పెంపుడు కుక్కను ఎత్తుకెళ్లారు!

పెంపుడు కుక్కను ఎత్తుకెళ్లారు!

మంథని: ముగ్గురు ముసుగు దొంగలు.. అందులో ఒకరు యువతి.. వీరందరూ కలిసి శనివారం రాత్రి పల్సర్‌ బైక్‌పై బయలు దేరారు. పెద్దపల్లి జిల్లా మంథని మున్సిపల్‌ పరిధిలోని శ్రీరాంనగర్‌లో నివాసం ఉండే నారాయణ ఇంట్లో చోరీకి పాల్పడ్డారు. ఇంతకీ వారు చోరీ చేసింది ఏమిటో తెలుసా..? నారాయణ కుటుంబ సభ్యులు అల్లారు ముద్దుగా పెంచుకుంటున్న హచ్‌రకం పెంపుడు కుక్కను. యువతి తీసుకొచ్చిన చున్నీలో శనకాన్ని దాచిపెట్టుకుని ఎవరి కంటా పడకుండా వచ్చిన దారి వెంటే బైక్‌పై పరారయ్యారు. ఈ దృశ్యాలు రామగిరి మండలం లద్నాపూర్‌ సమీపంలోని సీసీ కెమెరాల్లో రికార్డయ్యాయి. ఇంటి ఎదుట గేటు కాస్త తెరిచి ఉండడం దొంగలు తమ పనికానిచ్చేయడానికి సహకరించిందని, క్షణాల్లో తమ కుక్క మాయమైందని బాధితులు లబోదిబోమంటున్నారు. అంతేకాదు.. కుక్క చోరీకి గురైందనే బాధతో రెండ్రోజులుగా వారు అన్నపానీయాలు కూడా ముట్టుకోవడం లేదు. ఈ విషయంపై బాధితులు సోమవారం స్థానిక పోలీస్‌స్టేషన్‌లో ఫిర్యాదు చేశారు. కుక్కను వెతికే పనిలో పోలీసులు నిమగ్నమయ్యారు.