తక్కువ ధర.. ఎక్కువ నాణ్యత!

తక్కువ ధర.. ఎక్కువ నాణ్యత!

ఆన్‌లైన్‌లో ఆర్డర్‌ చేస్తే సరి..

విద్యుత్‌ ఉపకరణాలను ఆన్‌లైన్‌లో బుక్‌ చేసుకుని నేరుగా ఇంటి వద్ద డెలివరీ పొందే అవకాశాన్ని ఈఈఎస్‌ఎల్‌ కల్పించింది. వినియోగదారులు www.tgnpdcl.com వెబ్‌సైట్‌లో లాగిన్‌ అయి ఎనర్జీ ఎఫిషియెన్సీ సర్వీసెస్‌ లిమిటెడ్‌ హోమ్‌ పేజీలోకి వెళ్లి అందుబాటులో ఉన్న, అవసరమైన విద్యుత్‌ ఉపకరణాలను ఆర్డర్‌ చేసి కొనుగోలు చేయవచ్చు. ప్రధాన పట్టణాలు, నగరాల్లోనైతే ఆర్డర్‌ చేసిన 6–7 రోజుల్లో, ఇతర ప్రాంతాల్లో 10–12 రోజుల్లో ఉపకరణాలు ఇంటికి చేరతాయని చెబుతున్నారు.

ఖమ్మంవ్యవసాయం: నాణ్యమైన విద్యుత్‌ ఉపకరణాలను సరసమైన ధరలకు వినియోగదారులకు అందించేందుకు కేంద్ర, రాష్ట్ర ప్రభుత్వాలు ముందుకొచ్చాయి. మార్కెట్‌లో రకరకాల కంపెనీల ఉత్పత్తులు అందుబాటులో ఉన్నా నాణ్యత, తక్కువ విద్యుత్‌ వినియోగించుకునే వాటిపై అవగాహన లేక వినియోగదారులు ఎటూ తేల్చుకోలేకపోతున్నారు. దీంతో అందరికీ అందుబాటు ధరల్లో నాణ్యమైన పరికరాలను అందించే లక్ష్యంతో ప్రభుత్వ సంస్థలు ముందుకొచ్చాయి. కేంద్ర విద్యుత్‌ మంత్రిత్వ శాఖ అనుబంధంగా నిర్వహిస్తున్న ఎనర్జీ ఎఫిషియెన్సీ సర్వీసెస్‌ లిమిటెడ్‌(ఈఈఎస్‌ఎల్‌) సంస్థ పలు రకాల విద్యుత్‌ ఉపకరణాలను విక్రయిస్తుండగా ఇవి నాణ్యమైనవే కాక విద్యుత్‌ బిల్లుల్లో ఆదా అవుతుందని సంస్థలు స్పష్టం చేస్తున్నాయి.

ఎన్పీడీసీఎల్‌

భాగస్వామ్యంతో..

ఎనర్జీ ఎఫిషియెన్సీ సర్వీసెస్‌ లిమిటెడ్‌ అందుబాటులోకి తీసుకొచ్చిన విద్యుత్‌ ఉపకరణాల నాణ్యత, ధరలనే కాక వినియోదారులకు బిల్లుల్లో ఆదా అవుతుండడాన్ని ఎన్పీడీసీఎల్‌(నార్తర్న్‌ పవర్‌ డిస్ట్రిబ్యూషన్‌ కంపెనీ లిమిటెడ్‌(ఎన్పీడీసీఎల్‌) గుర్తించింది. పేద, మధ్య తరగతి వర్గాల ప్రజలకు ఈ ఉపకరణాలు మేలు చేసేవిగా ఉండడంతో ప్రోత్సహించడం కేంద్ర విద్యుత్‌ శాఖ అనుబంధ సంస్థ అయిన ఈఈఎస్‌ఎల్‌తో ఎన్పీడీసీఎల్‌ భాగస్వామ్యమైంది. రెండు సంస్థల ఆధ్వర్యాన విద్యుత్‌ ఉపకరణాలను విక్రయించేందుకు నిర్ణయించి ఒప్పందం కుదుర్చుకున్నాయి.

ఎన్పీడీసీఎల్‌ సైట్‌లో విద్యుత్‌ ఉపకరణాల కొనుగోలుకు అవకాశం

ఈఈఎస్‌ఎల్‌ ద్వారా బుకింగ్‌, ఇంటి వద్దే డెలివరీ

కేంద్ర, రాష్ట్ర సంస్థల భాగస్వామ్యంతో విక్రయాలు

అందుబాటులో బల్బులు, ట్యూబ్‌లైట్లు, ఫ్యాన్లు, స్టౌలు, ఏసీలు

విద్యుత్‌ ఉపకరణాల ధరలు (రూ.ల్లో)

ఉపకరణం ఎంఆర్‌పీ ప్రభుత్వ ధర

ఎల్‌ఈడీ బల్బ్‌ 9 వాట్స్‌ (3 స్టార్‌) 150 75

ఎల్‌ఈడీ బల్బ్‌ 6 వాట్స్‌ (5 స్టార్‌) 149 85

ఎమర్జెన్సీ ఎల్‌ఈడీ 10 వాట్స్‌ 649 459

ట్యూబ్‌లైట్‌ 20 వాట్స్‌ 349 199

సీలింగ్‌ ఫ్యాన్‌ (5 స్టార్‌) 4,100 2,699

ఎలక్ట్రికల్‌ స్టౌ 12 వాట్స్‌ 2,999 1,900

ఏసీ 1 టన్‌ (5 స్టార్‌) 55,000 36,500

ఏసీ 1.5 టన్‌ (5 స్టార్‌) 71,000 48,150