ఉద్యోగిపై దాడికి పాల్పడిన మహిళ అరెస్ట్‌

రామన్నపేట : ఎంజీఎంలో విధులకు వెళ్తున్న ఉద్యోగిని అడ్డగించి బెదిరించి దాడికి పాల్పడిన మహిళను అరెస్ట్‌ చేసినట్లు మట్టెవాడ ఇన్‌స్పెక్టర్‌ టి.గోపి మంగళవారం తెలిపారు. ఇన్‌స్పెక్టర్‌ గోపి కథనం ప్రకారం.. బిల్ల సుమలత 15 సంవత్సరాల నుంచి ఎంజీఎంలో ఔట్‌సోర్సింగ్‌గా, రెండు సంవత్సరాల నుంచి పేషెంట్‌ కేర్‌గా ఉద్యోగం చేస్తోంది. ఈనెల 9న మధ్యాహ్నం షిఫ్ట్‌ విధుల్లో భాగంగా ఎంజీఎంలోని బయోమెట్రిక్‌ మెషీన్‌ వద్దకు వచ్చి హాజరు వేస్తుండగా ఆలకుంట రాజమ్మ.. సుమలతను అడ్డుకుంది. ‘నీ నియామకానికి జీఓ తెచ్చింది నేనే.. అందుకే రూ.2 లక్షలు లంచం ఇస్తావా లేదా..లేకుంటే నిన్ను చంపేస్తా’ అంటూ బెదిరిస్తూ చైన్‌తో విచక్షణరహితంగా సుమలతను కొడుతూ తన వద్ద ఉన్న రూ.10 వేలు లాక్కుంది. ఈ ఘటనపై బాధితురాలు సుమలత ఫిర్యాదు మేరకు కేసు నమోదు చేసుకున్న పోలీసులు నిందితురాలు ఆలకుంట రాజమ్మ అరెస్ట్‌ చేసి ఆమె నుంచి రూ.వెయ్యి , నేరానికి ఉపయోగించిన చైన్‌ను స్వాధీనం చేసుకున్నట్లు వివరించారు. నిందితురాలిని రిమాండ్‌ తరలించినట్లు ఇన్‌స్పెక్టర్‌ గోపి తెలిపారు.

ఎంజీఎం ఘటనపై దోషులను శిక్షించాలి: ఎమ్మెల్యే నాయిని రాజేందర్‌రెడ్డి

వరంగల్‌ ఎంజీఎం ఆస్పత్రి ఉద్యోగి సుమలతపై దాడికి పాల్పడిన దోషులను చట్టపరంగా కఠినంగా శిక్షించాలని వరంగల్‌ పశ్చిమ ఎమ్మెల్యే నాయిని రాజేందర్‌రెడ్డి మంగళవారం అధికారులను ఆదేశించారు. సుమలతపై దాడికి పాల్పడిన రాజమ్మ గతంలో ఎంజీఎంలో విధులు నిర్వర్తించినప్పటికీ తనపై ఉన్న అభియోగాల నేపథ్యంలో విధుల నుంచి తొలగించినట్లు ఎమ్మెల్యే పేర్కొన్నారు. ఇలాంటి ఘటనలను ఊపేక్షించేది లేదని, నిందితులపై చర్యలు తీసుకుంటామని స్పష్టం చేశారు. భవిష్యత్‌లో వైద్యులు, సిబ్బందిపై ఇలాంటి ఘటనలకు పాల్ప డితే రౌడీషీట్‌ ఓపెన్‌ చేసి కేసు నమోదు చేసేలా చర్యలు తీసుకోవాలని అధికారులను ఆదేశించారు.