ఆటోలో పోగొట్టుకున్న హ్యాండ్‌ బ్యాగు అప్పగింత

ఆటోలో పోగొట్టుకున్న హ్యాండ్‌ బ్యాగు అప్పగింత

మదనపల్లె : ఆటోలో ప్రయాణిస్తున్న మహిళ మరచిపోయిన బ్యాగును పోలీసులు అప్పగించిన ఘటన సోమవారం మదనపల్లెలో జరిగింది. పీలేరు వండేవారిపల్లెకు చెందిన వెంకటనాగులమ్మ జీవనోపాధిలో భాగంగా కువైట్‌ వెళ్లేందుకు ప్రయాణమైంది. మదనపల్లె మీదుగా బెంగళూరుకు వెళ్లేందుకు నిర్ణయించుకుని శనివారం పీలేరు నుంచి మదనపల్లెకు చేరుకుంది. ఆర్టీసీ బస్టాండ్‌ నుంచి బెంగళూరు బస్టాండ్‌ వెళ్లేందుకు ఆటోలో బయలుదేరింది. అయితే లగేజీ దించుకునే క్రమంలో పాస్‌పోర్ట్‌, ఇతర పత్రాలు, వీసా కలిగిన బ్యాగును ఆటోలో మరచిపోయింది. తర్వాత కొంతసేపటికి గుర్తించి, హడావుడిగా వన్‌టౌన్‌ పోలీసులకు ఫిర్యాదు చేసింది. బాధిత మహిళ ఫిర్యాదు మేరకు వన్‌టౌన్‌ పోలీసులు ఆటో స్టాండ్‌లలో డ్రైవర్లను విచారిస్తుండగా, ఓ డ్రైవర్‌ తన ఆటోలో మహిళ బ్యాగు మరచిపోయిందని చెప్పి స్టేషన్‌లో అప్పగించి వెళ్లాడు. దీంతో వన్‌టౌన్‌ సీఐ ఎరీసావలీ, బాధిత మహిళకు హ్యాండ్‌బాగ్‌ అందజేశారు.