రోడ్డు ప్రమాదంలో యువకుడు మృతి

రోడ్డు ప్రమాదంలో యువకుడు మృతి

ఆలేరు రూరల్‌: రోడ్డు ప్రమాదంలో యువకుడు మృతి చెందిన ఘటన ఆలేరు మండలంలో ఆదివారం రాత్రి 11 గంటల సమయంలో చోటు చేసుకుంది. సోమవారం పోలీసులు, స్థానికులు తెలిపిన వివరాల ప్రకారం.. ఆలేరు పట్టణ కేంద్రానికి చెందిన రాపోలు ప్రకాష్‌ కొడుకు రవితేజ(23) బీపార్మసీ సెకండియర్‌ చదువుతున్నాడు. ఆలేరు మండలం టంగుటూరు శివారులో ఓ రిసార్ట్‌లో తనతోపాటు టెన్త్‌ చదివిన స్నేహితులు గెట్‌ టు గెదర్‌ చేసుకున్నారు. స్నేహితులకు భోజనం తేవడానికి పల్సర్‌ బైక్‌పై కటకం సంజయ్‌తో కలిసి ఆలేరు టౌన్‌లోకి వెళ్లి తిరిగి రిసార్ట్‌కు వస్తున్నారు. టంగుటూరు శివారులోకి రాగానే శారా జీపేట నుంచి ఆలేరుకు వస్తున్న గుర్తు తెలియని వాహనాన్ని తప్పించబోయి బైక్‌ అదుపు తప్పి కింద పడిపోయారు. దీంతో రవితేజ తలకు తీవ్ర గాయమై అక్కడికక్కడే మృతి చెందాడు. కటకం సంజయ్‌కు స్వల్ప గాయాలయ్యాయి. మృతుడి తండ్రి ప్రకాష్‌ ఫిర్యాదు మేరకు కేసు నమోదు చేసి దర్యాప్తు జరుపుతున్నట్లు ఎస్‌ఐ రజినీకర్‌ తెలిపారు.

అర్వపల్లి శివారులో భార్యాభర్తలకు గాయాలు

అర్వపల్లి: రోడ్డు ప్రమాదంలో భార్యాభర్తలు తీవ్రంగా గాయపడ్డారు. ఈ ఘటన ఆదివారం రాత్రి జాజిరెడ్డిగూడెం మండలం అర్వపల్లి శివారులో చోటుచేసుకుంది. వివరాల ప్రకారం.. జాజిరెడ్డిగూడెం మండలం తిమ్మాపురం గ్రామానికి చెందిన బూర్గుల రాంబాబు, ఆయన భార్య రజిత ఆదివారం రాత్రి అర్వపల్లి నుంచి స్వగ్రామానికి బైక్‌పై వెళ్తున్నారు. ఈ క్రమంలో వెనక నుంచి వచ్చిన గుర్తు తెలియని వాహనం ఢీకొట్టింది. రాంబాబు, రజిత తీవ్రంగా గాయపడ్డారు. వీరిని 108 అంబులెన్స్‌లో సూర్యాపేటలోని జనరల్‌ ఆసుపత్రికి తరలించారు.

ఇసుక ట్రాక్టర్‌ పట్టివేత

వేములపల్లి : ఇసుక అక్రమ రవాణా చేస్తుండగా ఓ ట్రాక్టర్‌ను పట్టుకుని కేసు నమోదు చేసినట్లు వేములపల్లి ఎస్‌ఐ వెంకటేశ్వర్లు తెలిపారు. ఆయన తెలిపిన వివరాల ప్రకారం.. వేములపల్లి మండలం రావులపెంటకు చెందిన జంగిలి శంకర్‌ తన ట్రాక్టర్‌ ద్వారా అనుమతులు లేకుండా సోమవారం ఇసుకను తరలిస్తుండగా గ్రామ శివారులో పట్టుకున్నామన్నారు. ట్రాక్టర్‌ను స్టేషన్‌కు తరలించి యజమానితోపాటు ట్రాక్టర్‌పై కేసు నమోదు చేశామని పేర్కొన్నారు.