నేత్రపర్వంగా త్రికోటేశ్వరునికి రుద్రాభిషేకం

నేత్రపర్వంగా త్రికోటేశ్వరునికి రుద్రాభిషేకం

నరసరావుపేట రూరల్‌: పవిత్ర కార్తిక సోమవారం పర్వదినాన కోటప్పకొండ శ్రీ త్రికోటేశ్వరస్వామికి మహాన్యాస పూర్వక రుద్రాభిషేకాలు వైభవంగా నిర్వహించారు. పంచామృతాలు, విశేష ద్రవ్యాలతో త్రికోటేశ్వరునికి అభిషేకాలు నేత్రపర్వంగా జరిగాయి. అనంతరం స్వామివారికి విశేష పుష్పాలంకరణ సేవ జరిపారు. భక్తులు పెద్దఎత్తున స్వామివారిని దర్శించుకుని తీర్ధప్రసాదాలు స్వీకరించారు. ఉచిత, శీఘ్ర, ప్రత్యేక దర్శనంతో పాటు అభిషేక దర్శనాన్ని భక్తులకు కల్పించారు. అభిషేక మండపంలో నిర్వహించిన ప్రత్యేక అభిషేకాల్లో భక్తులు అధిక సంఖ్యలో పాల్గొన్నారు. రావిచెట్టు, నందీశ్వరుడి వద్ద మహిళలు కార్తీక దీపాలు వెలిగించారు. ఆలయ ఈవో డి.చంద్రశేఖరరావు ఏర్పాట్లు పర్యవేక్షించారు. నరసరావుపేట, చిలకలూరిపేట నుంచి ఏపీఎస్‌ఆర్టీసీ ప్రత్యేక బస్సులను నడిపింది. ద్విచక్రవాహనాలు, కార్లలో భక్తులు స్వామి వారి దర్శనానికి రావడంతో పార్కింగ్‌ స్థలంలో వాహనాల రద్దీ నెలకొంది. ఘాట్‌రోడ్డు మార్గంలోని ప్రకృతి పర్యావరణ కేంద్రం వద్ద యాత్రికుల సందడి నెలకొంది. రూరల్‌ సీఐ పి.రామకృష్ణ, ఎస్‌ఐ కిశోర్‌ ఆధ్వర్యంలో పోలీసులు బందోబస్తు నిర్వహించారు.

1/1

నేత్రపర్వంగా త్రికోటేశ్వరునికి రుద్రాభిషేకం