పోలీసులపై దాడి.. ఆపై పరారీ యత్నం

● నిందితుడి కాలిపైకి తుపాకీతో కాల్పులు

సాక్షి,బళ్లారి: పోలీసులపై దాడి చేసి, తప్పించుకునేందుకు ప్రయత్నించిన నిందితుడిపై పోలీసులు కాల్పులు జరిపారు. గదగ్‌ జిల్లా రోణ తాలూకా కురహట్టి గ్రామ సమీపంలో జరిగిన ఈ ఘటన వివరాలు ఇలా ఉన్నాయి. గత జూన్‌ 28న నగరంలో హెల్త్‌ క్యాంపు నిర్వహిస్తున్న స్థలంలో గంగావతి పోలీసులపై సినిమా ఫక్కీలో పలువురు గుంపుగా చేరి దాడి చేసిన సంగతి విదితమే. ఈ ఘటనలో తమపై దాడి చేసిన నిందితుడిని పోలీసులు అరెస్ట్‌ చేశారు. దొంగతనం కేసులో విచారణకు నిందితుడిని గంగావతి పోలీసులు గదగ్‌కు తీసుకొని వెళ్లేటప్పుడు పోలీసులపై దాడి చేసి తప్పించుకున్నాడు. దాడి చేసిన తర్వాత స్కూటీలో తప్పించుకున్న నిందితుడు అక్కడ నుంచి రైలులో మహారాష్ట్రకు వెళ్లాడు. గంగావతి పోలీసులపై దాడి కేసులో బెటగెరె పోలీసులు నిందితుడుని అరెస్ట్‌ చేశారు. ఈ నేపథ్యంలో పోలీసులు పంచనామా కోసం వెళ్లి, తిరిగి వస్తుండగా, మళ్లీ పోలీసులపై దాడి చేసేందుకు ప్రయత్నించిన నిందితుడు అలీ ఇరాని(27) కాలుపై పోలీసులు కాల్పులు జరిపారు.ఈ ఘటనలో నిందితుడి కాలికి గాయాలు కాగా, గదగ్‌ ఆస్పత్రిలో చికిత్స పొందుతున్నాడు.