మత్స్యకారుడు మృతి

మత్స్యకారుడు మృతి

గార: మండలంలోని బలరాంపురం గ్రామానికి చెందిన వాసుపల్లి అప్పయ్య (58) వేటకు వెళ్లి మృతి చెందాడు. బుధవారం ఉదయం వేటకు వెళ్లి చీకటిపడుతున్నా ఇంటికి తిరిగి రాలేదు. గురువారం ఉదయం కూడా తిరిగి రాకపోవడంతో చుట్టుపక్కల వెతికారు. చివరకు గ్రామ సమీపంలోని ఉప్పుగెడ్డపై మృతదేహం తేలింది. కుమారుడు అప్పన్న ఫిర్యాదు మేరకు కేసు నమోదు చేసి దర్యాపు చేస్తున్నామని ఎస్‌ఐ జనార్ధన తెలిపారు.

మతిస్థిమితం లేని

వృద్ధుడు మృతి

బూర్జ: మండలంలోని వైకుంఠపురం పంచాయతీ అల్లేపల్లిగూడ గిరిజన గ్రామంలో మతిస్థిమితం లేని వృద్ధుడు శివకోల రమణయ్య (94) బుధవారం రాత్రి మృతి చెందాడు. ఈయన స్వగ్రామం సరుబుజ్జిలి మండలం కొత్తకోట. రెండు రోజుల కిందట కొత్తకోటలోని పెద్ద చెరువు మీదుగా బూర్జ మండలం వైకుంఠపురం వైపు వెళ్లాడు. అదే మండలంలోని అల్లేపల్లిగూడ కొండ దిగువున పొదల్లో పడి మృతి చెందాడు. ఇతని కుమారుడు 8 నెలల కిందట మృతి చెందాడు. కుమార్తెలకు వివాహమైంది. గ్రామంలో ఒక్కడే ఉండేవాడు. ఐదేళ్ల కిందట హిరమండలంలోని ఆర్‌అండ్‌ఆర్‌ కాలనీ పాడలి–దుగ్గుపురం నుంచి కొత్తకోట వలస వచ్చాడు. కుమార్తె కె.ప్రమీళ గురువారం ఇచ్చిన ఫిర్యాదు మేరకు ఎస్సై ఎం.ప్రవళ్ళిక కేసు నమోదు చేసి దర్యాప్తు చేస్తున్నారు.

రైస్‌మిల్లులో చోరీ

ఎల్‌.ఎన్‌.పేట: మండలంలోని ధనుకువాడ రోడ్డులో ఉన్న కల్కి కామాక్షి రైస్‌ మిల్లులో బుధవారం రాత్రి దొంగలు పడ్డారు. ఆఫీసు గది తాళాలు పగలు గొట్టి కంప్యూటర్‌, ఇతర పరికరాలను పట్టుకుపోయారు. మిల్లు యజమాని వూర్ణ సురేష్‌ గురువారం ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సరుబుజ్జిలి ఎస్సై ఎస్‌.బాలరాజు తెలిపారు.

1/1

మత్స్యకారుడు మృతి