చవగ్గా ఫర్నిచర్‌.. రూ.1.73 లక్షలు స్వాహా

మైసూరు: తక్కువ ధరకు ఫర్నిచర్‌ అందిస్తామని ఓ ఉపాధ్యాయిని దంపతుల నుంచి రూ.1.73 లక్షలను దోచుకున్నారు. వివరాలు.. మైసూరు సిద్ధార్థనగర్‌ నివాసి అయిన ఉపాధ్యాయిని గీతా, ఆమె భర్త సమాజ సేవకుడు. ఓ ఐఏఎస్‌ అధికారి బదిలీ అవుతున్నారు. వారి ఇంటిలోని ఫర్నిచర్‌ను తక్కువ ధరకు విక్రయిస్తున్నారనే పోస్టును గీత భర్త ఫేస్‌బుక్‌లో చూసి, ఆ నంబరుకు కాల్‌ చేశాడు. రూ.90 వేలకు ఫర్నిచర్‌ కొనుగోలుకు అంగీకరించారు. డబ్బు పంపగానే వాహనంలో ఫర్నిచర్‌ను పంపిస్తానని నమ్మబలికారు. బాధితుడు భార్య ఖాతా నుంచి రూ.90 వేలు బదలాయించాడు. ఆ సొమ్ము జమ కాలేదు, మరో రూ.83 వేలను చెల్లించాలని, ఆ మొత్తాన్ని తర్వాత వాపసు చేస్తామని వంచకుడు చెప్పగా సరేనని ఆ డబ్బును కూడా పంపించాడు. మోసగాడు మరింత డబ్బు కావాలని డిమాండ్‌ చేయగా గీతా దంపతులకు అనుమానం వచ్చింది. దీంతో అతనిని ప్రశ్నించేందుకు ప్రయత్నించగా ఫోన్‌ స్విచాఫ్‌ అయింది. బాధితులు నజర్‌బాద్‌ పోలీసు స్టేషన్‌లో ఫిర్యాదు చేశారు.