రామతీర్థంలో భక్తిశ్రద్ధలతో సహస్ర దీపాలంకరణ

రామతీర్థంలో భక్తిశ్రద్ధలతో సహస్ర దీపాలంకరణ

నెల్లిమర్ల రూరల్‌: ప్రసిద్ధ పుణ్యక్షేత్రం రామతీర్థం శ్రీ సీతారామస్వామివారి దేవస్థానంలో స్వామివారికి సహస్ర దీపాలంకరణ సేవ శుక్రవారం కనుల పండువగా సాగింది. కార్తీక శుక్రవారం సందర్భంగా సాయంత్రం స్వామివారి ఆస్థాన కల్యాణ మండపంలో భక్తులు అత్యంత భక్తిశ్రద్ధలతో దీపాలను వెలిగించారు. ఆలయ అర్చకులు ముందుగా స్వామివారిని సుందరంగా అలంకరించి ప్రత్యేక పూజలను చేపట్టారు. అనంతరం వేద మంత్రోచ్ఛారణ నడుమ కల్యాణ మండపంలో ఉన్న ప్రత్యేక ఊయల్లో స్వామివారిని వేచింపజేసి ఊంజల్‌ సేవను అత్యంత వైభవంగా జరిపించారు. భక్తులే స్వయంగా స్వామివారికి దీపాలంకరణ సేవ చేసే భాగ్యం కలగడంతో చుట్టు పక్కల గ్రామాలకు చెందిన మహిళలు అధిక సంఖ్యలో తరలివచ్చి భక్తి శ్రద్ధలతో సహస్ర దీపాలను వెలిగించారు. అనంతరం అర్చకస్వాములు భక్తులకు తీర్థ ప్రసాదాలను అందజేశారు. కార్యక్రమంలో దేవస్థాన సిబ్బందితో పాటు అధిక సంఖ్యలో భక్తులు పాల్గొన్నారు.