనే సినిమా షూటింగ్స్‌కి కూడా అనుమతి లభిస్తుందనే ఉద్దేశంతోనే ఆగస్ట్‌లో షూటింగ్‌  ప్రారంభించేందుకు ఈ చిత్రబృందం ప్లాన్‌ చేస్తోంది.

‘‘నీ పరిచయం తర్వాత నా జీవితంలో అన్నీ మధుర క్షణాలే. ఈ ఆనందానికి కారణమైనందుకు ధన్యవాదాలు’’ అంటూ దర్శకుడు విఘ్నేష్‌ శివన్‌ సోషల్‌ మీడియాలో నయనతారను ఉద్దేశించి ఓ పోస్ట్‌ పెట్టారు. విఘ్నేష్‌ దర్శకత్వంలో విజయ్‌ సేతుపతి, నయనతార జంటగా నటించిన ‘నానుమ్‌ రౌడీదాన్‌’ విడుదలై సోమవారంతో నాలుగేళ్లయింది. ఈ సందర్భాన్ని పురస్కరించుకుని ‘‘ధన్యవాదాలు బంగారం. ఈ సినిమా ఒప్పుకున్నందుకు థ్యాంక్స్‌. అలాగే నా జీవితం బాగుండే అవకాశం ఇచ్చావు. ఆ దేవుడి ఆశీర్వాదాలు నీకెప్పుడూ ఉండాలి. నువ్వు బయట, లోపల ఎప్పుడూ ఇంతే అందంగా ఉండాలి. బోలెడంత ప్రేమతో’’ అంటూ నయన పట్ల తనకున్న ఫీలింగ్‌ని షేర్‌ చేశారు విఘ్నేష్‌ శివన్‌. ‘నానుమ్‌ రౌడీదాన్‌’ సినిమా అప్పుడే విఘ్నేష్, నయన ప్రేమలో పడ్డారనే వార్తలు మొదలయ్యాయి. అప్పటినుంచి ఇప్పటివరకూ కలిసి విహార యాత్రలకు వెళ్లడం, ఒకరి పుట్టినరోజుని మరొకరు ఘనంగా జరపడం, పండగలను కూడా కలిసి జరుపుకోవడం.. ఇలాంటివన్నీ ఇద్దరి మధ్య అనుబంధం బలపడిందని చెప్పడానికి ఉదాహరణలు. త్వరలో ఇద్దరూ పెళ్లి చేసుకోవాలనుకుంటున్నారని సమాచారం.

నయనతార – విఘ్నేష్‌ శివన్‌ ప్రేమలో ఉన్నారు. ఆ విషయాన్ని అధికారికంగా బయటపెట్టకపోయినా వాళ్ల ప్రేమను మాత్రం వీలున్నప్పుడల్లా బయటపెడుతూనో, బయటపడుతూనో ఉంటారు. హాలీడేయింగ్, ఒకరి పుట్టినరోజు ఒకరు జరపడం. ఒకరికి హిట్‌ వస్తే ఇంకొకరు సెలబ్రేట్‌ చేసుకోవడంలాగా అన్నమాట. బుధవారం విఘ్నేష్‌ బర్త్‌డే. బాయ్‌ఫ్రెండ్‌ బర్త్‌డే పార్టీను ఫ్రెండ్స్‌తో కలిసి ఘనంగా చేశారు నయనతార. ఈ ఫంక్షన్‌కు డ్రెస్‌ కోడ్‌ బ్లాక్‌ అండ్‌ బ్లాక్‌. దర్శకుడు అట్లీ, సంగీత దర్శకుడు అనిరు«ద్, నటుడు అరవింద్‌ స్వామి, హీరో విజయ్‌ సేతుపతి మరికొందరు ఈ పార్టీకు హాజరయ్యారు. ఇటీవలే విఘ్నేష్‌ నిర్మాణంలో నయనతార హీరోయిన్‌గా ఓ సినిమా ప్రారంభం అయింది.

దక్షిణాదిలోనే అగ్ర కథానాయకిగా రాణిస్తున్న నటి నయనతార. పారితోషికంలోనూ తన ఆధిక్యతను చాటుకుంటున్న ఈ లేడీ సూపర్‌స్టార్‌కు అవకాశాలు చేతి నిండా ఉన్నాయి. అందులో ఏమాత్రం డౌట్‌ లేదు. తమిళం, తెలుగు, మలయాళం భాషల్లో అవకాశాలు తలుపు తడుతున్నాయి. అలాంటిది ఇప్పుడు వచ్చిన సమస్య అంతా సక్సెస్‌ రేటింగ్‌ పడిపోవడమే. ఈ విషయంలో నయనతార టైమ్‌ అస్సలు బాగోలేదనే చెప్పాలి. నిజానికి ఈ సంచలన నటి సక్సెస్‌ను చూసి చాలా కాలమే అయ్యింది. ఆ మధ్య అరమ్, కోలమావు కోకిల, ఇమైకా నొడిగళ్‌ వంటి చిత్రాలతో వరుసగా సక్సెస్‌లు అందుకున్న నయనతార ఆ తరువాత విజయాలకు దూరం అయ్యారు. ఇటీవల ఐరా,  శివకార్తికేయన్‌తో నటించిన మిస్టర్‌ లోకల్‌ చిత్రాలు పూర్తిగా నిరాశపరిచాయి. తాజాగా ఈ బ్యూటీ నటించిన కొలైయుధీర్‌ కాలం చిత్రం శిరోభారంగా మారిందనే చెప్పాలి. ఈ చిత్ర నిర్మాణంలోనే జాప్యం జరిగింది. ఎట్టకేలకు పూర్తి చేసుకుని ఆడియో ఆవిష్కరణ కార్యక్రమం వరకూ వచ్చిన కొలైయుధీర్‌ కాలం చిత్రం ఆ వేడుకలో సీనియర్‌ నటుడు రాధారవి నయనతారపై అనుచిత వ్యాఖ్యలు చేసిన విషయం తెలిసిందే. దీంతో ఆమె ఇమేజ్‌ డ్యామేజ్‌ అయ్యిందనే చెప్పాలి. దీనికి తోడు నయనతార ప్రియుడు, దర్శకుడు విఘ్నేశ్‌శివ అది ఆగిపోయిందనుకున్న చిత్రం అని కొలైయుధీర్‌ కాలం గురించి చేసిన వ్యాఖ్యలు చిత్రంపై తీవ్ర ప్రభావం చూపాయి. ఆ తరువాత సమస్య పరిష్కారం అయ్యి చిత్ర విడుదలకు సన్నాహాలు జరిగి తేదీని కూడా ప్రకటించారు. అయితే టైటిల్‌ సమస్యతో చిత్ర విడుదలపై కోర్టు తాత్కాలిక నిషేధాన్ని విధించింది. ఇదంతా నటి నయనతారకు మనశ్శాంతిని కరువు చేసే సంఘటనలే. ఇలాంటి సమయంలో నయనతారకు మరో చింత పట్టుకుంది. ఇదే కొలైయుధీర్‌ కాలం చిత్రం హిందిలోనూ ఖామోషి పేరుతో తెరకెక్కింది. ఈ రెండు భాషలకు దర్శకుడు చక్రి తోలేటి. నయనతార పాత్ర హిందిలో తమన్నా నటించింది. ఈ చిత్రం ఇటీవల విడుదలై అపజయాన్నే చవిచూసింది. దీంతో ఇప్పుడు కొలైయుధీర్‌ కాలం చిత్రం రిజల్ట్‌ను ఊహించుకుంటే నయనతారకు చెప్పలేనంత చింత పట్టుకుందట. అయితే ఆ చిత్రం గురించి కాదు నయనతార బాధ తన మార్కెట్‌కు ఎక్కడ దెబ్బ తగులుతుందోనన్నదేనట. ప్రస్తుతం ఈ అమ్మడు రజనీకాంత్‌తో దర్బార్, విజయ్‌కు జంటగా ఒక చిత్రం, శివకార్తికేయన్‌తో మరో చిత్రం చేస్తోంది. అదే విధంగా తెలుగులో చిరంజీవికి జంటగా సైరా నరసింహారెడ్డి చిత్రంలో నటిస్తోంది.

నటుడు రజనీకాంత్‌ను నటి నయనతార ప్రియుడు, దర్శకుడు అయిన విఘ్నేశ్‌ శివన్‌ కలిసి దిగిన ఫొటోను సోషల్‌మీడియాలో పోస్ట్‌ చేశారు. ఇదే ఇప్పుడు కోలీవుడ్‌లో చర్చనీయాంశంగా మారింది. రజనీకాంత్‌ నటిస్తున్న తాజా చిత్రంలో నయనతార కథానాయకిగా నటిస్తోంది. అలా ఆమెతో వెళ్లిన విఘ్నేశ్‌ శివన్‌ రజనీకాంత్‌తో ఫొటో దిగారా? లేక మరేదైనా పర్పస్‌ ఉందా? అన్న చర్చ తీవ్రంగా జరుగుతోంది. ప్రస్తుతం శివకాకేయన్‌ హీరోగా చిత్రం చేయబోతున్న విఘ్నేశ్‌ శివన్‌కు రజనీకాంత్‌ అవకాశం ఇవ్వనున్నారనే టాక్‌ కోలీవుడ్‌లో వినిపిస్తోంది. రజనీకాంత్‌కు తిల్లు ముల్లు వంటి పూర్తి హస్యభరిత కథా చిత్రంలో నటించాలనే కోరిక చాలా కాలంగా ఉందని, అలాంటి కథలో విఘ్నేశ్‌ శివన్‌ దర్శకత్వంలో నటించే అవకాశం ఉందనే టాక్‌ వినిపిస్తోంది. దర్బార్‌ చిత్ర షూటింగ్‌కు బయలు దేరే ముందు రజనీకాంత్‌ను మరో దర్శకుడు కేఎస్‌.రవికుమార్‌ కలిశారు. వీరి కలయిక చర్చనీయాంశంగా మారింది. దర్బార్‌ చిత్రం తరువాత రజనీకాంత్‌ కేఎస్‌.రవికుమార్‌ దర్శకత్వంలో నటించే అవకాశం ఉందనే ప్రచారం జరుగుతోంది. రజనీకాంత్, కేఎస్‌.రవికుమార్‌ కాంబినేషన్‌లో ఇంతకు ముందు పడయప్పా, ముత్తు వంటి విజయవంతమైయిన చిత్రాలు వచ్చాయన్నది గమనార్హం. దీంతో దర్బార్‌ తరువాత రజనీకాంత్‌ కేఎస్‌.రవికుమార్‌ దర్శకత్వంలో నటిస్తారా, లేక యువ దర్శకుడు విఘ్నేశ్‌శివన్‌కు అవకాశం ఇస్తారా? అన్నది ఆసక్తిగా మారింది. రజనీకాంత్‌ ఇటీవల యువ దర్శకులతో చిత్రాలు చేయడానికి ఆసక్తి చూపుతున్నారన్నది గమనార్హం.

టాలీ, కోలీ, బాలీ.. అన్ని వుడ్‌లనూ దాటిలవేరియా అన్ని అడవు(డ్‌)లకూ పాకింది.గుయ్‌.. గుయ్‌ మంటూ..ఈ వుడ్డునుంటావా, ఆ వుడ్డునుంటావాఅని అడిగేవరకూ ఆగడం లేదు. పడవెక్కి ప్రేమవుడ్డుకు.. సారీ.. ప్రేమఒడ్డుకుసాగిపోతోంది. అన్ని వుడ్‌ల ప్రేమా ఫలించాలి.  స్క్రీన్‌ మీద లవ్‌బర్డ్స్‌కి లైఫ్‌లో కూడా లవ్‌ వైరస్‌  సోకితే.. అభిమానులు, ఆడియన్స్‌ ఎంటర్‌టైన్‌మెంట్‌ వాక్సిన్‌ వేసుకుంటారు. అలా లవేరియాతో అయిదు జంటలు ఎంజాయ్‌ చేస్తున్నాయి. ఎవరో తెలుసుకోండి... పండగ చేసుకోండి ‘వాలెంటైన్స్‌డే’ను.   ఆ దేవుడే పంపాడు ఈ సంక్రాంతికి విశాల్‌ తన పెళ్లిని కన్ఫార్మ్‌ చేశారు. అనీషా ఆళ్ల అనే హైదరాబాద్‌ అమ్మాయిని పెళ్లి చేసుకోబోతున్నట్లు చెప్పారాయన. అనీషా కూడా నటే. ‘పెళ్ళి చూపులు, అర్జున్‌ రెడ్డి’ చిత్రాల్లో ఆమె నటించారు. ‘‘అనీషాతో నా పరిచయం పెళ్లివరకు వెళ్తుందని ఊహించలేదు. తనలో ఎన్నో మంచి క్వాలిటీస్‌  ఉన్నాయి. తను బాస్కెట్‌బాల్‌ నేషనల్‌ ప్లేయర్‌. సోషల్‌ వర్కర్‌ కూడా. మా పెళ్లి అయ్యాక అనీషా సినిమాలు మానేస్తుందని నేను చెప్పలేను. ఆమెను దేవుడే నా కోసం పంపాడు’’ అని విశాల్‌ అంటారు. విశాల్, అనీషా నిశ్చితార్థం మార్చిలో జరగనుందట. పెళ్లి ఆగస్టులో జరగనుందని టాక్‌. పెళ్లి కబురు ఎప్పుడొస్తుందో! కోలీవుడ్‌లో ప్రేమపక్షులు అంటే నయనతార, విఘ్నేష్‌ శివన్‌లే.  లేటెస్ట్‌గా ఆర్య, సాయేషాల పేర్లూ టైటిల్‌ కార్డ్స్‌లో చేరాయి. ఈ ఇద్దరూ కలిసి  ‘గజనీకాంత్‌’ అనే సినిమాలో జంటగా నటించారు. ఈ సినిమా టైమ్‌లోనే ఈ ఇద్దరి మీద కాదల్‌ (ప్రేమ) క్లాప్‌ కొట్టిందట. ఇప్పుడు సూర్య హీరోగా నటిస్తున్న ‘కాప్పాన్‌’ సినిమాలో సాయేషా కథానాయికగా నటిస్తుండగా, ఆర్య ఓ కీలక పాత్ర చేస్తున్నారు. అతి త్వరలో ఆర్య, సాయేషాల వివాçహానికి సంబంధించి అధికారిక ప్రకటన రావొచ్చనే వార్త వైరల్‌ అయింది  తమిళ సినీ పరిశ్రమలో.  ఫొటోలతో కన్ఫార్మ్‌  బాలీవుడ్‌ కూడా లవ్‌ ఫ్లూతో ఫ్లేమ్‌ అవుతోంది. నటుడు, దర్శకుడు  ఫర్హాన్‌ అఖ్తర్, నటి షిబానీ దండేకర్‌ ప్రేమలో ఉన్నారని ఎప్పటినుంచో వినపడుతోంది. సోషల్‌ మీడియాలో  కనపడుతోంది కూడా. గతేడాది అక్టోబర్‌లో ఫర్హాన్‌ అఖ్తర్, షిబానీ ఇద్దరూ ఒకేఫొటోను ఇన్‌స్టాగ్రామ్‌లో పోస్ట్‌ చేశారు. ఫర్హాన్‌ లవ్‌ సింబల్‌ను జతపెట్టి మరీ పోస్ట్‌ చేశారు. దీంతో వీరిద్దరి లవ్‌కి కన్ఫర్మేషన్‌ వచ్చినట్టయింది.  ‘‘మీరు ఫర్హాన్‌తో ప్రేమలో ఉన్నారా?’’ అని షిబానీని అడిగితే ‘‘మేం పోస్ట్‌ చేసే ఫొటోలను బట్టే అందరూ అర్థం చేసుకోవాలి’’ అని జవాబు ఇచ్చారు. దాంతో ఈ ఏడాదే వీళ్లిద్దరూ మ్యారేజ్‌ చేసుకోనున్నారని బాలీవుడ్‌లో ఒకటే హోరు.  రోహ్మాన్‌తో ప్యార్‌ మే 1994 మిస్‌ యూనివర్స్‌ సుష్మితా సేన్‌ ఇప్పుడు సినిమాల్లో రేర్‌ అయినా పబ్లిసిటీలో జోరుగా ఉన్నారు... రోహ్మన్‌ షాల్‌ అనే వ్యక్తితో లవ్‌లో పడి. ఇటీవల ఢిల్లీలో జరిగిన ఓ పెళ్లిలో ఈ జంట  వేసిన స్టెప్స్‌ సూపర్‌ హిట్‌. ‘రోహ్మాన్‌తో ప్యార్‌ మే’  కదా అంటే సుష్మితా నవ్వుతున్నారు.  ‘మీ పెళ్లెప్పుడు?’  అంటే మాత్రం ‘నా పెళ్లి విషయం మీకెందుకు’ అంటూ  మండిపడతున్నారట. కానీ మీడియాలో అయితే వీళ్లిద్దరూ ఈ ఏడాది వివాహం చేసుకోబోతున్నారనే న్యూస్‌ స్ట్రీమ్‌ అవుతోంది. సుష్మితా సేన్‌కు రినీ సేన్, అలీసా సేన్‌ అనే ఇద్దరు దత్తపుత్రికలు ఉన్న సంగతి తెలిసిందే. లవ్‌ ఫర్‌ హార్లిన్‌  ‘ఉరి: ది సర్జికల్‌స్ట్రైక్‌’తో 200 కోట్ల క్లబ్‌లో చేరాడు విక్కీ కౌశల్‌. పర్సనల్‌ లైఫ్‌ను లవ్‌ క్లబ్‌లో రిజిష్టర్‌ చేయించుకున్నాడు. హార్లిన్‌ సేథి అనే అమ్మాయితో ప్రేమలో ఉన్నట్లు చెప్పారు విక్కీ. ‘‘కామన్‌ ఫ్రెండ్‌ ద్వారా ఓ పార్టీలో హార్లిన్‌ను కలిశాను. లాస్ట్‌ ఇయర్‌ నుంచే తనతో డేటింగ్‌లో ఉన్నా. ఒకరినొకరం తెలుసుకుంటున్నాం. మా రిలేషన్‌ బాగుంది’’ అని చెప్పారు విక్కీ కౌశల్‌. మొహబ్బతే... తాప్సీ–మాథ్యాస్‌ బో,  శ్రుతీహాసన్‌ – మైఖేల్‌ కోర్సలే, ఇలి యానా –ఆండ్రూ నీబోన్, నటాషా దలాల్‌–వరుణ్‌ధావన్, ఆలియా భట్‌–రణ్‌బీర్‌ కపూర్, రియా కపూర్‌–కరణ్‌ బులానీ, టైగర్‌ ష్రాఫ్‌–దిశా పాట్నీ... ఈ జంటలు ప్రేమలో మునిగి ఉన్నట్లు  వాళ్ల తీరు స్పష్టం చేస్తోంది. వీళ్ల ప్యార్‌ ఈ యేడాదైనా మ్యారేజ్‌ టేక్‌ తీసుకుంటుందా? చూడాలి!  ఇంతకీ ఇక్కడ ప్రస్తావించిన జంటల్లో రియా కపూర్‌ ఎవరో అనుకునేరు... ప్రముఖ నటుడు అనిల్‌ కపూర్‌ కుమార్తె, నటి సోనమ్‌కపూర్‌ సోదరే  రియా. రింగులు మార్చుకున్నారు నిశ్చితార్థంతో  సగం పెళ్లి బంధంలోకి అడుగుపెట్టిన కథానాయికలూ ఉన్నారు.  జో అనే వ్యక్తితో రిచా గంగోపాధ్యాయ, జార్జ్‌ పానాయియోటోన్‌తో అమీ జాక్సన్, గుణ జక్కాతో అనీషా అంబ్రోస్‌లకు ఎంగేజ్‌మెంట్‌ అయింది. వీళ్ల పెళ్లి తేదీలు ఇంకా ఖరారు కాలేదు. జతకూడేనా? టాలీవుడ్‌లో ప్రేమ, పెళ్లి  టాపిక్స్‌ వస్తే చాలు వెంటనే ప్రభాస్, రానా గుర్తొస్తారు. వీరితోపాటు వరుణ్‌ తేజ్, శర్వానంద్, నితిన్, నిఖిల్, విజయ్‌ దేవరకొండ, సాయిధరమ్‌ తేజ్, అఖిల్, నాగశౌర్య, రాజ్‌ తరుణ్‌ వంటి హీరోల స్టేటస్‌ సింగిల్‌గానే ఉంది. వచ్చే ప్రేమికుల రోజుకైనా వీరికి వాళ్ల వేలెంటైన్‌ దొరికేనా.. జత కూడేనా? కాలం కాదల్‌తో జవాబిస్తుందేమో చూద్దాం! ప్రేమించు.. పెళ్లాడు ఇటీవల ప్రేమ వివాహలు చేసుకున్న జంటలు చాలానే ఉన్నాయి. మలయాళ నటి భావన.. నిర్మాత నవీన్‌ను, శ్రియ తన ప్రేమికుడు అండ్రూ కృశ్చేవ్‌ను,  కలర్స్‌ స్వాతి పైలట్‌ వికాస్‌ను పెళ్లి చేసుకున్నారు. అంతేకాదు నటి శ్వేతాబసు ప్రసాద్‌ గత డిసెంబర్‌ 13న పుణేలో రోహిత్‌ మిట్టల్‌కు జీవితభాగస్వామి అయ్యారు.  సూపర్‌స్టార్‌ రజనీకాంత్‌ కుమార్తె , దర్శక, నిర్మాత సౌందర్యా రజనీకాంత్‌ వ్యాపారవేత్త  విశాగన్‌ వనంగాముడిని వివాహమాడారు. ఇక బీటౌన్‌ పెళ్లిళ్ల వైపు వెళితే.. దీప్‌వీర్‌ల (దీపికా పదుకోన్‌–రణ్‌వీర్‌ సింగ్‌)  ఇటలీలో జరిగిన డెస్టినేషన్‌ వెడ్డింగ్‌తో ఒకింటి వారయ్యారన్నది సినీ అభిమాన జగమెరిగిన సత్యం.  ప్రియాంకా చోప్రా–నిక్‌ జోనస్‌ (నిక్యాంక)లు కూడా గత డిసెంబర్‌ 1, 2 తేదీల్లో రాజస్థాన్‌లోని జో«ద్‌పూర్‌లో పెళ్లి చేసుకున్నారు. డిసెంబర్‌ 1న క్రిస్టియన్‌ స్టైల్‌లో, డిసెంబర్‌ 2న నార్త్‌ ఇండియన్‌ స్టైల్‌లో ఆ పెళ్లి వేడుకలు జరిగాయి. బాలీవుడ్‌ నటి సోనమ్‌ కపూర్, ఢిల్లీకి చెందిన వ్యాపారవేత్త ఆనంద్‌ ఆహూజాల వెడ్డింగ్‌ పంజాబ్‌ స్టైల్‌లో గత మే 8న జరగింది. సోనమ్‌ కపూర్‌ పెళ్లి జరిగిన రెండు రోజుల తర్వాత మే 10న నేహా« «ధూపియా, అంగద్‌ బేడీల పెళ్లి అయింది.  నటుడు మిలింద్‌ సోమన్, అంకిత కోన్వార్‌..  ఏప్రిల్‌ 22న మహారాష్ట్రియన్‌ వివాహ పద్ధతిలో వైవాహిక జీవితంలోకి అడుగుపెట్టారు.  దర్శక–నిర్మాత దినేష్‌ విజన్‌ దుబాయ్‌కి చెందిన ప్రమీత తన్వర్‌ను,  బాలీవుడ్‌ నటుడు, కమెడియన్‌ కపిల్‌ శర్మ.. గిన్ని చత్రాథ్‌ను పరిణయమాడారు. వీరితో పాటు హిందీ బుల్లితెర నటీనటులు కొందరు గతేడాది మ్యారీడ్‌ లైఫ్‌కు శ్రీకారం చూట్టారు.

సాక్షి, చెన్నై : లేడీ సూపర్‌ స్టార్‌ నయనతార, యువదర్శకుడు విఘ్నేశ్‌ శివన్‌ మధ్య సంబంధం గురించి తెలియంది కాదు. నాన్‌మ్‌ రౌడీ ధాన్‌(తెలుగులో నేనూ రౌడీనే)చిత్ర షూటింగ్‌ సందర్భంగా ఏర్పడిన వీరి పరిచయం ఆ తర్వాత ప్రేమగా మారింది.  ఆ తర్వాత వీరిద్దరూ పలు ఈవెంట్లలో జంటగా కనిపిస్తూ హాట్‌ టాపిక్‌గా మిగిలారు. ఒకానోక దశలో వీరిద్దరూ కేరళలో రహస్యంగా వివాహం చేసుకున్నట్లు వార్తలు రావటం.. వాటిని నయనతార ఖండించటం చూశాం. ఆ సమయంలో విఘ్నేశ్‌తో ఉంది కేవలం స్నేహం మాత్రమే అంటూ ఆమె ప్రకటించారు. అయినప్పటికీ వారి మధ్య రిలేషన్‌షిప్‌ గురించి తర్వాత చాలా కథనాలు వచ్చాయి. ఇక శుక్రవారం ది హిందూ పత్రిక నిర్వహించిన మహిళా అవార్డుల వేడుకలో నయనతార పాల్గొన్నారు. ఈ సందర్భంగా నటనా రంగంలో ఎక్సలెన్స్‌ అవార్డు అందుకున్న నయన్‌.. తల్లిదండ్రులకు, సోదరుడికి, కాబోయే భర్త(విఘ్నేశ్‌ను ప్రస్తావిస్తూ)కు కృతజ్ఞతలు తెలియజేస్తున్నట్లు వేదిక మీద ప్రకటించింది. దీంతో వీరిద్దరూ త్వరలో వివాహం చేసుకోబోతున్నారన్న వార్త కన్ఫర్మ్‌ అయిపోయింది.


 నయనతార కంటే వయసులో ఏడాది చిన్నోడయినా... బోలెడంత ప్రేమను నయనకు పంచి, ఆమె ప్రేమను సంపాదించి ఒక్కసారిగా వార్తల్లో పెద్దోడయ్యాడు తమిళ దర్శకుడు విఘ్నేష్‌ శివన్‌. సాయంత్రం వేళకు ఓ గూటికి చేరే పక్షుల వలే... సన్‌ సెట్‌ కాగానే సినిమా సెట్‌ నుంచి విఘ్నేశ్, నయనలు స్ట్రయిట్‌గా ఓ గూటికి చేరి ప్రేమ కబుర్లు చెప్పుకుంటున్నారట. చెన్నై కోడంబాక్కమ్‌ వర్గాలు వీళ్ల ప్రేమకథ గురించి కథలు కథలుగా చెబుతున్నాయి.
 
  వీళ్లిద్దరూ ఈ కథలకు తగ్గట్టుగా మలయాళీ ఓనమ్, తమిళ పొంగల్‌ ఫెస్టివల్స్‌ను కలిసే సెలబ్రేట్‌ చేసుకున్నారు. ప్రేమలో ఆల్మోస్ట్‌ రెండేళ్లు గడిచాయేమో... మూడో ఏడు వచ్చేసరికి ఏడడుగులు వేసేయాలని విఘ్నేశ్, నయనలు నిశ్చయించుకున్నారని వార్తలొచ్చాయి. అబ్బే... అటువంటిది ఏం లేదని విఘ్నేష్‌ శివన్‌ క్లారిటీ ఇచ్చారు.
 
  ప్రస్తుతానికి కెరీర్‌ గురించి తప్ప... కల్యాణం గురించి ఆలోచించడం లేదని ఆయన సెలవిచ్చారు. అంతా బాగానే ఉంది.. ‘నయనతారను నేనెందుకు పెళ్లి చేసుకుంటాను?’ అనలేదు కాబట్టి, ఈ ఇద్దరూ ప్రేమలో ఉన్న మాట నిజమే అన్నమాట. ఏదేమైనా... ఇప్పట్లో నయనతార పెళ్లి లేనట్లే!! ఇంకో మూడు నాలుగేళ్లు కెరీర్‌పై ఫుల్లుగా కాన్సంట్రేట్‌ చేస్తారన్న మాట!


 తమిళ నాట ప్రయోగాత్మక చిత్రాలకు కేరాఫ్ అడ్రస్ గా మారిన హీరో సూర్య. క్యారెక్టర్ కోసం ఎలాంటి రిస్క్ చేయడానికైనా రెడీగా ఉండే ఈ స్టార్ హీరో మేకింగ్ విషయంలో కూడా యమా స్పీడు చూపిస్తుంటాడు. తన రేంజ్ హీరోలందరూ ఏడాది ఒక్క సినిమాతో సరిపెడుతుంటే సూర్య మాత్రం కనీసం రెండు సినిమాలైనా రిలీజ్ చేసేలా ప్లాన్ చేస్తున్నాడు.
 
 ప్రస్తుతం సూర్య తన కెరీర్ లో సూపర్ హిట్ సీరీస్ గా నిలిచిన సింగం సీరీస్ లో మూడో భాగంలో హీరోగా నటిస్తున్నాడు. హరి దర్శకత్వంలో తెరకెక్కుతున్న ఈ సినిమా షూటింగ్ పార్ట్ పూర్తి కాగా పోస్ట్ ప్రొడక్షన్ కార్యక్రమాలు జరుగుతున్నాయి. అయితే సింగం 3 షూటింగ్ తరువాత ఎలాంటి గ్యాప్ తీసుకోకుండా మరో సినిమాను మొదలెట్టేశాడు సూర్య.
 
 నానుమ్ రౌడీధాన్ సినిమా ఫేం విఘ్నేష్ శివన్ దర్శకత్వంలో ఓ కమర్షియల్ ఎంటర్టైనర్ లో నటిస్తున్నాడు. స్టూడియో గ్రీన్ సంస్థ నిర్మిస్తున్న ఈ సినిమాను ఈ రోజే(బుధవారం) లాంఛనంగా ప్రారంభించారు. రెండు మూడు రోజుల్లో రెగ్యులర్ షూటింగ్ ను కూడా స్టార్ట్ చేసే ప్లాన్ లో ఉన్నారు. వచ్చే ఏడాది సమ్మర్ లో రిలీజ్ కానున్న ఈసినిమాలో సూర్య సరసన కీర్తి సురేష్ హీరోయిన్ గా నటిస్తోంది.