కాశీబుగ్గలో దొంగల హల్‌చల్‌ ●

● 10 తులాల బంగారం,

రూ.1.50 లక్షల నగదు మాయం

కాశీబుగ్గ: పలాస–కాశీబుగ్గ మున్సిపాలిటీ పరిధిలో గురువారం దొంగలు రెచ్చిపోయారు. తాళాలు వేసిన ఇంటిని టార్గెట్‌ చేస్తూ చోరీకి తెగబడ్డారు. కాశీబుగ్గ అయ్యప్పస్వామి టెంపుల్‌ వీధిలో పలాస విద్యుత్‌ లైన్‌మెన్‌ తుంగాన ప్రభాకర్‌ ఇంటి తాళాలు పట్టపగలు పగలగొట్టిన దుండగులు లోపలికి చొరబడ్డారు. బీరువా తాళాలు తెరిచి బీరువా సొరుగులోని రూ.1.50 లక్షల నగదు, 10 తులాల బంగారం, 10 తులాల వెండి ఆభరణాలు అపహరించారు. లైన్‌మెన్‌ ప్రభాకర్‌ కుటుంబ సభ్యులతో కలిసి పుణ్యక్షేత్రాలకు వెళ్లినట్లు బంధువులు తెలుపుతున్నారు. ఇంటి తాళాలు పగలగొట్టడాన్ని చూసి వారు షాక్‌ అయ్యారు. తక్షణమే స్థానికుల సహకారంతో కాశీబుగ్గ పోలీసులకు సమాచారం అందించారు. ఘటనా స్థలానికి చేరుకున్న కాశీబుగ్గ పోలీసులు దర్యాప్తు ప్రారంభించారు. కాశీబుగ్గ డీఎస్పీ వెంకటఅప్పారావు, సీఐ మోహనరావు చోరీ జరిగిన ఇంటిని పరిశీలించారు. కేసు నమోదు చేసుకున్న పోలీసులు దర్యాప్తు చేపడుతున్నారు. క్లూస్‌ టీమ్‌ చేరుకుని ఫింగర్‌ ప్రింట్స్‌ సేకరిస్తూ, పరిసర ప్రాంతాల్లో ఉన్నటువంటి సీసీ టీవీ ఫుటేజీలు పరిశీలిస్తున్నారు.