ఐదేళ్ల తర్వాత భారత మహిళల టెన్నిస్‌ సింగిల్స్‌లో నంబర్‌వన్‌గా కొత్త క్రీడాకారిణి వచ్చింది. 2017 నుంచి భారత టాప్‌ ర్యాంకర్‌గా కొనసాగుతున్న అంకితా రైనా సోమవారం విడుదల చేసిన సింగిల్స్‌ ర్యాంకింగ్స్‌లో రెండో స్థానానికి పడిపోయింది. చెన్నై ఓపెన్‌ లో ప్రిక్వార్టర్‌ ఫైనల్‌ చేరిన కర్మన్‌ కౌర్‌ భారత కొత్త నంబర్‌వన్‌గా అవతరించింది. కర్మన్‌ 37 స్థానాలు ఎగబాకి 322వ ర్యాంక్‌కు చేరగా... చెన్నై ఓపెన్‌లో తొలి రౌండ్‌లోనే ఓడిన అంకిత నాలుగు స్థానాలు పడిపోయి 329వ ర్యాంక్‌లో నిలిచింది. 


 ఐటీఎఫ్ మహిళల టెన్నిస్ టోర్నీ
  మొయినాబాద్ రూరల్, న్యూస్‌లైన్ : అంతర్జాతీయ టెన్నిస్ సమాఖ్య (ఐటీఎఫ్) మహిళల టెన్నిస్ టోర్నమెంట్‌లో నిధి చిలుముల, కాల్వ భువన ముందంజ వేశారు. ఇక్కడి సానియా మీర్జా టెన్నిస్ అకాడమీ (ఎస్‌ఎమ్‌టీఏ)లో మంగళవారం జరిగిన సింగిల్స్ తొలిరౌండ్ మ్యాచ్‌ల్లో కాల్వ భువన 7-5, 6-4తో అర్షి బాసిన్‌పై, నిధి 6-0, 6-0తో సంస్కృతి రంజన్‌పై విజయం సాధించారు.
  
  ఇతర పోటీల్లో తింబరే 6-1, 6-1తో సృష్టి స్లారియాపై, శర్మదా బాలు 6-3, 4-6, 6-1తో జెనీ పటేల్‌పై, నటాషా పల్హా 6-1, 6-0తో సాహన్ శెట్టిపై, సంచన షరాన్ పాల్ 3-6, 6-1, 6-4తో వన్షిక సాహ్నేపై, రిషిక రవీంద్రన్ 6-2, 6-1తో తాన్వీ బోస్‌పై, ఇతీ మహిత 5-7, 6-1, 6-2తో స్నేహ పడమటపై, దామిని 3-6, 7-6 (7/0), 6-0తో ఉజ్జిని ప్రీతిపై, అమృత 6-2, 6-0తో ప్రీతి శ్రీనివాసన్‌పై, రిషిక సుంకర 6-2, 6-4తో చామంతిపై, శ్వేత రాణా 6-7 (3/7), 6-2, 6-3తో వైదేహి చౌదరిపై గెలుపొందారు.