ప్రాణాలు పోతున్నా.. పట్టదా?

ప్రాణాలు పోతున్నా.. పట్టదా?

తాడిపత్రి టౌన్‌: ప్రమాదమని తెలిసినా.. పరిమితికి మించి ప్రయాణికులను చేరవేయడంలో వాహనదారులు పోటీ పడుతూనే ఉన్నారు. శింగనమల నియోజకవర్గం గార్లదిన్నె వద్ద జాతీయ రహదారిపై శనివారం సాయంత్రం ఆటోను ఆర్టీసీ బస్సు ఢీకొన్న ఘటనలో ఎనిమిది మంది మృతి చెందిన విషయం తెలిసిందే. ఈ క్రమంలో తాడిపత్రి పోలీసులు అప్రమత్తమై ఆదివారం సాయంత్రం యల్లనూరు రోడ్డు సర్కిల్‌లో వాహన తనిఖీలు చేపట్టారు. ఆ సమయంలో అటుగా పరిమితికి ప్రయాణికులను తరలిస్తున్న రెండు ఆటోలు, రెండు బొలెరోలను సీజ్‌ చేశారు. కేసు నమోదు చేసి వాహనాలను ఆర్టీఓకు అప్పగించారు. పరిమితికి మించి వాహన ప్రయాణం చేస్తే ప్రమాదం జరిగే అవకాశం ఉందని ప్రయాణికులను పోలీసులు హెచ్చరించారు.