ఫిర్యాదుకు తావు లేకుండా ఓటర్ల జాబితా

ఫిర్యాదుకు తావు లేకుండా ఓటర్ల జాబితా

బీఎల్వోలకు కలెక్టర్‌ బాలాజీ ఆదేశం

చల్లపల్లి(అవనిగడ్డ): ఫిర్యాదులకు తావు లేకుండా ఫొటో ఓటర్ల జాబితాను తయారు చేయాలని జిల్లా ఎన్నికల అధికారి, కలెక్టర్‌ డీకే బాలాజీ బీఎల్వోలను ఆదేశించారు. భారత ఎన్నికల సంఘం ఆదేశాల మేరకు చల్లపల్లి ఎస్‌ఆర్‌వైఎస్‌పీ జూనియర్‌ కళాశాలలో ఏర్పాటు చేసిన పోలింగ్‌ కేంద్రాలను శనివారం ఆయన పరిశీలించారు. ఈ సందర్భంగా ఓటర్ల జాబితాలో కొత్త ఓటర్ల నమోదు, చేర్పులు, మార్పులపై దరఖాస్తులు స్వీకరించే ప్రక్రియను ఆయన పరిశీలించారు. బూత్‌స్థాయి అధికారుల వివరాలను అడిగి తెలుసుకున్నారు. ముసాయిదా ఓటర్ల జాబితా ప్రచురించాక ఓటర్ల జాబితా అందాక 6,7,8 దరఖాస్తు ఫారంలు ఏమైనా వచ్చాయా అని అడిగి తెలుసుకున్నారు. చాలామంది ఓటర్లు ఎక్కువగా ఆన్‌లైన్‌లోనే దరఖాస్తు చేస్తున్నారని బీఎల్వోలు కలెక్టర్‌కు వివరించారు.

సామూహిక టాయ్‌లెట్స్‌ పరిశీలన

ఈ సందర్భంగా స్వచ్ఛసుందర చల్లపల్లి ఆధ్వర్యంలో నిర్మించిన పబ్లిక్‌ టాయ్‌లెట్స్‌ని కలెక్టర్‌ బాలాజీ పరిశీలించారు. టాయ్‌లెట్స్‌ చాలా పరిశుభ్రంగా ఉన్నాయని ప్రశంసించారు. కార్యక్రమంలో చల్లపల్లి ఇన్‌చార్జి తహసీల్దార్‌ శ్రీలత, బీఎల్‌వోలు గోపాలకృష్ణ, రాజేంద్రప్రసాద్‌, ఆంజనేయులు, ఆర్‌ఐ కృష్ణమోహన్‌ పాల్గొన్నారు.