కార్లు ఢీకొని ఇద్దరి దుర్మరణం

కార్లు ఢీకొని ఇద్దరి దుర్మరణం

● అరుణాచలం వెళ్లి వస్తూ

రిటైర్డ్‌ ఎస్‌ఐ మృత్యువాత

● మరో ఇద్దరికి గాయాలు

శిరివెళ్ల: ఆళ్లగడ్డ–నంద్యాల జాతీయ రహదారిపై గోవిందపల్లె వేబ్రిడ్జి వద్ద ఆదివారం రెండు కార్లు ఢీకొన్న ప్రమాదంలో ఇద్దరు మృతి చెండగా మరో ఇద్దరికి తీవ్ర గాయాలయ్యాయి. వివరాలు.. కర్నూలులోని సంతోషనగర్‌కు చెందిన సిగరం చంద్రశేఖర్‌ (67) అతని భార్య ఈశ్వరమ్మ, కుమారుడు రవికుమార్‌ కలిసి అరుణాచలం వెళ్లేందుకు ఈ నెల 22న కారులో బయలుదేరారు. అక్కడ స్వామివారి దర్శనం ఆదివారం ఉదయం తిరుగుపయనమయ్యారు. అలాగే నంద్యాలలోని నడిగడ్డకు చెందిన యువకుడు శిరివెళ్లలోని తన అవ్వను చూడడానికి కారులో వెళుతున్నాడు. గోవిందపల్లె వద్దకు రాగానే కారు టైర్‌ పంక్చర్‌ కావడంతో అదుపుతప్పి కర్నూలు వైపు వెళ్తున్న రిటైర్డ్‌ ఎస్‌ఐ కారుపై దూసుకెళ్లింది. కారు డ్రైవింగ్‌ చేస్తున్న రిటైర్డ్‌ ఎస్‌ఐ చంద్రశేఖర్‌, మరో కారును నడుపుతున్న నంద్యాలకు చెందిన షేక్‌ ఖాదర్‌బాషా (22) అక్కడికక్కడే మృతి చెందాడు. ఏఎస్‌ఐ భార్య ఈశ్వరమ్మ, కుమారుడు రవికుమార్‌కు తీవ్రగాయాలయ్యాయి. వారిని చికిత్స నిమిత్తం నంద్యాల ప్రభుత్వాస్పత్రికి తరలించారు. మహిళ పరిస్థితి విషమించడంతో నంద్యాలలోని ఓ ప్రైవేటు ఆస్పత్రికి తీసుకెళ్లారు. రిటైర్డ్‌ ఎస్‌ఐ కుమారుడు ఇచ్చిన ఫిర్యాదు మేరకు ఎస్‌ఐ చిన్న పీరయ్య కేసు నమోదు చేసుకొని విచారణ చేస్తున్నారు. మృతదేహాలను పోస్టుమార్టం నిమిత్తం నంద్యాల ప్రభుత్వాస్పత్రికి తరలించారు. మృతుడు ఖదర్‌బాషా పేపర్‌ ప్లేట్ల తయారీ పరిశ్రమ నిర్వహిస్తున్నారు. రోడ్డు ప్రమాదం ఇరు కుటుంబాలలో విషాదం మిగిల్చింది.

1/1

కార్లు ఢీకొని ఇద్దరి దుర్మరణం