రోడ్డు ప్రమాదంలో వ్యక్తి మృతి

ఇచ్ఛాపురం: పురపాలక సంఘం పరిధిలో ఆదివారం సాయంత్రం జరిగిన రోడ్డు ప్రమాదంలో ఉయ్యాల వంశీకృష్ణ(24) మృతి చెందగా.. అతని బావ కృష్ణ తీవ్రంగా గాయపడ్డారు. స్థానికులు తెలిపిన వివరాల మేరకు.. పట్టణంలోని బలరాంపేటకు చెందిన వంశీకృష్ణ పట్టణంలోని ఊర్వసి రెడీమేడ్‌ సెంటర్‌లో పనిచేస్తున్నాడు. ఆదివారం కావడంతో వంశీ బరంపురం వెళ్లి అతని బావ కృష్ణను కలిశాడు. అక్కడి నుంచి ఇద్దరూ స్కూటీపై ఇచ్ఛాపు రం బయల్దేరారు. ఈ క్రమంలో పట్టణంలోని పాత జాతీయ రహదారిపై గల కార్‌ గ్యారేజ్‌ సమీపంలో ఓ కంటైనర్‌ లారీ వీరి బండిని ఢీకొట్టింది. ఘటనలో ఇద్దరూ తీవ్రంగా గాయపడ్డారు. స్థానికులు 108 సాయంతో వీరిని స్థానిక సీహెచ్‌సీకి తరలించారు. అక్కడ చికిత్స పొందుతూ బావమరిది వంశీ మృతి చెందగా కృష్ణ పరిస్థితి విషమంగా ఉండడంతో ఆయనను బరంపురం తరలించారు. పట్టణ పోలీసులు కేసు నమోదు చేసి దర్యాప్తు చేస్తున్నారు.